"నిజమైన గురువనేవాడు ఎక్కడైనా ఉంటే, ముందుగా తననుంచి నిన్ను విముక్తుణ్ణి చేస్తాడు" - యూజీ

4, ఆగస్టు 2020, మంగళవారం

'యోగతారావళి', 'శాండిల్యోపనిషత్' ప్రింట్ పుస్తకాలు విడుదలయ్యాయి


కరోనా టైమ్స్ లో నేను వ్రాసిన ఈ బుక్సన్నీ ఒక్కొక్కటిగా ప్రింట్ అవుతున్నాయి. 
ఈ క్రమంలో భాగంగా హైదరాబాద్ నుంచి ఈరోజున 'యోగతారావళి', 'శాండిల్యోపనిషత్' అనే రెండు ప్రింట్ పుస్తకాలను విడుదల చేశాము. ఇవి రెండూ యధావిధిగా pustakam.org నుంచి లభిస్తాయి.
read more " 'యోగతారావళి', 'శాండిల్యోపనిషత్' ప్రింట్ పుస్తకాలు విడుదలయ్యాయి "

3, ఆగస్టు 2020, సోమవారం

U.G (Uppaluri Gopalakrishna Murti) - Astro analysis - 5 (చిన్ననాటి బీజాలు)

ఏ మనిషి జీవితమైనా, అతని బాల్యంలోని మొదటి ఏడేళ్ల కొనసాగింపేనని మనస్తత్వశాస్త్రం అంటుంది. మొదటి ఏడేళ్ల జీవితంలో పడిన బీజాలే తరువాతి జీవితాన్ని నిర్మిస్తాయి. చిన్నప్పుడు అణచివేతకు గురైనవాళ్లు వారి తర్వాతి జీవితంలో తిరుగుబాటు దారులౌతారు. చిన్నపుడు భయభ్రాంతులకు  గురైన వాళ్లు పెద్దయ్యాక సాహసకార్యాలు చేస్తారు. చిన్నప్పుడు ప్రేమకు నోచుకోనివాళ్ళు  తరువాతి జీవితంలో ప్రేమకోసం తపిస్తారు, తమకు ఎదురైన అందరిలోనూ  దానిని వెతుక్కుంటారు.

ఆఫ్ కోర్స్ అందరికీ ఇలా జరగాలని రూలేమీ లేదు. కొంతమందికి జన్మంతా బాల్యంగానే నడుస్తుంది. వారి చిన్నప్పటి బీజాలు చివరిదాకా ఉంటాయి. మరికొంతమందిలో మాత్రం ఒక స్థాయినుంచి వాటికి పూర్తి వ్యతిరేకపోకడలు గోచరిస్తాయి. మనం అందరినీ ఒకే గాటన కట్టలేం. ఎవరి తత్త్వం వారిదే. ఈ సృష్టిలో ప్రతి మనిషీ విభిన్నుడే, విలక్షణుడే. కాకపోతే మానవజాతిని కొన్ని కొన్ని గ్రూపులుగా విభజించవచ్చు. అంతే ! మళ్ళీ ఆ గ్రూపులలో కూడా ఎవరి వ్యక్తిగత ప్రయాణం వారిదే. ఎవరి జీవితమైనా ఇంతే ! ఇంతకంటే భిన్నంగా ఏమీ ఉండదు.

మానవజీవితపు మౌలికసమస్యల పరిష్కారానికి లోతైన చింతనతో సమాధానాలు కనుక్కోవాలని ప్రయత్నించే ప్రతి ఆధ్యాత్మికుడూ నా దృష్టిలో ప్రేమకోసం తపించే ఒక ప్రేమికుడే. అతడు బైటకి బండరాయిలాగా కనిపించవచ్చు. కానీ లోలోపల మాత్రం అతి సున్నితమైన హృదయం అతనిలో ఉంటుంది. దానిని తాకగలిగిన వాళ్లకి మాత్రమే దాని విలువ తెలుస్తుంది. అలా తాకగలగాలంటే ముందుగా మనలో అలాంటి హృదయం ఉండాలి. లేకుంటే అలా చెయ్యడం అసంభవమౌతుంది. మనలో లేనిదాన్ని బయట మనమెలా చూడగలం?

యూజీగారు కూడా ప్రేమకోసం జీవితమంతా తపించిన ఒక ఉన్నతమైన ఆత్మ అని నా భావన. ఆయనను బాగా ఎరిగినవారు నా భావాన్ని అర్ధం చేసుకోగలుగుతారు. పైపైన పుస్తకాలు చదివి ఏవేవో భావాలు ఏర్పరచుకున్నవారికి మాత్రం నేను చెబుతున్నది వింతగా అనిపించవచ్చు. కొంచం వివరిస్తే నా భావమేంటో అర్ధం అవుతుంది.

యూజీగారి తల్లి చనిపోయిన వెంటనే తండ్రిగారు మళ్ళీ పెళ్లి చేసుకున్నారు. యూజీగారిని పట్టించుకోలేదు. యూజీగారు తన తాతయ్య సంరక్షణలో పెరిగారు గనుక ఆయనకు తండ్రిప్రేమ తెలియదు. తను పుట్టిన ఏడవరోజునే తల్లి గతించింది గనుక తల్లిప్రేమా తెలియదు. చిన్నప్పుడు తల్లిదండ్రుల ప్రేమకు దూరమైన పిల్లలు పెద్దయ్యాక తిరుగుబాటుదారులుగా తయారౌతారన్నది సత్యం. దీనిని  ఎంతోమంది జీవితాలలో గమనించవచ్చు.

బాల్యంలో బాధలు పడనివారికి నిజమైన ఆధ్యాత్మికత  ఎంతమాత్రమూ అందదనేది  నేనెప్పుడూ చెప్పే మాట ! ఎందుకంటే, అలాంటివాళ్లకే జీవితం పట్ల లోతైన చింతనా, పరిశీలనా కలుగుతాయి. ఇవి రెండూ లేనప్పుడు మతాచారాలు వంటబట్టవచ్చు, పూజలు చెయ్యవచ్చు, కానీ నిజమైన ఆధ్యాత్మికత మాత్రం అందదు. మతాన్ని అనుసరించడానికీ ఆధ్యాత్మికతకూ ఎలాంటి సంబంధమూ లేదు. ఒకవ్యక్తి జీవితమంతా పూజలు పునస్కారాలు సాధనలు చెయ్యవచ్చు. కానీ నిజమైన ఆధ్యాత్మికతను అందుకోలేకపోవచ్చు. ఇంకొకడు ఇవేవీ చేయకపోవచ్చు. కానీ ఆధ్యాత్మికశిఖరాలను అధిరోహించవచ్చు. వినడానికి వింతగా ఉన్నప్పటికీ, ఇది సాధ్యమే ! ఆసలైతే, చాలాసార్లు ఇలాగే జరుగుతుంది కూడా !

ఇలాంటి బాధాకరమైన స్థితులను చిన్నప్పుడు అనుభవించిన పిల్లలకు ఆధ్యాత్మికచింతన గనుక వారి లోలోపల ఉన్నట్లయితే, పెద్దయ్యాక రెండువిధాలుగా రూపుదిద్దుకునే అవకాశం ఉంటుంది. ఒకటి - పూర్తిగా ఒంటరిగా, ఎవరితోనూ సంబంధం లేకుండా ఉండే అంతర్ముఖులుగా నైనా అవుతారు. లేదా రెండు - తమచుట్టూ పెద్ద సంస్థలను నిర్మించుకుని ఎంతోమంది అనుయాయులను  చేర్చుకునే  విశ్వమానవులైనా అవుతారు. అంతిమంగా రెండూకూడా,చిన్నప్పుడు తాము పోగొట్టుకున్న ప్రేమను వెదుక్కునే దారులే అవుతాయి. మొదటిదాంట్లో అయితే, తమను తాము తెలుసుకున్న ఆత్మజ్ఞానులై ఆ స్థితిద్వారా విశ్వమంతటికీ మూలమైన చైతన్యంతో మమేకం అవుతారు. రెండవదానిలో అయితే, అన్ని జీవులలోనూ అభివ్యక్తమౌతున్న విశ్వచైతన్యంతొ అనుబంధం ఏర్పరచుకుని అందరికీ తమ ప్రేమను పంచుతారు. యూజీగారిలో ఈ రెండూ విభిన్నమైన పాళ్ళలో జరిగాయని నా నమ్మకం.

అయితే, ఇలాంటి పిల్లలకు వారి జీవితాలలో రెండువిధాలైన సంఘర్షణలుంటాయి. ఒకటి - తాము పోగొట్టుకున్నదాన్ని పట్ల హృదయపు లోతులలో ఉండే బాధ. రెండు - సాటిమనుషుల ప్రవర్తనవల్ల ఇంకా గాయపడే పరిస్థితి. ఇలాంటి పిల్లలు పెరిగే వయసులో, తమ చుట్టూ ఉన్న సమాజంలోని మనుషులు తమను అనే సూటిపోటి మాటలు ఆ పసిమనసులను తీవ్రంగా గాయపరుస్తాయి. వారు చనిపోయేవరకూ మానని గాయాలుగా అవి వారి లోలోపల ఉండిపోతాయి. ఈ రెండురకాలైన బాహ్య, అంతరిక సంఘర్షణలను వారు ఎదుర్కొనే తీరును బట్టి, వాటిని సమన్వయం చేసుకునే తీరునుబట్టి, లోకులతో వారు ప్రవర్తించే తీరు ఆధారపడి ఉంటుంది.

మన చెత్త సమాజంలో సూటిపోటి మాటలకు కొదవేమీ ఉండదు. అందులోను నూరేళ్ళక్రితం లోకులకు పనీపాటా ఏముంది గనుక? అరుగుల మీద కూచోని అందరినీ కామెంట్ చెయ్యడం తప్ప అప్పట్లోని దగుల్బాజీ సమాజానికి వేరేది ఏమి చేతనైంది? ఆఫ్ కోర్స్ ఇప్పుడు కూడా మనుషుల మనస్తత్వాలలో పెద్ద మార్పేమీ లేదనుకోండి. ముఖ్యంగా ఆడవాళ్ళ విషయంలో అయితే అస్సలు మార్పే లేదు. గాసిప్ అనేది వారిలోనే ఎక్కువ. మానసిక సమస్యలు కూడా వారిలోనే ఎక్కువ.

తమ అసలైన బాధ్యతను తప్పించుకుంటూ, లోకాన్ని మోసం చేస్తున్న నకిలీగురువులలో - చిన్నప్పుడు తనను బాధ్యతారహితంగా గాలికి వదిలేసిన  తన తండ్రిని యూజీగారు చూచారని నా మనస్తత్వ విశ్లేషణ. అందుకే ఆయన గురుద్వేషిగా తయారయ్యారు. చిన్నప్పటినుంచీ తన తండ్రిమీద గూడుకట్టుకున్న కోపం తనకే తెలియకుండా వారిమీద ప్రతిఫలించింది. అందుకే, గురువుల పేరెత్తితే ఆయన అగ్గిమీద గుగ్గిలం అయిపోయేవారు. వారిలోని అనైతికతనూ, బాధ్యతా రాహిత్యాన్నీ కటువైన పదాలతో తూర్పారబట్టేవాడు. ఆ వీడియోలను చూస్తున్నపుడు, ఆయన అనుభవించిన బాధాకరమైన బాల్యం నా కంటికి కనిపించింది.

జ్యోతిష్యశాస్త్రంలో కూడా నవమస్థానమనేది తండ్రికి, గురువులకు ఇద్దరికీ సూచకమౌతుందనేది జ్యోతిష్యశాస్త్రపు ఓనమాలు తెలిసినవారికి విదితమే కదా ! పాశ్చాత్య జ్యోతిష్యశాస్త్రంలో తండ్రిని దశమస్థానం సూచిస్తుంది. గురువును నవమస్థానం సూచిస్తుంది. కానీ భారతీయజ్యోతిష్యశాస్త్రంలో రెండింటినీ నవమస్థానమే సూచిస్తుంది. ఆఫ్ కోర్స్, నన్నడిగితే మాత్రం, తండ్రే గురువై గాయత్రీఉపదేశం చేసే ప్రాచీనకాలంలో అది నిజం కావచ్చునేమో గాని, నేడు మాత్రం పాశ్చాత్యజ్యోతిష్య భావనే సరియైనదని అంటాను. నేటి తండ్రులలో గురుత్వం ఎక్కడుందసలు? అంతా లఘుత్వం తప్ప ! ఇంకా చెప్పాలంటే, చాలామంది తల్లిదండ్రులైతే తమ పిల్లలచేత ఆధ్యాత్మిక పాఠాలు చెప్పించుకునే దురవస్థలో పడి ఉన్నారు. ఇదీ నేటి తల్లితండ్రుల దుస్థితి !

అయితే, మహనీయుల జీవితాలలో ఇలాంటి అవకతవక పరిస్థితులు ఎందుకు కలుగుతాయి? వారి జీవితం వడ్డించిన విస్తరిగా ఎందుకుండదు? అనే ప్రశ్నలు తలెత్తుతాయి. ముందే చెప్పినట్లు, సామాన్యుల జీవితమైనా, అసామాన్యుల జీవితమైనా, వారి పూర్వకర్మను బట్టి, పూర్వ సంస్కారాలను బట్టి జరుగుతుంది. ఆ కర్మ ఒకచోటకు పోగుపడి, ఈ జన్మలో వారి జీవితపథాన్ని నిర్దేశిస్తుంది. అలాంటి మనిషికి ఇదే ఆఖరు జన్మ అయినప్పుడు, ఈ జన్మలో అతడు మోక్షాన్ని లేదా జ్ఞానసిద్ధిని పొందుతున్నపుడు, ఆ పోగుబడిన పూర్వకర్మయే అతని సాధనా మార్గాన్ని కూడా చిత్రిస్తుంది. ఆ క్రమంలోనే అతడి భావ వ్యక్తీకరణా, లోకంతో అతడు ప్రవర్తించే తీరులు నడుస్తాయి.

యూజీగారికి ఇదే జరిగిందని నా ఊహ.

ఆయన జాతకంలో తండ్రిని సూచిస్తున్న దశమాధిపతి గురువు లగ్నంలోనే ఉన్నాడు. అయితే మిధున లగ్నానికి గురువు బాధకుడు. మంచిని చెయ్యడు. కనుక తండ్రివల్ల ఆయనకేమీ మంచి జరుగలేదు. కానీ గురువుయొక్క లగ్నస్థితివల్ల తండ్రి నీడ ఆయనను జీవితమంతా వెంటాడిందని చెప్పవచ్చు. విక్రమస్థానానికి అధిపతి అవుతూ, మాటతీరును సూచించే సూర్యుడు కూడా గురువుతో కూడి ఉన్నందున యూజీగారి మాట సూటిగా, పదునుగా, మింగుడు పడనట్లుగా ఉండేది. అదే ఆసమయంలో గురువు యొక్క బాధకత్వం వల్ల గురువుల గురించి ప్రస్తావన వస్తే మాత్రం ఆయనలోని రుద్రస్వరూపం బయట పడేది. యూజీగారిలో రుద్రాంశ ఉన్నదని నా నమ్మకం. ఆయన మొదటగా పొందిన ఉపదేశంకూడా శివమంత్రమే కావడం గమనార్హం. 

రవి గురువులకు పట్టిన పాపార్గళమూ, వారిమీద ఉన్న కుజుని కేంద్రదృష్టీ గుర్తుంటే, వాదనలు పెట్టుకుని రెచ్చగొట్టేవారితో యూజీగారి మాటలు అంత కరుకుగా ఎందుకున్నాయో అర్ధమౌతుంది.

యూట్యూబులో మనకు లభిస్తున్న వీడియోలు చూసి ఆయనకు మహాకోపమని అనుకుంటే మాత్రం పప్పులో కాలేసినట్లే. ఆయనను రెచ్చగొడితే అలా మాట్లాడేవాడు గాని, మామూలుగా ఉన్నపుడు ఆయన చాలా శాంతమూర్తి అని, అత్యంత మర్యాదస్తుడని, నిజాయితీకి ప్రతిబింబమని ఆయనను ఎరిగినవాళ్లు వ్రాశారు. ఆయనతో ఎన్నో ఏళ్ళు కలసి జీవించిన వాలెంటైన్ అయితే, ఆయనంత మంచిమనిషిని తన జీవితంలో చూడలేదని అన్నది.

ఒక జ్ఞానికి అంత కోపమేంటని ఆ వీడియోలలోనే కొందరు కామెంట్ చేశారు. ఆ కామెంట్ చదివినప్పుడు నాకు నవ్వొచ్చింది. ప్రతిదానినీ అంచనా వేసినట్లు, తీర్పు తీర్చినట్లు, లోకులు జ్ఞానుల పరిస్థితిని కూడా అంచనా వెయ్యబోతారు. వారెలా ఉండాలో వీరు చెప్పబోతారు. ఎంత హాస్యాస్పదం ! జ్ఞానమంటే ఏమిటో, దానిని పొందినవాని పరిస్థితి ఎలా ఉంటుందో, అదంటే ఏమాత్రమూ తెలియని అజ్ఞానులు తీర్పులు తీరుస్తారు. లోకం ఎంత మాయలో ఉందో, ఎంత చవకబారు మనుషులతో నిండి ఉందో, అని నాకెప్పుడూ అనిపించినా, ఇలాంటి లేకిమనుషుల పిచ్చివ్యాఖ్యలు చదివినప్పుడు ఇంకా ఎక్కువగా అనిపిస్తుంది. గురువంటే ఇలా ఉండకూడదని అనుకుంటూ నన్ను కూడా చాలామంది వదిలేసిపోయారు. వారి అజ్ఞానానికి నవ్వుకోవడం తప్ప నేనేం చెయ్యగలను మరి !

జ్ఞానులంటే చచ్చిన శవాలలాగా పడుండాలని, అందరినీ ప్రేమించాలని, శాంతమూర్తులుగా ఉండాలని అనేకులు భావిస్తారు. ఈ భావాలన్నీ పుస్తకాలు చదివి, సినిమాలు చూసి, మతబోధకులు చెప్పే కాకమ్మకబుర్లు విని లోకులు ఏర్పరచుకునే గాలి అభిప్రాయాలు మాత్రమే. అవి నిజాలు కావు. మానవులలో ఎన్ని రకాలున్నాయో, జ్ఞానులలో కూడా ఉంటాయి. జ్ఞానులలో స్థాయీభేదం లేదని, వారందరి స్థాయీ ఒక్కటిగానే ఉంటుందని  కొందరంటారు. ఇది కూడా అజ్ఞానపూరితమైన పొరపాటు అభిప్రాయమే.

ఒక యువకునిగా యూజీగారు అడిగినప్పుడు కూడా రమణమహర్షి ఇదే చెబుతూ, జ్ఞానంలో భేదాలు లేవన్నారు. కానీ నా ఉద్దేశ్యం వేరుగా ఉన్నది. రమణమహర్షి చెప్పినది పూర్తినిజం కాదని నా ఉద్దేశ్యం. 'రమణమహర్షి కంటే నీకెక్కువ తెలుసా?' అని మీరు నన్నడిగితే ఏమీ చెప్పలేను గాని, బ్రహ్మవేత్తలలో కూడా 'బ్రహ్మవిద్, బ్రహ్మవిద్వర, బ్రహ్మవిద్వరేణ్య, బ్రహ్మవిద్వరిష్ట' అంటూ నాలుగు భేదాలున్నాయని యోగవాశిష్టాది అద్వైతగ్రంధాలలో చెప్పబడిన విషయాన్ని వారికి గుర్తుచేస్తాను.

'బాలోన్మత్తపిశాచవత్' అంటూ - జ్ఞానియైనవాడు కొన్నిసార్లు బాలునిలా, కొన్నిసార్లు పిచ్చివానిలా, కొన్నిసార్లు పిశాచంలా తిరుగుతూ ఉంటాడని, ప్రవర్తిస్తాడని కూడా మన శాస్త్రాలలో చెప్పబడిందన్న సంగతి వారికి మనవి చేస్తాను.

ఏతావాతా నేను చెప్పేదేమంటే - జ్ఞానులైనా సరే, వారివారి పూర్వ సంస్కారాలను బట్టి, దానికనుగుణంగా ఈ జన్మలో వారి అనుభవాలను బట్టి, ఇంకా మిగిలి ఉన్న వారి కర్మను బట్టే లోకంతో ప్రవర్తిస్తారు. దానిని చూచి వారి జ్ఞానపు స్థాయిని అంచనా వేసే వెర్రి లోకులు  ఘోరంగా మోసపోయి, ఆ జ్ఞానుల నుంచి పొందవలసిన మేలును కోల్పోతూ ఉంటారు. ఇదే మహామాయ ఆడే ఆట !

జ్ఞానియైనవాడి స్థితిని ఎవరుబడితే వారు గుర్తించగలిగితే, వాళ్ళ జన్మలు ధన్యములైపోవూ? అలా ప్రతివాడూ గుర్తిస్తే ఈ సృష్టి ఆట నడిచేదెట్లా మరి ??

(ఇంకా ఉంది)
read more " U.G (Uppaluri Gopalakrishna Murti) - Astro analysis - 5 (చిన్ననాటి బీజాలు) "

2, ఆగస్టు 2020, ఆదివారం

U.G (Uppaluri Gopalakrishna Murti) - Astro analysis - 4 (గురుద్వేషి)

మనిషి పుట్టిన సమయంలో ఉన్న గ్రహస్థితులు అతని జీవితాన్ని  ప్రతిబింబించినట్లే, ఆ సమయంలో జరుగుతున్న గ్రహదశకూడా అతని జీవితాన్ని సూక్ష్మంగా సూచిస్తుంది. ఆ గ్రహదశలోనే ఆ జాతకుని జీవితం మొత్తం ఒక చిన్న నమూనా 
(capsule) లో నిక్షిప్తం చేయబడి మనకు గోచరిస్తుంది. నా పుస్తకం Medical Astrology Part -1 లో ఈ సూత్రాన్ని విశృంఖలంగా వాడాను. నూరు జాతకాలను విశ్లేషణ చేసిన ఆ పుస్తకంలో ప్రతి జాతకమూ ఈ సూత్రానికి తలొగ్గింది.

యూజీ  గారి జాతకంలో చూస్తే, ఆయన పుట్టినపుడు పునర్వసు నక్షత్రం గనుక గురుమహర్దశ నడుస్తున్నది. అందులోనూ, గురు - రాహు-బుధ - శని దశ నడిచింది. వీటిలో గురు - రాహు సంబంధం గురుఛండాలయోగాన్ని సూచిస్తుంది. అంటే, తీవ్రమైన గురుద్రోహాన్ని చేసినవారు గాని, గురువులతో తీవ్రంగా శత్రుత్వం పెట్టుకునే వారుగాని, గురువుల వల్ల ఘోరంగా మోసపోయేవారు గాని ఈ దశలో పుడతారు.

రాహు-బుధుల యోగం ఎన్నో శాస్త్రాలను తెలుసుకునే అఖండమైన తెలివితేటలను, సాంప్రదాయాన్ని ఏకి పారేసే తిరుగుబాటు ధోరణినీ, కులమతాలకు అతీతమైన  విశాలభావాలనూ  సూచిస్తుంది.

బుధ-శనుల యోగం తల్లికి గండాన్ని, బాధలతో కూడిన దుర్భరజీవితాన్ని, కుమిలిపోయే మనసునూ, అంతర్ముఖత్వాన్నీ సూచిస్తుంది.

గురు-శనుల యోగం దృఢమైన కర్మనూ, తీవ్రమైన కష్టాలతో కూడిన జీవితాన్నీ సూచిస్తుంది.  గురు-బుధయోగం సాంప్రదాయబద్ధమైన నడవడికను సూచిస్తుంది. రాహు-శనుల కలయిక శపితయోగాన్ని సూచిస్తూ, స్థిరమైన ఉద్యోగంగాని, ఆదాయం గాని లేకపోవడాన్ని, ఉన్నదంతా ధ్వంసం కావడాన్ని సూచిస్తుంది.

యూజీగారి జీవితం ఇదిగాక ఇంకేముంది మరి? ఈ విధంగా జననకాలదశను బట్టి ఒకరి జీవితాన్ని క్షుణ్ణంగా ఆ జాతకుడు పుట్టినప్పుడే చెప్పేయవచ్చు. ఇది ప్రాచీనజ్యోతిష్కులకు తెలిసిన అనేక రహస్యాలలో ఒక రహస్యం.

యూజీగారి గతజన్మలలో ఒకదానిలో గురువుల వల్ల ఆయన ఘోరంగా మోసపోయారు. మనస్పూర్తిగా నమ్మిన గురువులు ఆయన కుటుంబాన్ని మోసం చేశారు. వారి అనైతిక ప్రవర్తనవల్ల వారి ఇంటిలో ఘోరమైన పనులు జరిగాయి. వాటిని చూచి ఆయన మనస్సు విరిగిపోయింది. అదే అసహ్యం, గురువులపట్ల కసిగా ఆయన మనస్సులో బలమైన ముద్రగా పడిపోయింది. ఆ సంస్కారం ఈ జన్మకు బదిలీ అయింది. అందుకనే, గురువుల మాటెత్తితే చాలు, ఈ జన్మలో కూడా ఆయన ఉగ్రరూపం దాల్చేవారు.

'ఇదంతా మీకెలా తెలిసింది? ఎలా చెప్పగలుగుతున్నారో ఆయా జ్యోతిష్యసూత్రాలను బహిర్గతం చెయ్యండి' అని మాత్రం నన్నడక్కండి. అన్ని రహస్యాలనూ లోకానికి తెలియజెప్పవలసిన పని నాకులేదు. నమ్మితే నమ్మండి. లేకపోతే మీ ఖర్మ ! నాకు తెలిసినవి బ్లాగులో వ్రాసున్నంతమాత్రాన మిమ్మల్ని నమ్మించవలసిన పని నాకులేదు. ఇప్పటివరకూ నా బ్లాగులో నేను వ్రాసిన జ్యోతిష్యసూత్రాలను కాపీ కొట్టి సమాజాన్ని ఎంతమంది కుహనా కుర్రజ్యోతిష్కులు ఎలా మోసం చేస్తున్నారో, ఎంతెంత డబ్బు సంపాదిస్తున్నారో నాకు బాగా తెలుసు. వారికి ఇంకా కొత్తకొత్త మెటీరియల్ సప్లై చేసి వారి అనైతిక వ్యాపారాన్ని పెంచవలసిన ఖర్మ నాకు లేదు. కనుక ఆ రహస్యాలను వెల్లడించను.

యూజీగారి యూట్యూబ్ వీడియోలను చూస్తే చాలు, గురువులంటే ఆయనకెంత కసి ఉండేదో మీరు అర్ధం చేసుకోవచ్చు. జిడ్డు కృష్ణమూర్తిని పబ్లిగ్గా 'బాస్టర్డ్' అని బహుశా ఇంకెవరూ తిట్టి ఉండరు. ఆయన అలా తిడుతున్న రోజుల్లో ఎందుకు తిడుతున్నాడో తెలీక చాలామంది ' జిడ్డు అంటే ఈయనకు అసూయ. ఆయనలా పేరు సంపాదించ లేకపోయానని ఈయనకు కుళ్ళు. అందుకే అలా తిడుతున్నాడు' అనుకునేవారు. కానీ నిజం అది కాదు. డబ్బు, పేరు ప్రఖ్యాతులు, శిష్యులు ఇలాంటి చెత్తను యూజీగారు ఎప్పుడూ లెక్కచేయ్యలేదు. ఆయన అచ్చమైన అవధూతగా,  స్వచ్ఛమైన జ్ఞానిగా, ఎక్కడా రాజీపడకుండా ఒక ఆధ్యాత్మికసింహం లాగా బ్రతికాడు. ఆయనగాని సమాజాన్ని మోసం చెయ్యాలని అనుకున్నట్లైతే, ప్రపంచవ్యాప్తంగా ఒక బ్రహ్మాండమైన ఆధ్యాత్మికసంస్థకు అధిపతి అయ్యి ఉండేవాడు. ఎందుకంటే, రమణమహర్షికున్న జ్ఞానమూ, వివేకానందునికున్న వాగ్ధాటీ, నిక్కచ్ఛితో కూడిన నిజాయితీ మనస్తత్వమూ,ఒకరిని మోసంచెయ్యని గుణమూ, కుండలినీ జాగృతీ, నిజమైన ఆధ్యాత్మిక సంపదా ఆయనకున్నాయి. వాటిని ఉపయోగిస్తే, లౌకిక సంపదలలో, పేరుప్రఖ్యాతులలో, ఈనాటి సోకాల్డ్ గురువులకంటే ఎక్కడో చుక్కల్లో ఆయన ఉండగలిగేవాడు. కానీ ఆయన అలాంటి ఛండాలపు పనులను చెయ్యాలని ఎప్పుడూ అనుకోలేదు.

'రాధా రాజగోపాల్ స్లాస్' వ్రాసిన ' Lives in the shadow with j. Krishnamurti' అనే పుస్తకం చదివాక ప్రపంచానికి అర్ధమైంది యూజీగారు జిడ్డుని 'బాస్టర్డ్' అని ఎందుకు తిట్టేవాడో? తన తల్లియైన రోసలిన్ కీ జిడ్డుకీ ఉన్న అక్రమసంబంధాన్ని ఆ పుస్తకంలో రాధా రాజగోపాల్ చాలా రసవత్తరంగా వర్ణించింది. అంతేగాక, తన తల్లికి జిడ్డు మూడుసార్లు అబార్షన్ చేయించాడని స్పష్టాతిస్పష్టంగా వ్రాసింది. అసలు తను, జిడ్డు కూతుర్నే అని తనకు బాగా అనుమానమని కూడా వ్రాసింది. ఇవన్నీ చదివాక జిడ్డుపైన ఏర్పరచుకున్న భ్రమలన్నీ లోకానికి ఒక్కసారిగా ఎగిరిపోయాయి. జనాలకి అప్పుడర్ధమైంది యూజీ జిడ్డుని ఎందుకలా తిట్టేవాడో? నన్నడిగితే ఆ పదం చాలా చిన్నదంటాను.

రజనీష్ ని యూజీ 'పింప్' అనేవాడు. రజనీష్ ఆశ్రమంలో జరిగిన విషయాలను దగ్గరనుంచి చూసినవాళ్లకు ఆ మాట చాలా చిన్నపదంగా తోస్తుంది. 1960 లలో తన దగ్గరకు అప్పుడే రావడం మొదలుపెట్టిన తెల్లవాళ్ళను తరచుగా రజనీష్ ఒక మాట అడిగేవాడని ఆ తెల్లవాళ్లే వ్రాశారు అదేంటంటే - 'నువ్వొచ్చి ఇన్నాళ్లయింది. మా ఆశ్రమంలో నీకు నచ్చిన ఎవరైనా అమ్మాయిని తగులుకున్నావా లేదా?'. ఇలాంటి సంబంధాలను రజనీష్ ప్రోత్సహించేవాడు. అంతేకాదు, తన శిష్యులలో డ్రగ్సు స్మగ్లర్లూ, డబ్బుకోసం పడకసుఖం పంచుకునే తెల్లమ్మాయిలూ ఉన్నారన్న విషయం తనకు తెలిసినా వారిని ఏమీ అనేవాడు కాదు. పైగా, జ్ఞానం పొందటానికి నువ్వేం చేసినా తప్పులేదని ఆయా పనులను సమర్ధించేవాడు. చివరకు రజనీష్ ఆశ్రమం ఏమైందో మనకందరికీ తెలుసు. నేను 1998 లో అక్కడ మూడ్రోజులున్నాను. పైపై నటనలు, వేషాలు తప్ప నిజమైన ఆధ్యాత్మికత అక్కడ ఏ కోశానా నాక్కనిపించలేదు. రజనీష్ పుస్తకాలు చదివి, అక్కడ ఏముందో చూద్దామని వెళ్లిన నేను తీవ్ర ఆశాభంగం చెందాను. ఆధ్యాత్మికత తప్ప మిగిలిన చెత్త అంతా నాకక్కడ కనిపించింది. కనుక రజనీష్ ని యూజీ అలా తిట్టడం సబబే అని నా ఉద్దేశ్యం.

సత్యసాయిబాబాను 'క్రిమినల్' అని యూజీ తిట్టేవాడు. ఆయన చనిపోయిన సమయంలో ఆశ్రమంలో నుంచి ఎంత నల్లధనమూ బంగారమూ లారీలకు లారీలు ఎలా తరలించబడిందో అందరికీ తెలుసు. రాజకీయనాయకులు ఎందుకు ఆయన దగ్గరకు పరుగులెత్తేవారో, చివర్లో ఎందుకు అంత గాభరాపడి, ఆశ్రమానికి పరుగులు తీశారో అర్ధం చేసుకోవడానికి పెద్ద తెలివితేటలేమీ  అక్కర్లేదు, ఆశ్రమంలో జరిగిన విద్యార్థుల హత్యలూ, తెల్లమ్మాయిల రేపులూ హత్యలూ బయటకు రాకుండా ఎలా గప్ చుప్ అయ్యేవో అక్కడి స్థానికులకు, అప్పటి పోలీసు అధికారులకూ బాగా తెలుసు. కానీ లోకానికి జరిగే ప్రచారం వేరుగా ఉండేది. కేవలం మార్కెటింగ్ వల్లనే ఆయనొక 'గాడ్ మేన్' అయ్యాడు. ఆయన చేసిన బూడిదమహిమలన్నీ చిల్లర మేజిక్ ట్రిక్కులని వీడియో కెమెరాలు చివరకు పట్టేశాయి. వెరసి ఒక 50 ఏళ్లపాటు అబద్ధప్రచారంతో లోకం ఘోరంగా మోసపోయింది. ఇంటింటా భజనలు జోరుగా సాగాయి. పెద్ద పెద్ద శాస్త్రవేత్తలు, సివిల్ సర్వెంట్లు, మంత్రులు, దేశాధినేతలు అందరూ ఈ బుట్టలో పడ్డారు. అంతెందుకు? మా మేనమామ మద్రాస్ ఐఐటీలో ఫిజిక్స్ ప్రొఫెసర్ గా పనిచేసేవాడు. ఆయన సత్యసాయికి వీరభక్తుడు. నేను చాలా చిన్నపిల్లవాడిని. కానీ నాకెందుకో ఆయన మూఢభక్తి నచ్చేది కాదు. తర్వాత్తర్వాత బాబాబండారం బయటపడ్డాక లోకానికి అర్ధమైంది యూజీలాంటి నిజమైన జ్ఞానులు సత్యసాయిని అలా ఎందుకు తిట్టేవారో?

ఈ 'గురుద్వేషం' అనిన విషయాన్ని జ్యోతిష్యకోణంలోనుంచి చూచినప్పుడు యూజీగారు పుట్టిన గురు-రాహుదశ ప్రాముఖ్యతను సంతరించుకుంటుంది. దీనినే 'ఛిద్రదశ' అని కూడా జ్యోతిష్యశాస్త్రంలో పిలుస్తారు. అంటే, అన్నింటినీ ధ్వంసం చేసి పగలగొట్టి పారేసే దశ అని అర్ధం. అలాంటి దశలో పుట్టిన వ్యక్తి, అందులోనూ తీవ్ర అంతరిక సంఘర్షణతో జ్ఞానసిద్ధిని పొందిన వ్యక్తి, నకిలీ గురువుల్ని అలా తిట్టాడంటే వింత ఏముంటుంది? తిట్టకపోతే వింతగాని?

(ఇంకా ఉంది)
read more " U.G (Uppaluri Gopalakrishna Murti) - Astro analysis - 4 (గురుద్వేషి) "

1, ఆగస్టు 2020, శనివారం

U.G (Uppaluri Gopalakrishna Murti) - Astro analysis - 3 (నాడీజ్యోతిష్యం)

యూజీ గారి ఫిలాసఫీని చెప్పాలంటే కష్టమేమీ కాదు. అసలైన ఆధ్యాత్మికత అంటే ఏమిటో అనుభవంలో తెలిసినప్పుడు, అతికొద్ది మాటల్లో దానిని చెప్పవచ్చు. అది తెలీనప్పుడు, పుస్తకాలు పుస్తకాలు వ్రాసినా చెప్పలేకపోవచ్చు. అసలు ఆయనకంటూ ఒక ఫిలాసఫీ ఉందా అంటే 'ఉంది ', 'లేదు' అని రెండు రకాలుగా చెప్పాల్సి ఉంటుంది. ఎందుకంటే, ఆయన తనదంటూ ఒక కుంపటిని పెట్టుకోలేదు. ఒక సిద్ధాంతాన్ని ఒక పద్ధతిని ఎక్కడా బోధించలేదు. తన అన్వేషణలో 
తాను పోతూ ఆ అన్వేషణా ఫలితంగా కలిగిన తనదైన సహజస్థితిలో తాను బ్రతికాడు. అదే ఆయన ఫిలాసఫీ అంటే అది నిజమే కావచ్చు. కానీ, దానిని మనం ఆచరించలేం. అనుసరించలేం. అనుకరించలేం. ఆయనలా ఆయన బ్రతికాడు. మనలా మనం బ్రతకగలం. అంతే.  'ప్రతిమనిషీ విలక్షణుడే ఒకడిలా ఇంకొకడు ఉండటం సాధ్యంకాద'ని ఆయనకూడా అనేవారు. 

యూజీగారి ఫిలాసఫీని (అలాంటిదంటూ ఒకటుంటే) వివరించడం నా ఉద్దేశ్యం కాదు. ఆయనతో ఎన్నోఏళ్ళు కలిసి ఉన్నవాళ్లు, ఆయనను బాగా ఎరిగినవాళ్ళు ఎంతోమంది ఉన్నారు. వాళ్ళు ఆయన గురించి పుస్తకాలు వ్రాశారు. వారిలో మహేష్ భట్ ఒకడు. కొల్లిమర్ల చంద్రశేఖరరావు గారు ఒకరు. తెల్లవాళ్లు కూడా ఎందరో ఉన్నారు. యూజీగారిని గురించి, ఆయన జీవితాన్ని గురించి తెలుసుకోవాలంటే వాళ్ళు వ్రాసిన పుస్తకాలు చాలా ఉన్నాయి అవి చదవండి. ఇక్కడ కేవలం ఆయన జాతకాన్ని మాత్రమే నేను విశ్లేషించబోతున్నాను. ఆ క్రమంలో ఆయన జీవితమూ, ఆయన భావాలూ నాకర్ధమైన రీతిలో  వ్రాస్తాను. ఎవరైనా  చెయ్యగలిగింది  ఇంతేకదా ! ఉన్నదేదో అది తానున్నట్టుగా  ఉంటుంది. ఎవరికర్ధమైనట్లు వారు దానిని అర్ధం చేసుకోగలుగుతారు. అంతే !

నాకు యూజీ గారితో పరిచయం లేదు. నాకు ఊహా, ఆర్ధిక స్వాతంత్య్రమూ వచ్చిన తర్వాత దాదాపు 25 ఏళ్ళు ఆయన ఈ భూమిపైన దేహంతో ఉన్నారు. దాదాపు ప్రతి ఏడాదీ ఇండియాకు అందులోనూ బెంగుళూరికి  వచ్చేవారు. కానీ చూడలేకపోయాను. అదొక దురదృష్టం. చూస్తే ఏమౌతుంది? చూచినంత మాత్రాన ఏమి ఒరుగుతుంది? అంటే నాదగ్గర సమాధానం లేదు. మహనీయుల గురించి ఇలా అనుకోవడం వల్ల ఉపయోగం లేదని నేనూ ఇంతకు ముందు వ్రాశాను. కానీ కొంతమంది విషయంలో ఇలా అనుకోకుండా ఉండలేం, ఎంత వద్దనుకున్నా సరే !

యూజీగారు 9-7-1918 న 6.12 నిముషాలకు మచిలీపట్నంలో  పుట్టారు. జాతకచక్రాన్ని పక్కనే చూడవచ్చు. అంటే ఇప్పటికి 102 ఏళ్ళు గడిచాయి.

ఆసమయానికి, ఆషాఢశుక్ల పాడ్యమి, మంగళవారం, పునర్వసు నక్షత్రం 4 వ పాదం, కుజహోర నడుస్తున్నది. ఆధ్యాత్మికంగా గతజన్మలలో ఎదిగినా, కొంత కర్మ మిగిలిపోయి ఈ జన్మలో దానిని తీర్చుకుని, ఆ క్రమంలో మోక్షంగాని, ఎంతో ఆధ్యాత్మిక ప్రగతినిగాని పొందే జీవులు ఆషాఢమాసంలో పుడతారు. ఇది ఎంతోమంది జాతకాలలో నిగ్గుతేలిన సత్యం. పునర్వసు నక్షత్రం  కూడా అలాంటిదే. పునర్వసు నక్షత్రానికి రెండు రాశులున్నాయి. ఒకటి మిథునరాశి రెండు కర్కాటక రాశి. మొదటి మూడు పాదాలూ మిధునరాశిలో ఉంటే, చివరిపాదం మాత్రం కర్కాటక రాశిలో ఉంటుంది.  యూజీగారు 4వ పాదంలో పుట్టారు గనుక ఆయనది కర్కాటక రాశి అవుతుంది.

చంద్రుడు 1 వ డిగ్రీలో ఉంటూ చాలా బలహీనుడుగా ఉన్నాడు. కానీ వర్గోత్తమాంశ బలం ఉన్నది. ఈయన మనస్సు బలమైనది అవదు. ఒకవేళ అయితే మాత్రం, ఆ దోషం ఈయన తల్లికి సోకుతుంది. అందుకే, యూజీగారు పుట్టిన 7 వ రోజుననే తల్లిగారు మరణించారు. దీనికి ఇతర కారణాలు ఈ జాతకంలో ఉన్నాయి.

లగ్నాత్ అష్టమాధిపతిగా మారకుడైన శని, మాతృకారకుడైన చంద్రునితో కలసి మరొక మారకస్థానమైన ద్వితీయంలో ఉండటం ఒక బలమైన మాతృగండయోగం. అదే సమయంలో చతుర్ధాధిపతిగా తల్లిని సూచిస్తున్న బుధుడు కూడా అదే శని చంద్రులతో కలసి కుటుంబస్థానంలో, మారకస్థానంలో ఉండటం పై యోగానికి ఇంకా బలాన్నిచ్చింది.

నాడీజ్యోతిష్యంలో ఉపయోగించే ఒక సూత్రాన్ని ఇక్కడ వర్తింపజేస్తాను. లగ్నం మిధునరాశి 29 డిగ్రీలలో ఉన్నది. మాతృస్థానాధిపతి అయిన బుధుడు కర్కాటకం 6  డిగ్రీలలో ఉన్నాడు. వీరిద్దరి మధ్యనా 7 డిగ్రీల దూరం ఉన్నది. అంటే, ఈ జాతకుడు పుట్టిన 7 వ రోజున తల్లికి గండం రాసిపెట్టి ఉన్నదని అర్ధం. సరిగ్గా, యూజీగారు పుట్టిన 7 వ రోజునే ఈయన తల్లిగారు మరణించారు. ఈ  విధంగా, జ్యోతిష్య శాస్త్రాన్ని మనం నమ్మినా నమ్మకపోయినా అది మన జీవితాలలో పనిచేస్తూనే ఉంటుంది. దీనికి వేలాది రుజువులను నా పుస్తకాలలో నా వ్రాతలలో ఇప్పటికే చూపించి ఉన్నాను. ముందుముందు కూడా చూపిస్తాను,

యూజీగారి తాతగారైన తుమ్మలపల్లి కృష్ణమూర్తిగారు ఆ రోజులలోనే పేరున్న సంపన్న లాయరు. ఆయన సాంప్రదాయ చాదస్తం బాగా ఉన్న పాతకాలపు బ్రాహ్మణుడు కావడంతో ఆయనకూ జ్యోతిష్యంపిచ్చి బాగా ఉండేది. యూజీగారి  చిన్నప్పుడే నాడీజ్యోతిష్యం ద్వారా యూజీగారి జాతకాన్ని వేయించాడాయన. దానిలో ఇలా వచ్చింది.    

"ఈ జాతకుడు తీవ్రమైన అంతరిక సంఘర్షణ ద్వారా ఈ జన్మలోనే మోక్షాన్ని పొందుతాడు. కానీ ఈ అంతరిక సంఘర్షణ మంచిగానే ముగుస్తుంది. ఈయనను ఒక గొప్ప గురువు సరియైన దారిలో పెడతాడు. తన 49 వ ఏట ఇతను పునర్జన్మ నెత్తుతాడు. ఇతను ఏ ప్రదేశంలోనూ ఎక్కువరోజులు స్థిరంగా ఉండడు. తిరుగుతూ ఉంటాడు. తన అనుభవజ్ఞానాన్ని అందరికీ పంచుతూ దీర్ఘాయుష్కుడై బ్రతుకుతాడు".

తనకు పుట్టిన పిల్లవాడు ఒక కారణజన్ముడని, సామాన్యుడు కాడనీ, ఎవరో యోగభ్రష్టుడు ఈ విధంగా తన కడుపున పుట్టాడనీ, యూజీ తల్లిగారికి కూడా గట్టినమ్మకం ఉండేది. ఈ నమ్మకానికి ఆధారాలేమిటో మనకు తెలియదు. యూజీగారిని తన గర్భంలో మోసిన 9 నెలల కాలంలో ఆమెకు కలిగిన అనుభవాలు, అసాధారణమైన స్వప్నాలు ఏవైనా ఉండి ఉండవచ్చు. కానీ వాటిని ఎవరైనా గ్రంధస్తం చేశారో లేదో మనకు తెలియదు. ఏ అనుభవాలూ లేకుండా, ఆ విధమైన నమ్మకానికి ఆమె రావడానికి ఆస్కారం లేదు. కనుక, గర్భవతిగా ఉన్నపుడు ఆమెకు తప్పకుండా అతీతమైన అనుభవాలు కలిగాయని మనం నమ్మవచ్చు.

గతజన్మలలో యోగులైన జీవులు, ముఖ్యంగా కుండలినీ సాధకులైనవాళ్ళు,  తల్లి గర్భంలో ఉన్నపుడు సామాన్యంగా కొన్ని కొన్ని అనుభవాలు ఆ తల్లులకు కలుగుతాయి. అవి దర్శనాలు కావచ్చు, దృష్టాంతాలు కావచ్చు లేదా స్వప్నాలు కావచ్చు. వాటిల్లో ఒకటి, జాతి త్రాచుపాములు ఆ తల్లికి కనపడటం, ఆమె చుట్టు ప్రక్కల సంచరించడం. ఒక్కొక్కసారి ఆమె పడుకున్న మంచం మీదకు ఎక్కి ఆమెను చూస్తూ ఉండటం. ఇలాంటి సంఘటనలు మహనీయుల జీవితాలలో జరిగినట్లు  చరిత్ర చెబుతోంది. యూజీగారి తల్లికి అలాంటి అనుభవాలు కలిగాయో లేదో మనకు తెలియదుగాని, యూజీగారు ఉన్న ప్రతిచోటకూ తాచుపాములు రావడం చూచినవాళ్ళు అనేకమంది ఉన్నారు. పుస్తకాలలో ఆయా సంఘటనలను తేదీలతో సహా వ్రాశారు. చదవండి.

మహనీయులైనవాళ్లు చిన్నపిల్లలుగా ఉన్నపుడు కూడా, త్రాచుపాములు వాళ్ళ చుట్టూ తిరగడం సామాన్యంగా జరుగుతుంది. కొంతమంది మహాయోగులకు చిన్నప్పుడు ఎండ తగలకుండా పాములు పడగవిప్పి గొడుగులా పట్టాయని  చెబుతారు. అవి అబద్దాలు కావు. వాటిలో మనకర్ధం కాని నిజాలున్నాయి.

మామూలు తల్లులకు కూడా గర్భవతిగా ఉన్న 9 నెలలపాటు వచ్చే కలలను బట్టి, ఆలోచనలను బట్టి, లోపలున్న బిడ్డ ఎలాంటిదో తేలికగా ఊహించవచ్చు. దీనిని జాతకచక్రం కూడా అవసరం లేదు. కాన్పు అయ్యే తీరును బట్టి కూడా, ఆ సంతానం వల్ల తల్లికి మంచి జరుగుతుందో చెడు జరుగుతుందో గ్రహించవచ్చు. ఇవన్నీ నిజాలే. ఇదొక శాస్త్రం. దీనిలో లోతుపాతులు తెలిస్తే, పుట్టబోయే బిడ్డ జీవితాన్ని ముందే చెప్పవచ్చు. పాతకాలంలో ఇవన్నీ స్త్రీలకూ తెలిసి ఉండేవి. వీటిని బట్టి 'గొడ్డొచ్చిన వేళా బిడ్డొచ్చిన వేళా' లాంటి కొన్ని సామెతలు కూడా పుట్టుకొచ్చాయి.  వీటిల్లో తరతరాల  అనుభవం దాగి ఉంటుంది.

యూజీగారు పుట్టిన 7  వ రోజున పిల్లవాడిని తన తండ్రికి అప్పగిస్తూ 'ఈ అబ్బాయి తప్పకుండా కారణజన్ముడే. జాగ్రత్తగా చూచుకోమ' ని చెప్పి తల్లిగారు చనిపోయింది.

యూజీ గారికి జ్యోతిష్యమంటే నమ్మకం లేదు. కానీ, సాంప్రదాయ బ్రాహ్మణకుటుంబాలలో పెరిగిన పిల్లలకందరికీ కొద్దో గొప్పో జ్యోతిష్యం వచ్చినట్లే, ఆయనకు కూడా జ్యోతిష్యం వచ్చు. పెరిగి పెద్దయ్యాక చికాగోలో ఉన్నపుడు ఆయన హస్తసాముద్రికం కూడా నేర్చుకున్నాడు. కానీ వాటిని ఆయన సీరియస్ గా తీసుకునేవాడు కాదు. సరదా కాలక్షేపం కోసం వాటిని చర్చించేవాడు. లేదా తన సమక్షంలో జ్యోతిష్కులు చర్చిస్తుంటే సరదాగా వినేవాడు.

ఆయన మాటల్లో చెప్పాలంటే - 

'నాకు జ్యోతిష్యమంటే నమ్మకం లేదు. కానీ నా జాతకాన్ని ఎవరైనా జ్యోతిష్కులు పరిశీలిస్తే, మొదట్నుంచీ నా జీవితంలో గ్రహప్రభావం ఎలా పనిచేసిందో తెలుసుకోవడానికి వారికి ఉపయోగపడుతుంది. నా వరకు నామీద గ్రహాల ప్రభావం లేదు'.

ఇది నిజమే. మనోభూమికయైన ద్వంద్వస్థితిని  దాటి, అఖండమైన విశ్వచైతన్యంతొ అనుసంధానమైన స్థితిలో ఉన్న వారిమీద గ్రహాల ప్రభావం ఉండదు. కానీ వారి దేహం పంచభూతాత్మకమే గనుక దానిమీద తప్పకుండా ఉంటుంది. ఎందుకంటే, శ్రీరామకృష్ణుల వంటి అవతారపురుషుల జీవితాలు కూడా వారి జాతకచక్రాన్ని బట్టే జరిగాయి. వారి మనస్సు గ్రహాల ప్రభావానికి, దేహస్పృహకు అతీతంగా ఉండవచ్చు. కానీ దేహం మాత్రం గ్రహప్రభావాన్ని తప్పుకోలేదు. ఈ భూమిమీద పుట్టిన ఎవరికైనా ఇది తప్పదు, అది సామాన్యులైనా సరే, అసామాన్యులైనా సరే !

(ఇంకా ఉంది)
read more " U.G (Uppaluri Gopalakrishna Murti) - Astro analysis - 3 (నాడీజ్యోతిష్యం) "