ఈ రెండు సమయాలనూ సమర్ధిస్తూ అనేకమంది జ్యోతిష్కులు ఎవరికివారు విశ్లేషణలు వ్రాసుకున్నారు. నా దృష్టిలో అయితే, రెండూ తప్పులే. అసలా తేదీయే తప్పు. ఏమంటే, ఆ లగ్నాలతో, ఆ తేదీతో ఈయన జీవితంలోని ఏ ముఖ్యసంఘటనా సరిపోవడం లేదు. మనం సరిపెట్టడం వేరు, అది సరిపోవడం వేరు. అందరూ శాస్త్రిగారి జాతకాన్ని సరిపెట్టారు. అది సరిపోలేదు.
--------------------
ప్రముఖ జ్యోతిషవేత్త K.N.Rao గారు చాలాకాలం క్రితమే ఈ విషయం గురించి వ్రాస్తూ శాస్త్రిగారి అసలైన జననతేదీ అక్టోబర్ 9 అని చెప్పారు. దీనికి ఆయన రెండు ఆధారాలను సూచించారు.
1. ప్రముఖజ్యోతిష్కులైన బీవీ. రామన్, హరదేవ్ శర్మ త్రివేది, సూర్యనారాయణ్ వ్యాస్ గార్లు అక్టోబర్ 9 వ తేదీని శాస్త్రిగారి అసలైన జననతేదీగా నమ్మారు. అలా నమ్మడానికి వారికి ఆధారాలున్నాయి. వారు వేసిన జాతకంలో చంద్రుడు కన్యారాశిలో ఉన్నాడు. లగ్నం ధనుస్సయింది. ఆ జాతకం ప్రకారంగా వారందరూ, 1964 ప్రాంతాలలోనే, అంటే శాస్త్రిగారు ప్రధాని అయిన సమయంలోనే, 'ఈయన ఎక్కువకాలం పాటు పదవిలో ఉండరు' అని జోస్యం చెప్పారు. అది జరిగింది.
2. K.N.Rao గారి బంధువులలో ఒకరు లాల్ బహదూర్ శాస్త్రిగారి బంధువులలో ఒకరిని పెళ్లిచేసుకున్నారు. కనుక ఆయనకు శాస్త్రిగారి కుటుంబంతో సన్నిహిత సంబంధం ఉన్నది. వారివద్ద ఉన్న కుటుంబ రికార్డుల ప్రకారం శాస్త్రిగారు పుట్టినది అక్టోబర్ 9 వ తేదీన ఉదయం 11. 03 నిముషాలకు మాత్రమే. కానీ ప్రచారం మాత్రం 2 వ తేదీ అని జరిగింది. దానిలోకూడా కొంతమంది వృశ్చికలగ్నమని అంటున్నారు. మరికొంతమంది ధనుర్లగ్నమని అంటున్నారు.
నేనీ జాతకాలన్నింటినీ పరిశీలించాను. అక్టోబర్ రెండవ తేదీన ఏ టైము తీసుకున్నప్పటికీ, శాస్త్రిగారి జీవితవివరాలతో అది సరిపోవడం లేదు. సరిపెట్టబడుతోంది అంతే !
-----------------------
అక్టోబర్ 9, 1904 కి జాతకం వేస్తే, అప్పుడు శాస్త్రిగారి జీవిత సంఘటనలన్నీ సరిగ్గా సరిపోతున్నాయి. అదెలాగో వివరిస్తాను.
ముందుగా జాతకాన్ని చూద్దాం. ఆనాటి గ్రహస్థితులు ఈ విధంగా ఉన్నాయి.
శాస్త్రిగారి కుటుంబ రికార్డులలో ఉన్నట్లుగా, కన్యారాశి, ధనుర్లగ్నమూ సరిపోతున్నాయి. దశమంలో బుధుని ఉచ్ఛస్థితి గొప్పయోగం. అయితే, 8 వ అధిపతి క్షీణచంద్రుని యుతివల్ల ఇది భంగమౌతుంది. కనుక శాస్త్రిగారి చిన్నవయసులోనే, అంటే, ఒకటిన్నరేళ్ల వయసులోనే, తండ్రి మరణించాడు. అదేవిధంగా, పెద్దయ్యాక, ఒకటిన్నరేళ్ళకే ప్రధాని పదవీ పోయింది. ప్రాణమూ పోయింది.
ఈ యోగం యొక్క దృష్టి 4 వ భావం పైన ఉండటంతో, చదువు దెబ్బతిన్నది. కానీ, 4 వ అధిపతి అయిన గురువువల్ల కష్టపడి చదువుకొని కాశీవిద్యాపీఠం నుండి 'శాస్త్రి' పట్టాను పొందాడు.
9 వ భావమైన సింహంలో రాహు-కుజులవల్ల వంశంలో ఉన్న దుర్మరణయోగం కనిపిస్తోంది.
చంద్రలగ్నం నుంచి, నవమభావమైన వృషభానికి దశమంలో, శనిని సూచిస్తున్న కేతువువల్లా, మరియు నవమాధిపతి శుక్రుని పైన ఉన్న శనియొక్క దశమదృష్టి వల్లా ఇదే మళ్ళీ కనిపిస్తోంది. కనుక వీరి వంశంలో ఈ శాపం ఉన్నట్లు సూచన ఉన్నది. దీనికి రుజువుగా, శాస్త్రిగారి చిన్నవయసులోనే తండ్రిగారు అర్ధాంతరంగా చనిపోయారు. అది ఏప్రియల్ 1905.
ఆ సమయంలో శాస్త్రిగారి జాతకంలో సరిగ్గా కుజ - రాహుదశ నడిచింది. చూచారా దశాపరంగా ఈ శాపం ఎలా సరిపోయిందో? సరిగ్గా అదే సమయంలో శని కుంభంలోకి అడుగుపెట్టి కేతువుతో కలిశాడు. ఏప్రిల్ 3-17 మధ్యలో, నవాంశలో రాహుగురువులు సింహంలో ఉన్నారు. కనుక వంశశాపం జాగృతమైంది. తండ్రిని మ్రింగేసింది.
కుటుంబస్థానంలో ఉన్న వక్రశని లగ్నంలోకి వస్తున్నందువల్ల, వంశపారంపర్యంగా కుటుంబంలో ఉన్న శాపం ఈయనకు తగులుతుందని సూచన ఉన్నది. అదే జరిగింది కూడా.
లగ్నానికి 11 వ భావంలో ఉన్న శుక్రునివల్లా, 3 వ భావంలో ఉన్న కేతువువల్లా, ఈయనకొక అక్కా ఒక చెల్లెలూ సూచింపబడుతున్నారు. సరిగ్గా సరిపోయింది.
1917 లో కుటుంబం వారణాశికి మారింది. అప్పుడే, గాంధీభావాలకు ప్రభావితుడై, తన పేరునుండి 'శ్రీవాస్తవ' అనే కులనామాన్ని వదిలిపెట్టాడు. ఆ సమయంలో రాహు-శని దశ నడిచింది. ఇది శపిత దశగా చదువరులకు తెలుసు. కనుక, అటువంటి పనిని చేశాడు. అప్పటిలో చాలామంది నాయకులు ఇలాంటి కుహనా ఆదర్శాలకు పోయేవారు.
ఇది జరిగి నేటికీ 110 ఏళ్ళు గడిచాయి. సమాజం నుండి కులం మాత్రం మాయం కాలేదు. ఇంకా పెరిగింది. నిజానికి, ఎవరి కులమూ పోదు. బ్లడ్ గ్రూపు మారనట్లుగానే అదీ మారదు. కులం తప్పుకాదు. మానవత్వం లేకపోవడం తప్పు. ఆచరణయోగ్యం కాని గాంధీసిద్ధాంతాలవల్ల, కమ్యూనిష్టు సిద్ధాంతాలవల్ల సమాజానికి జరిగిన నష్టాలలో ఇదీ ఒకటి.
ఎవరి కులాన్ని వారు పాటిస్తూనే, మానవత్వాన్ని పెంచుకోవాలి. అదీ చెయ్యవలసింది. దానినే మహనీయులందరూ చెప్పారు. కానీ ఎవరు వింటారు?
1921 లో గాంధీ సిద్ధాంతాలకు ఆకర్షితుడై, చదువు వదిలేసి, తనకు ఆశ్రయమిచ్చిన మేనమామల మాటకు కూడా వ్యతిరేకంగా, స్వాతంత్ర పోరాటంలోకి అడుగుపెట్టాడు. ఆ సమయంలో రాహు- బుధ, రాహు-కేతు దశలు నడిచాయి. మొదటిది విప్లవాత్మక భావాలను రెచ్చగొడుతుంది. రెండవది, జీవితంలోనే అతిముఖ్యమైన దశ అవుతుంది. ఇవి రెండూ కరెక్ట్ గా జరిగాయి గమనించండి. అప్పుడాయనకు 16 ఏళ్ళు.
1925/26 లో కాశీవిద్యాపీఠం నుండి 'శాస్త్రి' పరీక్ష పాసయ్యాడు. అది తత్త్వశాస్త్రంలో డిగ్రీ. అప్పుడు, రాహు - శుక్రదశ నడిచింది. శుక్రుడు నవాంశలో ఉచ్ఛస్థితిలో ఉండటం చూడవచ్చు.
1937 లో, గురు-శుక్రదశలో అసెంబ్లీకి ఎన్నికయ్యాడు. అక్కడనుండి రాజకీయ ప్రస్థానం మొదలైంది. మళ్ళీ శుక్రుని అంతర్దశ రావడాన్ని గమనించవచ్చు.
శనిదశ 1944 లో మొదలైంది. 1947 లో దేశానికి స్వాతంత్రం వచ్చింది. ఆ సమయంలో ఈయన జాతకంలో శని - బుధదశ నడిచింది. బుధుని ఉచ్ఛత్వం వల్ల UP ప్రభుత్వంలో పోలీస్ మరియు రవాణాశాఖలకు మంత్రయ్యాడు. అప్పట్లోనే, బస్సులలో మహిళా కండక్టర్లను మొదలుపెట్టింది ఈయనే.
1952 లో కేంద్రప్రభుత్వంలోకి అడుగుపెట్టి రైల్వే మంత్రయ్యాడు. ఆ సమయంలో శని-శుక్ర దశ నడిచింది. శుక్రుని పాత్రను మళ్ళీ గమనించండి. నవాంశలో ఉచ్ఛగ్రహాలు ఈ విధంగా పనిచేస్తాయి.
1956 లో జరిగిన రైలు ప్రమాదాలకు బాధ్యత వహిస్తూ రాజీనామా చేశాడు. ఎక్కడో ఆంధ్రా, తమిళనాడులలో జరిగిన రైలు ప్రమాదాలకు ఢిల్లీలో ఉన్న తను డైరెక్ట్ గా బాధ్యుడు కాకపోయినప్పటికీ, విలువలకు కట్టుబడిన వ్యక్తిత్వం వల్ల నైతికబాధ్యత వహించాడు. ఆ సమయంలో శని - కుజ, శని - రాహుదశలు నడిచాయి. నా పోస్టులు, పుస్తకాలూ చదివేవారికి ఈ దశల గురించి మళ్ళీ మళ్ళీ చెప్పేపని లేదుకదా ! ఎంత కరెక్ట్ గా దశలతో జీవితసంఘటనలు సరిపోతున్నాయో చూడండి. ఇదే జ్యోతిషశాస్త్రం యొక్క మహత్యం !
అయితే, అసలు విషయం అది కాదు !
చాలామంది జీవితాలలో దీనిని గమనించవచ్చు. అన్నీ సజావుగా జరుగుతున్నపుడు అనుకోకుండా ఒక సంఘటన జరిగి మొత్తం తారుమారైపోతుంది. వాళ్ళ వంశంలో ఉన్న శాపం వల్ల ఇలా జరుగుతుంది. ఆ శాపాలు కూడా, ఆయా గ్రహదశలలోనే కరెక్ట్ గా జరుగుతాయి. మామూలు దశలలో జరగవు. అదీ విచిత్రం !
ఈ సంఘటనకు సమాంతరంగానే, 10 ఏళ్ల తర్వాత, తాను ప్రధానమంత్రి అయ్యి, అంతా సరిగ్గా జరుగుతున్నది అనుకుంటున్న సమయంలోనే, హఠాత్తుగా విషప్రయోగంతో చంపబడటం కూడా జరిగింది. ఈ ట్రెండ్ ను గమనించండి !
కనుక, అక్టోబరు 9 వ తేదీన 11.03 గంటలకు వేసిన జాతకం ఎంత సరిగ్గా సరిపోతున్నదో చూడండి.
ఇప్పుడు దుర్మరణాన్ని గురించి ప్రామాణిక గ్రంధాలేమంటున్నాయో చూద్దాం.
----------------------
జైమినీమహర్షి తన ఉపదేశసూత్రాలు రెండింటిలో బలవంతపు మరణాలను గురించి వివరించారు.
అవి,
సూ|| మందమాన్దిభ్యాం విష-సర్ప-జల-ఉద్బంధనాదిభిః || 2. 19 ||
తృతీయంలో శని మరియు మాందీ గ్రహాలున్నపుడు, విషము, పాముకాటు, నీరు, ఉరుల ద్వారా మరణం సంభవిస్తుంది.
సూ || కేతునా విషూచి-జలరోగాద్యై || 2. 20 ||
కేతువున్నపుడు, విషూచి (కలరా, స్ఫోటకం మొదలైన రోగాలు), ఒంటికి నీరుపట్టడం మొదలైన రోగాలవల్ల చావు మూడుతుంది.
ఈ సూత్రాన్ని గతంలో అనేకమంది సెలబ్రిటీల బలవంతపు చావులలో నిరూపించాను.
జైమినిసూత్రాలను లగ్నం, ఆరూఢలగ్నం, కారకాంశలగ్నాలనుండి ప్రధానంగా చూడాలి. అవసరాన్ని బట్టి ఇతర ప్రత్యేకలగ్నాలు, దశలు కూడా దానిలో వాడబడతాయి. శాస్త్రిగారి జాతకంలో లగ్నం ధనుస్సయింది. ఆరూఢలగ్నం సింహమైంది. ఆత్మకారకుడు చంద్రుడు గనుక కారకాంశలగ్నం కూడా సింహమే అయింది. కనుక ఈ రెండింటినుంచి పరిశీలించాలి.
ధనుస్సునుండి తృతీయంలో సరిగ్గా మాందీకేతువులున్నారు. కనుక పై రెండుసూత్రాలూ సరిగ్గా సరిపోతున్నాయి. విషప్రయోగమూ, ఊపిరితిత్తులలో నీరు చేరడమూ, గుండెపోటూ స్పష్టంగా కన్పిస్తున్నాయి.
అంతేకాదు, కేతువు, శనినే సూచిస్తున్నాడు. కనుక, మంద-మాందిభ్యాం అనే సూత్రం ఖచ్చితంగా సరిపోయింది. పైగా, కేతువు ఛాయాగ్రహం గనుక, శాస్త్రిగారి మరణం ఎప్పటికీ బయటకురాని రహస్యంగా చీకటిలోనే ఉండిపోతుందన్న సూచన స్పష్టంగా ఉన్నది. అందుకేనేమో, నేటికీ ఈ రహస్యం రహస్యంగానే ఉండిపోయింది.
సింహంలో కుజరాహువులున్నారు. ఈ గ్రహయోగం ప్రమాదాలకూ, బలవన్మరణానికీ, దౌర్జన్యపూరితమైన కుట్రకూ, విషప్రయోగాలకూ సూచిక. రాజరికరాశి అయిన సింహంలో ఈ యోగం ఉన్నది. లగ్నం నుండి సింహం 9 వ భావమైంది. ఇది దూరదేశానికి సూచిక. స్థిరరాశిగనుక ఇంటిలోనే ఈయన చనిపోయాడు. ఈ గ్రహస్థితుల వల్ల పాశ్చాత్యదేశాధినేతల కుట్రవల్ల ఈయన దూరదేశమైన సోవియట్ యూనియన్లో చనిపోయాడని స్పష్టంగా అర్ధమౌతున్నది.
-----------------------
ఆయన భార్య లలితాశాస్త్రిగారు చెప్పినదాని ప్రకారం, ఆయన బసచేసిన విల్లాలో మంచం ప్రక్కనే ఉంచిన మంచినీళ్ల ప్లాస్క్ లో ఏదో కలిపి ఉంటారని ఆమె అన్నది. ఆ నీళ్లను త్రాగి పడుకున్న శాస్త్రిగారు కొద్దిసేపట్లోనే విపరీతంగా దగ్గుతూ ఛాతీని పట్టుకుని లేచారని, ఆయనకు వాంతులయ్యాయని తరువాత నేలపైన పడిపోయి చనిపోయారని తెలుస్తోంది. వేరే చోట ఉన్న ఆయన యొక్క పర్సనల్ డాక్టర్ R.N. ఛుగ్ వచ్చి చూసేసరికే శాస్త్రిగారు చనిపోయి ఉన్నారు.
విచిత్రంగా, ఆ విల్లాలో ఆయనకివ్వబడిన గదిలో ఒక కాలింగ్ బెల్లు లేదు. ఫోన్ లేదు. అటెండెంట్ లేడు. ఫస్ట్ ఎయిడ్ బాక్సు లేదు. ఒక దేశప్రధానమంత్రికి, అందులోనూ యుద్ధంలో గెలిచిన దేశపు ప్రధానమంత్రికి అలాంటి ఏర్పాట్లా? అలా చేస్తారా ఎక్కడైనా? కావాలని ఆయనను చంపేసినట్లు క్లియర్ గా తెలియడం లేదూ?
ఆయన దేహానికి పోస్ట్ మార్టం జరగలేదు. తాష్కెంట్ అప్పట్లో సోవియెట్ ఉజ్బెకిస్తాన్ లో ఉండేది. భారతప్రభుత్వం అడిగినట్లైతే పోస్ట్ మార్టం చేసి ఉండేవారు. వీరు అడగలేదా? అడిగినా ఉపయోగం ఉండదని ఊరుకున్నారా? మనకు తెలియదు. మొత్తమ్మీద ఇదొక అధికారమార్పు కుట్ర (regime change operation) అని అర్ధమౌతున్నది.
శత్రుదేశాలకూ, అగ్రరాజ్యాలకూ, ఇలాంటి కుట్రలు మామూలే. మొన్నటికి మొన్న బాంగ్లాదేశ్ లో జరిగిందేమిటి? కనుక ఇది క్రొత్తేమీ కాదు. అవసరమైతే దేశాధినేతలను కూడా లేపేస్తారని దీనినిబట్టి తెలుస్తోంది. అందుకేనేమో, రష్యా, చైనా మొదలైన దేశాధినేతలు ఇలాంటి మీటింగులకు విదేశాలకు వచ్చినపుడు అక్కడి డిన్నర్లు తినరు. వాళ్ళు తెచ్చుకుని, ఒండుకుని తింటారు. పుతిన్ అయితే, సూట్కేస్ టాయిలెట్ కూడా తనవెంట తెచ్చుకుంటాడు.
మన ప్రధాని మోదీగారి మీద కూడా ఇటువంటి ప్రయత్నం ఒకటి ఈ మధ్యనే జరిగిందనీ, అయితే, ఆయనకు ముందస్తుగా ఇంటలిజెన్స్ సమాచారం ఉండటం వల్ల ఆ ప్రమాదం నుండి తప్పించుకున్నారనీ ఒక వార్త సోషల్ మీడియాలో చక్కర్లు కొడుతోంది. అందులో నిజం ఉండవచ్చని నేనుకూడా నమ్ముతున్నాను.
--------------------------
పోతే, శాస్త్రిగారి మృతదేహాన్ని మనదేశానికి తెచ్చి పాలం విమానాశ్రయంలో విమానం దింపినపుడు, దేహం మొత్తం నీలంరంగులోకి మారిపోయి ఉందని, కణతలదగ్గర మాత్రం తెల్లని మచ్చలున్నాయని, దగ్గరనుండి చూచిన బంధువులు, కొడుకులు, చెబుతున్నారు. కనుక ఆయన విషప్రయోగంతోనే చనిపోయి ఉండాలి.
అంతేకాదు, ఆయన యొక్క వ్యక్తిగత వైద్యుడైన Dr. R.N. Chugh, ఈ సంఘటన జరిగిన కొద్దికాలం తర్వాత ఒక రోడ్డు ప్రమాదంలో చనిపోయాడు. లేదా చంపబడ్డాడు. శాస్త్రిగారి మరణం పైన వేసిన ఎంక్వైరీ కమిషన్ ముందు తన వాంగ్మూలం ఇవ్వడానికి వెళుతున్న సమయంలో ఆయనకు రోడ్డు యాక్సిడెంట్ అయింది. చనిపోయాడు. ఆయనతోబాటు, ఆయన కుటుంబసభ్యులందరూ ఆ ప్రమాదంలో చంపబడ్డారు.
ఇంకా, శాస్త్రిగారి వ్యక్తిగత సేవకుడైన రాంనాధ్ కూడా అదేసమయంలో ఒక రోడ్డు యాక్సిడెంటులో తీవ్రంగా గాయపడ్డాడు. ప్రాణాలతో బయటపడినప్పటికీ, తలకు తగిలిన బలమైన గాయాలవల్ల, మతిస్థిమితాన్ని, జ్ఞాపకశక్తినీ కోల్పోయాడు. తరువాత బ్రతికినన్నాళ్ళు జీవచ్ఛవంలా బ్రతికాడు.
శాస్త్రిగారి దగ్గర ఒక రెడ్ డైరీ ఉండేది. ముఖ్యమైన విషయాలను దానిలో వ్రాసుకునేవాడాయన. విచిత్రంగా, ఆ డైరీ కూడా మాయమై పోయింది. అదేమై పోయిందో ఎవరికీ తెలియదు.
వీటన్నిటినీ బట్టి ఇదొక కుట్రని, దీనివెనుక ఇండియాలోని నేతలు కూడా ఉన్నారని, విదేశీహస్తం కూడా ఉందని, ఇద్దరూ కలిసే ఈ పనిని చేశారని. చిన్నపిల్లలైనా చెబుతారు. శాస్త్రిగారి జాతకం కూడా దీనినే స్పష్టంగా చెబుతోంది.
------------------------
శాస్త్రిగారి జాతకంలో జరిగిన కొన్ని ముఖ్యమైన సంఘటనలను జాతకపరంగా చూద్దాం.
ప్రధాని కావడం
27-5-1964 న నెహ్రూగారు చనిపోయాడు. 13 రోజులపాటు గుల్జారీలాల్ నందా గారు తాత్కాలిక ప్రధానిగా ఉన్నారు. 9-6-1964 న లాల్ బహదూర్ శాస్త్రి గారు ప్రధాని అయ్యారు. ఆ సమయంలో ఆయనకు బుధ బుధ రాహుదశ నడిచింది.
లగ్నం నుండి దశమంలో బుధుడు ఉచ్ఛస్థితిలో ఉండటాన్ని గమనించవచ్చు. కనుక బుధ దశ మొదలుకావడంతోనే ఆయన ప్రధాని అయ్యాడు. ఇది ఇందిరాగాంధీకి ఇష్టంలేదని చాలామంది అంటారు. తన తండ్రి తర్వాత తానే ప్రధాని కావాలని ఆమె అనుకుంది. కానీ అప్పట్లో ఆమెకంత అనుభవమూ లేదు, పేరూ లేదు. కనుక కాలేకపోయింది.
చంద్రలగ్నం నుండి కూడా, బుధుడు దశమాధిపతిగా లగ్నకేంద్రంలో ఉచ్ఛస్థితిలో ఉన్నాడు. ఇది ఖచ్చితంగా మహారాజయోగమే. ఈ యోగం అక్టోబర్ 2 వ జాతకంలో రాదు. కనుక ఆ తేదీ కరెక్ట్ కాదని తెలుస్తోంది.
9-6-1964 న గోచారాన్ని గమనిద్దాం.
మరణం
11-1-1966 న ఆయనకు బుధ కేతు శని దశ నడిచింది. బుధుని రాజయోగం ఉన్నప్పటికీ, శనికేతువుల ప్రభావం విషప్రయోగానికి దారితీసింది. జైమిని మహర్షి సూత్రం ప్రకారం ఇది ఖచ్చితంగా కేతువు-శనుల దశలోనే జరగడాన్ని గమనించండి.
పైన చెప్పినట్లుగా, కేతువు శనిని సూచిస్తున్నాడు. మాందితో కలసి ఆయుస్థానంలో ఉండటంవల్ల విషప్రయోగం ద్వారా మరణం సంభవించింది. గోచారాన్ని గమనిద్దాం.
ఆనాడు గ్రహస్థితి ఈ విధంగా ఉన్నది.కన్యనుండి 9 వ భావంలో గురుఛండాలయోగం ఉండటాన్ని చూడవచ్చు. ఇది దూరదేశంలో జరిగిన విద్రోహపూరిత కుట్రకు సూచిక. రాహుకేతువులు 3-9 ఇరుసులో ఉచ్ఛస్థితిలో ఉండటం మంచిదేకాని, గురుఛండాలయోగం మంచిది కాదు. కనుక, అధికారిక పర్యటనలో విషప్రయోగం జరిగింది. నవమాధిపతి శుక్రుడు 4 వ భావంలో రవిబుధులతో కలసి ఉన్నాడు. ఇది విదేశాలలోని ఇంటికి (ఈయన బసచేసిన విల్లాకు) సూచిక. రవిబుధశుక్రులకు బలమైన పాపార్గళం ఉన్నది. ఇది, ఆ విల్లా మొత్తం సీక్రెట్ ఏజంట్ల పర్యవేక్షణలో ఉన్న విషయాన్ని చూపిస్తున్నది.
అంతేకాదు, మరొక ముఖ్యమైన సూచిక ! విద్రోహచర్యలకు సూచకుడైన యురేనస్, మరణానికి కారకుడైన ఫ్లూటోతో కలసి సింహంలో, మనఃకారకుడైన చంద్రునితో కలసి ఉంటూ, ధనుస్సులోని సూర్యుని చాలా దగ్గరగా వీక్షిస్తున్నారు. సింహానికి అధిపతీ, దేశాధినేతలకు అధిపతీ సూర్యుడే. ఇదంతాకూడా దేశాధినేతల ప్రోద్బలంతో జరిగిన కుట్రను స్పష్టంగా సూచిస్తున్నది.
భారతరత్న ప్రదానం
1966 లోనే ఆయనకు భారతరత్న ఇవ్వబడింది. ఇది బుధ శుక్రదశలో జరిగింది. శుక్రుడు నవమాధిపతిగా స్వస్థానంలో ఉండటాన్ని, నవాంశలో ఉచ్ఛస్థితిలో ఉండటాన్ని గమనించవచ్చు. అయితే చంద్రునినుండి లగ్న దశమాధిపతి అయిన బుధుడు అదే నవాంశలో నీచస్థితిలో ఉండటాన్ని బట్టి, ప్లాన్ ప్రకారం ఆయనను చంపేసి భారతరత్న ఇచ్చారని అర్థమౌతోంది.
పై మూడు సంఘటనలూ, ఇంకా చెప్పాలంటే, అన్ని సంఘటనలూ అక్టోబరు 9 జాతకానికి మాత్రమే కరెక్ట్ గా సరిపోతున్నాయి. అక్టోబరు 2 జాతకానికి సరిపెట్టబడుతున్నాయి గాని సరిపోవడం లేదు.
ఈ విశ్లేషణను బట్టి రెండు విషయాలు స్పష్టంగా గోచరిస్తున్నాయి.
ఒకటి - శాస్త్రిగారి జననతేదీ అక్టోబర్ 2 కాదు. అక్టోబర్ 9.
రెండు - ఆయన విషప్రయోగంతో చంపబడ్డాడు.
ఈ రెండూ చరిత్రలో సమాధి చేయబడ్డాయి.
అయితే, మనుషులు తమ తప్పులను కప్పిపెట్టుకోవచ్చు. మంచివాళ్ళుగా నటించవచ్చు. కర్మ మాత్రం ఎవరినీ వదలదు. ఎవరి లాజిక్స్ వారికుండవచ్చు. కానీ, తమ కర్మకు మూల్యం చెల్లించక మాత్రం ఎవరికీ తప్పదు. దీనికి మాత్రం ఎంతటివారికీ మినహాయింపు లేదు.
ఆ సమయంలో ఉన్న నాయకులూ, దేశాధినేతలూ, ఆ తరువాత ఏమయ్యారో గమనిద్దాం.
----------------------
దేశాధినేతల దుర్మరణాలు
ఆ సమయంలో పాకిస్తాన్ అధ్యక్షునిగా మహమ్మద్ అయూబ్ ఖాన్ ఉన్నాడు. శాస్త్రిగారి పాడెను కూడా ఆయన మోశాడు. 1966 లో శాస్త్రిగారు చంపబడ్డారు. 1966 లోనే అయూబ్ ఖాన్ కు తీవ్రమైన గుండెజబ్బు మొదలైంది. దానితో 8 ఏళ్ళు బాధపడి చివరకు 1974 లో 66 ఏళ్ల వయసులో గుండెపోటుతోనే ఆయన కూడా చనిపోయాడు. 1969 లో ఆయన పదవి పోయింది. అప్పటినుండి అయిదేళ్లపాటు పాకిస్తాన్లో తన విల్లాలోనే ఉంటూ చివరకు హార్ట్ ఎటాక్ తో పోయాడు.
రష్యా ప్రధానిగా అలెక్సీ కొసిగిన్ ఉన్నాడు. ఈయనకు కూడా త్వరలోనే గుండెజబ్బు మొదలైంది. దానితో చాలా ఏళ్ళు బాధపడి 1980 లో 76 ఏళ్ల వయసులో హార్ట్ ఎటాక్ తోనే ఈయనకూడా చనిపోయాడు.
రష్యా కమ్యూనిస్ట్ పార్టీ సెక్రటరీగా లియోనిడ్ బ్రెజ్నెవ్ ఉన్నాడు. ఈయన కూడా హార్ట్ ఎటాక్ తోనే 1982 లో చనిపోయాడు. అంతకు ముందు ఆరేళ్లనుంచి, అంటే 1976 నుంచే ఆయనకు గుండెజబ్బు మొదలైంది. ఆరేళ్లలో ఆయన ఆరోగ్యం వేగంగా క్షీణిస్తూ వచ్చింది. ఒక సమయంలో ఆయన జీవచ్ఛవం (క్లినికల్లీ డెడ్) అయిపోయాడు. తన చుట్టూ పరిసరాలను, మనుషులను గుర్తించలేకపోయేవాడు. అటువంటి దీనస్థితిలో ఈయన కూడా చనిపోయాడు.
అమెరికా అధ్యక్షునిగా లిండన్ జాన్సన్ ఉన్నాడు. 1973 లో 64 ఏళ్ల వయసులో ఈయనకూడా హార్ట్ ఎటాక్ తోనే చనిపోయాడు. అంతకుముందు ఇరవై ఏళ్లుగా ఈయన గుండెజబ్బుతో బాధపడ్డాడు. ఈయనకు చెయిన్ స్మోకింగ్ అలవాటుండేది. దానితో మొట్టమొదటి హార్ట్ ఎటాక్ 1955 లో 46 ఏళ్ల వయసులోనే వచ్చింది. డాక్టర్లు హెచ్చరించినా తన స్మోకింగ్ అలవాటును మానుకోలేదు. 1969 లో ఈయన టర్మ్ అయిపోయి వైట్ హౌస్ ను వదిలిపెట్టాడు. ఆ తరువాత టెక్సాస్ లో ఉంటూ ఉండేవాడు. 1973 లో హార్ట్ ఎటాక్ వచ్చినపుడు, దగ్గర ఎవరూ లేకపోతే, హార్ట్ ఎటాక్ వచ్చి గిలగిలా కొట్టుకుంటూ కూడా, తన సీక్రెట్ సర్వీస్ వారికి తనే ఫోన్ చేశాడు. అయితే, వాళ్ళు వచ్చేలోపే చనిపోయాడు.
అప్పట్లో CIA అధినేతగా విలియం రాబోర్న్ జూనియర్ ఉన్నాడు. జూన్ 1966 లో ఈయన పదవిని అర్ధాంతరంగా కోల్పోయాడు. 1990 లో 84 ఏళ్ల వయసులో ఈయన కూడా హార్ట్ ఎటాక్ తోనే చనిపోయాడు.
చైనా అధినేతగా మావో జెడాంగ్ ఉన్నాడు. 1970 లలో ఈయనకు తీవ్రమైన గుండెజబ్బు మొదలైంది. అప్పటినుంచీ ఈయన ఆరోగ్యం వేగంగా క్షీణిస్తూ వచ్చింది. ఊపిరితిత్తులు కూడా పాడయ్యాయి. పార్కిన్ సన్ వ్యాధి వచ్చింది. 1976 లో రెండు తీవ్రమైన హార్ట్ ఎటాక్స్ వచ్చాయి. రెండవదానితో ఈయన చనిపోయాడు.
నెహ్రూగారి మరణం తర్వాత, శాస్త్రిగారి స్థానంలో ప్రధాని పదవిని ఆశించిన వారిలో ఇందిరాగాంధీ కూడా ఉన్నది. ఆ తరువాత, తను అనుకున్నట్లుగా ప్రధాని అయి, దేశాన్ని చాలా ఏళ్ళు పరిపాలించినప్పటికీ, చివరకు తన బాడీగార్డ్స్ చేతులలోనే ఈమె కాల్చి చంపబడింది. ఈమె కొడుకులిద్దరూ కూడా దుర్మరణాల పాలయ్యారు.
జనవరి 1966 లో శాస్త్రిగారు చనిపోయిన సమయంలో ఉన్న లీడర్స్ వీళ్ళే. వీరందరూ ఎలా చనిపోయారో అన్న విషయాన్నీ, అప్పటి రాజకీయ సమీకరణాలనూ గమనిస్తే శాస్త్రిగారి దుర్మరణానికి ఎవరు లేదా ఎంతమంది కారకులో తేలికగా అర్ధమౌతుంది.
-------------------------
కారకులెవరు?
మరికొంత లోతైన జ్యోతిషవిశ్లేషణతో వారెవరో నేను చెప్పగలను. పైన చెప్పబడినవారిలోనే కుట్రదారులున్నారు. మార్మికశాస్త్రాల జ్ఞానంతో వారెవరో నేను ఊహించగలను. పంచవటిలో జరిగే క్లోజ్ మీటింగులలో ఇంతకంటే లోతులను మనం మాట్లాడుకోవచ్చు, కానీ బ్లాగులో మాత్రం ఇంతకంటే ఎక్కువగా చెప్పను. ఉబుసుపోని జనాల ఉత్సాహం కోసం నేనా పనిని చేయనవసరం లేదు. ప్రభుత్వానికి అన్నీ తెలుసు. తెలిసీ దాచిపెట్టాలని ప్రభుత్వమే అనుకుంటున్నపుడు నేనెందుకు బయటపెట్టాలి?
శాస్త్రిగారు అక్టోబరు 2 న పుట్టారనీ, తాష్కెంట్ లో సహజంగానే చనిపోయారనీ లోకం నమ్ముతున్నది. సరే, అలాగే నమ్మనిద్దాం.
కానీ, ఈ రెండూ అబద్దాలే, నిజాలు కావు. ఇంకా చెప్పాలంటే, నేటి ప్రపంచంలో ఏదీ నిజం కాదు. ప్రేమలూ, పెళ్ళిళ్ళూ, కుటుంబాలూ, సంసారాలూ, రాజకీయాలూ, గురువులూ, ఆశ్రమాలూ, విద్యా, వైద్యమూ, వ్యాపారాలూ, వ్యవహారాలూ, చావూ, పుట్టుకా, ఏవీ నిజాలు కావు. ఎక్కడైనా సరే, జరిగేది వేరు. ప్రచారాలు వేరు. లోకం ప్రచారాన్నే నమ్ముతుంది. నిజాలను మాత్రం నమ్మదు.
నేడు మనిషిజీవితమే ఒక నాటకమైపోయింది. అబద్దపు ప్రచారాల ముసుగులలోనే ప్రపంచమంతా నడుస్తోంది. నిజాల పైన ఆధారపడి మాత్రం నడవడం లేదు.
నేటి సమాజంలో నిజాలెవరిక్కావాలి?
