దీపపు కుదురు

అయితే ఎర్రజెండా మొండి మనుషులు

లేకపోతే తురకబాబా మూఢభక్తులు

కాకపోతే కొలుపులు, బలులు, పల్లెటూరి మూర్ఖత్వాలు

ఇంకా కాదంటే పార్టుటైం దీక్షలు, కోరికల పారాయణాలు, పూజలు

అదీకాదంటే పిరమిడ్లు, సమాధులు, సూక్ష్మలోకప్రయాణాలు

ఇదీ ఒంగోలు చుట్టుప్రక్కల గోల . . . 

మనుషుల అజ్ఞానం ఎంత దట్టంగా ఉందంటే

చిమ్మచీకటి కూడా దీనిని చూచి సిగ్గుపడుతోంది

చెవిటివాడికి శంఖం ఊదటం ఎలాగో 

వీరికి అసలైన ఆధ్యాత్మికత నేర్పడం అలాగ

అందుకే,

ఒంగోలు బుక్ ఎగ్జిబిషన్లో మా బుక్ స్టాల్ పెట్టడం

ఇదే మొదటిసారి, ఇదే చివరిసారి కూడా

ఎడారిలో చిరుదీపం వెలుగుతోంది

దాని వెలుగు ఇతరదేశాలలో కూడా ప్రసరిస్తోంది

కానీ దాని కుదురుదగ్గర మాత్రం చీకటిగానే ఉంది.

ఏ దీపమైనా ఇంతేనేమో?

read more " దీపపు కుదురు "

కాగితపు పడవలు

అంతర్జాలపు విషంతో

మెదళ్ళు నిండిపోతున్నాయి 

మనుషుల సమాజంలో

జంతువులు పెరిగిపోతున్నాయి

అహంకారాల బురదలతో

హృదయాలు కుళ్ళిపోతున్నాయి

అతితెలివి బ్రతుకులతో

వయసులు మళ్లిపోతున్నాయి

డబ్బు వెంట పరుగులలో

జీవితాలు చెల్లిపోతున్నాయి

బాంధవ్యాలు ఆవిరైపోతూ

జ్ఞాపకాలను చల్లిపోతున్నాయి

ఆధ్యాత్మికపు ముసుగులలో

ఆవేశాలు చల్లారుతున్నాయి

అజ్ఞానపు ఆకర్షణలతో

అవరోధాలు ఊరేగుతున్నాయి

మురికిగుంటల దారులలో

నీటిచెలమలెందుకుంటాయి?

బండరాళ్ళ కనుమలలో

నదుల జాడలెందుకుంటాయి?

వరద ముంచుకొస్తుంటే

కాగితపు పడవలెలా ఆదుకుంటాయి?

ఊర్లు తగలబడుతుంటే

ఉత్తమాటలెలా అక్కరకొస్తాయి?

read more " కాగితపు పడవలు "

చేపల పాపం

నీళ్లలో మునిగితే పాపాలు పోతాయని

చేపలంటున్నాయి

ఎడారిలో ఎగిరితే పాపాలు పోతాయని

కొంగలంటున్నాయి

చేపలను కొంగలు తింటున్నాయి

కొంగలు వలల్లో పడుతున్నాయి

వలలు ఎండకు చివికిపోతున్నాయి

చేపలూ కొంగలూ వలలూ పోయాక

పాపం !

పాపం అడుగుతోంది

'నేనెలా పోతాను?' అని

read more " చేపల పాపం "

పంచవటి

కొడిగట్టిన దీపాలకు

క్రొత్త వెలుగునిచ్చి

మసిపట్టిన మానవాళికి

మళ్ళీ జీవం పోసిన

మహోన్నత దైవత్వం

పాండిత్యపు పంజరాలలో బందీ అయింది

దైవాన్ని భూమిపైకి

దించి తీసుకొద్దామని

రాక్షసత్వ పట్టునుంచి

భూమిని విడిపిద్దామని

చెయ్యబడిన మహాప్రయత్నం

కనపడకుండా కనుమరుగై పోయింది

అమేయమైన ఆత్మతత్త్వాన్ని

ఆచరణలో ప్రదర్శించి

మహోన్నత శిఖరంగా

మానవాళి ముందు నిలిచిన

వేదోపనిషత్తుల సారం

ప్రదక్షిణాల సంత అయింది

అవధిలేని మాతృత్వాన్ని

అక్షరాలా నిరూపించి

గొప్పగొప్ప సత్యాలను

గోరుముద్దలుగా తినిపించిన

రూపుదాల్చిన వాత్సల్యం

సాంప్రదాయ సంకెళ్ళలో సద్దుమణిగింది

మాటను గ్రహించలేని

మానవజాతి మొద్దునిద్రను

ఒక్కసారిగా వదిలించాలని

మట్టిమనుషులను మేల్కొల్పాలని

సంకల్పించిన మహామౌనం

ఎవరికీ గుర్తులేని ఏకాకి అయింది  

అన్నింటినీ ఆకళింపు చేసుకున్న

అమేయమైన చైతన్యం

మానవసమూహాల రొచ్చుకు

అందనంత సుదూరతీరంలో

విశ్వపుటంచులను అన్వేషిస్తూ

తనలో తానై తదేకనిష్ఠలో నిలిచింది

read more " పంచవటి "

మూడవ అమెరికా యాత్ర - 59 (సంతోషం)

తల్లి ఒడిలో కళ్ళు తెరచిన

క్షణం నుండి

నీ పయనం మొదలైంది

ఆపడం నీ చేతిలో లేదు

సంతోషంగా పయనించు

ఊపిరి పీల్చుకోవడం

మొదలుపెట్టిన క్షణం నుండి

నీ నడక మొదలైంది

ఆపడం నీ చేతిలో లేదు

సంతోషంగా నడువు

గడపదాటి బయటకు

అడుగేసిన క్షణం నుండి

అందరితో నీ స్నేహం మొదలైంది

ఆపడం నీ చేతిలో లేదు

సంతోషంగా సాటివారిని ఆదరించు

తిండనేది తినడం

మొదలుపెట్టిన క్షణం నుండి

నీ బ్రతుకు మొదలైంది

ఆపడం నీ చేతిలో లేదు

సంతోషంగా బ్రతుకు

నవ్వూ ఏడుపుల మధ్యన

నీ జీవితంలోకి 

దేనిని తీసుకోవాలనేది మాత్రం

నీ చేతిలోనే ఉంది

నవ్వునే స్వీకరించు

ఏ పరిస్ధితిలో ఉన్నప్పటికీ

సంతోషంగా ఉండాలా

ఏడుస్తూ ఉండాలా

అనేది మాత్రం నీ చేతిలోనే ఉంది

సంతోషంగా ఉండు

సంతోషమనేది బయట లేదు

నీ చుట్టూ ఉన్న పరిస్థితులలో లేదు

నీకు కలిగే లాభాలలో లేదు

జీవితమంటే నీ అవగాహనలో ఉంది

దానిని నీలో కళ్ళు తెరవనీ

అన్నీ ఉన్నా ఏడుస్తూ ఉండచ్చు

ఏమీ లేకున్నా సంతోషంగా ఉండచ్చు

ఉండటం లేకపోవడాల మీద

సంతోషం ఆధారపడి లేదు

ఈ అవగాహనను నీలో వెలగనీ

సంతోషపు రహస్యమేమిటో చెప్పనా?

కృతజ్ఞత నీలో ఉంటే 

సంతోషం నీలో ఉంటుంది

నీలో ఏ అర్హతలూ లేకున్నా

నీకు దక్కిన వరాలు గుర్తుంటే

సంతోషం నీలో ఉంటుంది

బ్రతకడానికి నీకేం అర్హతుంది?

కానీ సృష్టి నిన్ను బ్రతకనిస్తున్నది 

ఈ కృతజ్ఞత అనుక్షణం నీలో ఉండాలి

అప్పుడే సంతోషరహస్యం నీకర్థమౌతుంది

అప్పుడే నీ జీవితం ఆనందమయమౌతుంది

read more " మూడవ అమెరికా యాత్ర - 59 (సంతోషం) "

మూడవ అమెరికా యాత్ర - 49 (ఇలా అన్నాను)

ఇలా అన్నాను

దేవుడు లేడనే వాడితో - 'సృష్టి దానంతట అదే పుట్టిందా?' అన్నాను?

దేవుడున్నాడనే వాడితో - 'ఉంటే కనిపించడెందుకు?' అన్నాను.

దేవుడికి రూపం లేదనేవాడితో - 'రూపం లేనివాడు ఇన్ని రూపాలనెలా చేశాడు?' అన్నాను.

దేవుడికి రూపం ఉంది అనేవాడితో - 'ఇన్నిరూపాలలో ఆయనది ఏ రూపమో?' అన్నాను.

అసలు దేవుడున్నాడా అని అడిగినవాడితో - 'ఉన్నా లేకపోయినా నీకెందుకు?' అన్నాను.

పెద్దగా అరుస్తూ దేవుడిని పిలవాలనేవాడితో - 'ఏం మీ దేవుడికి చెవుడా?' అన్నాను.

మౌనంగా ప్రార్ధించాలి అనేవాడితో - 'మౌనంలో ప్రార్ధన ఎలా కుదురుతుంది?' అన్నాను.

ఓం శాంతి అన్నవాడితో - 'జై మాలిని' అన్నాను.

క్రియా యోగా అన్నవాడితో - 'కర్త, కర్మ ఏమయ్యాయి?' అన్నాను.

హార్ట్ ఫుల్ గా మెడిటేషన్ చెయ్యాలి అన్నవాడితో - హార్ట్ ఫుల్ అయితే, మూడు నిముషాల్లో పోతావ్' అన్నాను.

సుదర్శనం మంచిది అన్నవాడితో - 'పాశుపతం చేసిన పాపమేంటి?' అన్నాను.

ఆన్ లైన్లో క్లాసులు చేస్తున్నా అన్నవాడితో - 'ఆఫ్ లైన్లో గ్లాసులు మోస్తున్నావా' అన్నా.

శ్వాస మీద ధ్యాస అన్నవాడితో - ' శ్వాస ఆగినప్పుడు నీ ధ్యాస ఏమౌతుంది?' అన్నా.

మక్కా కెళ్తా అన్నవాడితో - 'ముందు చొక్కా సరిగ్గా తొడుక్కో' అన్నాను.

నమాజ్ చెయ్యాలి అన్నవాడితో - 'దేవుడికి అరబిక్ తప్ప వేరే భాషలు రావా?' అన్నాను.

గుళ్ళు కూలగొట్టాలి అన్నవాడితో 'ముందు మీ గుడి కూల్చుకో ' అన్నాను.

విగ్రహారాధన పనికిరాదు అనేవాడితో - 'విగ్రహం కానిదాన్ని ఎలా ఆరాధిస్తావు?' అన్నాను.

ఆదివారం ప్రేయర్ కెళ్తాను అన్నవాడితో -'మిగతావారాలు బబ్బుంటావా?' అన్నాను.

ఉపవాస ప్రార్ధన చేస్తాను అన్నవాడితో - 'నీ పొట్ట ప్రార్ధన విను ముందు' అన్నాను.

ఏకాంత కూడికలు అన్నవాడితో - 'ఏం నలుగురిలో లెక్కలు రావా?' అన్నాను.

నేను కమ్యూనిస్టుని అన్నవాడితో - 'ముందు నీ ఇమ్యూనిటీ పెంచుకో' అన్నాను.

ధ్యానమే కరెక్ట్ అనేవాడితో, 'నువ్వు లేచేసరికి వంట ఎవరు చేస్తారు?' అన్నాను.

ఒక్కొక్క రోజున ఒక్కొక్క పూజ చెయ్యాలి అనేవాడితో - 'రోజుకొక్క పెళ్లి కూడా చేసుకో' అన్నాను.

పూజ చేయనిదే మంచినీళ్లు కూడా ముట్టను అన్నవాడితో - 'ఒక నెలరోజులు పూజ చెయ్యకు' అన్నాను.

నైవేద్యం పెట్టనిదే భోజనం చెయ్యను అన్నవాడితో - 'నువ్వు పెట్టలేదని దేవుడు నీరసమొచ్చి పడిపోయాడు' అన్నాను.

మా మతమే కరెక్ట్ అనేవాడితో - 'మీ మతం పుట్టకముందు దేవుడు నిద్రపోతున్నాడా?' అన్నాను.

దేవుడిని శిలువేశారు అనేవాడితో - 'వేసినవాడు ఎంత గొప్ప దేవుడో?' అన్నాను.

సైతానుంది అనేవాడితో - 'సైతాన్ని దేవుడెందుకు చేశాడు? ఎందుకు ఉండనిస్తున్నాడు?' అన్నాను.

మా పుస్తకమే కరెక్ట్ అనేవాడితో - 'మీ పుస్తకం రాకముందు ప్రింటింగ్ ప్రెస్సులు లేవా?' అన్నాను.

మా ప్రవక్త ఇలా చెప్పాడు అనేవాడితో - 'మీ ప్రవక్త రాకముందు వక్తలే లేరా?' అన్నాను.

ఆచారం వద్దనేవాడితో - 'నువ్వు చేసేదే ఆచారం. ఏమీ చెయ్యకుండా ఉండగలవా?' అన్నాను.

మీ ఆచారం కంటే మా ఆచారం గొప్పది అనేవాడితో - 'మా పిల్లి మ్యావ్ అంటుంది, మీ పిల్లి భౌ అంటుందా?' అన్నాను.

మతం మత్తుమందు అనేవాడితో - 'మత్తుమందు కానిదేది?' అన్నాను.

నేను నాస్తికుడిని అనేవాడితో - 'నీకు ఆస్తి ఉందిగా లేదంటావేంటి?' అన్నాను.

మతం మారు అనేవాడితో - 'లింగమార్పిడి ఆపరేషన్ ఫెయిలౌతుంది' అన్నాను

జ్యోతిష్యాన్ని నమ్మను అనేవాడితో - 'రేపటినుంచీ సూర్యుడు ఉదయించడులే' అన్నాను.

అదృష్ట రెమెడీలు చెప్పండి అనేవాడితో - 'నీ అదృష్టం నీ చేతులలోనే ఉంది' అన్నాను.

శివుడికి కార్తీకమాసం ఇష్టం అనేవాడితో - 'మిగతా మాసాలలో ఆయన ఉపవాసమా?' అన్నాను.

ఈ దేవుడిని నమ్మితే మంచి జరుగుతుంది అనేవాడితో - 'నమ్మనివాడికి కూడా జరుగుతోందిగా?' అన్నాను.

ఈ దీక్ష బాగుంటుంది అనేవాడితో 'ఎందుకు నిన్ను నువ్వే శిక్షించుకుంటావ్?' అన్నాను.

ఈ దేవుడు మావాడు అనేవాడితో - ' అసలు నువ్వెవరివాడివి?' అన్నాను.

మూఢనమ్మకాలు మంచివి కావు అనేవాడితో - 'ఆధారం లేకుండా నమ్మకం ఎలా ఉంటుంది?' అన్నాను.

లోకాన్ని ఉద్ధరిస్తా అనేవాడితో - 'లోకం ఇక్కడే ఉంటుంది. పొయ్యేది నువ్వే' అన్నాను.

మరేం చెయ్యాలి? అన్నవాడితో - 'ఉన్నన్నాళ్ళు ఉండు. పోయేరోజున పో' అన్నాను.

మీ బోధ ఏంటి? అన్నవాడితో - 'నువ్వు బాధపడకు, పక్కవాడిని బాధపెట్టకు' అన్నాను.

read more " మూడవ అమెరికా యాత్ర - 49 (ఇలా అన్నాను) "

మూడవ అమెరికా యాత్ర - 20 (ఏముంది?)

జననమరణాల హద్దులను అధిగమిస్తూ

కర్మఫలితాల పద్దులను తిరగరాస్తూ

అమేయమైన గమనంతో

అనంతమైన శూన్యంలో

అదుపులేకుండా పారుతోందొక

అజరామర దృష్టి

అది చూడనిదేముంది?

అది తెలియనిదేముంది?

కాంతిభూమికల అంచులను దాటిపోతూ

భ్రాంతి వీచికల పంచలను కూలదోస్తూ

అలౌకిక లోకంలో

అగాధపు మౌనంలో

అన్నీ తానే అవుతోందొక

అపరాజిత సరళి

అది పొందనిదేముంది?

అది అందనిదేముంది?

తననుంచి తననే

నిరంతరం సృష్టించుకుంటూ

తనదేహాన్ని తానే

అనుక్షణం నరుక్కుంటూ

తన విలయాన్ని తానే

నిరామయ సాక్షిగా చూస్తూ

ఉండీ లేని స్థితిలో

లేమై ఉన్న ధృతిలో

తెలిసీ తెలియని గతిలో

నిలిచి కదులుతోందొక

నిరుపమాన తరళి

అది కానిదేముంది?

అది లేనిదేముంది?

read more " మూడవ అమెరికా యాత్ర - 20 (ఏముంది?) "

మూడవ అమెరికా యాత్ర - 19 (బ్రతుకుబాట)

ఏ కళ్ళను చూచినా

ఏదో వెదుకులాట

ఏ మనిషిని చూచినా

అదే బ్రతుకుబాట

తెలియని గమ్యాలు

తెరవని నయనాలు

ఆగని పయనాలు 

అందని మజిలీలు

ప్రతి బ్రదుకులోనూ

బావురంటోందొక వెలితి

ప్రతి పరుగులోనూ

ఆవిరౌతోందొక ప్రగతి

ఊహల ఉద్వేగాలకూ

నిజాల నిట్టూర్పులకూ

నిరంతర స్నేహమేగా

మనిషి జీవితం

అది ఇండియా అయినా సరే

ఇంకెక్కడైనా సరే

మనకది అర్థమైనా సరే

కాకపోయినా సరే

read more " మూడవ అమెరికా యాత్ర - 19 (బ్రతుకుబాట) "

ఆధ్యాత్మిక వైరస్

ఎన్నో శతాబ్దాల క్రితం
నాకొక వైరస్ సోకింది
అప్పటినుంచీ దానినంటిద్దామని
చూస్తున్నా ఎవరికైనా

చాలామంది బడాయిలు పోయారు
నీ వైరస్ మాకిష్టం అంటూ
అంటిస్తా రమ్మంటే భయపడి
ఒకటే పరుగు తీస్తున్నారు

నాతో చేతులు కలిపినా
గ్లోవ్స్ వేసుకునే కలిపారు
నా కౌగిట్లోకి వచ్చినా
స్పేస్ సూట్లోనే వచ్చారు

ముఖానికి మాస్కులతో
నా ఇంటికి వచ్చారు
నెరవేరని టాస్కుల కోసం
నన్ను వద్దనుకున్నారు

నాతో చేతులు కలిపి
హ్యాండ్ వాష్ వాడుకున్నారు
నాటకానికి నన్ను హత్తుకుని
తర్వాత స్నానాలు చేశారు

నీతో వస్తాం అన్నవాళ్లు
నాలుగడుగుల తర్వాత
హటాత్తుగా నన్నొదిలేసి
పరిగెత్తి పారిపోయారు

బ్రతుకు మీద అంత తీపుంటే
నాతో రావాలని ఆశెందుకు?
మాయమయ్యే ధైర్యం లేకుంటే
నా ఇంట్లోకి అడుగెందుకు?

మగతనం లేకుంటే
మగువ మీద ఆశెందుకు?
తెగువనేది రాకుంటే
తనను దాటి చూపెందుకు?

మరణం నీడ నాకిష్టం
కానీ నేనెప్పుడూ బ్రతికే ఉంటాను
చావంటే మీకు భయం
కానీ మీరు నిత్యం చస్తున్నారు

చస్తూ బ్రతకడం నా కళ
బ్రతుకుతూ చావడం మీ ఖర్మ
చీకట్లో వెలుగును నేను
పగటిపూట నీడలు మీరు

మీకెందుకు నా స్నేహం?
నాకెందుకు మీ సహవాసం?
వైరస్ ఫ్రీగా కావాలంటే
అది కుదరని బేరసారం

అన్ని పరిష్కారాలూ లోపలున్న
అలవిగాని సమస్యని నేను
అమితమైన వెలుగును నింపుకున్న
అంతుబట్టని చీకటిని నేను

నడిరోడ్డులో నిలబడున్నా
నా వైరస్ మీకిస్తా రమ్మని
నన్నెవరూ నమ్మడం లేదు
వెలలేని వైరస్ కు విలువ లేదని

వైరస్ ని కూడా కొనుక్కుంటార్రా?
వెకిలి దరిద్రుల్లారా
పైరసీ బ్రతుకులెందుకురా?
నకిలీ ఆత్మల్లారా

వెలుగును విరజిమ్ముతూ పిలుస్తున్నా
నా చీకటిని మీకిస్తా రమ్మని
నా వైపెవరూ చూడడం లేదు
నాటకాల కళ్ళు పోతాయని

చీకటి లేనిదే వెలుగెలా వస్తుందిరా?
దద్దమ్మల్లారా
ఏడవలేనివాళ్ళు ఎలా నవ్వుతార్రా?
పెద్దమ్మల్లారా

ఇన్ని శతాబ్దాలుగా
ఈ వైరస్ నాలో ఉంది
కానీ నాకు చావు లేదు
ఏంటీ రహస్యం?

ఎన్నో జన్మలుగా
మీలో ఏ వైరసూ లేదు
కానీ మీరు రోజూ చస్తున్నారు
ఏంటీ విచిత్రం?

నాకే షాపూ లేదు
నడిరోడ్డు మీదే నా బేరం
నా వైరస్ ని కొనాలంటే
నువ్వు నగ్నంగా రావాలి

నాకే డబ్బూ వద్దు
నువ్వే నాక్కావాలి
నీకే జబ్బూ రాదు
నువ్వు మాయం కావాలి

నాతో వచ్చే ధైర్యం నీకుందా?
నీ ఇంటిని నీవు వదిలెయ్యాలి
నాతో నడిచే తెగింపు నీకుందా?
నీ ఒంటిని నీవు మర్చిపోవాలి

అప్పుడు నీకు తెలుస్తుంది
నాకే వైరసూ లేదని
అప్పుడే నీకర్ధమౌతుంది
నీ వైరసులన్నీ పోయాయని

మరి సిద్ధమేనా?
నాలా మారి నాతో కలసి
నడవడానికి?
నాలో కరిగి నేనుగా వెలిగి
నవ్వడానికి?

read more " ఆధ్యాత్మిక వైరస్ "

ప్రయత్నం

పక్క జీవిని తింటూ
తను హాయిగా బ్రతకాలని
ప్రతి జీవీ ప్రయత్నం

నక్కజిత్తులు వేస్తూ
నాటకాలాడటం
సగటుజీవి ప్రయత్నం

పోతానని తెలిసినా
పోకుండా ఉండాలని
ప్రతి ప్రాణీ ప్రయత్నం

మోతబరువు మోస్తున్నా
మోజు తీరకపోవడం
సంసారి ప్రయత్నం

వద్దనుకునేదానిలోనే
వయసంతా బ్రతకడం
సన్యాసి ప్రయత్నం

తప్పని తెలిసినా
తప్పించుకోలేక తారట్లాడటం
మనిషి ప్రయత్నం

ఎప్పటినుంచో కోరుకున్నది
ఎదురుగా ఉన్నా అందుకోలేని
అసమర్ధుని ప్రయత్నం

చెయ్యలేనని తెలిసినా
చేద్దామనుకోవడం
ఆశాజీవి ప్రయత్నం

అరగదని తెలిసినా
ఆబగా తినబోవడం
అతితెలివి ప్రయత్నం

తను చెయ్యలేనిది
ఇతరులకు చెప్పబోవడం
బోధకుని ప్రయత్నం

సాధ్యం కాదని తెలిసినా
సాధించాలని చూడటం
సాధకుని ప్రయత్నం

లేవలేరని తెలిసినా
నిద్ర లేపబోవడం
గురువు ప్రయత్నం

నిండైన మనిషికోసం
నిత్యం చేస్తున్న
ప్రకృతి ప్రయత్నం

గుండెల్లో తనకు
గుడికట్టేవాడి కోసం
దైవం ప్రయత్నం

read more " ప్రయత్నం "

జీవితం - హైకూలు

కలలను మరువలేకపోవడమే జీవితం

కనులను తెరువలేకపోవడమే జీవితం

కలలు కల్లలని అందరికీ తెలుసోయ్ !

అంతులేని వెదుకులాటేగా జీవితం

అర్ధంకాని కలలబాటేగా జీవితం 

నీ వాళ్ళు దూరం కావడమే జీవితం

నీ కాళ్ళు భారం కావడమే జీవితం

నిజంగా మనవాళ్ళంటే ఎవరోయ్?

కుదురు లేని మనసేగా జీవితం

ఎదురు చూచు చూపేగా జీవితం

ప్రేమకు ప్రేమ దక్కకపోవడం జీవితం

కామపు మంట ఆరకపోవడం జీవితం

అన్నీ కావాలని అందరూ ఆశిస్తారోయ్

కొందరికే కొన్నే దక్కడం జీవితం

ఎందులోనూ ఏదీ మిగలకపోవడం జీవితం

ఏదో కావాలని వెర్రిగా ఆశించడం జీవితం

అదే దొరికాక అదికాదని తెలియడం జీవితం

ఈలోకంలో దేన్నీ వెదకనివాడు ఎవడోయ్?

లేనిదాన్ని చేరాలనుకోవడం జీవితం

కానిదాన్ని కావాలనుకోవడం జీవితం

ఎండమావులను నిజాలనుకోవడం జీవితం

బండబావులలో నీళ్లుంటాయనుకోవడం జీవితం

నిజంగా దాహం తీరినవాడు ఎవడున్నాడోయ్?

నీడలవెంట పరుగులాటేగా జీవితం

శూన్యపు ఇంట వెదుకులాటేగా జీవితం

నువ్వేంటో నీకు తెలియకపోవడమే జీవితం

అన్నింటినీ అనుభవించాలనుకోవడమే జీవితం

ఎన్నాళ్ళు నువ్విక్కడ ఉంటావోయ్?

కిరాయి కొచ్చిన కులుకులాటే జీవితం

పరాయిపెళ్ళికి విరగబాటే జీవితం

ఇప్పటికిది నిజమనుకోవడం జీవితం

తప్పని తెలిసినా తప్పకపోవడం జీవితం

తప్పులు చెయ్యనివాడు ఎవడున్నాడోయ్?

తప్పొప్పుల మధ్య తటపటాయింపే జీవితం

ముప్పొద్దుల మధ్య ముగిసిపోవడమే జీవితం

read more " జీవితం - హైకూలు "

జ్ఞాపకం

ఒకనాడొక చర్చలో 'జీవితం అంటే ఏమిటి?' అన్న విషయం మొదలైంది.

అక్కడున్న వాళ్ళందరూ రకరకాలుగా వారికి తోచిన విధంగా చెప్పారు.

నేనన్నాను - 'జీవితం ఒక జ్ఞాపకం. అంతే' అని.

అదేంటన్నారు.

ఇలా చెప్పాను.

'జీవితంలో చివరికి మిగిలేవి జ్ఞాపకాలే. ఇక్కడ ఏదీ నీతో రాదు. నీతో వచ్చేది నీ జ్ఞాపకాలే. జీవిత చరమాంకంలో వెనక్కు తిరిగి చూచుకున్నప్పుడే ఈ విషయం అర్ధమౌతుంది. అంతకు ముందు అర్ధం కాదు. ఇంకా చెప్పాలంటే, జీవితం మొదట్లోనే జీవిత చరమాంకాన్ని రుచి చూచినవాడికే ఇది బాగా అర్ధమౌతుంది.

జీవితంలో నువ్వు పొందిన సంతోషాలూ, బాధలూ, ఆశలూ, నిరాశలూ, పొంగిపోవడాలూ క్రుంగిపోవడాలూ - అవన్నీ ఇప్పుడేవి? ఎక్కడున్నాయి?

నీ జ్ఞాపకాలుగా మిగిలి ఉన్నాయి. అంతే !

జీవితమంటే వర్తమానమే అని, వర్తమానంలో జీవించమని కొందరు తాత్వికులంటారు. నేను వాళ్ళను చూచి నవ్వుతాను. జీవితం వర్తమానం కాదు. అదొక జ్ఞాపకం. వర్తమానం కూడా జ్ఞాపకం అయినప్పుడే నీకు గుర్తుంటుంది. లేకుంటే దాన్ని నువ్వు గుర్తించలేవు.

నీ జీవితంలో నువ్వు ప్రేమించినవాళ్ళూ, నిన్ను ప్రేమించినవాళ్ళూ, నువ్వు ద్వేషించినవాళ్ళూ, నిన్ను ద్వేషించినవాళ్ళూ, నువ్వు కావాలనుకున్న వాళ్ళూ, నిన్ను కావాలనుకున్నవాళ్ళూ - వాళ్ళంతా ఏరి? ఇప్పుడెక్కడున్నారు?

నీ జ్ఞాపకాలలో ఉన్నారు. నీ జ్ఞాపకాలుగా మిగిలి ఉన్నారు.

నీ జీవితం మొత్తం ఇంతే. అది ఒక జ్ఞాపకం ! ఒక జ్ఞాపకంగానే అది చివరకు మిగులుతుంది.

గత జన్మలైనా అంతే. అవి జ్ఞాపకాలుగా నీ సుప్తచేతన అడుగున ఉన్నాయి. ఆ లోతులకు వెళ్లి చూడగలిగితే నీకు కనిపిస్తాయి. అప్పుడు నీ గత జన్మలలో నువ్వేంటో అర్ధమౌతుంది. ఈ జన్మలో నువ్వేంటో, అసలు నువ్వెంతో అర్ధమౌతుంది.  నువ్వెవరో అర్ధమౌతుంది.

'ఏమంటారు?' అన్నాను.

వాళ్ళందరూ ఏమీ అనలేదు. మౌనంగా ఉన్నారు.

ఏదైనా అనడానికి వాళ్ళంటూ అసలుంటే కదా? వాళ్ళంతా నేనే. వాళ్ళు నావాళ్ళే. నాలోని వాళ్ళే. నా జ్ఞాపకాలే.

జీవితమంటే ఒక జ్ఞాపకమే.

కాదా?

read more " జ్ఞాపకం "

జీవితం

ఊహలే నిజమనుకుంటూ
వాస్తవాన్ని వాస్తవంగా గుర్తించలేకపోవడం
జీవితం

ఎక్కడెక్కడో ఆలోచిస్తూ
చేతిలోని జీవితాన్ని చేజార్చుకోవడం
జీవితం

పిచ్చిపిచ్చి గమ్యాలు పెట్టుకుని
వాటికోసం వెర్రిగా పరుగెత్తడం
జీవితం

నిజంగా తనవారెవరో తెలుసుకోలేక
ప్రతివారూ తనవారే అనుకోవడం
జీవితం

పక్కవాడికంటే వేగంగా పరుగెత్తకపోతే
తనదేదో పోతుందని భ్రమించడం
జీవితం

అన్నీ సంపాదించాక
అవన్నీ అక్కరకు రావని గ్రహించడం
జీవితం

చెయ్యాల్సిన పనిని వాయిదా వేసి
అవసరం లేని పనుల్ని అతిగా చెయ్యడం
జీవితం

అన్నీ తెలుసని అహంకరిస్తూ
అసలైనవాటిని దూరం చేసుకోవడం
జీవితం

ఈ క్షణమే శాశ్వతం అనుకుంటూ
శాశ్వతాన్ని కాలదన్నుకోవడం
జీవితం

బాధల్లో ఏడవడం
అవి తీరాక అందర్నీ అరవడం
జీవితం

ఉన్నప్పుడు విలువ తెలియక
లేనప్పుడు విలపించడం
జీవితం

పావురాళ్ళను దూరం చేసుకోవడం
నాగుపాముల్ని నమ్మడం
జీవితం

ఎందుకు బ్రతుకుతున్నామో
తెలియకుండా బ్రతకడం
జీవితం

జీవితాన్ని అనుక్షణం
చేజార్చుకుంటూ జీవించడం
జీవితం

read more " జీవితం "

ఎవరు నేను?

కొందరు నన్ను మంచి మిత్రుడినన్నారు

నిజమే

చక్కగా నాతో స్నేహం చేసేవారికి

మంచి మిత్రుడినే నేను

కొందరు నన్ను మోసగాడన్నారు

నిజమే

ఏవేవో కోరికలతో నాదగ్గరకు వస్తే

పెద్ద మోసగాడినే నేను

కొందరు నన్ను పిచ్చివాడన్నారు

నిజమే

ఈలోకమంతా ఉన్న  పిచ్చివాళ్ళకు అర్ధంకాని

కొత్తరకం పిచ్చివాడినే నేను

కొందరు నన్ను అమాయకుడన్నారు

నిజమే

ఈ ప్రపంచపు మాయలు తెలియని

అసలైన అమాయకుడినే నేను

కొందరు నన్ను స్వాప్నికుడనన్నారు

నిజమే

ఎప్పుడూ ఏవేవో కలల్లో ఉండే

స్వాప్నికుడినే నేను

కొందరు నన్ను పొగరుబోతునన్నారు

నిజమే

పొగరుగా నాకెదురు వచ్చేవారికి

అంతకంటే పెద్ద పొగరుబోతునే నేను

కొందరు నన్ను సరదా మనిషినన్నారు

నిజమే

మామూలు సరదాలకు దూరమైన

సరదా మనిషినే నేను

కొందరు నన్ను అనాచారినన్నారు

నిజమే

కొంతమందికే తెలిసిన ఆచారాన్ని పాటించే

అసలు సిసలు అనాచారినే నేను

కొందరు నన్ను నాస్తికుడనన్నారు

నిజమే

ఆస్తిపాస్తులమీద పెద్దగా నమ్మకం లేని

నికార్సైన నాస్తికుడనే నేను

కొందరు నన్ను సంసారాలు కూల్చేవాడినన్నారు

నిజమే

సంసారాన్నే కూల్చేద్దామని

ఎప్పుడూ ప్రయత్నించేవాడినే నేను

కొందరు నన్నొక దొంగనన్నారు

నిజమే

మీ ఆస్తులన్నీ దోచుకుని మిమ్మల్ని నాస్తిగా చేసే

గజదొంగనే నేను

కొందరు నన్నొక ప్రేమికుడనన్నారు

నిజమే

మనుషుల్లో నిద్రాణంగా ఉన్న ప్రేమను తట్టిలేపే

ప్రేమికుడినే నేను

కొందరు నన్నొక కాముకుడినన్నారు

నిజమే

దేన్ని కామించాలో ఎలా కామించాలో తెలిసిన

కాముకుడినే నేను

కొందరు నన్నొక రచయితనన్నారు

నిజమే

ఏం వ్రాస్తానో ఎలా వ్రాస్తానో నాకే తెలియని

రచయితనే నేను

కొందరు నన్నొక ఉపన్యాసకుడినన్నారు

నిజమే

నేను మాట్లాడేది నేను కూడా వినే

ఉపన్యాసకుడినే నేను

కొందరు నన్నొక గాయకుడి నన్నారు
నిజమే
పాతగాయాల్ని పాటలతో మర్చిపోదామని ప్రయత్నించే
గాయకుడినే నేను

కొందరు నన్నొక జులాయినన్నారు

నిజమే

ఏ కట్టుబాట్లకూ లొంగకుండా సంచరించే

జులాయినే నేను

కొందరు నన్నొక సాధకుడినన్నారు

నిజమే

సాధారణంగా ఉండటానికి ఇష్టపడే

సాధకుడినే నేను

కొందరు నన్నొక గురువునన్నారు

నిజమే

గురువుల గ్రుడ్డితనాన్ని చూచి నవ్వుకునే

గురువునే నేను

కొందరేమో నువ్వు అర్ధం కావన్నారు
నిజమే
నాకే నేనర్ధం కాను
ఇక మీకెలా అవుతానన్నాను

ఇంతకీ ఎవరు నేను?

అందరికీ తలూపుతూ

అన్నిటికీ ఔనంటూ

అన్నీచూచి నవ్వుకుంటూ

అవన్నీ నేనౌతూ

ఆ అన్నిటికీ అతీతంగా

నన్నే నేను నిరంతరం దాటిపోతూ
నాలోనే నేనుండే

అసలైన నేనును నేను

read more " ఎవరు నేను? "

టాయిలెట్ ధ్యానం

ఒకడు

టాయిలెట్లో భార్య ఎక్కువసేపుందని

తలుపులు బాదుతున్నాడు

తన పూజకు లేటౌతోందని

తను స్నానం చెయ్యాలని

త్వరగా మడి కట్టుకోవాలని

మెట్టేషన్ చేసుకోవాలని

బాత్రూం బయట కోతిలా ఎగురుతున్నాడు

చివరకు భార్య బయటకొచ్చింది

ఇతని స్నానం అయింది, పూజ అయింది

పూజ సమయంలో టీవీ సౌండ్ తగ్గించలేదని

భార్యను తిడుతున్నాడు

టిఫిన్ సరిగా చెయ్యలేదని

నీవల్లే ఆఫీసుకు లేటైందని

చిర్రుబుర్రులాడుతున్నాడు

భర్త భరతనాట్యం చేస్తున్నాడు
భార్య మౌనయోగినిలా ఉంది
భర్త అసహనంగా ఉన్నాడు
భార్య అమాయకంగా ఉంది

ఆ భార్య

టాయిలెట్లో ఉన్నంతసేపూ

ట్యాప్ లోంచి మగ్గులో పడుతున్న

నీటి చుక్కల శబ్దం వింటూ

దానిలో లీనమై

ప్రపంచాన్ని మరచింది

తనెక్కడుందో మరచింది

ఆమె మనసు ఆగిపోయింది

శూన్యమై పోయింది

అందుకే అక్కడ అంతసేపుంది

మడికట్టుకుని గంటసేపు
పూజా ధ్యానం చేసిన భర్త మనసు

చేపల మార్కెట్లా ఉంది

పావుగంటసేపు టాయిలెట్లో ఉన్న భార్య మనసు

మానససరోవరంలా ఉంది

ఎవరిది ధ్యానం?

ఎవరిది మౌనం?

పూజగది టాయిలెట్ అయింది

టాయిలెట్ పూజగది అయింది

భలే ఉంది కదూ

టాయిలెట్ ధ్యానం !

read more " టాయిలెట్ ధ్యానం "

ఈ లోకం...

ఈ లోకం
ప్రాచీన రంగస్థలం
ఈ లోకం
కౌపీన సంరక్షణం

ఇక్కడ ఒకే డ్రామా
అనేకసార్లు ఆడబడుతుంది
ఇక్కడ ఒకే కామా
అనేక సార్లు పెట్టబడుతుంది

ఇదొక గానుగెద్దు జీవితం
పిచ్చిమొద్దు జీవితం
ఇదొక పనికిరాని కాగితం
చదవలేని జాతకం

ఈ హాస్య నాటికలో ప్రతి నటుడూ
ఎన్నోసార్లు అదే పాత్రను పోషిస్తాడు
ఈ వేశ్యా వాటికలో ప్రతివాడూ
అనేకసార్లు అడుగుపెడతాడు

ఈ రంగస్థలాన్ని ఎలా వదలాలో
ఎవరికీ తెలీదు
ఈ డ్రామాని ఎలా ముగించాలో
ఎవరికీ తెలియదు
ఈ కామాని పుల్ స్టాప్ గా ఎలా మార్చాలో
ఎవరికీ తెలీదు

ఇక్కడ ప్రతివాడూ
చక్కగా జీవిస్తున్నాననుకుంటాడు
కానీ ఊరకే
ఏడుస్తూ బ్రతుకుతుంటాడు

ఇక్కడ ప్రతివాడూ
గెలుస్తున్నాననే అనుకుంటాడు
కానీ ప్రతిక్షణం
ఓడిపోతూనే ఉంటాడు

ఇక్కడ ప్రతివాడూ
ఎన్నో పొందుతున్నాననే భ్రమిస్తాడు
కానీ జీవితాన్ని
కోల్పోతున్నానని మర్చిపోతాడు

ఏవేవో గమ్యాలకోసం
ఎప్పుడూ వెదుకుతూ ఉంటాడు
అనుక్షణం కాళ్ళక్రింద కాలం
కరిగిపోవడం గుర్తించలేడు

పిచ్చివాళ్ళ నిలయం
ఈ లోకం
అచ్చమైన వలయం
ఈ లోకం

అంతు తెలియని పద్మవ్యూహం
ఈ లోకం
లోతు అందని వింతమోహం
ఈ లోకం...

read more " ఈ లోకం... "

ప్రేమ మైకం

ఈరోజు తెల్లవారక ముందే
ఎందుకో మెలకువొచ్చింది
ఇంకా కళ్ళు తెరవక ముందే
ప్రేమ నాలో కన్ను విచ్చింది

నీ ప్రేమను తలచుకొంటూ
విలపిస్తూ నిద్ర లేచాను
ఇంత ప్రేమకు నేనర్హుడినా?
అనుకుంటూ నిద్ర లేచాను

ఉదయిస్తున్న సూర్యుడిని చూచాను
ఆ బింబంలో నీ ప్రేమే నాకు కనిపించింది
ఒంటికి తాకుతున్న చల్లని గాలిలో
నీ ప్రేమే నన్ను సుతారంగా స్పృశించింది

మనోజ్ఞమైన ఉదయసంధ్యలో
నీ ప్రేమవెలుగే నన్ను పలకరించింది
ఏ దిక్కుకు తిరిగి చూచినా
నీ చిరునవ్వే నాకు దర్శనమిచ్చింది

పంచభూతాలుగా ఈ లోకంలో 

నన్ను పోషిస్తున్నది నీ ప్రేమే

ఇక్కడి నా ప్రయాణం ముగిశాక 

నే చేరే ఆఖరి మజిలీ నీ ప్రేమే

మా అమ్మ లాలింపుగా
నన్ను పెంచింది నీ ప్రేమే
నా పిల్లలపై ప్రేమగా
నాలో పొంగింది నీ ప్రేమే

నన్ను ప్రేమిస్తున్న వారిద్వారా
హర్షంగా నాపై కురుస్తోంది నీ ప్రేమే
నన్ను ద్వేషిస్తున్న వారిలో
శీర్షాసనం వేస్తున్నది నీ ప్రేమే

నన్ను చూచే నా ప్రేయసి కళ్ళలో
తళుక్కుమన్నది నీ ప్రేమే
నన్ను చంపే నా శత్రువు చేతిలో
చురుక్కుమన్నది నీ ప్రేమే

జీవితపు ప్రతి మజిలీలోనూ
ఎన్నో వేషాలలో ఎదురైంది నీ ప్రేమే
కాగితపు పూలల్లో కూడా
కళకళలాడింది నీ ప్రేమే

నేను గ్రహించినా గ్రహించలేకున్నా
నన్ను నడిపింది నీ ప్రేమే
నేను చూచినా చూడకపోయినా
కన్ను కలిపింది నీ ప్రేమే

జగత్తును నడుపుతున్నది ప్రేమే
జ్వలిస్తూ కరుగుతున్నది ప్రేమే
జీవితాన్ని మలుపుతున్నది ప్రేమే
చావులేక వెలుగుతున్నదీ ప్రేమే

read more " ప్రేమ మైకం "

మానవుడు

ఒక మానవుడు....

మట్టిలో పుట్టి

మట్టికోసం కొట్టుకుని

మట్టిలో కలసి

మట్టికొట్టుకు పోతున్నాడు

తప్పని తెలిసీ

తప్పించుకునే మార్గం తెలియక

చేసిన తప్పులనే మళ్ళీ చేస్తూ

తప్పుల కుప్ప అవుతున్నాడు

ఒప్పులివీ అంటూ

ఒప్పించేవాళ్ళు చెప్పినా

ఒప్పుకోలేక

ఒప్పులకుప్పలా వగలేస్తున్నాడు

తనతో ఏదీ రాదనీ తెలిసినా

తమాయించుకోలేక

తనివి తీరకుండానే

తనువు చాలిస్తున్నాడు

ఇంకో మానవుడు

మట్టిలో పుట్టినా

మత్తులో జోగకుండా

మనసునధిగమిస్తూ

మహనీయుడౌతున్నాడు

దానవత్వాన్ని దాటిపోతూ

మానవత్వాన్ని పోగు చేస్తూ

దైవతత్వాన్ని అందుకుంటూ

ధన్యజీవిగా మారుతున్నాడు

రహదారిలో తాను నడుస్తూ

తనవారిని తనతో నడిపిస్తూ

పరతత్వపు పందిళ్ళలో

పరవశించి పోతున్నాడు

చావు పుట్టుకల ఆటలో

పావుగా ఇక్కడ పుట్టినా

ఆట నియమాలను దాటి

అనంతంలోకి అడుగేస్తున్నాడు

మానవుడు....

read more " మానవుడు "

ఆధ్యాత్మికం అంటే ఏమిటి?

ఆధ్యాత్మికం అంటే ఏమిటి?

అని నన్నడిగింది ఒకమ్మాయి

"ప్రేమించడం, ప్రేమలో మునిగి మరణించడం"

అన్నాను.

లోకంలో అందరూ ప్రేమిస్తున్నారుగా?

మరి వాళ్ళంతా ఆధ్యాత్మికులేనా?

అడిగింది తను.

లోకంలో కనిపించే ప్రేమ, ప్రేమ కాదు
ఆ పేరుకు అది తగదు 

నేను చెప్పే ప్రేమకు అదొక సుదూరపు ఛాయ

నేను చెప్పే ప్రేమ సత్యం. లోకప్రేమ మాయ

అన్నాను.

దానిని పొందాలంటే ఏం చెయ్యాలి?

అడిగింది.

నిన్ను బంధించిన సంకెళ్ళను త్రెంచుకోవాలి

దానిలోకి అడుగుపెట్టాలి.

దానిలో కరిగిపోవాలి.

చెప్పాను.

నా వాళ్ళను నేను వదలలేను.

నా జీవితాన్ని నేను వదలలేను.

అన్నది.

వదలమని ఎవరు చెప్పారు?

అన్నాను.

మరి బంధాలను త్రెంచాలన్నావుగా?

అడిగింది అమాయకంగా.

బంధాలంటే నీ బయట నిన్ను పట్టుకున్నవి కావు.

నిన్ను నువ్వే కట్టుకున్నవి.
నీలోపల నువ్వే అల్లుకున్నవి.

అన్నాను.

'పూజలు సరిపోవా?' అడిగింది.

'పూజలకూ దీనికీ సంబంధం లేదు.

పూజలు చేస్తుంటే పుచ్చిపోతావు గాని పండవు.'

అన్నాను.

'అర్ధం కాలేదు' అంది.
'ఇది అర్ధం చేసుకునేది కాదు. అనుభవించేది' అన్నాను.
'ఎలా?' అంది.

'ముందుకు అడుగెయ్యి తెలుస్తుంది' అన్నాను.

'వెయ్యలేను.' అంది.

'నీ ఖర్మ! పడు.' అన్నాను.

read more " ఆధ్యాత్మికం అంటే ఏమిటి? "

ప్రేమకోసం...

జీవితం నాకెంతో మందిని
పరిచయం చేసింది
ఎన్నో ముంగిళ్ళలో నాచేత
కాలు మోపించింది

ప్రతి కళ్ళలోనూ కళ్ళు కలిపాను
ప్రతి ముఖంలోకీ తొంగిచూచాను
ప్రతి హృదయంలోకీ అడుగుపెట్టాను
పిచ్చిగా ఒకేదానికోసం జీవితమంతా వెదికాను
దేనికోసమో తెలుసా? ప్రేమకోసం !

కానీ ఏమైందో తెలుసా?

ప్రతిచోటా స్వార్ధమే పలకరించింది
ఎక్కడైనా వ్యాపారమే ఎదురొచ్చింది

కొన్ని చోట్ల కోరిక చెయ్యిసాచింది
కొన్ని చోట్ల మోసం కొలువుదీరింది

కానీ, ఎక్కడైనా చీకటే వెక్కిరించింది
ప్రేమవెలుగు మాత్రం ఎక్కడా దొరకలేదు

ప్రతి పుష్కరిణీ
ఒక వైతరణే అని అర్ధమైంది
ప్రతి కోవెలా
ఒక వెలయాలి లోగిలే అనిపించింది
ప్రతి బంధమూ
ఒక ప్రతిబంధకమే అని తెలిసింది
ప్రతి స్నేహమూ
ఒక మోసంతోనే ముగిసింది

అమృతభాండం అనుకున్నది
విషపు కుండని అర్ధమైంది
అమాయకులనుకున్నవారు
అమానుషంగా ప్రవర్తించారు

నేను నమ్మిన ప్రతివారూ
నన్ను వెన్నుపోటు పొడిచారు
నా ప్రేమను రుచి చూచిన ప్రతివారూ
నా ముఖాన తుపుక్కున ఉమిశారు

అయినా నా ఆశ చావలేదు
అయినా నా అన్వేషణ ఆగలేదు
అయినా నా నమ్మకం సడలిపోలేదు
అయినా నా విశ్వాసం వీగిపోలేదు

ప్రపంచంపైనా ప్రకృతిపైనా
నా ప్రేమ సడలిపోలేదు
మనిషి మీదా దైవం మీదా
నా నమ్మకం వడలిపోలేదు

ఏదో ఒక గుండెలోనైనా
ఆ జీవం ఉండకపోతుందా?
ఏదో ఒక ఇంటిలోనైనా
ఆ వెలుగు కన్పించకపోతుందా?
ఏదో ఒక మనిషిలోనైనా
ఆ మానవత్వం మెరవకపోతుందా?
ఏదో ఒక ఆత్మలోంచైనా
ఆ సౌందర్యం కురవకపోతుందా?

అని ఇంటింటికీ తిరుగుతున్నాను
వీధి వీధీ గాలిస్తున్నాను
మనిషి మనిషినీ జల్లెడ పడుతున్నాను
లోకపు శూన్యనగరాలలో
ఒంటరిగా వెదుకుతున్నాను

ఈ ప్రయత్నంలో కూలిపోతాను గాని
మురికి లోగిళ్ళలో విశ్రాంతి కోరను
ఈ వేదనలో కాలిపోతాను గాని
వెకిలి కౌగిళ్ళలో సేదతీరను

ఇలా తిరుగుతూనే ఉంటాను
నేను కోరుతున్నది నాకు దొరికేదాకా
ఇలా మరిగిపోతూనే ఉంటాను
నా గుండె వెలుగు ప్రతిబింబం
ఒక్కరిలోనైనా నాకు కన్పించేదాకా...

read more " ప్రేమకోసం... "