“అడ్డు లేనిది, అంతు లేనిదే అమ్మ" -- జిల్లెళ్ళమూడి అమ్మగారు

27, నవంబర్ 2013, బుధవారం

మాగ్నస్ కాల్సన్ (ప్రపంచ చదరంగ చాంపియన్) జాతకం

మాగ్నస్ కాల్సన్ నేటి వరల్డ్ చెస్ చాంపియన్.చెన్నైలో జరిగిన పోటీలో విశ్వనాధన్ ఆనంద్ ని ఓడించి టైటిల్ గెలుచుకున్నాడు.ఇతని జాతకం ఒకసారి పరిశీలిద్దాం.

ఇతను 30-11-90 న నార్వేలో టాన్స్ బెర్గ్ అనే ఊళ్ళో పుట్టినాడు.జనన సమయం తెలియదు.కనుక విభిన్నములైన నాడీ విధానాలతో ఇతని జాతకాన్ని స్థూలంగా చూద్దాం.

ఇతను శుక్రనక్షత్రంలో శుక్రవారం రోజున పుట్టినాడు.కనుక శుక్రునికి ఇతని జీవితంలో మంచి ప్రాధాన్యత ఉండాలి.పైగా శుక్రుడు అమాత్యకారకుడయ్యాడు.కనుక ఇతని వృత్తిని కూడా శుక్రుడే నిర్ణయిస్తాడు.ఆ శుక్రుడు గూడత్వాన్ని సూచించే వృశ్చికంలో ఉంటూ,వెనుకవైపు సూర్యునీ,ముందు బుధునీ శనినీ కలిగి ఉన్నాడు.అంటే తండ్రి తోడ్పాటుతో,తెలివిని ఉపయోగించి ఆడేఆట అయిన చదరంగం వృత్తిగా కలిగిన వాడౌతాడని గ్రహములు సూచిస్తున్నాయి.

ఇతని జాతకంలో ఆత్మకారకుడు శని అయినాడు.ఆరోజున చంద్రునికి ఆత్మకారకత్వం రాదు.ఇతర గ్రహములు ఆ స్థానమును ఆక్రమించలేవు.కనుక కారకాంశ ధనుస్సు అవుతుంది.శనికి వర్గోత్తమాంశ కలిగింది.రవి కూడా వర్గోత్తమాంశలోనే ఉన్నాడు.ఈ రెంటివల్ల ఇతనికి వృత్తిపరమైన అదృష్టమూ,పేరుప్రఖ్యాతులూ తేలికగా వస్తాయని అర్ధమౌతుంది.చదరంగంలో బాలమేధావి అవడం ఈ రెండుగ్రహాల వరమే.

ధనుస్సులో శని,బుధుడు,యురేనస్,నెప్ట్యూన్ లున్నారు.వీరిలో యురేనస్సూ సూర్యుడూ ఖచ్చితమైన ద్విర్ద్వాదశస్థితిలో ఉన్నారు.దీనివల్ల ఉన్నట్టుండి సరియైన అంత:స్ఫురణ కలుగుతుంది.గురువూ నెప్త్యూనూ ఖచ్చితమైన షష్టాష్టక స్థితిలో ఉన్నారు.దీనివల్ల మతాభినివేశమూ అదృష్టమూ ఉంటాయి.

మేషరాశిలోని చంద్రమంగళయోగం వల్ల ఓటమిని అంగీకరించని పట్టుదల ఉంటుంది.శని బుధుల కలయిక వల్ల ఓర్పుగా ఆలోచించి ఆడగల నేర్పు వస్తుంది.గజకేసరీ యోగం అదృష్టాన్నిస్తుంది.

కర్మకారకుడైన శనితో బుధుని కలయికవల్ల ఆలోచనాశక్తితో కూడిన జీవిక ఉంటుందని సూచన ఉన్నది.చంద్రలగ్నాత్ తృతీయాధిపతి కూడా బుధుడే అవడం గమనార్హం.కనుక గంటలు గంటలపాటు స్థిరంగా ఆలోచించి ఓర్పుగా ఎత్తుకు పైఎత్తులు వేసి ఆడవలసిన చదరంగం లో ప్రావీణ్యం కలిగింది.

శనికి వచ్చిన ద్వితీయ తృతీయాధిపత్యములవల్ల,క్రీడలుగాని,రచనలుగాని, సమాజంతో కమ్యూనికేషన్ వల్లగాని ధనార్జన ఉంటుందని తెలుస్తుంది.ఈ మూడూ ఇతని జీవితంలో నిజాలయ్యాయి.

శని వెనుకగా వరుసగా సూర్య,శుక్ర,బుధులు ఉండటం వల్ల,ఇతని వృత్తిలో పేరు ప్రఖ్యాతులూ,విలాస జీవితమూ,తెలివితో కూడిన ఆలోచనాశక్తీ తోడుగా ఉంటాయన్న సూచన ఉన్నది.

శుక్రునికి వచ్చిన అమాత్యకారకత్వంవల్ల,చిన్నప్పుడే మోడలింగ్ చేసే అవకాశాలు వచ్చాయి.ఉత్పత్తులకు ప్రోమోటింగ్ మోడల్ గా అవకాశాలను చదరంగ విజయాలు కలిగించాయి.

ఎంత క్రీడాసామర్ధ్యం ఉన్నప్పటికీ చదరంగం వంటి ఆటలో స్ఫురణశక్తి చాలా ప్రధానం.అటువంటి అంత:స్ఫురణను ఇవ్వడంలో శన్యతీతగ్రహాలకు చాలా ప్రముఖపాత్ర ఉంటుంది.ఆ కోణంలో యురేనస్ నెప్త్యూన్ల పాత్ర స్పష్టంగా కనిపించే మరొక్క జాతకం ఇతనిది.

సరియైన జననసమయం లేకున్నా,నాడీజ్యోతిష్య విధానములు ఉపయోగించడం వల్ల జాతకాన్ని స్థూలంగా చదవవచ్చు.చాలావరకూ జీవిత దిశనూ దశనూ గ్రహించవచ్చు అనడానికి ఇలాంటి జాతకములే ఉదాహరణలు.
read more " మాగ్నస్ కాల్సన్ (ప్రపంచ చదరంగ చాంపియన్) జాతకం "

23, నవంబర్ 2013, శనివారం

సచిన్ టెండూల్కర్ జాతకం

సచిన్ టెండూల్కర్ మొన్న నవంబర్ 16 న క్రికెట్ నుంచి రిటైరయ్యాడు.ఆ సందర్భంగా అతని జాతకం చూద్దాం.ఇతని జననసమయం కూడా ఖచ్చితమైనది దొరకడం లేదు.ప్రముఖవ్యక్తులు వారి జనన సమయాన్ని దాచి ఉంచుతారు.దానికి రకరకాలైన కారణాలుంటాయి. ఇతను 24-4-1973 న ముంబైలో పుట్టినాడు. జనన సమయాలు మధ్యాన్నం 1 అనీ,2.47 అనీ సాయంత్రం 4.20 అనీ రకరకాలుగా దొరుకుతున్నాయి. వీటిలో ఏది సరియైన సమయమో తేలికగా కనిపెట్టవచ్చు.కొన్ని స్థూలమైన విషయాలద్వారా మాత్రమే దీనిని గమనిద్దాం.

సూర్యుడూ కుజుడూ ఇతని జాతకంలో ఉచ్ఛలో ఉన్నారు.కుజుడు క్రీడలకు దూకుడుతనానికి కారకుడు కనుక క్రికెట్ ఆటలో అంతపేరు సంపాదించాడు. కన్యాలగ్నం అయితే మాత్రమే ఇది సాధ్యం.ఎందుకంటే అప్పుడు మాత్రమే కుజుడు తృతీయాధిపతి అవుతాడు అనే వాదనతో నాకు కొన్ని సందేహాలున్నాయి.కనుక ప్రస్తుతం ఆ విషయం అలా ఉంచుదాం.

సూర్యునివల్ల సమాజంలో మంచి పేరు ప్రఖ్యాతులూ, ఆదరణా, విజయ పరంపరలూ కలిగాయి.గురువు నీచలో ఉన్నాడు.కనుక సత్యసాయిబాబాకు భక్తుడయ్యాడు.సత్యసాయిబాబా జాతకంలో కూడా గురువు నీచలో ఉండటం గమనార్హం.కార్మిక్ సిగ్నేచర్స్ ఆ విధంగా పనిచేస్తాయి.

ఇతనిది ప్రేమవివాహం.కర్కాటక కన్యాలగ్నాలకు ఈజాతకం ప్రకారం ప్రేమవివాహం సాధ్యమే.కనుక ఈరెంటిలో ఏదో ఒకటి అయి ఉండాలి.ఇతని భార్య ఇతనికంటె ఆరేళ్ళు పెద్దది.ఈ రెండు లగ్నాలకూ సప్తమదోషం ఉన్నప్పటికీ ఎక్కువగా కర్కాటక లగ్నమే సూచితం అవుతుంది.ఎందుకంటే అప్పుడే సప్తమానికి శని ఆధిపత్యం వస్తుంది.పైగా భార్య డాక్టర్ అయ్యే యోగం కర్కాటక లగ్నానికే ఎక్కువగా ఉన్నది.

కెరీర్ పరంగా చూచినా కన్యాలగ్నం అయితే దశమకేతువు వల్ల కెరీర్ అంత బాగుండదు.అదే కర్కాటకం అయితే దశమంలోని ఉచ్ఛసూర్యుని వల్ల బ్రహ్మాండంగా ఉంటుంది.కనుక కర్కాటకలగ్నమే సరియైనది అని అనిపిస్తున్నది.అలాంటప్పుడు జననసమయం మద్యాన్నం ఒంటిగంట ప్రాంతం అవుతుంది.అప్పుడు వివాహసమయానికి(24-5-1995) కుజ/గురు/బుధదశ జరిగింది.కుజగురులు సప్తమంలోనూ బుధుడు చంద్రలగ్నాత్ సుఖస్థానం లోనూ ఉండటం చూస్తే ఈ సంఘటన సరిగ్గా సరిపోతుంది.కనుక మధ్యాన్నం ఒంటిగంట సమయమే సరియైనది.

ప్రస్తుతం ఇతను కెరీర్ నుంచి విరమించుకున్నాడు.భారతరత్న బిరుదు కూడా ఇవ్వబడింది.దశాపరంగా పరిశీలిద్దాం.

ప్రస్తుతం ఇతని జాతకంలో రాహు/శుక్ర/గురు/కేతుదశ జరుగుతున్నది. శుక్రునితో కలిసి ఉన్న సూర్యుడు అత్యున్నత పురస్కారం ఇచ్చాడు.శుక్రుడు ఈ లగ్నానికి బాధకుడు,గురువు నీచలోఉండి కుజునికి దోషాన్ని ఆపాదిస్తున్నాడు,కేతువు విడిపోవడాన్ని సూచిస్తాడు.కనుక కెరీర్ ముగిసింది.

ఇతని జాతకంలో కూడా వ్యతిరేక కాలసర్పయోగం ఉందని కొందరు అంటారు. కాని అలాంటియోగం అంటూ అసలు ఏదీలేదని ఇతని అప్రతిహతమైన కెరీర్ వల్ల తెలుస్తున్నది.ఆ పదం కూడా కొందరిసృష్టి మాత్రమేగాని నిజం కాదన్న విషయం కూడా నిజమే.

తృతీయంలోని యురేనస్ ప్లూటోలు క్రీడలలో దూకుడును ఇస్తాయి.ఇతని జాతకంలో ఈ రెంటిలో యురేనస్ బాగా బలంగా ఉన్నది.ఎందుకంటే యురేనస్ కుజనక్షత్రంలో ఉండి ఖచ్చితమైన పంచమదృష్టితో ఉచ్ఛకుజుడిని చూస్తున్నది.కనుకనే డోనాల్డ్ బ్రాడ్మన్ కూడా ఇతన్ని మెచ్చుకునే విధంగా విచిత్రంగా టెక్నిక్ నూ దూకుడునూ కలగలిపి ఆడగలిగాడు.

పంచమంలో నెప్ట్యూన్ ప్రేమవివాహాన్ని ఇస్తుంది.ఇతని జాతకంలో ఇదికూడా నిజం కావడం చూడవచ్చు.నెప్ట్యూన్ శనినక్షత్రమైన అనూరాధలో ఉండటం వల్ల తనకంటే పెద్దదైన అమ్మాయిని ప్రేమించి పెళ్లి చేసుకున్నాడు.

యురేనస్ నెప్ట్యూన్ ప్లూటోలను నేనుకూడా మొదట్లో పరిగణించేవాడిని కాను.కాని తర్వాత్తర్వాత నా అభిప్రాయాలు మార్చుకున్నాను.వాటిని కూడా జాతకంలో లెక్కలోకి తీసుకుంటేనే ఎక్కువ క్లారిటీ వస్తుంది అనేమాట నిజమే.

తృతీయంలోని ఘటికాలగ్నం కూడా క్రీడలవల్ల వచ్చే పేరుప్రఖ్యాతులను సూచిస్తున్నది.

ఈ రకంగా జాతకచక్రాన్నిబట్టే జీవితం జరగడం ఎవరి జీవితంలో చూచినా గమనించవచ్చు.ఏరంగంలో ఎంత గొప్పవారైనా గ్రహాలకూ జాతకానికి అతీతులు కారు.కాలేరు.
read more " సచిన్ టెండూల్కర్ జాతకం "

20, నవంబర్ 2013, బుధవారం

జాబులూ-జవాబులూ

చాలారోజులనుంచీ చిక్కటి వేదాంతవిషయాలను చదివి తలవేడెక్కిన నా అభిమానుల కోసం ఒక చిన్న కామెడీ బ్రేక్.

నాకు చాలా మెయిల్స్ వస్తుంటాయి.వాటిల్లో రకరకాల మెయిల్స్ ఉంటాయి.రకరకాల భాష వాడబడుతూ ఉంటుంది.వాటిలో మెచ్చుకుంటూ వచ్చె మెయిల్స్ ఇక్కడ వ్రాసి ఉపయోగం లేదు.అసలే ఎప్పుడెప్పుడు విమర్శిద్దామా అని కాచుక్కూచున్న నా ఆప్తమిత్రులకు మళ్ళీ స్వోత్కర్షగా కనిపిస్తుంది.కనుక నన్ను విమర్శిస్తూ తిడుతూ బెదిరిస్తూ వచ్చిన కొన్ని మెయిల్స్ నూ వాటికి నేనిచ్చిన జవాబులనూ ఇక్కడ చదవండి.మెయిల్స్ యధాతధంగా ఇవ్వడం లేదు.వాటిని ఎవరు వ్రాశారో ఆ మెయిల్ ఐడిలు కూడా వ్రాయను.వాటిలోని ముఖ్యమైన పాయింట్లు మాత్రమే ఇస్తున్నాను.

నిజాయితీగా అడిగితే ఏ సందేహం అయినా నేను తీరుస్తాను.ఎగతాళిగా అడిగితే అదే ధోరణిలో జవాబు వస్తుంది.బెదిరిస్తే అదే తీరులో వారికీ జవాబు వెళ్తుంది.మంచిగా అడిగితే మహామంచిగా సమాధానం ఇస్తాను.తిక్కగా మెయిల్ ఇస్తే మహాతిక్కగా జవాబు వెళ్తుంది.అడిగేవారు వాడిన భాషను బట్టి నాజవాబు ఉంటుంది.అద్దం మన ముఖాన్నే చూపిస్తుంది.అది గమనించండి.

>>మీకు కోపం చాలా ఎక్కువట కదా?

నా జవాబు:-అయితే మీకొచ్చిన నష్టం ఏంటట?మీకన్నీ తక్కువగా ఉన్నాయా?ముందు మీ సంగతి చూచుకోండి.తర్వాత నా సంగతి ఆలోచిద్దురుగాని.

>>మొదట్లో నువ్వు ఒక మంచి సాధకుడివి అనుకున్నాను.కాదని తర్వాత తెలిసింది.

నా జవాబు:-చాలా త్వరగా నీకు జ్ఞానోదయం అయినందుకు సంతోషం.ఏ పనీ లేకుంటే ఒక పిల్లిని వెతుక్కో.అయినా నీ బోడి సర్టిఫికేట్ ఎవరిక్కావాలి?

>>మన మతానికి వక్రభాష్యం చెబుతూ దాన్ని నవ్వులపాలు చేస్తున్నందుకు నిన్ను ఉరి తియ్యాలి.

నా జవాబు:-దమ్ముంటే వచ్చి ఉరితియ్యి.లేదా నీఅడ్రస్ చెప్పు నేనే వస్తాను. ఎవరు ఏమౌతారో చూద్దాం.

ఇదే ధోరణిలో అడగబడిన ఇంకొక మర్యాద పూర్వకమైన ప్రశ్నకు ఇలా జవాబిచ్చాను.

>>మీరు వ్రాసేవి బాగానే ఉంటాయి.కాని అప్పుడప్పుడూ మీరు కొంచం పెడధోరణిలో మాట్లాడతారు.అక్కడే మనస్సు చివుక్కుమంటుంది.

నా జవాబు:-చూడమ్మా.నా అనుభవాన్నీ,తర్కాన్నీ,మన సనాతన సాహిత్యాన్నీ ఆధారంగా చేసుకుని నేను మాట్లాడతాను.ఊహించి మాట్లాడను.నేను ఎక్కడ పెడగా వ్రాశానో ఆ పాయింట్స్ వ్రాస్తే,ఏ సందర్భంలో నేను అలా వ్రాయవలసి వచ్చిందో,మీకు జవాబు ఇవ్వగలను.తర్కబద్ధమైన మర్యాదపూర్వకమైన చర్చకు నేను ఎప్పుడూ సిద్ధమే.

>>వెంటనే నీ బ్లాగ్ మూసేసి నీ చెత్త వ్రాతలు ఆపకపోతే తీవ్ర పరిణామాలు ఎదుర్కోవలసి ఉంటుంది.

నా జవాబు:-నీలాంటి జఫ్ఫాగాళ్ళని చాలామందిని చూచాను.నీకూ,నీవెనుక ఉండి ఇలాంటి మెయిల్స్ వ్రాయిస్తున్న పేడివెధవలకూ ఇదే నా చాలెంజ్. నీకు ధైర్యంఉంటే తర్కబద్ధంగా నాతో వాదించి నావాదన తప్పని నిరూపించు. లేదా ఇలాంటి మెయిల్స్ వ్రాయడం ఆపి దాసోహం అని శరణు కోరు.అప్పుడు నిన్ను క్షమిస్తాను.అయినా నాబ్లాగ్ ముయ్యమని ఆజ్ఞాపించడానికి నువ్వెవడివి?

>>నిన్ను అనుసరిస్తున్న నీ గ్రూప్ లోని తెలివితక్కువ సభ్యులందరికీ నా సానుభూతి.

నా జవాబు:-ఏం నాయనా? ఎందుకంత జెలసీ?నిన్ను నా గ్రూప్ లోనుంచి బయటకి తరిమేసిన జ్ఞాపకం నాకు లేదే?అవున్లే పనికిమాలిన డబ్బాగాళ్ళని గుర్తుపెట్టుకునే అలవాటు నాకు లేదు.

>>నీ వ్రాతలు చూస్తుంటే వళ్ళు మండుతోంది.

నా జవాబు:--బక్కెట్ చన్నీళ్ళలో కేజీ ఈనో కలుపుకుని స్నానం చెయ్యి.మంట తగ్గుతుంది.

>>నాయనా ఒక పెద్దవాడిగా సలహా ఇస్తున్నాను.అహంకారం తగ్గించుకో.

నా జవాబు:- నాకు బొడ్డుకోసి పేరుపెట్టింది మీరేకదా తాతగారు? ఆ తప్పు మీదే.అయినా మీకు మీరే పెద్దరికం ఆపాదించుకుంటున్నారెంటి? దీనిని మీ అహంకారం అనుకోవాలా?లేక అజ్ఞానం అనుకోవాలా?

>>రమణమహర్షీ రామక్రిష్ణుడూ పరమశాంతంగా ఉండేవారు.మీకు ఇంత కోపం ఏమిటి?

నా జవాబు:-మీ మెప్పుకోసం వాళ్ళను నేను అనుకరించలేను. అనుసరించగలను.వాళ్ళు చెయ్యాలనుకుని చెయ్యలేకపోయినవి ఇలా నాచేత చేయిస్తున్నారు.మీకందరికీ ఎలా జవాబులు చెప్పాలో వాళ్ళే నా కలలోకి రోజూవచ్చి నేర్పిస్తూ ఉంటారు.

>>నీకు మార్షల్ ఆర్ట్స్ వచ్చా? ఛా? జోకా?

నా జవాబు:-వచ్చో రాదో మాటల్లో ఎలా తెలుస్తుంది?చేతల్లో చూస్తానంటే నేను సిద్ధమే.ఎరీనా ఎక్కడో చెప్పు.నేనే వస్తాను. అయితే ముందుగా ఒక అంబులెన్స్ సిద్ధం చేసుకో. ఫైట్ మొదలైన అయిదు నిముషాల తర్వాత నాతో మాట్లాడటానికి నీకు చాన్సుండదు.ఎందుకంటే నీవు కోమాలో ఉంటావు మరి.

>>మీ వ్రాతల్లో రానురాను స్వోత్కర్ష ఎక్కువౌతోంది.డబ్బా కొట్టుకోవడం కొంచం తగ్గించండి.

నా జవాబు:-పోనీలేమ్మా. నేను నాడబ్బానే వాయించుకుంటున్నాను.మీలాగా అవినీతి రాజకీయనాయకులదో, మీ అభిమాన చెత్తహీరోలదో,మిమ్మల్ని మోసం చేస్తున్న దొంగగురువులదో డబ్బాలు వాయించడం లేదుకదా.నా అనుభవాలనుంచి నేను వ్రాస్తాను. కనుక నాగురించి నేను చెప్పుకున్నట్లు మీకు అనిపిస్తుంది.దానికి నేనేం చెయ్యను?

>>ఇప్పటికే చాలామంది చార్లటన్స్ గురువులు ఉన్నారు.మళ్ళీ మీరొకరు తయారవుతున్నారు?మాకు ఇలాంటి గురువుల అవసరం లేదు.

నా జవాబు:-నిన్ను నా శిష్యునిగా అంగీకరించే హీనస్థితిలో నేను లేను.నా శిష్యుడు కావాలంటే నీకు చాలా పూర్వజన్మ సుకృతం ఉండాలి.అది లేకుంటే కనీసం నన్ను చూడనుకూడా చూడలేవు.అప్పటిదాకా నీ ప్రస్తుత చార్లటన్ గురువుతో ఒక పనికిమాలిన బఫూన్ లాగా కాలం గడుపు.

>>చూడండి సార్.మీకు కొంచం అహం ఎక్కువేమో నని నా అనుమానం.

నా జవాబు:-అనుమానం ఉండటానికి కూడా అర్హత కావాలమ్మా.నీకు నిజంగా అనుమానం ఉంటే దానిని ఎందుకు నివృత్తి చేసుకోవు?వచ్చి నన్ను కలిసి నాతో మాట్లాడి చూడు.ఎవరో చెప్పిన మాటలు ఎందుకు నమ్ముతావు?వ్రాతలను బట్టి మనిషిని ఎప్పుడూ అంచనా వెయ్యకు.మోసపోతావు.జీసస్ లాగా ఒకచెంపమీద కొడితే రెండోచెంపకూడా చూపించి శిలువ వేయించుకునే సాహసం నేను చెయ్యలేను.మీమెప్పుకోసం నంగివేషాలు వేసి నక్కవినయాలు నటించడం నావల్ల కాదు.

>>ప్రతివారినీ విమర్శించే ముందు నీ స్థాయి ఏమిటో చూసుకో.నీలాంటి అహంకారులకు మహనీయులను విమర్శిచే హక్కెక్కడిది?

నా జవాబు:-ఆత్మాభిమానానికీ అహంకారానికీ తేడా తెలియని నీలాంటి వాజమ్మలకు కూడా నేను జవాబిస్తాను.ఇక్కడే నాకు అహంకారం ఉందో లేదో నీకు తెలియడం లేదా? 

>>సార్.నేనొక సాధకుడను.ఆధ్యాత్మికపధంలో చాలాకాలంనుంచీ ప్రయాణిస్తూ ఎందఱో గురువుల దగ్గర తిరిగాను.కాని నాకు వారివద్ద తృప్తి కలగలేదు.మీ శిష్యునిగా నన్ను స్వీకరించగలరా?

నా జవాబు:-గలను.కాని కొన్నాళ్ళకు నావద్ద కూడా తృప్తికలగక ఇంకొక గురువువద్దకు మీరు వెళ్లరని నమ్మకం ఏమిటి?అసలు మీరు దేనికోసం వెదుకుతున్నారో దానిగురించి సరియైన క్లారిటీ మీకులేదని నాకు అనిపిస్తున్నది.అదీగాక సాధనామార్గంలో నేనుపెట్టే పరీక్షలు మీరు తట్టుకోలేరు.లేదు నేను తట్టుకోగలను అని మీరు అనుకుంటే,ముందు మీకేం కావాలో సరిగ్గా ఆత్మపరిశీలన చేసుకుని,ఒక క్లారిటీ వచ్చినాక నన్ను కలవండి.ఇదీ నా అడ్రస్.

>>దేవుళ్ళనీ గురువులనీ విమర్శిస్తున్నావు?నీవేమైనా శ్రీకృష్ణ పరమాత్ముడవా?

నా జవాబు:-అదేమో తెలియదుగాని,ప్రస్తుతం గోపిక పోస్ట్ లు ఖాళీలేవు. కొన్నాళ్ళ తర్వాత ట్రై చెయ్యి.

>>మీరు షిర్డీ సాయిబాబానీ అయ్యప్పనీ తరచూ విమర్శిస్తారు.ఎందుకని?

నా జవాబు:-పొరపాటు పడుతున్నావమ్మా.నేను వాళ్ళని విమర్శించను.వారి పేరుతో జరుగుతున్న దొంగవ్యాపారాలనూ,సమాజాన్ని మోసం చేస్తున్న దొంగభక్తులనూ విమర్శిస్తాను.ఒక్కసారి స్వచ్చమైన మనస్సుతో మళ్ళీ నేను వ్రాసినవి చదువు.అవి పచ్చినిజాలే అని నీవూ అంగీకరిస్తావు.

>>మీరు అద్వైతం వ్రాస్తున్నారు.మరి అందరినీ విమర్శించడం ఎందుకు?అంతా ఏకస్వరూపమే కదా?

నా జవాబు:--ఈ సంగతి తెలియకనేనా పాపం ఆదిశంకరులు దేశమంతా కాలినడకన తిరిగి అంతమందితో వాదించి చర్చించి అద్వైతాన్ని స్థాపించారు?ఆయన అద్వైతి కారని మీ అభిప్రాయమా? ఆయన ఎన్నివేలమందితో వాదవివాదాలు చేసినారో మీకు తెలుసా?అంతా ఏకమే అని చెప్పిన ఆదిశంకరులు అన్ని వాదాలలో ఎందుకు పాల్గొన్నారు? ఈ ప్రశ్నకు మీరు సమాధానం చెప్పండి?

(మరికొన్ని జాబులూ-జవాబులూ ఇంకోసారి)
read more " జాబులూ-జవాబులూ "

17, నవంబర్ 2013, ఆదివారం

శబరిమల వెళ్ళాలి చందాలివ్వండి

మొన్నొకరోజున ఏదోపని మీద వెళ్ళి ఇంటికి తిరిగివచ్చి లోనికి వెళ్లబోతుండగా వెనకనుంచి ఎవరో పిలిచినట్లు అయితే చూచాను.ఒక అయ్యప్పవేషధారి నిలబడి ఉన్నాడు.అతను అప్పటివరకూ ఒక ఇంటిముందు నిలబడి యాచిస్తున్నట్లుగా ఉన్నాడు.నన్ను చూచి గబగబా నావైపు వచ్చి చెయ్యి చాచాడు.

నేనతని ముఖంలోకి తాపీగా చూచాను.

అతనికి 30-40 మధ్యలో ఉంటాయి.మనిషిని చూస్తే పేదవాడి చాయలు కనిపించడం లేదు.కొంచం ఘరానాగానే ఉన్నాడు.

'ఏమిటి?' అడిగాను.

ఉపోద్ఘాతంతో సమయం వృధా చెయ్యడం ఎందుకనుకున్నాడో ఏమో,అతను సరాసరి విషయంలోకి వచ్చేశాడు.

'శబరిమల వెళ్ళాలి డబ్బులు తక్కువైనాయి' అన్నాడు క్లుప్తంగా.

'దానికి నేనేం చెయ్యను?' అడిగాను.

'చందా ఇవ్వండి' అన్నాడు.

'నువ్వు శబరిమల వెళ్తుంటే నేనెందుకు డబ్బులివ్వాలి.నిన్నక్కడికి వెళ్ళమని నేనేమీ చెప్పలేదు కదా?' అడిగాను.

చాలా కోపంగా చూచాడు.

'అందరూ ఇస్తున్నారు?' అన్నాడు.

'అందరూ ఇస్తే నేనెందుకు ఇవ్వాలి?' అడిగాను.

అతనికి అసహనం ఇంకా పెరిగిపోయింది.

'మీకు తోచినంత ఇవ్వండి' అన్నాడు.

'నాకేమీ తోచడం లేదు' అన్నాను.

అతను ఒక్కసారి బరస్ట్ అయిపోయాడు.

'నువ్వు నరకానికి పోతావ్' అన్నాడు ఏకవచనంలోకి దిగుతూ.

నాకు భలే నవ్వొచ్చింది.అతన్ని చూచి జాలీ కలిగింది.

'చూడమ్మా బుచ్చిబాబు.నీలా పిల్లిశాపాలు చాలామంది నాకు పెట్టారు.ఒక్కటీ తగల్లేదు.తగలవు కూడా.ఒక విషయం విను.నీకు నిజంగా ఆకలిగా ఉంటే భోజనం పెడతాను తిను.అంతేగాని నీకు డబ్బులివ్వను.అదే మళ్ళీ రెండోసారి అయితే అదీపెట్టను.నీకు దీక్ష ముఖ్యమైతే నడిచివెళ్ళు.నల్లగుడ్డలు వేసుకున్నంత మాత్రాన అడుక్కోడానికి ఒక లైసెన్స్ అనుకోకు.పని చూసుకో.నీలాంటి సోమరిపోతులకు నేను సాయం చెయ్యను.' అని చెప్పాను.

ఇదంతా చూస్తున్న మా ఫ్రెండ్ అడిగాడు.

'అంత వాదనెందుకు? ఎంతో కొంత ఇస్తే వాడే పోతాడుగా?'

'నేనలా చెయ్యలేను.' చెప్పాను.

'పోనీ నీ హితబోధ వల్ల వాడేమైనా మారుతాడా?'

'అతను మారాలనీ మార్చాలనీ కాదు నా ప్రయత్నం.మతాన్నో దేవుడినో బూచిగా చూపి ఆడుకోవాలని చూస్తే అందరూ లొంగరన్న విషయం అతనికి తెలియాలి.అంతే.' చెప్పాను.

తానొక ఘోరమైన దోషిననీ,పాపిననీ భయంకరమైన గిల్టీ ఫీలింగ్ అంతరాంతరాలలో ఉన్నవారే శరీరాన్ని ఇలా హింసపెట్టుకునే దీక్షలు చేస్తుంటారు.శరీరాన్ని ఎంత హింస పెట్టుకుంటే అంతపుణ్యం వస్తుందని ఏ దేవుడూ ఎక్కడా చెప్పినట్లు దాఖలాలు లేవు.

మన దేశంలో ప్రతిదీ ఎదుటివాడిని దోచుకోవడానికి ఒక లైసెన్స్ అయిపోతుంది.చివరకు దేవుడిని కూడా మనం ఒదలం.రోడ్డుమీద పెట్టి రూపాయికి అమ్మిపారేస్తాం.అందులోనూ కాపీరైట్ హక్కులూ రిజిస్టర్డ్ దేవుడూ కాకపోతే ఆ దేవుడిపని అధోగతే.ప్రతివాడూ ఒక గుడికట్టేసి వ్యాపారం మొదలు పెట్టేస్తాడు.షిర్డీ సాయిబాబాకు ప్రస్తుతం అదేగతి పట్టింది.

రైల్వే స్టేషన్ దగ్గర పేవ్ మెంట్ మీద తెల్లవారేసరికి ఒకసారి సాయిబాబా ప్రతిమ వెలిసింది.చిన్నగా దానిమీద ఒక చిన్నగుడి లేచింది.రెండేళ్లు గడిచేసరికి అదే పేవ్మెంట్ మీద ఒక చిన్న శివలింగమూ నందీ వెలిశాయి.ఇదిచూచి పక్కనే ఉన్న ఒకచెట్టుకి కొన్ని ఆకుపచ్చ జెండాలు రాత్రికిరాత్రే వచ్చి చుట్టుకున్నాయి. ప్రస్తుతం అదొక సర్వమతసమానత్వ మందిరం అయిపోయింది.దానిని మొదలుపెట్టిన ఆసామీ ఒక కుర్చీ వేసుకుని రోడ్డు మీదే కూచుంటాడు.భక్తులు క్యూ కడుతున్నారు.మొక్కులు చెల్లిస్తున్నారు.ట్రాఫిక్ మొత్తం వేరే సందులోనుంచి తిరిగిపోతున్నది.ఇక దీక్షలు ఒక్కటే తక్కువ.త్వరలో అవీ మొదలౌతాయి.స్పెషల్ బస్సులు మొదలౌతాయి.స్పెషల్ రైళ్ళూ రంగంలోకి దిగుతాయి.అదొక గొప్ప పుణ్యక్షేత్రం అయిపోతుంది.మనుషులు అజ్ఞానంలో ఇంకాఇంకా కూరుకుపోతూ అదేదో గొప్ప మతాచరణగా భావిస్తూ ఉంటారు. మనదేశంలోనూ ముఖ్యంగా మన రాష్ట్రంలోనూ ప్రతిచోటా ఇదే తతంగం నడుస్తూ ఉంటుంది.

ఇరవైఏళ్లక్రితం నాకొక మిత్రుడుండేవాడు.ఆయన అయ్యప్పకు వీరాతివీరభక్తుడు.విజయవాడ నుంచి శబరిమలకు నడిచి పొయ్యేవాడు.అలా చాలాసార్లు వెళ్లాడు.శరీరాన్ని అంతగా హింస పెట్టుకున్నప్పటికీ ఆయనకు తృప్తి కలగలేదు.ఒకసారి రూటు మార్చాడు.విజయవాడ నుంచి కాశీకి కాలినడకన వెళ్ళి అక్కడనుంచి శబరిమలకు కాలినడకన వెళ్ళి అక్కణ్ణించి విజయవాడకు నడిచి వచ్చాడు.ఇదంతా జరగడానికి నాలుగైదు నెలలు పట్టేది.మధ్యమధ్యలో మజిలీలు చేసుకుంటూ వెళ్ళేవాడు.తన వస్తువులన్నీ భుజాన కావడి కట్టుకుని దానికి గంటలు తగిలించి పెద్దవేషంతో నడుస్తూ వెళ్ళేవాడు.దారిలో కుక్కలు వెంటపడేవి.వాటిని తోలడానికీ,నడకలో ఊతానికీ చేతిలో ఒకకర్ర ఉండేది.

చూచీ చూచీ ఒకసారి ఆయన్ను ఇలా అడిగాను.

'ఎందుకు శరీరాన్ని అంత హింస పెడుతున్నారు?దానివల్ల ఏమిటి ఉపయోగం? ఏమి ఆశించి ఇదంతా చేస్తున్నారు?ఆత్మజ్ఞానాన్ని పొందటానికి ఇదంతా అవసరమా?'

'ఆత్మజ్ఞానం కోసం కాదు.నేననుకున్న కొన్ని పనులుకావడం కోసం ఇలా చేస్తున్నాను.'

'ఇలా చేస్తే ఆ పనులు అవుతాయని ఎక్కడైనా ఎవరైనా చెప్పారా?'

'లేదు.నేనే అనుకొని దీక్షపూని చేస్తున్నాను.'

'మీరనుకున్నది సత్యమే అవ్వాలని ఎక్కడుంది?కానప్పుడు మీరు అసత్యాన్ని అనుసరిస్తున్నట్లే కదా?' అడిగాను.

జవాబు లేదు.

జనాల దీక్షలన్నీ ఇంతే.వాటికి ఒక రీజనూ రైమూ ఉండదు.'అనుకొని' చేసేస్తుంటారు.ఆ అనుకోవడానికి ఆధారం ఏమిటన్నది ఎవరూ చెప్పలేరు. నిరాధారమైన నమ్మకాలూ,'ఇలాచేస్తే మాకు పనైంది,బాగుపడ్డాము'అని ఇతరులు చెప్పడమూ వారిని నడిపిస్తాయి.అంతేగాని ఆలోచనా,తర్కమూ నడిపించవు.అందుకే ఇవన్నీ అసలు దీక్షలేకాదనీ వీటివల్ల పరమప్రయోజనం అంటూ ఏదీ ఉండదనీ నేనంటాను.

వీరి జీవితాలలో ఉన్నతమైన మార్పులుకూడా రావు.పైన చెప్పిన మా మిత్రుడు మామూలు రోజుల్లో మంచి పేకాటవీరుడు.సిట్టింగ్ లో కూచుంటే మూడురోజులైనా ఆడుతూనే ఉండేవాడు.ఒక్కోసారి ఒంటిమీద ఉంగరాలూ వాచీ మొదలైనవి కూడా ఆటలోపెట్టి ఓడిపోయి ధర్మరాజులాగా కట్టుబట్టలతో ఇంటికి చేరినరోజులు ఎన్నో ఉన్నాయి.ఇలాంటి వాళ్ళు దీక్షలంటూ వెఱ్ఱి వేషాలు వేస్తుంటే నాకు నవ్వూ జాలీ ఒకేసారి వస్తుంటాయి.

నిన్న ఒక ఊరినుంచి శబరీ ఎక్స్ ప్రెస్ లో గుంటూరుకు వస్తున్నాను.అందులో హైదరాబాద్ నుంచి శబరీమల వెళ్ళే యాత్రీకులు ఎక్కువ.ఒకడు పై బెర్త్ లో నిద్రపోతున్నాడు.గుంటూరు స్టేషన్ వస్తున్నది లేచి స్నానం చెయ్యమని ఇంకొకడు అతన్ని లేపుతున్నాడు.ఆ క్రమంలో మాటామాటా పెరిగి వాళ్ళిద్దరూ ఘోరంగా తిట్టుకున్నారు.అయితే మాటమాటకూ తిట్టుతిట్టుకూ మధ్య స్వామీ స్వామీ అని అనుకుంటున్నారు.ఇదొక వింత ప్రహసనం.ఇక ఈదీక్షలు ఎందుకో అసలు ఇవేమి దీక్షలో నాకేమీ అర్ధం కాలేదు.

ఎన్ని పల్టీలు కొట్టినా,దేవుడనేవాడు మనిషికి ఎందుకు కనపడడో నాకు బాగా తెలుసు.ఎందుకంటే,కనిపిస్తే దేవుడిని రోడ్డుమీద నిలబెట్టి 'భలేమంచి చౌక బేరమూ...'అంటూ అమ్మేస్తాడు మనిషి.దానికి భయపడే దేవుడు మనిషికి కనపడకుండా దాక్కుంటున్నాడు.

మనిషి అజ్ఞానానికి బానిసగా ఉన్నంతవరకూ వెఱ్ఱిదీక్షలూ,మతవ్యాపారాలూ సాగుతూనే ఉంటాయి.నిజమైన మతం మనిషికి అందనంత ఎత్తులో ఉంటూనే ఉంటుంది.నిత్యజీవితంలో సక్రమంగా బ్రతికేవాడికి ఏ దీక్షలూ అవసరం లేదు....ఒక్క ఆత్మదీక్ష తప్ప.
read more " శబరిమల వెళ్ళాలి చందాలివ్వండి "