ప్రక్కఊరినుండి అప్పుడపుడు కొంతమంది ఏదో పనిమీద ఆశ్రమానికి వస్తూ ఉంటారు. వారిలో ఒకతను ఈ మధ్యన ఇలా అడిగాడు.
'ప్రతి ఏడాది మా గుడిలో నవరాత్రులు చేస్తాము. మీరూ ఆశ్రమంలో చేస్తారా?'
'రాత్రులను మనం చేసేదేముంది? అవే వచ్చిపోతుంటాయి' అన్నాను.
షాకయ్యాడు.
'అంటే, అమ్మవారికి ప్రత్యేకపూజలు ఏవీ చెయ్యరా?' అడిగాడు అనుమానంగా.
'ప్రత్యేకంగా చేసేది పూజ ఎలా అవుతుంది?' అన్నాను.
అయోమయంగా చూచాడు.
'మరి నైవేద్యాలు?' భయంగా అడిగాడు.
'కాలానికి మనం అవుతున్నాంగా ప్రతిరోజూ - నైవేద్యం' అన్నాను.
కాసేపు మాటరాలేదు.
'మరి మైకులు భజనలు ఉండవా?' అన్నాడు.
'అమ్మవారికి చెవుడు లేదు. ఆమెకు భజనపరులు నచ్చరు' అన్నాను.
అతను లేచి వెళ్ళిపోయాడు.
నవరాత్రులు నవ్వుతున్నాయి.
