"నిజమైన గురువనేవాడు ఎక్కడైనా ఉంటే, ముందుగా తననుంచి నిన్ను విముక్తుణ్ణి చేస్తాడు" - యూజీ

14, సెప్టెంబర్ 2020, సోమవారం

నిత్యానంద జాతకంలో గోచార గ్రహాల పాత్ర - కొన్ని ప్రశ్నలు

గత రెండు పోస్టులు చదివిన తర్వాత నేను నిత్యానందను పూర్తిగా సపోర్ట్ చేస్తున్నానని మీరు అనుకోవచ్చు. ఆ ప్రమాదం మీకు లేకుండా చెయ్యడానికే ఈ పోస్ట్. అదీగాక, గత  పోస్ట్ లో గోచారగ్రహాల పాత్రను నేను చెప్పలేదు. తమ్ముడు తనవాడైనా ధర్మం చెప్పాలి కదా ! 

అందుకని, ఇప్పుడు చదవండి.

ఏలినాటి శని

పుట్టినపుడు ఎవరికైతే శనిచంద్రులు కలసి ఉంటారో వారు ఏలినాటి శని రెండవ ఘట్టంలో పుట్టినట్లు లెక్క. ఆ జాతకానికి శని యోగకారకుడైనా సరే, ఇలాంటి యోగం జాతకంలో ఉన్నపుడు ఆ జాతకుడిని ముప్పుతిప్పలు పెట్టి మూడు చెరువుల నీళ్ళు తాగిస్తాడు. ఇది జాతకుడి జన్మంతా తప్పని ఒక చెడుయోగం. నిత్యానంద జాతకంలో ఈ యోగం ఉన్నట్లు మనం చూడవచ్చు. పైగా ఈ లగ్నానికి శని అర్ధపాపి. చంద్రలగ్నానికి పూర్ణపాపి. కనుక, ఈ యోగం ఒక విధమైన ఆధ్యాత్మికజీవితాన్ని ఇచ్చినప్పటికీ, ఏదో రకమైన వేధింపులు మాత్రం ఇతనికి ఎప్పుడూ ఉంటూనే ఉంటాయి.

పన్నెండేళ్ళ వయసులో 360 డిగ్రీల దృష్టి

అంటే అది 1990 వ సంవత్సరం. ఆ సమయంలో గోచారశని పంచమంలోను, గురువు ద్వాదశంలో ఉచ్చస్థితిలోనూ ఉన్నారు. ఇది ఆధ్యాత్మికంగా అనుభవాలను కలిగించే గోచారమే గనుక ఒక క్షణికమైన అనుభవాన్ని కలిగించి ఉండవచ్చు. కానీ ఒక విషయాన్నీ గుర్తుంచుకోవాలి. ఆధ్యాత్మిక అనుభవాలు ఎల్లకాలం నిలబడి ఉండవు. ఆ కాసేపు ఉంటాయి. తరువాత పోతాయి. అందుకే వాటిని లెక్కపెట్టకూడదని యూజీగారు అనేవారు. జిల్లెళ్ళమూడి అమ్మగారు మహిమలను కొట్టి పారేసేవారు. 

శ్రీ రామకృష్ణులు, వారి భక్తులు కూడా మహిమలను మహత్యాలను లెక్కచెయ్యరు.  వారూ ఇదే అంటారు. అనుభవాలు శాశ్వతం కాదు. అనుభవి శాశ్వతం. ఇంకొక మెట్టు పైకెక్కితే అనుభవి కూడా లేడు. యోగి గమ్యం అది కావాలి గాని ఈ క్షణం ఉండి మరుక్షణం మాయమయ్యే చిన్నచిన్న అనుభవాలకోసం అతడు అర్రులు చాచకూడదు. సాధనామార్గంలో వేలాదిగా అలాంటి అనుభవాలు కలుగుతాయి. కానీ మనం పట్టించుకోకూడదు.

ఒకవేళ ఆ సిద్ధి అలాగే నిలబడి ఉన్నది అనుకుంటే, రంజిత వీడియో సమయంలో తన గదిలో సీక్రెట్ కెమెరా ఉన్నదన్న విషయం 360 డిగ్రీల దృష్టి ఉన్నవాడికి ఎందుకు తెలియలేదు? మూడోకన్ను అప్పుడెందుకు పని చెయ్యలేదు? రంజిత సమక్షంలో అన్ని శక్తులూ నీరుగారిపోయాయా? దీనికి సమాధానం ఉండదు. కనుక ఈ సిద్ధి ఆయనకు శాశ్వతంగా ఉన్నట్టి సిద్ధి కాదని అర్ధం కావడం లేదా?

ఇదే సంఘటనకు సమాంతర సంఘటనలు మిగతా గురువుల జీవితాలలో కూడా జరిగాయి.

ఆరిగాన్ లో తన ఇంటిని, తన గదిని షీలా వైర్ ట్యాపింగ్ చేయించినప్పుడు ఓషో తెలుసుకోలేకపోయాడు. తర్వాత, అమెరికన్ మీడియా ఆయన్ను అడిగింది - 'నువ్వు జ్ఞానివైతే నీ గదిలో జరుగుతున్నది నీకు తెలీలేదా?' అని. దానికి ఓషో ఏవేవో కాకమ్మ కబుర్లు చెప్పాడు. నవ్వుల పాలయ్యాడు.

ఎన్నో శక్తులున్నాయని చెప్పుకునే అరబిందో కూడా ఈ విషయంలో ఫెయిల్ అయ్యాడు. మనకు స్వతంత్రం వచ్చిన రోజున, పాండిచేరి అరబిందో ఆశ్రమాన్ని నాస్తికులు ఎటాక్ చేసారు. అరబిందో వ్యక్తిగత అనుచరుడు ఆ కొట్లాటలో స్పాట్ లో చనిపోయాడు. దీనిని అరబిందో ముందుగా తెలుసుకోలేక పోయాడు. ఆపలేక పోయాడు. దీనికి ఆయన భక్తులు ఇప్పటిదాకా తృప్తికరమైన సమాధానం చెప్పలేకపోతున్నారు.

ఎక్కడో వేల మైళ్ళ దూరంలో ప్రత్యక్షమై ఆపరేషన్లు కూడా చేశాడని ప్రచారం చేయించుకున్న సత్యసాయిబాబా, స్టూడెంట్స్ మర్డర్ నాటి రాత్రి, తన గదిలోకి పారిపోయి లోపలనుంచి గడియ బిగించుకుని దాక్కున్నాడు. పెద్దవయసులో ఆరోగ్యంతో పాటు శక్తులూ తగ్గిపోయాయా?  ఏంటిదంతా?

జరిగే ప్రచారాలేమిటి? జరుగుతున్న వాస్తవాలేమిటి? ఎక్కడైనా పొంతన ఉందా అసలు? పిచ్చిలోకం పిచ్చి గోల?

కనుక, ప్రతి సాధకుడికీ, గురువుకూ,  కొద్దో గొప్పో శక్తులు ఉంటాయి. కానీ ప్రచారం మాత్రం గోరంతలు కొండంతలు చేసుకుంటారు. ఇది తప్పు. ఇక్కడే ప్రతి గురువూ అతని శిష్యులూ  తప్పు చేస్తున్నారు. శిష్యుల అతిప్రచారం వల్లనే గురువులు పతనం అవుతారు. ఉన్నవీ లేనివీ ప్రచారాలు చేసి జనాన్ని మోసం చేస్తే, సమయం వచ్చినపుడు శనిభగవానుడి చేతిలో శిక్ష తప్పదు. అందుకే, గొప్పలు ఎచ్చులు పనికిరావు.

14 ఏళ్ళ వయసులో పరమశివానుభవం

అప్పుడు 1992 వ సంవత్సరం. ఆ సమయంలో గోచార శని వక్రస్థితిలో మకరంలో ఉన్నాడు. ఇది గోచారానికి షష్ఠమస్థితి, మంచిదే. పోనీ, వక్రత్వం వల్ల పంచమం లోకి వచ్చాడని అనుకుంటే ఒక ఆధ్యాత్మిక అనుభవం కలిగే అవకాశం ఉన్నది. కానీ గురువు ద్వితీయంలో కన్యలో ఉన్నాడు. కనుక ఏ విధమైన అనుభవమూ కలిగే అవకాశం లేదు. కనుక ఈ సంఘటన జరగడానికి సూచన లేదు.

1995 - 1996

సప్తమ శని, తృతీయ గురువు. ఆ సమయంలో మద్రాస్, బేలూర్ మఠాలలో బ్రహ్మచారిగా ఉన్నాడు. గురువు నవమాన్ని చూస్తూ ఒక నిజమైన ఆధ్యాత్మికసంస్థలో ప్రవేశాన్నిచ్చాడు. కానీ 1996 లో బేలూర్ మఠాన్ని వదిలేసి, హిమాలయాలకు పయనం సాగించాడు. దానికి కారణం అప్పుడే మొదలైన అష్టమశని ప్రభావం.  గురువు కూడా పంచమంలో ధనుస్సులోకి వచ్చాడు. కనుక మంత్రతంత్రాల పైకి శక్తుల పైకి మనస్సు మళ్ళింది. అందుకే, శుద్ధమైన ఆధ్యాత్మికమార్గాన్ని ప్రబోధించే రామకృష్ణమఠంలో ఇమడలేక బయటకు వచ్చాడు. సిద్ధులు శక్తుల కోసం ప్రయత్నాలు చేశాడు.

2000 సంవత్సరం ప్రాంతంలో తన తిరుగుడును ఆపి తమిళనాడులో స్థిరపడ్డాడు. అప్పటికి శని గురువులు వృషభంలో కలిశారు. అది ఈయనకు వృత్తి స్థానమైన దశమం అయింది. కనుక తన ఆశ్రమాలు, ప్రచారాలు, శిష్యులను పోగేసుకోవడం మొదలు పెట్టాడు.

ఏలినాటి శని మళ్ళీ మొదలు

2004 లో ఇతనికి మళ్ళీ ఏలినాటి శని మొదలైంది. ఇక అక్కడనుంచి ఇతనికి చెడుకాలం మొదలైంది. సినిమా యాక్టర్లు అమ్మాయిలూ చుట్టూ చేరడం మొదలు పెట్టారు. 2006 మధ్యవరకూ ఏలినాటి శని మొదటి ఘట్టం జరిగింది. తరువాత 2009 వరకూ రెండవ ఘట్టం జరిగింది. ఆ సమయంలోనే, అంటే 2008 డిసెంబర్ లోనే ఇతని జన్మనక్షత్రం అయిన ఉత్తర మీదకు శనిసంచారం జరిగింది. తరువాత కొంతకాలం వక్రించి మళ్ళీ ఆగస్ట్ 2009 లో పూర్తిగా ఆ నక్షత్రం మీదకు శని వచ్చాడు.  అక్కడనుంచీ ఇతని పతనం ప్రారంభమైనది.

ఏ మనిషికైనా ఇది జరుగుతుంది. మీరు కావాలంటే మీమీ జాతకాలలో పరిశీలించి చూసుకొండి. మీ జన్మనక్షత్రం మీదకు గాని, అనుజన్మ నక్షత్రాలమీదకు గాని శనిసంచారం జరిగినప్పుడు మీరు నానాబాధలు పడి ఉంటారు. దీనిని ఎవరూ తప్పుకోలేరు. ఇతనిది ఉత్తరానక్షత్రం. కరెక్ట్ గా ఉత్తరానక్షత్రం మీద  శని సంచరిస్తున్నపుడే రంజిత ఉదంతం జరిగింది. అక్కడనుంచి ఇతని జీవితం కష్టాలపాలు కావడం మొదలైంది. నాటకాలాడితే ఎవరైనా క్షమిస్తారేమో గాని శని భగవానుడు మాత్రం క్షమించడు.

2012, 2013 లలో శని తులారాశిలో ఇతని తృతీయంలో ఉచ్చస్థితిలో సంచారం సాగించాడు. అందుకే అన్ని బిరుదులు పదవులు వరించాయి. శని భగవానుడు ఇంతే, ఇచ్చేటప్పుడు గొప్పగా ఇస్తాడు. కోసేటపుడు దయాదాక్షిణ్యం లేకుండా కోసేస్తాడు.

ఎవరి జీవితమైనా సరే, గ్రహప్రభావం ప్రకారం ఖచ్చితంగా జరుగుతుంది. గీచిన గీత దాటదు. అర్ధం చేసుకుంటే అంతా అర్ధమౌతుంది.

ఆ తరువాత 2014 లో మొదలైన అర్దాష్టమశని అనేక వక్రత్వాల వల్ల 2017 ఫిబ్రవరి వరకూ సాగింది. ఇది ఇతనిని నానా బాధలూ పెట్టింది. కోర్టు కేసులు వెంటాడాయి. మీడియా వెంటాడింది. సమాజం ఛీ కొట్టింది. ఇదంతా మళ్ళీ శని ప్రభావమే.

ఆ తరువాత 2019 వరకూ ధనుస్సులో పంచమంలో శని సంచరించాడు. పంచమం బుద్ధిస్థానం. అప్పుడు ఇతని మనస్సు బాగా క్రుంగిపోయింది. ఏం చెయ్యాలో తోచలేదు. ఎటు చూచినా అన్నీ సమస్యలు అడ్డంకులు కనిపిస్తున్నాయి. నిస్సహాయ స్థితిలో పడ్డాడు.

2020 ప్రారంభ్డంలో శని మకరరాశిలోకి షష్ఠరాశిలోకి ప్రవేశించాడు. గోచారశని 3, 6, 11 లలో ఉన్నప్పుడు మంచి చేస్తాడు. కనుక 2022 వరకూ ఇతనికి మంచిసమయం జరుగుతున్నది. అందుకే ఇండియా నుంచి పారిపోయి ఎక్కడో తన ద్వీపంలో తానున్నాడు. రాజ్యం ఏలుతున్నాడు.

2022 ఏప్రిల్ నుంచీ ఇతనికి కష్టాలు మళ్ళీ మొదలౌతాయి. ఎందుకంటే అప్పుడు గోచారశని ఇతనికి సప్తమంలోకి వస్తాడు. మళ్ళీ వేధింపులు మొదలౌతాయి. ఇప్పుడు తానున్న చోటనుండి మళ్ళీ ఇంకొక చోటకు పోవలసి రావచ్చు. లేదా అరెస్ట్ కావచ్చు.

2025 లో శని మీనరాశిలో, ఇతనికి అష్టమం లోకి రావడం తోనే, ఇతని పరిస్థితి మళ్ళీ గందరగోళంలో పడుతుంది. ఆ పైన మూడేళ్ళు ఇతనికి చాలా కష్టకాలమే. మళ్ళీ నానా బాధలు పడతాడు.

ఈ విధంగా గోచారశని ఇతనిని ఎన్ని బాధలు పెట్టాడో మనం చూడవచ్చు. ఈ బాధలు తప్పాలంటే ఈ క్రింది సూచనలను ఇతను పాటించాలి.

1 . తను అవతార పురుషుడనని గప్పాలు కొట్టడం మానుకోవాలి. ఇది నిజం కాదు.

2 . తనకు లేని శక్తులు ఉన్నట్టు చెప్పుకోవడం మానుకోవాలి. ఉన్నవి ఉన్నట్టు చెప్పాలి, నిజాలు మాట్లాడాలి.

3 . అమ్మాయిల నుంచి దూరం ఉండాలి. లేదంటే వాళ్ళవల్లనే చివరకు ఈ సంస్థ మూతబడే ప్రమాదం ఉన్నది. పెద్దపెద్ద సంస్థలన్నీ 'డబ్బు - అమ్మాయిలు' ఈ రెంటివల్లనే దెబ్బ తిన్నాయన్న విషయం మరచిపోకూడదు.

4. అపవాదులు ఎక్కడ వచ్చే అవకాశం ఉన్నదో అక్కడ జాగ్రత్తపడాలి. జనం లోకి ఎక్కువగా చొచ్చుకుపోవడం మానుకోవాలి. లోకులతో ఎక్కువగా పెట్టుకుంటే పతనమే అన్న విషయం గ్రహించాలి. లోకాన్ని లోకులను ఏకమొత్తంగా ఎవ్వరూ ఉద్ధరించలేరన్న విషయం తెలుసుకోవాలి. ఈ పని అవతారపురుషుల వల్లనే కాలేదు. ఇక మామూలు సాధకుల వల్ల, స్వాముల వల్ల ఏమౌతుంది?

5. సాధనాశక్తి తగ్గకుండా చూసుకోవాలి. డబ్బు, పేరు ప్రతిష్టలు, అమ్మాయిలు, బంగారం ఇవన్నీ చుట్టూ చేరితే సాధన భ్రష్టు పడుతుంది. అది పోతే అన్నీ పోతాయి. కనుక ఈ విషయంలో ముఖ్యంగా ఇతను చాలా జాగ్రత్తగా ఉండాలి.

ఈ సూచనలు పాటిస్తే, ఈ తరానికి ఇతను ఒక గొప్ప హిందూగురువు అవుతాడు. జేజేలు అందుకుంటాడు, లేకుంటే పతనం తప్పదు.

తస్మాత్ జాగ్రత తమ్ముడూ !
read more " నిత్యానంద జాతకంలో గోచార గ్రహాల పాత్ర - కొన్ని ప్రశ్నలు "

13, సెప్టెంబర్ 2020, ఆదివారం

చిన్నతమ్ముడు నిత్యానంద జాతకం - విశ్లేషణ

నిత్యానంద జననతేదీ కోసం వెదికితే,  ఇంటర్ నెట్ లో మనకు రెండు తేదీలు లభిస్తున్నాయి. ఒకటి 19-3-1977, మరొకటి 1-1-1978. మొదటిది తన పాస్ పోర్ట్ లో ఇచ్చుకున్నది. రెండవది హైకోర్టులో సమర్పించినది. కనుక ఉన్నంతలో రెండవదే సరియైనదని నేను భావిస్తున్నాను. ఎందుకంటే వ్రాతపూర్వకంగా కోర్టుకు అబద్ధం చెప్పలేడు గనుక.

ఇకపోతే, జననసమయం గురించి వెదికితే అర్ధరాత్రి 00.32 అని ఒక సమయం దొరికింది. ఇదెంతవరకు నిజమో తెలియదు. ఇతని అఫిషియల్ వెబ్ సైట్లో మాత్రం ఏమీ లేదు. కారణాలేమిటో తెలియదు గాని, ప్రముఖులు తమ అసలైన జననతేదీలను సమయాలను సామాన్యంగా  బయటపెట్టరు. కానీ ప్రస్తుతానికి ఇదే దొరికింది. సరియైనది దొరికేవరకూ ఇది సరిపోతుందో లేదో చూద్దాం.

అనుమాననివృత్తి కోసం ప్రశ్నశాస్త్ర సహాయం తీసుకుందాం. 

ప్రశ్నసమయం : ఈరోజు ఉదయం 10.10 గంటలు

ప్రదేశం : హైదరాబాద్

లగ్నం తుల అవుతూ స్వక్షేత్రంలో ఉన్న కుజునితో చూడబడుతున్నది. లగ్నాధిపతి దశమకేంద్రంలో ఉన్నాడు. దశమాదిపతి చంద్రుడు లగ్నాన్ని చూస్తున్నాడు. కనుక ఈ సమయం సరియైనదే అన్న సూచన ఉన్నది.

ఈయన పుట్టింది తిరువన్నామలై లో. అది మాత్రం సరిగానే దొరుకుతోంది. ఇప్పుడీయన జాతకాన్ని చూద్దాం.

నా విధానంలో ఈ సమయాన్ని సంస్కరించగా అర్ధరాత్రి ౦౦.24 నిముషాలు అవుతోంది. అదంతా ఎలా చెయ్యాలి? అన్న విషయం నన్నడక్కండి. పాత పోస్టులలో చాలా జాతకాలకు జననకాల సంస్కరణ చేశాను కావాలంటే అవి చూసుకోండి.

ఇది ఇతని జాతకమేనా కాదా తెలియాలంటే ముందుగా కొన్ని కొన్ని పరీక్షలు చెయ్యాలి.

జాతక పరీక్ష

ఇద్దరు సంతానంలో ఇతను చిన్నవాడు. 11 లో కుజుని వల్ల ఇది సరిపోతున్నది. మెకానికల్ ఇంజనీరింగ్ లో డిప్లమో చేశాడు. వక్రత్వం వల్ల మిధునంలోకి వచ్చిన కుజుడు చతుర్దంలో ఉన్న రవి శుక్రులను చూస్తున్నాడు కనుక ఇంజనీరింగ్ విద్యనూ ఇస్తాడు. సరిపోయింది. లగ్న సప్తమాలలో ఉన్న రాహుకేతువుల వల్ల వివాహజీవితం భగ్నం అయింది. ఇదీ సరిపోయింది. కనుక జాతకం సరిపోతున్నట్లే కనిపిస్తున్నది. ఇక ముందుకెళదాం.

జాతక పరిశీలన

లగ్నరాహువు సూచిస్తున్న ఉచ్చబుధుని వల్ల ఇతను చాలా తెలివైనవాడని తెలుస్తున్నది. పైన చెప్పినట్లుగా లగ్న సప్తమాలను అందులోనూ కన్యా మీనరాశులను రాహుకేతువుల ఇరుసు పాడు చేసినందువల్ల ఇతనికి వివాహజీవితం చెడిపోయింది. ఇంజనీరింగ్ లో డిప్లొమా ఎలా వచ్చిందో పైన వివరించాను. తృతీయ వక్రబుధుని వల్ల మంచి మాటకారని అవసరమైతే అబద్దాలు బాగా చెబుతాడని సూచన ఉన్నది. కుజబుధ గురుశనుల వక్రత్వం వల్ల జీవితం అనేక ఒడుదుడుకులకు ఎత్తుపల్లాలకు లోనౌతుందని  పూర్వకర్మ చాలా బలంగా ఉన్నదని తెలుస్తున్నది.

ఆధ్యాత్మిక యోగమైన శనిచంద్రుల కలయిక ఈ జాతకంలోనూ ఉండటాన్ని చూడవచ్చు. ఇది ఆధ్యాత్మిక యోగమే. అయితే, శని వక్రత్వం వల్ల, ఈ యోగం పరిపూర్ణమైన సిద్ధికి సూచిక కాదు. కనుక ఈయన చెప్పుకుంటున్నట్లుగా ఈయన ఒక అవతారం కానే కాదు. ఒక అవతార పురుషునికి ఉండవలసిన యోగాలు ఈ జాతకంలో లేవు. శని వక్రత్వమనేది లోకంతో, లోకులతో ఉన్న బలమైన కర్మను సూచిస్తుంది.

ఇది ఒక తాంత్రికయోగి  జాతకం మాత్రమే గాని అవతార పురుషుని జాతకం ఎంతమాత్రం కాదు. బ్రతికి ఉన్నపుడు అవతార పురుషుని ఎవరూ గుర్తించలేరు. అది సాధ్యం కాదు. లోకం తమను గుర్తిస్తున్నదని గమనించిన వెంటనే వాళ్ళు లోకాన్ని విడచి వెళ్ళిపోతారు. ప్రచారాలు చేసుకుంటూ గౌరవాలు పొందేవాళ్ళు యోగులు సిద్ధులు అయితే కావచ్చేమో గాని అవతారపురుషులు మాత్రం కారు.

ఇతని విమ్శాంశ లగ్నం సింహం అయింది. 9 లో నీచశని ఉండటం చూడవచ్చు. ఇది సాంప్రదాయ విరుద్ధమైన నీచ పోకడలను, సాధనలను సూచిస్తుంది. ఈ శని మీనంలోకి వస్తూ ఉచ్చశుక్రునితో కలవడం వల్ల, ఆ మీనం 8 వ భావం కావడం వల్ల అందగత్తెలైన సినిమా స్టార్స్ తో రహస్య రొమాన్స్ కనిపిస్తున్నది. 12 వ అధిపతి చంద్రుడు దశమంలో ఉచ్చస్థితిని బట్టి రహస్యమైన ఆధ్యాత్మికమార్గం (తంత్రం) లో ఇతనికి సిద్ధి ఉన్నదని, శక్తి ఉపాసన ఉన్నదని, దానిలో కొన్ని శక్తులు సాధించాడని కనిపిస్తున్నది. మేము కాదని ఎంత బుకాయించినప్పటికీ ఆ వీడియోలో ఉన్నది వాళ్లిద్దరే నన్నది సత్యం. 9 వ అధిపతి కుజుడు సప్తమంలో ఉండటం దీనికి బలాన్నిస్తున్నది. 6 లోకి వచ్చి ఉచ్చస్థితిని పొందటం వల్ల, సంప్రదాయ విరుద్ధమైన తంత్రమార్గంలో గట్టి పట్టు ఉన్నవాడని, ఈ పనుల వల్ల లోకంతో విరోధం కలుగుతుందని తెలుస్తున్నది. కనుక ఆధ్యాత్మిక జీవితాన్ని సూచించే విమ్శాంశ చక్రం ఇతని జీవితానికి సరిగ్గా సరిపోతున్నది. ఇప్పుడు దశలను పరిశీలిద్దాం.

దశాఫలితాలు

ఇతను పుట్టినప్పుడు రవి - రవి - రాహుదశ నడుస్తున్నది. ఇది తంత్రమార్గాన్ని సూచించే దశ. అంతేగాక దీనివల్ల అనేక కష్టాలు, విరోధాలు, లోకంలో గొడవలు ఉంటాయి. రాహువు ఉచ్చ బుధుని సూచిస్తూ తెలివైన మాటకారిని, రహస్య కార్యకలాపాల నేర్పరిని, అనేక దేశాలు తిరిగేవాడిని సూచిస్తున్నాడు. 12 అధిపతిగా సూర్యుడు తంత్రజ్ఞానాన్నిస్తాడు. అదే సమయంలో అధికారులతో గొడవలను, జైలు జీవితాన్ని కూడా ప్రసాదిస్తాడు. 4 లో 9 వ అధిపతి అయిన శుక్రునితో కలసి, 7 అధిపతి మరియు బాధకుడైన గురువుతో చూడబడుతూ - ఆధ్యాత్మికజీవితం గడుపుతూ, అందగత్తెలతో రహస్యకలాపాల వల్ల చిక్కులు ఎదుర్కోవడం కనిపిస్తున్నది. జరిగినది అదే కదా మరి !  ఇతని జీవితం ఇలాగే జరుగుతున్నది గనుక మనం చూస్తున్న ఇతని జనన సమయం సరియైనదే కావచ్చు.

1982 లో నాలుగేళ్ల చిన్న వయసులో ఈయన గురువైన మాతా విభూతానంద పురి ఇచ్చిన కాషాయవస్త్రాలను ధరించాడని అంటున్నారు - ఈ సంఘటన రవి - కేతువులో గాని, రవి - శుక్ర దశలో గాని జరిగి ఉంటుంది. కేతువు మోక్షకారకుడు, మోక్షరాశి అయిన మీనంలో ఉన్నాడు. శుక్రుడు 9 వ అధిపతిగా 12 వ అధిపతి అయిన రవితో కలసి ఉన్నాడు. కనుక ఈ సంఘటన జరగడానికి ఆస్కారం ఉన్నది.

పన్నెండేళ్ళ వయసులో ఈయనకు 360 డిగ్రీల దృష్టి వచ్చిందని అంటారు. మామూలు మనుషులకు 90 డిగ్రీల దృష్టి మాత్రమె ఉంటుంది. పినియాల్ పిట్యూటరీ గ్రంధులు ఉత్తేజితములైన యోగులకు మాత్రం ఈ పరిధి పెరుగుతూ పోయి 360 ల దృష్టి లభిస్తుంది. అంటే, వీళ్ళు ఆ స్థితిలో ఉన్నపుడు తల తిప్పకుండా వెనుక కూడా ఏమి జరుగుతున్నదో చూడగలుగుతారు.  ఇది యోగంలో సాధ్యమే. పరమహంస యోగానంద గారికి ఇది కలిగింది. యూజీ గారికి ఇది కలిగింది. ఇంకా అనేకమంది యోగులకు ఇది కలిగింది. సరిగ్గా సాధన చేస్తె,  ఇప్పటికైనా సరే, ఇది ఎవరికైనా కలుగుతుంది. కానీ ఈయన భక్తులు చెబుతున్నట్లుగా ఇది జ్ఞానస్థితి మాత్రం కాదు. ఇది ఒకరకమైన చిన్నపాటి సిద్ధి మాత్రమే. ఆ వయసులో ఈయనకు చంద్ర - బుధ దశ జరిగింది. చంద్రుడు 12 వ భావంలో 5 వ అధిపతి అయిన శనితో కలసి ఉండటం వల్ల ఇది జరిగినట్లుగా మనం ఒప్పుకోవచ్చు.
 
1992 లో ఈయనకు 14 ఏళ్ళ వయసులో పరమశివానుభావం కలిగిందని చెబుతున్నారు. ఇది నిజం కాకపోవచ్చు. అప్పుడాయనకు చంద్ర-శుక్ర దశ జరిగింది. చంద్రుడు 12 లో 5 వ అధిపతి అయిన శనితో కలసి ఆధ్యాత్మిక యోగంలో ఉన్నాడు. శుక్రుడు 9 వ భావాదిపతి. కనుక ఒక ఉన్నతమైన ఆధ్యాత్మిక అనుభవం కలిగే సూచన ఉన్నది. కానీ ఇంత స్థాయి అనుభవం కలిగే సూచన లేదు. కాకపోతే, ఏదో ఒక చిన్నపాటి సమాధిస్థితి కలిగి ఉండవచ్చు. లగ్నంలో ఉన్న రాహువు భ్రమలకు కారకుడు గనుక దానినాయన 'పరమశివానుభవం' అనుకుంటూ ఉండవచ్చు.

ఈయన వేదాంతమును తంత్రమును శ్రీవిద్యను ఔపోశన పట్టినట్లుగా చెబుతున్నారు ఈయన శిష్యులు. ఇది నిజం కాదు. కాకపోతే వాటిలో ప్రవేశం ఉండి ఉండవచ్చు గాని ఔపోశన పట్టాలంటే మానవమాత్రుని వల్ల జరిగే పని కాదు. శ్రీ రామకృష్ణుల వంటి అవతార పురుషులకే అది సాధ్యమౌతుంది. అలాంటి యోగాలు ఈయన జాతకంలో ఎక్కడా లేవు. కనుక ఇది ఉత్త ప్రచారం మాత్రమేగాని నిజం కాదు. తనను తాను ఒక అవతారంగా ప్రచారం  చేసుకుంటూ నిత్యానంద మళ్ళీ తప్పు చేస్తున్నాడు.   

1992 - 1995 - ఈ సమయంలో ఈయన మెకానికల్ ఇంజనీరింగ్ లో డిప్లొమా చేశాడు. అప్పటికే జ్ఞానసిద్ధిని, పరమశివానుభావాన్ని పొంది వేదాంతమును, తంత్రమును శ్రీవిద్యను ఔపోశన పట్టిన వ్యక్తికి మెకానికల్ ఇంజనీరింగ్ లో డిప్లొమా చెయ్యవలసిన అవసరం ఎంతమాత్రం ఉండదు. కనుక పైన చెప్పుకుంటున్న ప్రచారాలు నిజం కాదని తెలుస్తున్నది. ఇంజనీరింగ్ మొదలయ్యే సమయంలో చంద్రదశ చివరలో ఉంది. చంద్రునిమీద ఉన్న శని ప్రభావం వల్ల ఇనుప మిషన్లకు సంబంధించిన విద్య అబ్బింది. చదువు అయిపోయే సమయానికి కుజదశలో మొదటి మూడు అంతరాలు జరిగాయి. కుజుడుయంత్రాలకు సూచకుడు గనుక ఇది కూడా సరిపోయింది. 

1995 లో మద్రాస్ రామకృష్ణ మఠంలో బ్రహ్మచారిగా చేరాడు - ఈయనను నేను అభిమానించడానికి ఉన్న కారణాలలో ఇదొకటి. నా గురువులలో ఒకరైన శ్రీమత్ స్వామి నందానందగారికి ఇతను కొన్నాళ్ళు శ్రద్దగా సేవ చేశాడు. అందుకని ఇతను నా చిన్నతమ్ముడిలాంటి వాడు. ఆ ఒక్క పాయింట్ మీద ఇతనిని నేను అభిమానిస్తాను.

ఆ సమయంలో ఇతనికి కుజ - గురు దశ జరిగింది. గురువు నవమంలో ఉండటం చూడవచ్చు. కుజుడు 8 వ అధిపతిగా సాధనామార్గాన్ని సూచిస్తు, మంత్రస్థానమైన పంచమాన్ని చూస్తున్నాడు. కనుక సరిపోయింది.

1996 - లో బేలూర్ మఠానికి చేరుకున్నాడు. అప్పుడు కుజునిలో శని అంతర్దశ జరిగినిది. శని 5 అధిపతిగా సాధనను సూచిస్తూ 12 భావమైన మోక్షస్తానంలో ఉన్నాడు. తరువాత రామకృష్ణ మఠాన్ని వదిలేసి హిమాలయాలకు యాత్ర సాగించాడు. కుజ - శని దశ యాక్సిడెంట్లను ఇస్తుంది. రామకృష్ణ మఠాన్ని వదిలెయ్యడం ఇతని జీవితంలో ఒక యాక్సిడెంటే. అందులో ఉంటే ఇప్పుడు తను చేస్తున్న పనులు చెయ్యడం కుదరదు. ఒళ్ళు దగ్గర పెట్టుకుని బుద్ధిగా అణిగిమణిగి ఉండాలి. వివేకానందస్వాములవారు పెట్టిన నియమాలను ఖచ్చితంగా పాటించాలి. అక్కడుంటూ ఇలాంటి పనులు చేస్తే వాళ్ళే బయటకు నెడతారు.

కానీ ఇతని పూర్వకర్మ చాలా బలంగా ఉన్నది. నాలుగు గ్రహాల వక్రత్వము, కుజుని నీచత్వము, అంశచక్రాలలో శని నీచత్వము, లగ్మలో రాహువు పరిస్థితి - ఇవన్నీ ఆపనిని చేయ్యనివ్వవు. లోపలనుంచి పూర్వకర్మ ఊపుతూ ఉంటుంది.

కనుక రామకృష్ణమఠంలో ఇమడలేక బయటకు వచ్చాడు. కానీ ఈనాటికీ శ్రీ రామకృష్ణులను ఆరాధిస్తాడు, అమితంగా గౌరవిస్తాడు. నా గురువులలో ఒకరైన నందానందస్వాముల గురించి ఎంతో గొప్పగా తన ఉపన్యాసాలలో చెబుతాడు. ఈ రెండు పాయింట్ల వల్ల ఇతను చేసిన లక్షతప్పులనైనా సరే నా కోర్టులో నేను కొట్టేస్తున్నాను. శ్రీ రామకృష్ణుల మీద భక్తి ఎలాంటివాడినైనా ఉద్ధరిస్తుంది. మంచివాడిగా మారుస్తుంది. మోక్షాన్నిస్తుంది. కనుక ఇతను పడిపోడు. ఉద్ధరింపబడతాడు. శ్రీ రామకృష్ణుల శక్తి అంతటి అమోఘమైనది. ఆయనను హృదయంలో నిలుపుకుని ధ్యానిస్తూ ఉన్నంతవరకూ, ఇతను వెయ్యి మంది ఆడవాళ్ళతో తిరిగినా సరే, ఇతనికి ఏమీ కాదు. ఇతను పతనం కాడని నేను ఘంటాపధంగా చెబుతున్నాను. ఇతను స్వతహాగా మంచివాడే. కొంచం దారి తప్పాడు. కానీ చివరకు గమ్యాన్ని చేరుకుంటాడు. రక్షింపబడతాడు.
 
దేశమంతా ఆ విధంగా తిరిగి తిరిగి 2000 సంవత్సరానికి మళ్ళీ తమిళనాడు చేరుకున్నాడు. అప్పటికి కుజ మహర్దశ అయిపోయింది.

కుజుడు 3 వ భావాదిపతి, అంటే దగ్గర ప్రయాణాలిస్తాడు. అందుకే ఇండియాలో తిరిగాడు. అప్పటికి విదేశాలకు ఇంకా పోలేదు. నీచ వక్రకుజుడు గనుక ఒక సన్యాసిగా కాలినడకన దేశమంతా తిరుగుతూ చాలా బాధలు పడి ఉంటాడు. రామకృష్ణమఠంలో చేరి కొన్నాళ్ళుండి బయటకు వచ్చాడు. ఇదంతా కుజ మహర్దశలో జరిగింది.

ఆ తరువాత మొదలైన 18 ఏళ్ళ రాహు మహర్దశ ఇతనికి చుక్కలు చూపించింది. మరి రాహువంటే మాటలా? చుక్కలూ చూపిస్తాడు, బురదలోనూ పడేస్తాడు, ఎక్కడెక్కడో దొర్లిస్తాడు, ఏవేవో పనులు చేయిస్తాడు. రాహువు రాక్షసుడు కదా మరి ! రాహు దశ అలాగే ఉంటుంది. ఈ సమయంలోనే ఆశ్రమాలు పెట్టడం, ఊళ్లు తిరగడం, మూడవ కన్నుకు సంబంధించిన ప్రయోగాలు, నిదర్శనాలు చూపించడం, రోగాలు తగ్గించడం, మహిమలు చూపించడం మొదలైనవన్నీ జరిగాయి.

2010 - లో సినీనటి రంజితతో గడిపిన వీడియో బయట పడటంతో గగ్గోలు చెలరేగింది. ఈ సమయంలో ఇతనికి రాహు-బుధ దశ జరిగింది. తనమీద తనకున్న అతి నమ్మకం కొంప ముంచింది. నమ్మునవాళ్ళే శత్రువులయ్యారు. ఇది ఖచ్చితంగా రాహు ప్రభావమే.

ఇతని జీవితంలో రాహువు అతిముఖ్య గ్రహం. దీనికి రుజువుగా ఇతని ఉత్తాన పతనాలు రెండూ రాహు దశలోనే జరిగాయి. ఒక్కసారిగా పేరు ప్రఖ్యాతులు పుంజుకున్నాయి. అదే విధంగా పడిపోవడమూ జరిగింది. ఇది రాహు ప్రభావమే.

రాహువు పంచమమైన మకరాన్ని, సప్తమమైన మీనాన్ని, నవమమైన వృషభాన్ని చూస్తున్నాడు. నవమం శుక్రస్థానం అయింది. కనుక మతముసుగులో అమ్మాయిలతో సంబంధాలు కనిపిస్తున్నాయి. సప్తమం కూడా శుక్రునికి ఉచ్చస్తానమయింది. ఇది కూడా అగ్నికి ఆజ్యం పోస్తుంది. అక్కడే గురువును సూచిస్తున్న కేతువున్నాడు. కనుక దైవ రాక్షస గుణాలు కలగాపులగం అయ్యాయి. అమ్మాయిల ఆకర్షణకు లోబడ్డాడు. పతనమయ్యాడు. పరువు పోగొట్టుకున్నాడు.

ఓషోకూ నిత్యానందకూ కొన్ని పోలికలున్నాయి. కొన్ని భేదాలున్నాయి. ఓషోను చూస్తే మొండివాడైన పెద్దన్నను చూసినట్లు నాకు చాలా కోపమొస్తుంది. నిత్యానందను చూస్తే తెలిసీ తెలియని చిన్నతమ్ముడిని చూసినట్లు జాలేస్తుంది.

అమ్మాయిలతో సంబంధాలు బయటపడినప్పుడు ఓషో ఏమీ తొణకలేదు బెణకలేదు. 'నేనింతే, మీ దిక్కున్నచోట చెప్పుకోండి' అన్నాడు. కానీ నిత్యానంద భయపడ్డాడు. ఆ వీడియో మాది కాదన్నాడు. తరువాత నేనసలు మొగాడినే కాదన్నాడు. పరీక్షలు  చేశారు. 'నువ్వు మగాడివే, నీకు పటుత్వం ఉంది' అన్నారు. అందుకే నేను రాసిన పోస్ట్ కి 'వీడు మగాడ్రా బుజ్జీ' అని పేరు పెట్టాను.

ఇలా రకరకాలైన అబద్ధాలు చెప్పడంలో పరువు పోగొట్టుకున్నాడు. అలా కాకుండా ఓషోలాగా ధైర్యంగా నిలబడి ఉంటె బాగుండేది. కానీ అలా చెయ్యలేకపోయాడు. ఓషో మహా ముదురు, బరి తెగించినవాడు. అమెరికాలో ఉంటూ అమెరికా ప్రభుత్వానికే ఎదురు తిరిగి సవాల్ చేసిన జగమొండి జగన్నాధం. కానీ నిత్యానంద అలా చెయ్యలేకపోయాడు. పరువు కోసం చూసుకున్నాడు. అబద్ధాలు చెప్పాడు. ఆ క్రమంలో పరువు పోగొట్టుకున్నాడు.

ఒక దారీ తెన్నూ లేకుండా ఎన్నో ప్రయోగాలు చేసి, తనతో బాటు వేలాదిమంది జీవితాలను నాశనం చేశాడు ఓషో. అందుకే ఆయనంటే నాకు ఒళ్ళుమంట. కానీ, నిత్యానంద అలా చెయ్యడం లేదు. అతన్ని అనుసరిస్తున్న ఎవరి జీవితాలూ నాశనం కావడం లేదు. రంజిత పరువు తనవల్ల పోయింది. అందుకే ఆమెకు తన సంస్థలో ఉన్నతమైన పదవినిచ్చాడు నిత్యానంద. ఆమె హాయిగా ఉన్నది. ఉంటుంది కూడా!  తన స్వార్ధానికి అందరినీ వాడుకొని వదిలేశాడు ఓషో. తన పొరపాటు వల్ల దెబ్బతిన్న వారిని వదిలెయ్యకుండా ఆదుకుంటున్నాడు నిత్యానంద. అదే ఓషోకూ నిత్యానందకూ తేడా !

మనం నాశనమైనా పరవాలేదు. మనల్ని నమ్మినవాళ్ళను మాత్రం ఏ నాటికీ ముంచకూడదనేది నా సిద్ధాంతం. ఏ గురువైనా ఇదే సిద్ధాంతాన్ని అనుసరించాలి. అప్పుడే అతడు సరియైన గురువౌతాడు.

2012 - లో రాహు - కేతుదశలో మదురై ఆదీనం అనే మఠానికి 293 వ అధిపతిగా నియమితుడయ్యాడు. మళ్ళీ జీవితం ఒక పెద్ద మలుపు తిరిగింది.

2012 -  అదే సమయంలో 100 మంది ఆధ్యాత్మిక ప్రముఖులలో ఒకడిగా గుర్తించబడ్డాడు.

ఫిబ్రవరి 2013 - లో రాహు - శుక్ర - చంద్ర దశలో పంచవటి మహానిర్వాణి అఖారా అనే పీఠం ఈయనకు ' మహామండలేశ్వర్' అనే బిరుదునిచ్చింది.

ఆ తరువాత ఆరేళ్ళ పాటు ఈయనను రకరకాల కోర్టు కేసులు వెంటాడాయి. ఆ సమయంలో రాహు - రవి , రాహు - చంద్ర దశలు జరిగాయి. ఇవి గ్రహణ దశలు గనుక ఇతన్ని నానా తిప్పలు పెట్టాయి.

నవంబర్ 2019 - లో ఈ వేధింపులు తారాస్థాయికి చేరాయి. వాటిని తట్టుకోలేక ఇండియా వదలి పారిపోయాడు. 2018 నవంబర్ లో ఇతడికి ఔన్నత్యమూ పతనమూ రకరకాల ఎత్తుపల్లాలూ అన్నీ చూపించిన రాహుదశ అంతమై గురు మహర్దశ మొదలైంది. జీవితం మళ్ళీ మలుపు తిరిగింది.

భవిష్యత్తు ఎలా ఉంటుంది?

2035 వరకూ ఇతనికి గురు మహర్దశ జరుగుతుంది. ఈ సమయంలో ఒక పేరుగాంచిన గురువుగా ఇతను చెలామణీ అవుతాడు. కానీ బాధలు వేధింపులు తప్పవు. కోటానుకోట్ల సంపదకు అధిపతి అవుతాడు. కానీ సంస్థలో అంతర్గత కుట్రలుంటాయి. ఇతను మొదలు పెడుతున్న కైలాస అనే దేశం అంత త్వరగా అంతర్జాతీయ గుర్తింపును పొందదు. చాలా కష్టపడవలసి ఉంటుంది. 16 ఏళ్ళ ఈ గురు దశలో ఇతను ఎంతో జీవితాన్ని చూస్తాడు. ఆయా అంతర్దశలు మళ్ళీ ఎన్నో ఉత్తాన పతనాలను చూపిస్తాయి. అవి వచ్చినపుడు వాటిని వివరిస్తాను.

ఈ దశ అయిపోయేసరికి ఇతనికి 57 ఏళ్ళు వస్తాయి. అప్పటికి పరిపక్వత వస్తుంది. వేడి చల్లారుతుంది. 19 ఏళ్ళ శని మహర్దశ మొదలౌతుంది. దానిలో మాత్రమే ఇతనికి నిజమైన ఆధ్యాత్మిక ఔన్నత్యం అందుతుంది. శ్రీ రామకృష్ణుల అనుగ్రహం ఊరకే పోదు. నందానందస్వాముల పాదాలను తాకిన అదృష్టం ఊరకే పోదు. ఎన్ని జన్మలైనా అవి వదిలిపెట్టవు. జన్మజన్మాంతరాలను దాటి అవి రక్షిస్తూనే ఉంటాయి. కాకపోతే, ఇతని పూర్వకర్మ చాలా బలంగా ఉన్నది గనుక ఇలాంటి ఎత్తు పల్లాలను చూస్తున్నాడు. శనిమహర్దశ వచ్చేసరికి అన్నీ సర్దుకుంటాయి. అప్పుడు నిజమైన సిద్ధగురువుగా పేరు తెచ్చుకుంటాడు. అంతవరకూ మాత్రం వీలు కాదు.

చివరగా ఒక మాట !

'ప్రతి మహనీయుడికీ ఒక గతం ఉంటుంది. ప్రతి పాపికీ ఒక భవిష్యత్తు ఉంటుంది' అంటుంది ఒక ఇంగ్లీషు సామెత. నిత్యానంద తప్పులు చేసి ఉండవచ్చు. అంతమాత్రం చేత అతని దగ్గర సబ్జెక్ట్ లేదని అనుకోకండి. ఖచ్చితంగా అతను ఎన్నో లక్షలమంది కంటే ఉన్నతుడే. ఇందులో అనుమానం లేదు. ఒకసారి పడినంత మాత్రాన వాడు ఎప్పటికీ పడే ఉండడు.

ప్రపంచమంతా నేడు గాయత్రీమంత్రం జపిస్తోంది. దానిని కనుక్కున్న విశ్వామిత్ర ఋషి ఏం చేశాడు? మేనక దెబ్బకు బొక్కబోర్లా పడ్డాడు. కానీ మళ్ళీ లేచాడు. తనను తాను జయించాడు. బ్రహ్మర్షి అనిపించుకున్నాడు. మేనక వలలో పడ్డాడని విశ్వామిత్రుడిని 'నీవు ఋషివి కాదు' అనగలమా?

ఆలోచించండి !
read more " చిన్నతమ్ముడు నిత్యానంద జాతకం - విశ్లేషణ "

11, సెప్టెంబర్ 2020, శుక్రవారం

వీడు మగాడ్రా బుజ్జీ !

నేనీ మాట అంటే చాలామందికి కోపాలు రావచ్చు. కానీ ఒకరికి నచ్చదనో, కోపాలొస్తాయనో నా అభిప్రాయాలు నేను మార్చుకోను.

నా దృష్టిలో, నేటి గురువులలో చాలామంది కంటే నిత్యానంద చాలా మంచివాడు, చాలా శక్తివంతుడు కూడా. మూడవ కన్ను అనబడే third eye ని తెరిచే విధానాలు అతనికి తెలుసు. అంతేకాక అతనికి చాలా అతీంద్రియ శక్తులున్నాయి కూడా. ఇది వాస్తవమే. ఇతరులలో మూడవకంటిని వికసింపజేసే శక్తి ఈయనకు నిజంగానే ఉన్నది.

ఏమీ శక్తులు లేని సత్యసాయిబాబానే ఈ పిచ్చిలోకం 50 ఏళ్ళపాటు పిచ్చిగా కొలిచింది. ఆయన దగ్గర వీధిగారడీ ట్రిక్కులు తప్ప ఇంకేమీ లేవు. పెద్ద ఫిలాసఫీ కూడా ఆయన చెప్పలేడు. ఆయన దగ్గర సబ్జెక్ట్ కూడా ఏమీ లేదు. ఆయనతో పోల్చుకుంటే ఎన్నో రెట్లు శక్తిలో గొప్పవాడు నిత్యానంద. ఈయన తాంత్రికుడు. నిజమైన అతీంద్రియ శక్తులున్నవాడు. మరి ఈయన్ను ఎందుకో అందరూ తిడుతున్నారు? కారణం చెప్పనా? ధైర్యంగా వినండి !

మనకు దక్కని సుఖాలు ఆయన హాయిగా అనుభవిస్తున్నాడనే కుళ్ళు తప్ప ఈ ద్వేషానికి ఇంకేమీ కారణం లేదు. వయసులో ఉన్నాడు, బోలెడంత డబ్బుంది, సినిమా స్టార్స్ ఆయన చుట్టూ తిరుగుతున్నారు. ప్రస్తుతం ఒక ద్వీపాన్నే కొనుక్కుని తన రాజ్యంలో తానున్నాడు. హేపీగా జీవితాన్ని ఎంజాయ్ చేస్తున్నాడనే బాధతో ప్రతివాడూ ఇష్టం వచ్చినట్లు మాట్లాడుతున్నారు. ఇది తప్ప ఆయన్ను తిట్టడానికి వేరే కారణం ఏమీ లేదు. మనకు లేనిది ఇంకొకడికి ఉంటే కుళ్ళుతో చచ్చిపోవడం ఈ చెత్త మనుషులకు పరిపాటేగా?

నేను నాలుగేళ్ల క్రితం అమెరికా వెళ్ళినపుడు ఒకమ్మాయి కళ్ళకు గంతలు కట్టుకుని, అన్నింటినీ చక్కగా చూస్తున్నట్లు చదవడాన్ని చూచాను. ఆ అమ్మాయికి నిజంగానే ఆ శక్తి ఉన్నది. ఆమె తల్లిదండ్రులను అడిగాను 'ఎవరు మీ అమ్మాయికి ఈ విద్యను నేర్పించారు? ఆ గురువెవరు?' అని. దానికి వాళ్ళు చాలాసేపు జవాబు చెప్పకుండా తటపటాయించారు. కానీ చివరకు 'స్వామీ నిత్యానంద' అని చెప్పారు.

స్వామి నిత్యానంద పెట్టిన స్కూళ్ళలో చదువుకునే పిల్లల్లో చాలామందికి ఈ శక్తి ఉన్నది. 14 ఏళ్ళ లోపు పిల్లల్లో ఈ శక్తిని త్వరగా వికసింపజేయవచ్చని ఆయనంటాడు. ఇది నిజమే. ఆ తరువాత శరీరంలో చాలా మార్పులోస్తాయి. అప్పుడు ఈ మూడవ కన్నును వికసింపజేయడం కష్టమౌతుంది అంటాడు. ఇదీ నిజమే.  యోగ - తంత్ర రహస్యాలు తెలిసిన వారికి ఈ విషయాలు అర్ధమౌతాయి. మామూలు మనుషులకు అర్ధం కావు.

నిత్యానంద రంజితల మధ్య వ్యవహారం ఒక్కటే ఆయన్ను లోకం ముందు దోషిగా నిలబెట్టింది. ఇదొక్కటి పక్కన పెడితే, వేలెత్తి చూపదగ్గ తప్పులేమీ ఇతనిలో లేవు. కానీ నా దృష్టిలో అది కూడా తప్పు కాదు. ఎందుకంటే, ఆయన వేదాంత సాంప్రదాయ సన్యాసి కాదు, ఘోటక బ్రహ్మచారిగా ఉండటానికి.  పిచ్చిలోకుల దృష్టిలో ఎర్రగుడ్డలేసుకున్న ప్రతివాడూ బ్రహ్మచర్యం పాటించాలని అనుకుంటారు. కానీ అది నిజం కాదు. నిత్యానంద ఒక తాంత్రికుడు. ఆయన ఆగమశాస్త్రాన్ని అనుసరిస్తాడు. ఆ మార్గంలో స్త్రీ సాహచర్యం తప్పు కాదు. అది వారి సాధనలలో ఒకటి. అంతమాత్రం చేత వారి జ్ఞానానికీ శక్తికీ ఏమీ లోటుండదు. తంత్రమార్గం అర్ధం కానివారు ఏదేదో వాగుతూ ఉంటారు. వారిని పట్టించుకోవలసిన పని ఏ మాత్రమూ లేదు.

హిందూమతమంటే ఏమిటో సగటు హిందువుకు ఏమీ తెలియదు. దానిలో ఎన్నెన్ని శాఖలు ఉపశాఖలున్నాయో వాటి ఆరాధనా విధానాలు సాధనాపద్ధతులు ఎలా ఉంటాయో ఏమీ తెలియదు. వాడికి తెలిసిందల్లా మంగళవారం గుడికెళ్ళి బొట్టు పెట్టుకుని కొబ్బరికాయ కొట్టి కోరికలు కోరుకుని వెనక్కు రావడం ఒక్కటే.  అదే హిందూమతమని చాలామంది అనుకుంటారు. ఇది హిందూమతంలో కనీసం ఎల్ కేజీ స్థాయికూడా కాదు. అంతకంటే తక్కువ !

శైవాగమమూ, శాక్తాగమమూ, కౌలాచారమూ, వామాచారమూ మొదలైనవేవీ ఇసుమంతైనా తెలియని హిందువులు మాత్రమే నిత్యానందను తప్పుగా అర్ధం చేసుకుంటారు. తంత్రశాస్త్రపు లోతుపాతులు తెలిసినవారు అలా అనుకోరు. నిత్యానందకు 'పరమహంస' అనీ 'మహామండలేశ్వర్' అనీ బిరుదులిచ్చిన పీఠాధిపతులకు తెలియదా మనకు తెలిసినపాటి హిందూధర్మం? వాళ్ళు చూడలేదా రంజిత వీడియో?

తత్వశాస్త్రం, శైవసిద్ధాంతం, యోగసాధన మొదలైన విషయాలలో నిత్యానంద, నేటి ఎందరో స్వామీజీలంటే ఉన్నతుడు. ఆయన దగ్గర నిజమైన సబ్జెక్ట్ ఉన్నది. కానీ అల్లరౌతున్నాడు. ఎందుకని?పైగా ఇన్ని శక్తులున్న వాడు, దేశాన్ని వదిలి పారిపోవలసిన పనేముంది? అని మీకు డౌటు రావచ్చు.

నిత్యానంద రంజితల వీడియోను బయటపెట్టడం వెనుక క్రైస్తవ మిషనరీల హస్తం ఉన్నది. అమ్ముడు పోయిన మీడియా పాత్ర ఉన్నది. సన్ టీవీ ఎవరిదో అందరికీ తెలుసు. రాకెట్ వేగంతో ఎదుగుతున్న నిత్యానందను కట్టడి చెయ్యకపోతే, లోకానికి మరొక అద్భుతమైన హిందూగురువు వస్తున్నాడన్న అసూయా, వారి మతప్రచారానికి దెబ్బ తగులుతుందన్న భయమూ, వాళ్ళ చేత నిత్యానంద మీద 'లెనిన్' అనే కారు డ్రైవర్ ను అస్త్రంగా ప్రయోగించాయి. వీడియో తీయించాయి. గాలి దుమారం రేగింది. కోర్టు కేసులు పెట్టబడ్డాయి. వేధింపులు మొదలయ్యాయి. చివరకు నిత్యానంద తన స్వదేశాన్నే వదలి పారిపోవలసిన గతి పట్టించాయి.

మీరొక్క విషయం ఆలోచించారా?

క్రైస్తవ మిషనరీలు తమిళనాడు లోనూ, కేరళలోనూ ఎన్నేన్ని రేపులు చేస్తున్నారు? ఎంతమంది చిన్నపిల్లలను ఎబ్యూస్ చేస్తున్నారు? వాళ్ళమీద ఎన్నెన్ని కేసులున్నాయి? వీళ్ళందరికీ కేంద్ర బిందువైన వాటికన్ లో ఏం జరుగుతోంది? అక్కడి పోపులమీదా, ఇతర బిషప్పులమీదా ఎన్నెన్ని కేసులున్నాయి?  ఇవెవరూ మాట్లాడరెందుకు? జీసస్ కి కోపమొస్తుందని భయమా? వాళ్ళందరూ పత్తిత్తులా? ఈయనొకడే దోషా?

ముస్లిం మతగురువులు ఎంత హింసను రేపుతున్నారు? ఎంత ద్వేషాన్ని ప్రతి శుక్రవారమూ అమాయక ముస్లిములలో నూరిపోస్తున్నారు? ఎంతమంది టెర్రరిస్టులు మదరసాలలో తయారౌతున్నారు? వాటి గురించి ఎవరూ మాట్లడరెందుకు? భయమా? 

మరి ఒక స్వామీజీని, అందులోనూ తంత్ర సాంప్రదాయానికి చెందిన వాడిని ఇష్టం వచ్చినట్లు మాట్లాడతారా? అసలు హిందూమతంలో ఎన్నెన్ని శాఖలున్నాయో, వాటి పద్ధతులేమిటో, వాటి విధానాలేమిటో తెలుసా మీకు? తెలీనప్పుడు ఈ వాగుడెందుకు? ఇలా వాగడానికి చర్చి నుంచి ఎంత లంచం ముట్టింది మీకు?

డిల్లీ గ్యాంగ్ రేప్ దోషులకు శిక్ష పడటానికి ఎనిమిదేళ్లు పట్టింది మన వ్యవస్థలో. ఎంతోమంది అమ్మాయిల రేపిస్టులూ, హంతకులూ పొలిటికల్ సపోర్ట్ తో హాయిగా మనమధ్యనే దశాబ్దాలుగా తిరుగుతున్న దేశం మనది. నిత్యానంద మాత్రం దేశాన్ని వదలి పారిపోవాలి. భలే ఉంది కదూ ? అతనెవరినీ రేప్ చేయలేదే? స్టూడెంట్స్ ని మర్డర్ చేయలేదే? పొలిటికల్ హవాలా చేయలేదే? అండర్ గ్రౌండ్ లో టన్నులకొద్దీ బంగారం దాచలేదే? అతనేమీ ఉమనైజర్ కాదు. అతని తాంత్రికసాధనలకు స్త్రీ సహకారం అవసరం. తన పంధా ఏంటో స్పష్టంగా చెబుతున్నాడు. ఇష్టపడి వచ్చినవాళ్ళను దగ్గరకు తీస్తున్నాడు. తప్పేముంది? ఇద్దరు consenting adults మధ్యన జరిగేదాన్ని కాదనడానికి మీరెవరు?

అతని స్కూల్స్ లో చదువుకుంటున అమ్మాయిలు క్షేమంగా ఉన్నారు. ఆ తల్లిదండ్రులే దగ్గరుండి మరీ చేర్పిస్తున్నారు. చక్కని హిందూ సాంప్రదాయాన్ని వాళ్ళు నేర్చుకుంటున్నారు. 'మా అమ్మాయి అక్కడ చేరి చెడిపోయింది' అని ఒక్క తల్లి కూడా ఇంతవరకూ చెప్పలేదు. వాళ్ళలో ఎవరినీ అతను ముట్టుకోలేదు. స్వంత కూతుళ్లలాగా చూసుకుంటున్నాడు. 

హిందూమతం గురించి ఓనమాలు తెలియని ప్రతివాడూ మాట్లాడేవాడే ! ప్రతివాడూ బురద జల్లేవాడే !

ఇండియాని సర్వనాశనం చేస్తున్నది కమ్యూనిస్టులు, క్రైస్తవ మిషనరీలు, మదరసాలు. వీళ్ళ దుష్టప్రభావం నుంచి మన దేశాన్ని కాపాడాలనుకున్న ప్రతి హిందువునూ వీళ్ళు టార్గెట్ చేస్తారు. అదే నిత్యానందకూ జరిగింది. 

ఇండియాలో ఉంటే తాననుకున్న పని చెయ్యలేనన్న విషయం అర్ధమై, వీళ్ళ హింసను వేధింపులను తట్టుకోలేక, ఎక్కడో అమెరికా క్రింద ఒక ద్వీపాన్నే కొనుక్కుని తన రాజ్యాన్ని తాను స్థాపించుకున్నాడు నిత్యానంద. చాలా మంచిపని చేశాడు. ఇంకా మోదీగారి పరిపాలన గనుక ఇండియా దాటి బయటకు పోగలిగాడు. లేకపోతే దొంగకేసులు మోపబడి ఇక్కడి జైళ్లలో జీవితాంతం మగ్గిపోయేవాడు. ఇదీ గాంధీ నెహ్రూలు మన దేశానికి పట్టించిన సెక్యులర్ దరిద్రం !

తమిళనాడుకు ఇంకొక దరిద్రం ఉన్నది. అక్కడున్నన్ని గుడులు గోపురాలు మన దేశంలో ఇంకెక్కడా లేవు. కానీ అక్కడ ఉండేది నాస్తికప్రభుత్వం.దానికి హిందూ సాంప్రదాయం అంటే పడదు. ఆస్తికప్రజలను పాలించే నాస్తిక ప్రభుత్వమే తమిళనాడు ప్రభుత్వం. ఇంకా చెప్పాలంటే హిందూప్రజలను పాలించే క్రైస్తవ ప్రభుత్వం అది. మరి అక్కడ, నిత్యానంద ఎలా బ్రతకగలడు? ఆయన ఉన్నది బెంగుళూరు లో కదా అన్న సందేహం మళ్ళీ మీకు రావచ్చు. అదీ ఇదీ ఒకటే. పెద్ద తేడా ఏమీ లేదు. బార్డర్ జిల్లాల్లో తమిళ, కన్నడ సంస్కృతులు పోకడలు కలిసే ఉంటాయి. వేధింపులకు ఎక్కడైతేనేం? అందుకే అక్కడ ఉండలేక నిత్యానంద గుజరాత్ కు పారిపోయాడు. తమిళుడైన ఆయనను గుజరాతీయులు ఆదరించారు. చివరకు అక్కడా బ్రతకలేక దేశాన్నే వదలి పారిపోయాడు.

ఏతావాతా నేను చెప్పేదేమంటే, నిత్యానంద చెబుతున్నది, చేస్తున్నది అంతా కరెక్టే. నేను నిత్యానందను ఓపెన్ గా సమర్ధిస్తున్నాను. ఓషో ఎక్కడ విఫలమయ్యాడో నిత్యానంద అక్కడ సక్సెస్ సాధించాడు. వెరీ గుడ్ !

ఇండియాకి తిరిగి రాకుండా నిత్యానంద అక్కడే ఉండాలని, హిందూసామ్రాజ్యాన్ని స్థాపించాలని, గట్టిగా నిలబడాలని, ఈ చెత్తలోకానికి సరైన బుద్ధి చెప్పాలని కోరుకుంటున్నాను. ఎందుకంటే, కంచి శంకరాచార్యనే జైల్లో పెట్టిన గొప్ప దేశం కదా మనది? మన దేశంలో పేరుకు మాత్రమే హిందువుల మెజారిటీ. కానీ అసలైన మైనారిటీలు వాళ్ళే ఇక్కడ.

నిత్యానందను ఇండియాకు సాదరంగా ఆహ్వానించినప్పుడే మళ్ళీ ఈ దేశానికి నిష్కృతి కలుగుతుంది. మన దేశంలోని ప్రతి రాష్ట్రంలోనూ ఒక నిత్యానంద ఉండాలి. హిందూ సమాజానికి పట్టిన దరిద్రం అప్పుడు మాత్రమే వదులుతుంది. 

అందుకే అంటాను 'వీడు మగాడ్రా బుజ్జీ' అని.

కాదనగలరా మీరు?

read more " వీడు మగాడ్రా బుజ్జీ ! "

9, సెప్టెంబర్ 2020, బుధవారం

'వరాహోపనిషత్' ప్రింట్ పుస్తకం ఈ రోజు విడుదలైంది


కరోనా టైమ్స్ లో గత ఆరునెలలుగా నేను వ్రాసిన 18 పుస్తకాలను ప్రింట్ చేసే కార్యక్రమం నిరంతరంగా సాగుతోంది. ఈ పనిలో భాగంగా 'వరాహోపనిషత్' ప్రింట్ పుస్తకాన్ని ఈ రోజు హైదరాబాద్ లోని మా ఇంటినుండి నిరాడంబరంగా విడుదల చేశాము.

మిగతా శిష్యులందరినీ పిలవలేదని బాధపడకండి.  ఈ కరోనా గోల అయిపోయిన తర్వాత అందరం కలుద్దాం. మళ్ళీ మన స్పిరిట్యువల్ రిట్రీట్స్ అన్నీ యధావిధిగా మొదలవుతాయి. అంతవరకు కొంచం ఓపిక పట్టండి.

యధావిధిగా ఇది కూడా pustakam.org నుండి లభిస్తుంది.

read more " 'వరాహోపనిషత్' ప్రింట్ పుస్తకం ఈ రోజు విడుదలైంది "

8, సెప్టెంబర్ 2020, మంగళవారం

ఓషో ప్రియురాలు 'మా యోగ వివేక్' చంపబడిందా?

31 ఏళ్ళుగా నలుగుతున్న ఒక రహస్యాన్ని తేల్చడానికి జ్యోతిష్యశాస్త్రాన్ని ఉపయోగిద్దాం.

క్రిస్టియన్ వుల్ఫ్ స్మిత్ అనే అమ్మాయి 'యునైటెడ్ కింగ్ డం' లో 19-3-1949 న పుట్టింది. 9-12-1989 న  పూనాలో ఓషో ఆశ్రమంలో చనిపోయింది. ఈమెకు ఓషో 'మా యోగ వివేక్' అని పేరు పెట్టాడు. తర్వాత 'మా ప్రేమ్ నిర్వానో' అని ఇంకొక పేరు ఈమెకు పెట్టబడింది. ఈ అమ్మాయి 40 ఏళ్ళు మాత్రమె బ్రతికింది. అందులో 20 ఏళ్ళు ఓషో పక్కనే తోడునీడగా ఉంటూ అన్ని సేవలూ చేస్తూ ఉన్నది. ఈమె గనుక పక్కన ఉండి ఎంతో జాగ్రత్తగా 20 ఏళ్ళపాటు చూచుకోకపోయినట్లైతే ఓషో అన్ని ఏళ్ళు బ్రతికేవాడు కాదు. ఎందుకంటే ఓషో ఆరోగ్యం అంత గట్టిది కాదు.

ఈమె గురించి ఓషో ఒక కధ చెప్పేవాడు. ఓషో చిన్నప్పుడు వాళ్ళ పల్లెటూళ్ళో డాక్టర్ శర్మ అనే ఒకాయన ఉండేవాడు. ఆ కుగ్రామంలో ఆయనే డాక్టరు. ఆ డాక్టరు కూతురిపేరు శశి. ఈ అమ్మాయి రజనీష్ ఇద్దరూ చిన్నప్పటి నుంచీ స్నేహితులు. కలసి మెలసి ఆడుకుంటూ ఉండేవాళ్ళు. వాళ్ళ మధ్యన ప్రేమ చిగురించింది. చిన్ననాటి ప్రేమ చాలా మధురమైనది. దానిలో సెక్స్ అనేది ఉండదు. అలాంటి ప్రేమ వాళ్ళిద్దరి మధ్యన ఉండేది. అయితే, ఉన్నట్టుండి ఏదో జబ్బు చేసిన శశి 1947 లో చనిపోయింది. అప్పటికి రజనీష్ కి 16 ఏళ్ళు. ఆ అమ్మాయికి 14 ఉంటాయేమో? చనిపోయేటప్పుడు రజనీష్ ని చూస్తూ ఆ అమ్మాయి ఇలా అన్నది ' నేను మళ్ళీ వస్తాను. నీ తోడుగా ఉంటాను. నిన్ను చూసుకుంటాను'.

తర్వాత రెండేళ్లకు 1949 లో క్రిష్టియన్ ఉల్ఫ్ స్మిత్ అనే అమ్మాయిగా శశి మళ్ళీ బ్రిటన్ లో పుట్టిందని ఓషో అనేవాడు. ఈ అమ్మాయి 20 ఏళ్ళ వయసులో ఆధ్యాత్మికతను వెతుక్కుంటూ ఇండియాకు వచ్చి 1989 లో చనిపోయేవరకు ఓషోతో ఉండిపోయింది. ఓషో సమక్షంలో ఈమెకు తన పూర్వజన్మ గుర్తు వచ్చిందని అంటారు. అది నిజమో కాదో మనకు తెలియదు. ఎవరికీ తెలియదు. కానీ వాళ్ళిద్దరి మధ్యనా చాలా గట్టి ప్రేమ ఉండేది. దాదాపు 20 ఏళ్ళపాటు ఒషోని కంటికి రెప్పలాగా చూసుకుంది.

ఓషోకు సేవ చెయ్యడం అంటే మాటలు కాదు. అది ఒక ధ్యానం లాంటిదే. అనుక్షణం ఎంతో జాగరూకతతో ఒళ్ళు దగ్గర పెట్టుకుని ఉండాలి. ఆయన ఆరోగ్యం మంచిది కాదు. ఎప్పుడూ ఏదో ఒక సమస్య ఆయనకు ఉండేది. ఆయనకు ముఖ్యంగా డస్ట్ ఎలర్జీ ఉండేది. కొద్దిగా దుమ్ము తగిలినా ఆయనకు జలుబు చేసేది. ఆస్తమా ఎటాక్ కూడా వచ్చేది. 17 డిగ్రీలు దాటిన వాతావరణం ఆయనకు పడేది కాదు. దీనికి తోడూ ఆయనకు డయాబెటీస్ ఉండేది. ఒక చిన్న పిల్లవాడిని చూసుకున్నట్లు ఆయనను చూసుకోవాల్సి వచ్చేది. ఇదిగాక, పెద్ద చప్పుడులు ధ్వనులు ఆయన భరించలేడు. కొంతమంది ఒంటి వాసన ఆయనకు పడేది కాదు. ఇంటి గదులు ఎంతో క్లీన్ గా ఉంటె తప్ప ఆయన ఉండలేకపోయేవాడు. ఇలాంటి సమస్యలున్న మనిషిని ఎలా చూసుకోవాలి? వివేక్ ఈ పనులన్నీ చాలా ఓపికగా 20 ఏళ్ళ పాటు చేసింది. కానీ ఏనాడూ తన ఆధిపత్యం చేలాయించాలని చూసేది కాదు. ఒక నీడలాగా మౌనంగా ఆయన పక్కనే ఉండేది. సేవ చేసేది. అంతే !

ఇదంతా ఇంటర్ నెట్లో దొరుకుతుంది. ఓషో పుస్తకాలలో దొరుకుతుంది. అది కాదు నేను చెప్పబోయేది. వివేక్ చాలా అనుమానాస్పద పరిస్థితిలో చనిపోయింది. ఇప్పటికీ ఈ మిస్టరీ తేలలేదు. ఈమె చావును హడావుడిగా ముగించేసి, చనిపోయిన రెండే రెండు గంటలలో ఆమెను దహనం చేసేసి, ఏమీ జరగనట్టు నటించారు ఓషో ఆశ్రమ నిర్వాహకులు. అప్పటికి ఓషో చక్కగా బ్రతికే ఉన్నాడు.  జీవితాంతం తనకి సేవ చేసిన అమ్మాయికి అదా ఓషో ఇచ్చిన బహుమతి? ఇదా గురుత్వమంటే?

ఓషోకు ఇంత నమ్మకంగా ప్రేమగా 20 ఏళ్ళు సేవ చేసిన వివేక్. ఓషో చనిపోయే 40 రోజుల ముందుగా తను చనిపోయింది. అప్పటికి ఆమెకు 40 ఏళ్ళు మాత్రమే. ఆమె చనిపోయిన వెంటనే ఒక రెండు గంటలలో చడీ చప్పుడూ లేకుండా, ఒక అనామకురాలిని చేసినట్లు, ఆమెను దహనం చేసేశారు. ఇది వివేక్ ను అభిమానించే ఎందరినో కలచివేసే సంఘటన ! ఇది జరిగి నేటికి 31 ఏళ్ళు  గడిచినప్పటికీ వివేక్ మరణం ఈనాటికీ ఒక తేలని రహస్యంగానే మిగిలిపోయింది.

ఓషో శిష్యులలో ఇప్పటికీ బ్రతికున్నవాళ్ళు ఈ విషయం మీద కల్లబొల్లి కాకమ్మ కధలు చెబుతున్నారు గాని అసలు విషయం ఎవరూ చెప్పడం లేదు. అందుకని, ఈ రహస్యాన్ని జ్యోతిష్యం సహాయంతో చేదిద్దామని అనుకున్నాను. జ్యోతిష్యశాస్త్రాన్ని సరిగ్గా ఉపయోగించడం తెలిస్తే, జరిగిపోయినది, జరగబోయేది, జరుగుతున్నది అన్నీ ఇంట్లోనుంచి కదకుండా తెలుసుకోవచ్చు. అదే ఈ సైన్స్ గొప్పదనం. ఇక  చదవండి !

ఓషో శిష్యులలో చాలామంది 1949 ప్రాంతాలలో పుట్టారు. ఆ సమయంలో గురువు మకరరాశిలో సంచరిస్తూ నీచస్థితిలో ఉన్నాడు. వీళ్ళందరూ గురుదోష బాధితులు. అందుకే వీళ్ళ జీవితాలు అలా గడిచి, చివరికి  రకరకాలుగా విషాదాంతాలయ్యాయి.

అందులోనూ ఈమెది అనూరాధా నక్షత్రం అయింది. అనూరాధా నక్షత్ర జాతకులు విచిత్రమైన మనుషులు. ఎందుకంటే వీరికి చంద్రుడు నీచస్థితిలో ఉంటాడు. అందుకే వీళ్ళ మనస్సు ఎప్పుడు ఎలా ప్రవర్తిస్తుందో వీరికే తెలియదు. విశాఖ - 4 వ పాదం, జ్యేష్ట నాలుగు పాదాలు కూడా అంతే. వీళ్ళ మనసులు ఎటు పోతుంటాయో వీరికే తెలియదు.

నక్షత్రాలకు కొన్ని లక్షణాలు ఉండటం నిజమే. ఆయా నక్షత్రాలలో పుట్టినవారికి ఆయా లక్షణాలు ఉండటం కూడా నిజమే. ప్రాచీన వేదకాలంలో విశాఖ నక్షత్రాన్ని 'రాధ' అనేవారు. దానిని అనుసరించి ఉంటుంది గనుక దాని తరువాత నక్షత్రం అనూరాధ అయింది. అనూరాధా నక్షత్రజాతకులు ఎప్పుడూ ఎవరినో ఒకరిని అనుసరిస్తూ ఉంటారు. లేదా ఎవరినో ఒకరిని ఆశ్రయించి, వారిపైన ఆధారపడి బ్రతుకుతూ ఉంటారు. ఈ ఆధారపడటం అనేది భౌతికంగా కావచ్చు లేదా మానసికంగా కావచ్చు. వివేక్ విషయంలో రెండూ జరిగాయి. 1970 లో ఓషోను కలిసినది మొదలు 1989 లో తను చనిపోయేవారకూ వివేక్ ఓషోతోనే ఉన్నది.

ఈమెది కర్కాటక లగ్నం తులా నవాంశ అని నా ఉద్దేశ్యం. కనుక ఈమె మధ్యాహ్నం 12.50 నుంచి 1.04 లోపు పుట్టి ఉంటుంది. ఈ నిర్ధారణకు ఎలా వచ్చానో అదంతా వివరించను. అదంతా చెప్పాలంటే ఇంకో రెండు పోస్టులు అవుతాయి. సూచనాప్రాయంగా కొన్ని మాత్రం చెబుతాను.

నవమాదిపతి ఐన గురువు సప్తమంలో నీచస్థితిలో ఉండటం - ఈమె గురువు, లవరు రెండూ అయిన ఓషోని సూచిస్తున్నది.

కుటుంబస్థానంలోని శని - ఈమె కుటుంబంలో ఉన్న శాపాన్ని సూచిస్తున్నాడు. ఈమె పెద్దల జీవితాలలో కూడా ఇలాంటి సంఘటనలే ఉండి ఉండవచ్చు.

పంచమంలో నీచస్థితిలో ఉన్న లగ్నాధిపతి చంద్రుడు సమాజపు కట్టుబాట్లకు లొంగని ఒక విపరీతప్రేమ వ్యవహారాన్ని చూపుతున్నాడు. నవమంలో ఉన్న పంచమాధిపతి కుజుడు - ఒక ప్రసిద్ధుడూ శక్తివంతుడూ అయిన గురువుతో ప్రేమలో పడటాన్ని సూచిస్తున్నాడు.

ఇంతకంటే ఎక్కువగా వివరించవలసిన పని లేదు. ఇది ఈమె జాతకమే.

ఈమె చనిపోయిన 9-12-1989 న గ్రహస్థితి ఇలా ఉన్నది.

అప్పుడామెకు ఏలినాటి శని రెండోపాదం జరుగుతున్నది. కనుక కష్టకాలమే. ఇకపోతే గురువు అష్టమంలో వక్రించి ఉన్నాడు. జీవశక్తి బాగా క్రుంగిపోవడాన్ని ఇది సూచిస్తుంది. ఓషో వల్ల వివేక్ గర్భవతి అయింది. కానీ ఓషో పట్టుపట్టి ఆమెకు అబార్షన్ చేయించడమే గాక, ఆమెకు పిల్లలు పుట్టకుండా ఆపరేషన్ చేయించేశాడు. ఈ సంఘటనతో ఆమె బాగా క్రుంగిపోయింది. ఆ తరువాత ఆమె ఆరోగ్యం కూడా బాగా చెడిపోయింది. ఆమెకు తీవ్రమైన ప్రీ మెన్సురల్ సిండ్రోమ్ ఉండేది. ఆ సమయంలో ఆమె పిచ్చిపిచ్చిగా ప్రవర్తించేది. చూసేవాళ్లకు స్కిజోప్రేనియా అనిపించేటంతగా ఆమె విపరీత ప్రవర్తన ఉండేది. ఇవన్నీ కలసి ఆమె ఆరోగ్యాన్ని చిన్న వయసులోనే బాగా దెబ్బతీశాయి.

ఈమె చనిపోయిన రోజున ఉన్న గోచార గ్రహస్థితి ఇలా ఉన్నది.

జననకాల రాహువు మీదకు గోచార చంద్రుడు 

దీనివల్ల మనసు నిలకడ తప్పుతుంది. మీనంలో ఉన్న జననకాల కుజుడిని దాటిన చంద్రునివల్ల, ఆ సమయంలో ఈమె నెలసరికి దగ్గరగా ఉందని తెలుసుకోవచ్చు. కనుక శరీర బాధలకు తోడుగా మనసుకూడా ఈమె అదుపు తప్పిందని తెలుస్తున్నది. అలాంటి సమయాలలోనే విపరీతమైన నిర్ణయాలు తీసుకుంటారు. అయితే ఇది మైక్రో పిక్చర్ మాత్రమే. అంటే, ఈ స్థితి నాలుగైదు రోజులపాటే ఉంటుంది.

జననకాల నీచచంద్రునిమీద గోచార రవి కుజులు

దీనివల్ల, మొండి నిర్ణయాలు తీసుకోవడం జరుగుతుంది. ఎవరు చెప్పినా మాట వినరు. తాము తీసుకున్న నిర్ణయాన్ని అమలు చేస్తారు. ఈ స్థితి నెలా నెలన్నర పాటు వెంటాడుతుంది. అంటే, నెలనుంచీ తర్జన భర్జన పడుతున్న విషయాన్ని ఈమె ఆ సమయంలో అమలు చేసినట్లు తెలుస్తున్నది. ఏంటా విషయం?

జననకాల నీచ గురువు మీద గోచార రాహుశుక్రులు

ఇది ఈమె చావును కొనితెచ్చిన మేక్రో సూచన. ఇందులో రాహుస్థితి ఏడాదిన్నర పాటు ఉంటుంది. శుక్రుడు ఒక నెలపాటు మాత్రమే రాహువుతో కలుస్తాడు. ఈ కలయిక వల్ల ఏం జరుగుతుంది?

అప్పటికే ఓషో ఆరోగ్యం చాలా వేగంగా క్షీణిస్తున్నది. ఆయన మహా బ్రతికితే ఒక నెల పాటు బ్రతుకుతాడని అందరూ అనుకుంటున్నారు. గురువుమీద ఉన్న అమితమైన ప్రేమను చంపుకోలేకపోయిన వివేక్,  ఆయనకంటే ముందే తాను చనిపోవాలనుకుంది. అబార్షన్ మొదలైన పిచ్చి పనులవల్ల ఎలాగూ తన ఆరోగ్యం కూడా వేగంగా క్షీణిస్తున్నది. ఓషో పోయాక తనుండి చేసేదేముంది? అన్న ఆలోచన ఆమెలో ఏడాది నుంచీ ఉన్నది. ఒక నెలనుంచీ తీవ్రమైంది. ఆ మూడు రోజులలో ఉధృతమైంది. అందుకే తనంతట తాను చనిపోయింది.

ఓషో కమ్యూన్ లో బయటకు కనపడని నేరపూరిత రహస్యాలు చాలా ఉన్నాయి. ఆరిగాన్ లో వీళ్ళంతా ఉన్నపుడు - ఒక మనిషి బాధ లేకుండా చనిపోవాలంటే ఏ ఏ సింథటిక్ విషాలు తీసుకోవాలి. ఎంత మోతాదులో తీసుకోవాలి? ఏయే విషాలు కలపాలి? మొదలైన వాటిమీద చాలా రీసెర్చి చేశారు. దానికోసం ఒక గ్రూప్ ప్రత్యేకంగా ఉండేది. ఒకవేళ తన ఆరోగ్యం బాగా క్షీణిస్తే, ఈ విధంగా చనిపోవడానికి ముందే ప్లాన్ వేసిన ఓషో ఆయా విషాలు, ఇంజెక్షన్లు తెప్పించి సిద్ధంగా ఉంచుకున్నాడు. ఈ సంగతి ఆయన ఇన్నర్ సర్కిల్ లో వారికి తెలుసు. ఆయన ఆదేశాల మేరకు వాళ్ళే అవన్నీ తెప్పించి పెట్టారు.

వివేక్ కు కూడా ఇవన్నీ తెలుసు. చివరి రోజులలో, ఓషో పర్సనల్ డాక్టర్ తో ఆమె ఎఫైర్ లో ఉన్నదని అంటారు. కనుక ఆ గ్రూపులోని నిపుణుల సహాయంతో ఆమె ఆ ఇంజక్షన్ తీసుకుని ఉండవచ్చు. లేదా అందరూ నమ్ముతున్నట్టు ఎక్కువ మోతాదులో నిద్రమాత్రలు మింగి ఉండవచ్చు. మొత్తం మీద ఆమెది సహజ మరణం మాత్రం కాదు. ఆమెది ఆత్మహత్య అయినప్పటికీ ఇతరులకు తెలియకుండా జరిగినది మాత్రం కాదు. దీనిలో ఓషో ఇన్నర్ సర్కిల్ శిష్యుల పాత్ర ఖచ్చితంగా ఉన్నది.

దశా ప్రభావం

ఆ సమయానికి జాతకంలో శుక్ర - రాహు - గురు దశ జరుగుతూ నేను చెబుతున్నది నిజమే అని రుజువు చేస్తున్నది. సరిగ్గా గోచారంలో కూడా ఇవే గ్రహాలు ఉన్నాయి గమనించండి. జననకాల గురువు మీదకు గోచార రాహు శుక్రులు సంచరించారు. కనుక ఈ మూడు గ్రహాలలోనే ఈ రహస్యం దాగున్నది.

శుక్ర రాహువులు ఎఫైర్లకు సూచకులు. ఓషో డాక్టర్ తో ఈమె ఎఫైర్ అందరికీ తెలిసినదే. ఇతనే కాక ఇంకా కొంతమంది లవర్స్ ఈమెకు ఉన్నారని తెలుస్తోంది. ఓషోను అంతగా ప్రేమించిన ఈమె మళ్ళీ ఇలా చేయడం ఏమిటి? అదేంటో ఆ దేవుడికే తెలియాలి. ఓషో ఆశ్రమంలో జరిగిన చండాలమంతా వర్ణించాలంటే ఆ బ్రహ్మకు కూడా సాధ్యం కాదేమో మరి? అసలీ తప్పంతా ఓషోది. ఫ్రీ సెక్స్ ని ప్రోత్సహించడం ఆయన చేసిన అతి పెద్ద తప్పులలో ఒకటి. దానివల్ల ఎవరూ బాగుపడలేదు. ఎవరికీ ఆధ్యాత్మికత అనేది అందలేదు. చివరకి అందరూ భ్రష్టు పట్టారు. అంతా సర్వనాశనం అయింది.

రాహుగురువులు కలిస్తే గురుచండాల యోగం అవుతుంది. అంటే, గురువుకు సంబంధించిన గోలలో పడి ఈమె తన గొయ్యి తానే తవ్వుకుందని అర్ధమౌతున్నది. దొంగ గురువుల మాయలో పడితే ఇలాగే అవుతుంది మరి !

శుక్ర గురువుల కలయిక ఎటూ తేల్చుకోలేని గందరగోళపు పరిస్థితినిస్తుంది. ఒకరు రాక్షస గురువు, ఇంకొకరు దేవ గురువు కావడమే ఈ పరిస్థితికి కారణం. జాతకురాలి మనసుని ఒకరు ఒకవైపు లాగితే ఇంకొకరు ఇంకోకవైపు లాగుతారు. ఈ స్థితిలో మరేం జరుగుతుంది? ఊహించండి.

ఈమె జాతకంలో శుక్రుడు 11 వ అధిపతిగా ద్వితీయ రోగ స్థానాధిపతి. పునరుత్పత్తి వ్యవస్థకు సంబంధించిన రోగాలను సూచిస్తున్నాడు. ఈమెకు జరిగిన అబార్షన్, పీ ఎమ్మెస్, హిస్టీరికల్ ప్రవర్తనలను పైన వివరించాను. ఈ దశ వీటిని స్పష్టంగా సూచిస్తున్నది. ఆ శుక్రుడు బుధునితో కలసి చావును సూచించే 8 వ ఇంటిలో ఉండటం చూడవచ్చు. ఈ 8 వ ఇల్లు నిస్వార్ధరాశి యైన కుంభం అవుతున్నది. ఇతరులమీద ప్రేమతో చనిపోవడాన్ని సూచిస్తున్నది.

అంతర్దశానాధుడైన రాహువు దశమంలో ఉంటూ మనస్సుకు సూచిక అయిన 4 వ ఇంటిని చూస్తూ, రాక్షసమైన ప్లాన్ ను సూచిస్తున్నాడు. అంటే, విషప్రయోగంతో చనిపోవడమన్నమాట. ఈ రాహువు కుజునికి సూచకుడు. ఆ కుజుడు గురువును సూచించే నవమంలో రవితో కలసి ఖచ్చితమైన డిగ్రీ కంజంక్షన్ లో ఉన్నాడు. అంటే తీవ్ర అస్తంగత దోషంలో పాపార్గళం పట్టి ఉన్నాడు. కనుక గురువుకోసం చనిపోవడాన్ని సూచిస్తున్నాడు.

విదశానాధుడైన నీచగురువు, సప్తమంలో ఉంటూ, ఓషో పాత్రను కూడా సూచిస్తున్నాడు. ఆసలిలాంటి చెత్త ప్లాన్లను తన శిష్యుల బుర్రలలో ఎక్కించింది ఓషోనే. అందుకే ఈ పాపమంతా ఆయనదే అని నేనంటాను.

ఆ సమయంలో వివేక్ పరిస్థితి ఎలా ఉందో ఈ క్రింది లైన్లు చదివితే మీకర్ధమౌతుంది.  

  • ఓషో మీద విపరీతమైన ప్రేమ.
  • ఓషో ఇంకో నెలలో పోతాడని డాక్టర్లు చెప్పడం
  • పూర్తిగా చెడిపోతున్న తన ఆరోగ్యం. 
  • దానికితోడు గజిబిజి మనసు
  • చెడు దశ
  • చెడు గోచారం
  • వేధిస్తున్న పీ ఎమ్మెస్ 
  • అందుబాటులో ఉన్న రకరకాల ఆత్మహత్యా పద్ధతులు
  • వాటిని అమలు చేయగల నిపుణులు
  • ఓషో పోయాక తన గతి ఏమౌతుందో అన్న భయం 
ఇవన్నీ కలిస్తే ఏమవుతుంది? జవాబు నేను చెప్పనక్కర లేదు. మీరే చెప్పండి.

ఇంకా క్లారిటీ కోసం ప్రశ్న శాస్త్ర సహాయం తీసుకుందాం !

సమయం : రాత్రి 10.15 నిముషాలు
తేదీ : 7-9-2020 
ప్రదేశం : హైదరాబాద్

లగ్నాధిపతి శుక్రుడు ఆయుష్హు సూచించే 3 వ ఇంటిలో ఉంటూ, గురువును సూచించే 9 వ ఇంటిలో ఉన్న వక్రశని చేత చూడబడుతున్నాడు. ఈ శని ఈ లగ్నానికి బాధకుడు. అంటే ఏంటి దీనర్ధం? గురువుకు తెలిసే ఈమె చావు జరిగిందని లేదా గురువుకోసం ఈమె చనిపోయిందని అర్ధం.

దీనికి ఇంకా బలాన్నిస్తూ, వక్ర గురువు రహస్యాలకు నిలయమైన 8 వ ఇంటిలో మరణసూచకుడైన ఉచ్చకేతువుతో కలసి ఉన్నాడు. తెలివికి కారకుడైన బుధుడు బుద్ధిస్థానంలో ఉచ్చస్థితిలో ఉంటూ అతితెలివితో కూడిన ప్లాన్ ని సూచిస్తున్నాడు. మనస్సుకు కారకుడైన చంద్రుడు మారకుడైన కుజునితో కలసి చావును సూచించే 12 వ భావంలో ఉంటూ బలవంతపు చావును సూచిస్తున్నాడు.

ఇంతకీ అసలు ప్రశ్న తేలలేదు. వివేక్ చనిపోయినది ఇంజక్షన్ తోనా లేదా నిద్ర మాత్రలు మ్రింగడం వల్లనా? మనఃకారకుడైన చంద్రుడు కుజునితో కలసి ఉన్నాడు. కుజుడు కత్తులకు సూదులకు గాయాలకు కారకుడు. కేతువు సూదిని సూచిస్తాడు. ఆయన ధనుస్సులో ఉఛ్చస్థితిలో ఉంటూ చంద్ర కుజులను చక్కగా చూస్తున్నాడు. ఇంకా చెప్పాలా ఆమె పాయిజన్ ఇంజక్షన్ తీసుకుని చనిపోయిందని? అందుకే హడావుడిగా ఎవరి కంటా పడకుండా ఆమెను దహనం చేసేశారని? 

జాతకవిశ్లేషణలో కనిపించిన నిజాలన్నీ ప్రశ్నలో కూడా స్పష్టంగా కనిపిస్తున్నాయా లేదా? క్లారిటీ వచ్చిందా లేదా? చెప్పండి !

అసలీ పాపమంతా ఓషోదే. తనను నమ్మిన ఎవరికీ ఆయన మోక్షాన్ని ఇవ్వలేకపోయాడు సరిగదా కనీసం ఆ మార్గంలో సరిగ్గా నడిపించలేకపోయాడు. చివరికి అందర్నీ ముంచాడు. తానూ మునిగాడు. ఇదే జరిగింది.

ఓషో ఎందరో గురువులను విమర్శించాడు. చివరకు అవతారాలను కూడా విమర్శించాడు. కానీ తనను నమ్మి వచ్చిన తన శిష్యులను తానేం చేశాడు? నట్టేట ముంచాడు. వివేక్ కూడా అలాగే మునిగింది.

తన తండ్రిని గురించి చెబుతూ 'ఆయన సమాధి స్థితిలో చనిపోయాడు' అని ఓషో అన్నాడు. ఇది పక్కా కట్టుకధ. ఎందుకంటే, తను, తన శిష్యులు ఎవరూ ఇప్పటిదాకా సమాధిస్థితిలో చనిపోలేదు కాబట్టి. వీళ్ళ చావులన్నీ ఘోరంగా ఉన్నాయి. హత్యలు, ఆత్మహత్యలు, అనుమానాస్పద మరణాలు. డ్రగ్స్, ఇలాంటి గోలలో చనిపోయేవాళ్ళు యోగులా? వీళ్ళకు సమాధిస్థితి అందుబాటులో ఉన్నదా? వినేవాడు వెర్రి వెంగళప్ప అయితే ఎన్నయినా చెప్పి నమ్మించవచ్చు !

సోది మాటలు చెప్పడం వేరు. నిజంగా ఆయా ధ్యానస్థితులను సాధించడం వేరు. సోదితో లోకాన్ని నమ్మించవచ్చు. కానీ ప్రకృతిని, దైవాన్ని, కర్మను మోసం చేయలేం. అది జరిగే పని కాదు.

'యధా గురు తధా శిష్య:' అంటే ఇదేగా మరి !
read more " ఓషో ప్రియురాలు 'మా యోగ వివేక్' చంపబడిందా? "

7, సెప్టెంబర్ 2020, సోమవారం

Ma Anand Sheela - జాతక పరిశీలన - 2

ఇప్పుడు  ఈమె జాతకాన్ని సంస్కరించి జనన సమయాన్ని రాబడదాం. నేను చేయబోయే విశ్లేషణ జ్యోతిష్య విద్యార్థులకు చాలా ఉపయోగకరంగా ఉంటుంది. ఇది చాలా కష్టమైన సమగ్రమైన విశ్లేషణ. పైపైన జ్యోతిష్యం వచ్చిన వాళ్లకు అర్ధం కాదు. జాగ్రత్తగా గమనించండి.

జీవితంలో కొన్ని సంఘటనలు తెలిసిన వాళ్ళకు, అంటే కొంచం పెద్ద అయినవాళ్లకు జననకాల విశ్లేషణ చేసే విధానం వేరుగా ఉంటుంది. జనన సమయాన్ని రికార్డ్ చేయకపోతే, చిన్నప్పుడే దానిని రాబట్టే విధానం వేరుగా ఉంటుంది. రెండూ శాస్త్రసమ్మతమైనవే. ఇందులో మొదటిదాన్ని ఇప్పుడు ఉపయోగిస్తున్నాను.

వర్గచక్రాలనేవి భారతీయ జ్యోతిష్య శాస్త్రంలో ఉన్న అద్భుతమైన ఉపకరణాలు. వాటిని వాడి జనన సమయం తెలియని వారి జాతకంలో దానిని ఎలా బయటకు తియ్యవచ్చో ఇప్పుడు చూడండి.

వికీ పీడియా ప్రకారం,  ఆరుగురు సంతానంలో  షీలా చిన్నది. కనుక ఆమెది వృషభ, కర్కాటక, వృశ్చిక, మీన లగ్నాలలో ఏదో ఒకటి అవ్వాలి. 5, 7, 9 భావాలను బట్టి ఆమె మనస్తత్వం, ఆమె గురువు, ఆమె ప్రేమవ్యవహారాలు, పెళ్లిళ్లు వీటన్నిటికీ ఈ నాలుగు లగ్నాలు మాత్రమే సరిపోతాయి..

     

 

28 - 12 - 1949 న రేవతి నక్షత్రం ఉన్నది. అందులోని నాలుగు పాదాలు ఈ లగ్నాలను కలిగి ఉన్నాయి.-

రేవతి  - 2 : 4.08 - 6.23 వృశ్చిక లగ్నం

రేవతి - 3: 11.51 - 13.21 మీన లగ్నం

రేవతి - 3: 15.03 - 17.01 వృషభ లగ్నం

రేవతి - 4: 19.13 - 21.28 కర్కాటక లగ్నం

దాదాపు 17 గంటల వ్యవధిలో ఈ నాలుగు లగ్నాలు ఒక్కొక్కటి దాదాపు రెండు గంటలపాటు ఉంటాయి. వాటిల్లో నుంచి సరియైన లగ్నాన్ని, జనన సమయాన్ని మనం రాబట్టాలి.

రేవతి - 2

ఇది 4.08 - 6.13 మధ్యలో వృశ్చిక లగ్నంతో ఉన్నది. నవాంశలో చంద్రుడు మకరం ఉంటూ, రాశి తుల్య నవాంశ పద్దతిలో అక్కడున్న మూడు గ్రహాలను ఆవరిస్తున్నాడు. మకరరాశి చాలా మొండి మనస్తత్వాన్నిస్తుంది. వీళ్ళు ఓటమిని అంగీకరించే మనుషులు కారు. ఎన్నో ఎదురుదెబ్బలు తిన్నప్పటికీ చివరకు విజయాన్ని సాధిస్తారు.

ద్వాదశాంశలో చంద్రుడు వృశ్చికరాశిలో నీచలో ఉన్నాడు. 4.31 - 4.41 మధ్యలో మకర లగ్నం ఉదయిస్తోంది. నీచ శుక్రుడు నవమంలో ఉంటూ నీచ గురువును సూచిస్తున్నాడు. కనుక జనన సమయం ఈ మధ్యలోనే ఉండాలి.


నవాంశలో 4.37 వరకూ సింహ లగ్నం ఉన్నది. తరువాత కన్యాలగ్నం ఉదయిస్తోంది. ఈమె జీవితానికి సింహ లగ్నమే సరిపోతుంది.  ఎందుకని? అక్కడనుంచి అయితేనే గురువు నవమంలో ఉన్నాడు గనుక. నీచ రాహువు బుద్ధిస్థానంలో ఉన్నాడు గనుక. 4 భావాధిపతిగా మనస్సును సూచిస్తున్న క కుట్రలకు కుతంత్రాలకు కారణమైన 8 లో ఉన్నాడు గనుక. కనుక జనన సమయం 4.31 నుండి 4.37 మధ్యలో ఉండి ఉండాలి.


త్రింశాంశ చక్రం మనస్తత్వాన్ని స్పష్టంగా సూచిస్తుంది. చంద్రుడు మకరంలో శుక్రునితో కలసి ఉంటూ ఈమె జీవితాన్ని సరిగానే చూపిస్తున్నాడు. మకరంలో ఉన్న శుక్రుడు జాతకుడికి సంప్రదాయ విరుద్ధమైన నడవడికనూ, ఒక విధమైన విచ్చలవిడి జీవితాన్ని ఇస్తాడు. లగ్నం కన్య అవుతూ ఈమె తన జీవితంలో చాలా భాగం ఒంటరిగానే ఉండవలసిన పరిస్థితిని చూపుతున్నది. లగ్నంలో ఉన్న కుజుడు సమస్యలకు లొంగని తెలివైన మొండి మనస్తత్వాన్నిస్తున్నాడు.

ఇంకా సూక్ష్మంగా వెళ్ళడానికి షష్ట్యంశ సహాయం తీసుకోవాలి. 4.40 నుండి 4.41 వరకూ మకరలగ్నమే ఉదయిస్తూ నవమంలో నీచ శుక్రునితో, పంచమ లాభస్థానాలలో ఉచ్చరాహు కేతువులతో కలసి ఉన్నది.

నవమ నీచశుక్రుడు ఓషోని సూచిస్తున్నాడు. పంచమ ఉచ్చ రాహువు నేరపూరిత మనస్తత్వాన్నీ ఒకటి కంటే ఎక్కువ ప్రేమ వ్యవహారాలనూ సూచిస్తున్నాడు. 


అష్టోత్తరాంశ చక్రంలో 4.41 వృశ్చిక లగ్నం అవుతూ ఈమె జీవితాన్ని ఇంకా స్పష్టంగా చూపిస్తున్నది. ఎలా? 9 వ అధిపతి చంద్రుడు 3 లో ఉంటూ 9 ని చూస్తున్నాడు. పంచమంలో కేతువు రహస్య ప్లానులను ఇస్తున్నాడు. 6 లో ఉన్న 10 వ అధిపతి ఉచ్చ సూర్యుడు విపరీతమైన అధికారాన్నిస్తున్నాడు. కనుక ఈమె జనన సమయం 4.41 AM అవుతున్నది.

దశను పరిశీలిస్తే బుధ -శుక్ర -రాహు దశ అవుతూ, ఈమె జనన గతిని చూపిస్త్తున్నది. కనుక ఈ విశ్లేషణ ప్రకారం 4.41 ఈమె జనన సమయం అవుతున్నది.



రేవతి - 3

ఈ నక్షత్రపాదంలో చంద్రుడు కుంభరాశిలోకి వస్తున్నాడు. కుంభరాశివారు నిస్వార్ధదానగుణం కలిగి ఉంటారు. సాయపడే తత్త్వం వీరికి పుట్టుకతో వస్తుంది. నా ఉద్దేశ్యం ప్రకారం తన గురువైన ఓషోని ఈమె నిజంగానే మనస్పూర్తిగానే ప్రేమించింది. ఈ మధ్య ఇండియాకు వచ్చినపుడు కరణ్ జోహార్ కి ఇచ్చిన ఇంటర్వ్యూలో కూడా 'నాకిప్పటికీ ఓషో అంటే గౌరవమే' అంది. షీలా ఆరిగాన్ వదిలి పారిపోయినప్పుడు ఓషో ఆమెను నానా బూతులు తిట్టాడు.అయినా సరే షీలా ఆయనను ఒక్కమాట అనలేదు. ఈ కోణంలో ఓషో కంటే షీలా మంచిదని అనిపిస్తుంది.

ద్వాదశాంశలో చూస్తే, కుంభ లగ్నం ఈమె జీవితాన్ని చక్కగా ప్రతిబింబిస్తుందని అనిపిస్తుంది.  నవమంలో రాహువు ఉంటూ ఉచ్చశనిని సూచిస్తున్నాడు. ఈ యోగం ఒక శక్తివంతుడైన అదే సమయంలో దుర్మార్గుడైన గురువును సూచిస్తుంది. నవమాదిపతి శుక్రుడు అష్టమంలో నీచలో ఉంటూ గురువు వల్ల ఈమె జీవితంలో జరిగే గొప్ప నష్టాన్ని చూపిస్తున్నాడు. కుజుడు చంద్రుడు ఏకాదశంలో ఉంటూ శని గురువుల చేత చూడబడుతూ ఆమె పైన ఉన్న అన్నలను అక్కలకు సూచికలుగా ఉన్నారు. కనుక 13.15 నుండి 13.22 వరకు ఉన్న కుంభలగ్నం ఇక్కడ సరిపోతున్నది.

మనస్తత్వాన్ని సూచించే త్రింశాంశలో వృశ్చికలగ్నం ఉదయిస్తోంది. ద్వాదశంలో ఉచ్చశని అనేక మందిని రహస్యకుట్రలతో ముంచడాన్నిస్తాడు. సప్తమంలో బుధుడు ఉంటూ తెలివైన విరోధులను చూపుతున్నాడు. మకరంలో తృతీయంలో ఉన్న చంద్రుడు శుక్రుడు నవమాన్ని చూస్తూ ఒకరి కంటే ఎక్కువమందితో సంబంధాలున్న గురువును ఇస్తున్నారు. 12 లో ఉన్న ఉచ్చ శని సామాన్య జనాన్ని హింస పెట్టడాన్ని సూచిస్తున్నాడు.


షష్ట్యంశ చక్రంలో 13. 19 మరియు 13. 20 లు ఈమె జీవితానికి సరియైన సూచికలుగా ఉన్నాయి. నవమంలో నీచ శుక్రుడు ఉంటూ, నీచుడైన సెక్స్ గురువును చూపిస్తున్నాడు.  

పంచమంలో ఉచ్చ స్థితిలో ఉన్న రాహువు శుక్రునికి కారకుడుగా ఒకటిని మించి ప్రేమ వ్యవహారాలను సెక్స్ సంబంధాలను చూపుతున్నాడు. చతుర్ధంలోని బుధుడు చంద్రుడు ఈమె జీవితంలోని ఒడుదుడుకులకు కష్టాలకు గొడవలకు కారకులౌతున్నారు.

ఇంకా లోతుగా వెళ్లి అష్టోత్తరాంశను చూస్తే 13.19 సరిగ్గా సరిపోతున్నది. తృతీయంలో నీచ గురువుంటూ నవమంలో ఉన్న బుధుని చూస్తూ, ఒక తెలివైన చెడ్డ గురువు చేతిలో ఈమె మోసపోతుందని చెబుతున్నాడు.

ఈ సమయానికి బుధ - రాహు - గురుదశ నడిచింది. రాహువు లగ్నంలో ఉన్నాడు. ఇది గురు చండాలయోగం. గత జన్మనించి వచ్చిన గురుశాపం ఇది. బుధుడు నీచ గురువు కర్మస్థానమైన తృతీయాన్ని, ప్రేమవ్యవహారాలను సూచించే పంచమాన్ని, వివాహాలకు కారకమైన సప్తమాన్ని చూస్తున్నారు.

రేవతి - 3

15.03 నుంచి 17.01 మధ్యలో వృషభలగ్నం ఉదయిస్తోంది.

దీనిలో చంద్రుడు మళ్ళీ కుంభరాశిలోకి వచ్చి ఉన్నాడు. దీని ఫలితాన్ని పైన వివరించాను కనుక మళ్ళీ చెప్పనవసరం లేదు. 15.40 నుంచి 15.52 మధ్య ఉన్న సమయం ఈమె జీవితాన్ని చాలా సరిగా చూపిస్తున్నది. ఎందుకంటే నీచ రాహువు నవమంలో ఉంటూ, గురువుకు కారకుడౌతూ గురుచండాల యోగాన్నిస్తూ ఒక దుర్మార్గుడైన గురువును సూచిస్తున్నాడు.

ద్వాదశాంశను చూస్తే, 15.40 నుండి 15.48 వరకు కన్యా లగ్నం ఉదయిస్తూ, నవమాది పతి అయిన నీచ శుక్రునితో కూడి ఉన్నది. ఆ తరువాత తులాలగ్నం అవుతున్నది. 9 లో 12 వ అధిపతి అయిన సూర్యుడు ఉంటూ, రహస్య కార్యకలాపాలున్న గురువునిస్తున్నాడు. 10 లో గురు శనులుంటూ అమెరికాకు సంబంధం ఉన్నట్టి బలమైన పూర్వకర్మను చూపుతున్నారు. కనుక ద్వాదశాంశను బట్టి జనన సమయం 15.40 నుండి 15.48 మధ్యలో ఉంటుంది.

త్రింశాంశను చూద్దాం. 15.40 నుంచి15.46 మధ్యలో కన్యా లగ్నం ఉన్నది. 15.47 మరియు 15.48 లలో మీనలగ్నం అవుతున్నది. ఈ రెంటిలో మీన లగ్నమే సరిపోతుంది. దీనినుంచి నీచ చంద్రుడు నవమంలో ఉంటూ ఒక రహస్య కుట్రలు చేసే ఒక నీచగురువు నిస్తున్నాడు. రాహువు గురువులు లగ్నంలో ఉండటం భయంకరమైన గురుచండాల యోగం. కనుక ఈ చక్రం మనకు 15.47 మరియు 15.48 అనే రెండు సమయాలనిస్తున్నది.

ఇప్పుడు షష్ట్యంశకు వద్దాం. ఈ రెండు సమయాలకూ ఇది వృషభ లగ్నాన్నే చూపిస్తున్నది. కనుక ఇంకా లోతుకు పోవాలి.

అష్టోత్తరాంశను చూస్తే, 15.47 వృశ్చిక లగ్నమౌతున్నది. త్రుతీయంలో నీచ గురువుంటూ నవమాన్ని చూస్తున్నాడు. ఓషోని సరిగా సూచిస్తున్నాడు. 15.48 అయితే లగ్నం ధనుస్సు అవుతూ ఈమె జీవితాన్ని సరిగా చూపలేకపోతోంది.  కనుక 15.47 అనేది ఈమె జనన సమయం అవుతూన్నది. 

ఈ సమయంలో బుధ - రాహు - శుక్రదశ నడుస్తూ ఈమె జీవిత గమనాన్ని చాలా సరిగ్గా చూపిస్తున్నది.




రేవతి - 4

ఈ నక్షత్ర పాదంలో కర్కాటక లగ్నం 19.13 నుంచి 21.28 వరకూ ఉదయిస్తున్నది.

ద్వాదశాంశ ప్రకారం మకర లగ్నం 20.22 నుండి 20.30 వరకూ ఉన్నది. నవమంలో నీచ గురువుంటూ మళ్ళీ ఓషో ఎలాంటివాడో చూపిస్తున్నాడు. 9 వ అధిపతి బుధుడు లగ్నంలోకి వచ్చి ఈమె జీవితం మీద ఉన్న బలమైన గురు ప్రభావాన్ని సూచిస్తున్నాడు.
4/10 ఇరుసులో ఉన్న రాహు కేతువులు స్వదేశంలోనూ విదేశంలోనూ అపజయాలనిస్తున్నారు. 6 లో ఉన్న గురు శనులు గురువుతో ఇతర శిష్యులతో, సామాన్య జనంతో విరోధాన్నిచ్చారు. 

ఒక్కసారి వెనక్కు వచ్చి నవాంశ ను గమనిస్తే, 20.28 వరకూ వృశ్చిక లగ్నమని, తరువాత రెండు నిముషాలలో అది ధనుర్లగ్నం అవుతున్నదని చూడవచ్చు. ఈ రెంటిలో ఈమె జీవితానికి వృశ్చికలగ్నమే సరిగ్గా సరిపోతున్నది. ఎందుకని? 2/8 ఇరుసులోని నీచ రాహు కేతువులు వివాహ జీవితాన్ని పాడుచేశాయి. 5 లో ఉన్న కుజ చంద్రులు మొండి మనస్తత్వాన్నిచ్చాయి. 6 లోని గురువు గురువుతో శతృత్వాన్నిచ్చాడు. కనుక నవాంశను బట్టి ఈమె జనన సమయం 20.22 నుండి 20.28 మధ్యలో ఉంటుంది.

త్రింశాంశను గమనిద్దాం. 20.22 నుండి 20.28 వరకూ ఇక్కడ మీనలగ్నమే ఉదయిస్తూ బలమైన గురుచండాలయోగాన్ని కలిగి ఉంటున్నది. నవమంలో నీచ చంద్రుడు మళ్ళీ నీచ గురువును చూపిస్తున్నాడు. 8 లో ఉచ్చశని వల్ల లోకాపవాదం వచ్చింది. విలన్ గా ముద్ర వేయబడింది. అయితే, మిగతా విషయాల కోసం ఇంకా లోతులకు వెళ్ళాలి.

షష్ట్యంశ లోకి వెళదాం. 20.22 మరియు 20.23 రెండూ మకర లగ్నమే అవుతున్నది. నీచ శుక్రుడు నవమంలో ఉంటూ ఒక సెక్స్ గురువును చూపిస్తున్నాడు. శుక్ర క్షేత్రమైన పంచమంలో ఉన్న రాహువు బుధుడు ఒకటి కంటే ఎక్కువ ప్రేమ వ్యవహారాలను, పెళ్ళిళ్ళను చూపిస్తున్నారు. శుభ పాపార్గళం పట్టిన లగ్నం ఎటూ తేలని జీవితాన్ని చూపిస్తోంది.

అష్టోత్తరాంశను చూద్దాం. ఇందులో 20.22 అనేది వృషభ లగ్నాన్ని ఇస్తున్నది. నవమలో నీచ గురువున్నాడు. సరిగా సరిపోయింది. 3 లో కుజ చంద్రులు దురుసు మాటను, 4 లో రవి రాహువులు సుఖం లేని జీవితాన్ని, 5 లో శని బుధులు తెలివైన బాధక గురువును ఇచ్చారు. 

ఈ సమయానికి జననకాల దశగా బుధ శని శని దశ నడుస్తున్నది. ఈ దశ ఈమె యొక్క మూడు పెళ్ళిళ్ళను, ప్రేమ వ్యవహారాలను, ఈమెకున్న శాపాలను, వేదనలను, గురువువల్ల పడే బాధలను చూపిస్తున్నది.


ఇప్పటి వరకూ మనం చేసిన విశ్లేషణను బట్టి మనకు నాలుగు సమయాలు వచ్చాయి. వీటిని మనం చిత్రిక పట్టాలి. అవి :

1. 4.41 AM

2. 13.19 PM

3. 15.47 PM

4. 20.22 PM

షీలా జీవితంలో జరిగిన సంఘనలతో ఈ సమయాలను పోల్చి చూచి వీటిలో ఏది సరియైనదో నిర్ణయించాలి. వాటిలో ఓషో మరణం ముఖ్యమైన సంఘటన. ఓషో 1990 జనవరి 19వ తేదీన అనుమానాస్చపద పరిస్థితులలో పూనాలో చనిపోయాడు.

జనన సమయ పరీక్ష

4.41 గంటల జాతకం వృశ్చిక లగ్నం - మీనరాశి

ఆ రోజున రవి- చంద్ర - బుధదశ నడిచింది. సూర్యుడికి గురువుకి సంబంధం లేదు. నీచచంద్రుడు నవమాధి పతిగా ఉంటూ నీచ గురువును సూచిస్తున్నాడు. బుధుడు నవమానికి పన్నెండులో ఉంటూ గురువు చావును సరిగానే చూపిస్తున్నాడు.

13.19 గంటల జాతకం మీనలగ్నం మీనరాశి 

ఓషో చనిపోయిన రోజున ఈ జాతకానికి చంద్ర - చంద్ర - చంద్రదశ నడిచింది. నవమాదిపతి అయిన కుజినిచేత చూడబటటం తప్ప చంద్రునికి గురువు మరణంతో సూటి సంబంధం లేదు. కనుక ఈ సమయం సరిపోదు.

15.47 గంటల జాతకం వృషభలగ్నం మీనరాశి

ఆ రోజున చంద్ర - రాహు - రాహుదశ నడిచింది. నవమమైన మకరం నుండి చంద్రుడు రాహువు తృతీయంలో ఉంటూ ఆయుస్శును పాడుచేస్తున్నారు. చంద్రురుడు మారకుడు. నవమాదిపతి అయిన శని నుండి చంద్రుడు రాహువు ఇద్ద్దరూ 8 ఇంటిలో ఉంటూ గురువు చావును సూచిస్తున్నారు. కనుక ఈ సమయం కరెక్ట్ గా సరిపోతున్నది. 

20.22 గంటల జాతకం కటకలగ్నం మీనరాశి

ఆ రోజున చంద్ర - శని - శనిదశ నడిచింది. ఇది మానసిక వేదనను ఇస్తుంది. శని 8 వ అధిపతి అవుతూ 9 కి 12 గా గురువు చావును సూచిస్తున్నాడు. చంద్రుడు ఆయుస్సును  సూచించే మూడవ ఇంటిలో ఉన్నాడు. శని నాశనాన్నిచ్చే 8 వ ఇంటిలో ఉన్నాడు. చంద్రుడు శని ఇద్దరూ షష్టాష్టకంలో ఉన్నారు.

1965/66 లో ఉన్నత చదువుల కోసం షీలా అమెరికాకు వెళ్ళింది.

20.22 - శుక్ర - చంద్రదశ నడిచింది. శుక్రుడు 4 అవ అధిపతిగా విద్యనిస్తాడు. చంద్రుడు లగ్నాదిపతిగా 9 లో ఉంటూ విదేశ గమనాన్నిచ్చాడు.

15.47 - శుక్ర శుక్ర దశ. లగ్నాధిపతి అయిన శుక్రుడు 9 లో ఉంటూ విదేశీయాత్రనిచ్చాడు.

1981 లో ఓషోకి సెక్రటరీ అయింది. అమెరికాకు వెళ్లారు.

15.47 - శుక్ర - కేతుదశ. కేతువు ఉచ్చబుధునికి కారకుడు. తెలివైన కుట్రను చూపిస్తున్నాడు. భూకారకుడైన కుజునితో ఉంటూ అమెరికాలో భూమి కొనుగోలును చూపుతూన్నాడు. 

20.22 - రవి - రాహు దశ. ఈ సంఘటనను చూపడం లేదు.

1984 నుంచి 85 - ఆరిగాన్ లో గొడవలు - కుట్రలు

20.22 - రవి దశలో బుధ, కేతు శుక్ర దశలు. రవి 6 లో ఉండటం వల్ల గొడవలు ఉంటాయి. కానీ నేరాలు ఘోరాల సూచన లేదు. 

15.47 - రవి దశలో గురు, శని అంతర్దశలు. రవి 8 లో రహస్య కుట్రలిస్తాడు. 9 లో ఉన్న గురువు గురువును సూచిస్తాడు. శని 9 అధిపతిగా బాధకుడు. గురువు చేతిలో కీలుబొమ్మగా మారి నానా నేరాలు చెయ్యడం సూచన ఉన్నది. కనుక  15.47 బాగా సరిపోతున్నది. 

13 Sept 1985 న ఈమె ఓషోని వదిలేసి యూరప్ కి పారిపోయింది.

15.47 chart - రవి - శని - శుక్రదశ నడిచింది. రవి 8 లో ఉంటూ గురువును వదిలెయ్యడం చూపుతున్నాడు. 9 వ అధిపతి అయిన శని బాధకుడు, గురువు వల్ల బాధలను సూచిస్తున్నాడు. లగ్నాధిపతి 9 లో ఉంటూ విదేశాలకు పోవడాన్నిస్తున్నాడు. ఈ సమయం మళ్ళీ సరిపోతున్నది.

పై విశ్లేషణను బట్టి, 28.12.1949 న 15.47 అనేది ఆమె ఖచితమైన జనన సమయంగా నేను భావిస్తున్నాను. 

ఈ సమయానికి ఉన్న వృషభ లగ్న జాతకం ఈమె జీవితంలో అన్ని సంఘటనలను సరిగ్గా చూపిస్తున్నది. మచ్చుకి ఈ క్రింది విషయాలు గమనించండి.

  • 11 వ భావం నుండి ఈమె అయిదుమంది అన్నలు అక్కలు సరిపోతున్నారు.
  • 9 లో ఉన్న నీచ గురువు ఈమె తండ్రిని సూచిస్తున్నాడు. ఆయనొక మహానుభావుడు. 16 ఏళ్ళ వయసులో కూతురిని అమెరికాకు పంపిస్తూ - 'నీకు మొదట తారసపడిన స్నేహితుడిని తొందరపడి పెళ్లి చేసుకోకు. కొంతమందితో సెక్స్ ఎంజాయ్ చేయి. ఆ తరువాత వారిలో నీకు బాగా నచ్చిన ఎవడో ఒకడిని ఎంచుకో' - అన్న జ్ఞానబోధ చేసిన మహా గొప్ప తండ్రి.
  • 9 లోని నీచ గురువు, ఈమె గురువైన ఓషోని కూడా సూచిస్తాడు. ఈమె చేత అడ్డమైన పనులన్నీ చేయించిన ఓషో, చివరకి తను తెలివిగా తప్పుకున్నాడు. ఈమెను జైలు పాలు చేశాడు.
  • 4 లో శని శత్రుస్థాన స్థితి వల్ల సంసార సౌఖ్యం ఉండదు. సుఖం ఉండదు. శాంతీ ఉండదు.
  • 5 లో కుజ కేతువుల వల్ల మహా మొండి మనస్తత్త్వం, చావు తెలివీ ఉంటాయి.
  • లగ్నాధిపతి శుక్రుడు 9 లో మిత్రక్షేత్రంలో ఉండటం వల్ల జీవితమంతా విదేశాలలో నివాసం ఉంటుంది.
  • ఈ జాతకం ఈమె యొక్క గట్టి మనస్సుని కూడా కరెక్ట్ గా చూపిస్తున్నది. నా ఉద్దేశ్యంలో, ఇంకొక ఆడపిల్ల అయితే ఇన్ని కష్టాలను, అది కూడా విదేశాలలో ఉంటూ, ఒంటరిగా తట్టుకునేదే కాదు. వృషభలగ్న జాతకులు అలాంటి వారే. ఎన్ని కష్టాలనైనా తట్టుకుని ధైర్యంగా నిలబడతారు.

ఓషోని వదిలేసి షీలా చాలా మంచిపని చేసిందని నా ఉద్దేశం. ఈమె జీవితాన్ని ఓషో పూర్తిగా భ్రష్టు పట్టించాడు. ఒకవేళ ఇంకా ఇంకా ఓషోతోనే ఉండి ఉన్నట్లయితే ఈమె జీవితం ఇంకా సర్వనాశనం అయిపోయి ఉండేది.

ఓషో ఈమెను నానా బూతులు తిట్టినా ఈమె తిరిగి ఒక్క మాట కూడా అనలేదు. అక్కడే ఈమె ఔన్నత్యము, ఓషోపట్ల ఈమెకున్న గౌరవము బయటపడుతున్నాయి. మొదట లక్ష్మిని, తర్వాత షీలాను, ఆ తర్వాత హాస్యను తన స్వార్ధానికి  వాడుకోబట్టే చివరకు ఓషో హత్య చేయబడ్డాడు. అంతేకాదు, ఆయన ప్రేమికురాలు సేవకురాలు అయిన వివేక్ కూడా చంపబడింది. అవన్నీ ఇంకోసారి చూద్దాం.

ప్రస్తుతం ఈమెకు రాహు దశ జరుగుతున్నది. లాభస్థానంలో ఉన్న రాహువు, గోచారంలో లాభంలో ఉన్న శని ఈమెను మళ్ళీ భారతదేశానికి తెచ్చారు. ఈమె జీవితం మీద సినిమాలు తీయిస్తున్నారు. ఇప్కపుడామెకు 70 ఏళ్ళు వచ్చాయి. కనీసం ఇప్పుడైనా ఈమె జీవితంలో సంతోషం నిండాలని కోరుకుందాం ! 

read more " Ma Anand Sheela - జాతక పరిశీలన - 2 "