కనిపించని లోకాలను కళ్ళముందు నిలుపుతాయి
ఈ రోజు శ్రీరామకృష్ణులవారి 187 వ జయంతి.
ఈ రోజునుండీ మా ఆశ్రమం పనులు చురుకుగా ముందుకు కదులుతున్నాయి. దానిలో భాగంగా, ఇప్పటివరకూ ఉన్న మొక్కలను తొలగించడం, ఆశ్రమస్థలాన్ని దున్నించడం, స్థలహద్దులను గుర్తించడం, బోరింగ్ పాయింట్ ను జియాలజిస్ట్ సహాయంతో గుర్తించడం మొదలైన ప్రాధమిక పనులను మొదలు పెట్టాం.
ఈ సందర్భంగా తీసిన ఫోటోలను వీడియోలను ఇక్కడ చూడండి.
ఈ రోజు శ్రీరామకృష్ణులవారి 187 వ జయంతి.
ఈ శుభదినాన,, మా 'పంచవటి స్పిరిట్యువల్ ఫౌండేషన్' ఆశ్రమం పనులు మొదలయ్యాయి. ఈ రోజునుంచీ మా ఫేస్ బుక్ పేజీ కూడా లైవ్ అవుతున్నది. మా ఇండియా, అమెరికా వెబ్ సైట్లతో బాటు, ఫేస్ బుక్ పేజీలో కూడా ఇకనుంచీ మా కార్యక్రమాలు అప్ డేట్ అవుతాయి.
ఈ క్రింది వెబ్ అడ్రస్ లో మా ఫేస్ బుక్ పేజీని మీరు సందర్శించవచ్చు. మా కార్యక్రమాలను, పురోగతిని ఎప్పటికప్పుడు తెలుసుకోవచ్చు. మా సంస్థ గురించిన మీ అభిప్రాయాలను, భావాలను మాతో పంచుకోవచ్చు. మా ప్రయాణంలో మాతో కలసి నడువవచ్చు. తద్వారా వేదాంత - యోగ - తంత్ర - జ్యోతిష్యరహస్యాలతో కూడిన సాధనామార్గంలో ఉన్నత అంతస్తులను అందుకోవచ్చు.
మాతో అనుసంధానం అవడానికి ఇదే మీకు ఆహ్వానం.
https://www.facebook.com/Panchawati-Spiritual-Foundation-110864981474679/
శ్రీరామకృష్ణులవారి బోధనలు ద్వైత, అద్వైత, విశిష్టాద్వైత సిద్ధాంతములను సమన్వయపరుస్తూ, అతిసరళమైన విధానంలో జీవితానికి అన్వయించుకునే విధంగా ఉంటాయి. అసలైన సత్యంకూడా అదే. వేదములకు, ఉపనిషత్తులకు కేవలం ద్వైతపరంగానో, విశిష్టాద్వైతపరంగానో, అద్వైతపరంగానో భాష్యాన్ని చెప్పడము, వీటిలో ఏదో ఒకటే సరియైనదంటూ, మిగిలినవి తప్పులని ఖండించడమే అసలైన పెద్దతప్పు. ఇలా అనడం సాహసమైనప్పటికీ, త్రిమతాచార్యులు చేసిన తప్పు అదేనని చెప్పక తప్పదు. దానినే వారి అనుయాయులు నేటికీ కొనసాగిస్తూ వస్తున్నారు. ఆ చీకటియుగాన్ని దాటి చాలా ముందుకొచ్చిన మనకు, అవే విభేదాలను 'శైవం, వైష్ణవం, శాక్తేయం' అంటూ మళ్ళీ కొందరు ఆచార్యులు నూరిపోస్తున్నారు. శివుడే దేవుడని, విష్ణువే దేవుడని, ప్రజలను మళ్ళీ వర్గాలుగా చీలుస్తూ విభేదాలను సృష్టిస్తున్నారు. సమాజాన్ని చీకటియుగాలలోకి మళ్ళీ తీసుకుపోతున్నారు. ఇది పూర్తిగా తప్పు. ఈ తప్పును సరిదిద్దవలసిన బాధ్యత నిజమైన ఆధ్యాత్మిక గురువులపైన ఉన్నది.
నా మార్గం కూడా ఇదే. నా ' శ్రీవిద్యా రహస్యం' గ్రంధంలో దీనినే వివరించాను.
త్వరలో రాబోతున్న నా సంచలనాత్మక గ్రంధం, 'త్రిమత సమన్వయము' కు ముందస్తుగా కొన్ని శంకర, రామానుజ, మధ్వ సాంప్రదాయాలకు చెందిన గ్రంధములను విడుదల చేయాలన్నది నా ఆలోచన. ఆ ఒరవడిలో ఒక ప్రయత్నమే శంకరాచార్యులవారు రచించిన ఈ 'ఆత్మబోధ' పుస్తకం.
ఎంతోమంది పండితులు, జ్ఞానులు ఇప్పటికే ఈ గ్రంధానికి వ్యాఖ్యానాలను వ్రాశారు. నా చింతనాధోరణిలో ఇప్పుడు నేనూ దీనిని వ్యాఖ్యానించాను. అద్వైతాభిమానులకు నా వ్యాఖ్యానం తప్పకుండా నచ్చుతుందని భావిస్తున్నాను.
దానికి తోడుగా, ఈ రోజుకు ఇంకొక ప్రత్యేకత ఉన్నది.
ఈరోజున మా ఒంగోలు ఆశ్రమం పనులు మొదలయ్యాయి. ఆశ్రమస్థలాన్ని దున్నించడం, స్థలం హద్దులను సరిచూడడం, బోరింగ్ పాయింట్ ను గుర్తించడం మొదలైన ప్రాధమికపనులను ఈరోజున చేస్తున్నాము. అందుకని, నా శిష్యులందరి కోరికననుసరించి, మా ఆశ్రమస్థలంనుంచే ఈ పుస్తకాన్ని విడుదల చేస్తున్నాను. ఈ విధంగా, మా ఆశ్రమస్థలం నుండి విడుదలౌతున్న మొదటి పుస్తకం -- శంకరుల 'ఆత్మబోధ' అవుతున్నది.
రాబోయే రెండునెలలలో ఆశ్రమపనులను చురుకుగా కొనసాగిస్తూ, కనీసం రెండు స్పిరిట్యువల్ రిట్రీట్స్ ను మా శిష్యులందరితో కలసి మా ఆశ్రమస్థలంలో జరుపబోతున్నాము. నిజమైన ఆధ్యాత్మికసాధకులకు ఇక పండుగరోజులు మొదలు కాబోతున్నాయి. నలభై అయిదేళ్లుగా సాగిన నా సాధనామార్గంలో నేను అవగతం చేసుకున్న అనేక నిగూఢమైన జ్యోతిష, యోగ, తంత్రరహస్యాలను, ఇన్నాళ్లూ నమ్మకంగా నన్ను అనుసరిస్తూ వస్తున్న శిష్యులకు దగ్గరుండి నేర్పించబోతున్నాను. వారిని యోగ-తంత్ర సాధనాపూర్వకమైన ధ్యానమార్గంలో ప్రాక్టికల్ గా నడిపించబోతున్నాను.
నేనిన్నాళ్ళూ చెబుతూ వస్తున్నది ఇప్పుడు సాకారం అవుతున్నది. గమనించండి !
ఈ ప్రయాణానికి తొలి అడుగుగా, మా ఆశ్రమస్థలం నుండి 'ఆత్మబోధ' ను ఈరోజు విడుదల చేస్తున్నాను. నా సాధనామార్గంలో నడవాలని ఆశించేవారికి ఈరోజు సుదినం. ఆధ్యాత్మిక జీవితపు అనుభవాలను ప్రాక్టికల్ గా పొందాలని ఆశించేవారికి ఇది నూతనాధ్యాయం !
ఇక, ఆనందపు వెల్లువలతో కూడిన నిరంతర అంతరిక ప్రయాణానికి సిద్ధం కండి !
నల్లముసుగుల ఆందోళన
మోడీ ఏం చేస్తున్నాడు?
ఉక్రెయిన్ మీద రష్యా
ఉక్రోషంగా బాంబులేస్తోంది
మోడీ ఏం చేస్తున్నాడు?
నీళ్లు రావట్లేదు
మా బెడ్రూంలో ఏసీ
పనిచెయ్యట్లేదు
మోడీ ఏం చేస్తున్నాడు?
ఈ మధ్యన ఒక పాత మిత్రుడిని కలవడం సంభవించింది. ఆయన స్టేట్ గవర్నమెంట్ లో హై పొజిషన్ లో రిటైర్ అయ్యాడు. ఇద్దరికీ ఇద్దరి గురించీ తెలిసినా నా నాణేనికి ఉన్న రెండోవైపు ఆయనకు తెలీదు. అందుకని మామూలు ధోరణిలోనే మాటలు సాగాయి.
నా మిత్రులలో ఎవరిని నేను కలిసినా ఆస్తిపాస్తుల గురించీ, పిల్లల గురించీ, ఎంత సంపాదించావ్?, ఎంత వెనకేశావ్? ఇలాంటి చచ్చుప్రశ్నలు ఎప్పుడూ అడగను. నేనడిగేది ఒకటే ప్రశ్న, 'ఎలా ఉన్నావ్?' అని. మహా అడిగితే 'ఆరోగ్యం బాగుందా?' అని రెండో ప్రశ్న అడుగుతా, అంతే. అంతకుమించి అడగకపోవడంతో, నాకు జనరల్ నాలెడ్జి తక్కువని సహజంగానే వారనుకుంటూ ఉంటారు. వారలా అనుకోవడమే నాకూ కావాలి గనుక, నేనూ మౌనంగా ఊరుకుంటాను.
'నీకింకా ఎన్నాళ్ళుందేంటి సర్వీసు?'అనడిగాడు తను.
'ఇంకెంత? కొద్ది నెలలు. జూలైలో రిటైర్ అవుతున్నా' అన్నా.
'మరి సంపాదించుకున్నావా? పిల్లలెక్కడున్నారు?' అనడిగాడు.
'ఆ ! తింటానికి ఉంటానికి సరిపోతుంది. నా రాతను బట్టి నా సంపాదన. పిల్లల రాతను బట్టి వాళ్ళు సెటిలయ్యారు. చెప్పుకోడానికేముంది?' అన్నా.
'ఏదో ఆశ్రమం పెడుతున్నావుట? నాగేశ్వర్రావు చెప్పాడు. ఓల్డేజి హోమా?' అన్నాడు.
నాగేశ్వర్రావు గుంటూరులో మాకిద్దరికీ కామన్ ఫ్రెండ్. వాడిద్వారా ఈ విషయం తెలుసుకున్నట్లున్నాడు.
'అలాంటిదే' అన్నా, అన్నీ అందరికీ చెప్పడం ఎందుకని.
'బాగుంటుందిలే. దానిమీద కూడా బాగా సంపాదించవచ్చు' అన్నాడు.
చాలా జాలేసింది ఆ మాట విని. సంభాషణ పొడిగించడం ఇష్టం లేక, మౌనంగా ఊరుకున్నా.
ఇక తన గురించి మొదలుపెట్టి, హైద్రాబాద్ లో తను ఎన్ని విల్లాలు కొన్నదీ, పిల్లలు ఎలా ఫారిన్ లో సెటిలైందీ, ఎక్కడెక్కడ ఎన్నెన్ని స్థలాలున్నదీ గర్వంగా చెప్పుకొచ్చాడు. మధ్యలో ఆపి, 'కనీసం ఒక్క విల్లా కూడా కొనలేదా నువ్వు?' అన్నాడు జాలిగా.
'లేదు. అంత అవసరమూ లేదు, అవకాశమూ రాలేదు' అన్నాను.
'రాలేదా? నువ్వు ప్రయత్నం చేయలేదా?' అన్నాడు హాస్యంగా.
'రెండోదే నిజమనుకో' అన్నా ఈ టాపిక్ పొడిగించడం ఇష్టం లేనట్లు.
'క్రిప్టో గురించి చూస్తున్నావా?'అడిగాడు.
తెలిసినా తెలీనట్లు, 'అదేంటి?' అన్నా
'నువ్వింతే' అన్నట్లు జాలిగా ముఖం పెట్టి, 'ఓహో ! అయితే నీకర్ధం కాదులే. నువ్వు చాలా వెనుకబడి ఉన్నావ్, ఫ్యూచరంతా క్రిప్టో దే' అన్నాడు.
'ఐసీ' అన్నా నిరాసక్తంగా.
'ఇప్పుడు మనకు లీవ్ బాధ లేదుగా. వచ్చే నెలలో అమెరికా వెళ్తున్నా, హ్యాపీ' అన్నాడు.
'అమెరికా వెళ్తే హ్యాపీనా? మరి అక్కడున్న NRI లు వెనక్కొస్తున్నారేంటి? వాళ్ళు హ్యాపీ కాదా?' అడిగా నవ్వుతూ.
'ఇందాకట్నుంచీ చూస్తున్నా నీ ధోరణి? ఎడ్డెమంటే తెడ్డెమంటావ్? అసలేంటి నీ గోల? చేతనైతే సంపాదించాలి. అంతేగాని ఇలా కుళ్ళుకోకూడదు' అన్నాడు కొంచం కోపంగా.
నాకు నవ్వుతో పొలమారింది. 'కుళ్ళా? ఎందుకు?' అన్నా నవ్వాపుకుని.
'అదే. నేను బాగా సెటిలయ్యాను. నువ్వు కాలేదు. అందుకే నీకు కుళ్ళు' అన్నాడు.
'నేను బాగా సెటిలవ్వలేదని ఎవరన్నారిప్పుడు?' అన్నా.
'మరి సంపాదించి దాచిపెట్టలేదని నువ్వే అంటున్నావ్ గా?' అన్నాడు.
'దానికీ, 'బాగా' సెటిలవ్వడానికీ సంబంధం ఏంటి?' అన్నా అమాయకంగా.
'ఓరి దేవుడో ! నీతో పెట్టుకుంటే నాకు పిచ్చెక్కేలా ఉందిగాని, నీకో దణ్ణం నేనొస్తా' అంటూ అవతలకి పోబోయాడు.
ఈ జీవికి కొంచం జ్ఞానబోధ చేద్దామని జాలి కలిగింది. ఆపి, ఇలా అడిగా.
'సరే. ఇప్పటిదాకా నువ్వు ప్రశ్నలడిగావ్ నేను జవాబులు చెప్పా. ఇప్పుడు నేను కొన్ని ప్రశ్నలడుగుతా, నీకు చేతనైతే ఆన్సర్స్ చెప్పు' అన్నా.
అతని ఈగో దెబ్బతింది. పోబోతున్నవాడల్లా ఆగి, 'సరే అడుగు' అన్నాడు అనుమానంగా.
'ప్రస్తుతం నీ వయసెంత?' అడిగా.
'అరవై ఒకటి' అన్నాడు.
'ఓకే. నీ ఆరోగ్య పరిస్థితి ఎలా ఉంది?' అన్నా.
'అన్ని రోగాలూ ఉన్నాయి. మందులున్నాయిగా. నడుస్తోంది బండి. కరోనా కూడా రెండుసార్లు వచ్చి తగ్గింది. మొదటిసారి పైదాకా వెళ్లి వచ్చా. రెండోసారి లైట్ గా బ్రష్ కోటింగ్ పడింది' అన్నాడు.
'ఇంకా ఎన్నాళ్ళు బ్రతుకుతావని నీ అంచనా?' అన్నా.
షాకయ్యాడు ఆ మాటకి.
'ఏమో? కనీసం ఇంకా పదీ ఇరవై ఏళ్ళు బ్రతుకుతానేమో?' అన్నాడు.
'అబ్బో అంత గ్యారంటీ ఉందా? నియో కవ్ అని ఇంకో కరోనా వెరైటీ వస్తోందిట. సోకిన ముగ్గురిలో ఒకడు గ్యారంటీగా పోతాట్ట' అన్నా.
'అవి పుకార్లు, నమ్మకు. పేపర్లలో ఏవో రాస్తుంటారు' అన్నాడు.
'సరే ఇంకో పదీ ఇరవై ఏళ్ళు బ్రతుకుతావని అనుకుందాం. అది కూడా, క్రిప్టో కరెన్సీ, షేర్ మార్కెట్, రియల్ ఎస్టేట్ అంటూ బ్రతికి చివరకేం చేస్తావ్?' అన్నా.
'ఏముంది? అందరూ ఏం చేస్తారు? పోవడమే' అన్నాడు.
'మరి చివరకు, ఇంత సంపాదించిన నువ్వూ పోయి, ఏమీ సంపాదించని నేనూ పోయి, అందరూ పోయేదే కదా? నాకంటే డిఫరెంట్ గా ఏంటి నువ్వు సాధించింది?' అన్నా.
'ఎవరైనా సాధించేది డబ్బే కదా ! లగ్జరీగా బ్రతకడమేగా ఎవరైనా చేసేది? ఇంకేముంది?' అన్నాడు.
'లగ్జరీ ఒక్కటే జీవిత పరమావధి కాదు. అలా కాకపోయినా బాగా బ్రతకవచ్చు. డబ్బు, కంఫర్ట్స్, ఇవొక్కటే జీవితానికి అంతిమగమ్యాలు కావు. నువ్వు పోయాక ఎక్కడికి పోతావో, ఏమౌతావో, అప్పుడు నువ్వు సంపాదించిన ఈ భూములు, విల్లాలు, అపార్ట్ మెంట్లు, ఆస్తులు ఏమౌతాయో ఆలోచించావా ఎప్పుడైనా?' అడిగా.
'ఏముంది? నా పిల్లలు ఎంజాయి చేస్తారు?' అన్నాడు.
'ఎంతని ఎంజాయి చేస్తారు? వాళ్లేమో అమెరికాలో సెటిలయ్యారు. నీ డబ్బు వాళ్ళకెందుకు? ఇక్కడ నీ ఆస్తులు వాళ్లెలా ఎంజాయి చేస్తారు? అమ్ముకుంటారు' అన్నా.
'పోన్లే. ఆ డబ్బు వాళ్లకు మిగులుతుంది కదా !' అన్నాడు మొండిగా.
'ఏం చేసుకుంటారు ఆ డబ్బుని? అప్పుడు కూడా, నీ బ్లాక్ మనీని వాళ్లెలా అక్కడికి ట్రాన్స్ ఫర్ చేసుకోగలరు? పోనీ ఏదో చేస్తార్లే అనుకున్నా, ఒక లిమిట్ దాటాక డబ్బు ఎందుకు? మినిమమ్ లివింగ్ ఉంటే చాలదా ? ఆ తర్వాత ఏం చేసుకుంటావ్ డబ్బుని? ఇప్పుడు నీకు కోట్లున్నాయి. మరి నీ రోగాలు తగ్గడం లేదు కదా? ఏంటి ఉపయోగం?' అన్నా.
'ఓహో ఫిలాసఫీనా ! అయితే నీ ఆశ్రమంలో చేరమంటావా నన్ను? డొనేషన్ కావాలా?' అన్నాడు నవ్వుతూ.
ఇలా కాదని సూటిగా విషయం లోకొచ్చా.
'చూడు గుర్నాధం ! ఎవడు బడితే వాడు ఇచ్చే డొనేషన్ మేము తీసుకోము. ఇవ్వాలన్నా ఒక అర్హత ఉండాలి. అవినీతి డొనేషన్లు మాకక్కర్లేదు. నీతిగా సంపాదించిన మా సంపాదన మాకు చాలు. ఇకపోతే, నువ్వు చేరతానని వచ్చినా, మా ఆశ్రమంలో ఎవరిని బడితే వారిని చేర్చుకోవడం జరగదు. నిన్నసలు గేట్ లోపలకే రానివ్వం. మాతో చేరాలన్నా, మాతో ఉండాలన్నా కొన్ని అర్హతలుండాలి' అన్నా.
'అబ్బో ! ఏంటో అవి?' అన్నాడు ఎగతాళిగా.
'మొదటగా, జీవితమంటే లోతైన ఆలోచనా, అవగాహనా నీకుండాలి. జీవితంలో నీ ప్రయారిటీలు 'సంపాదన, డబ్బు, సుఖాలు' ఇవే కాకూడదు. ఉన్నతమైన తాత్త్వికచింతన నీలో ఉండాలి. నేను ఇందాక అడిగానే, ఆ ప్రశ్నలకు జవాబులు నీకు స్పష్టంగా తెలిసి ఉండాలి. ఆధ్యాత్మికమార్గంలో నడవాలన్న తీవ్రమైన తపన నీలో ఉండాలి. అప్పుడు మాత్రమే నీకు మా ఆశ్రమం తలుపులు తెరుచుకుంటాయి. లేకపోతే తెరుచుకోవు. నువ్వు ఇప్పటిదాకా బ్రతికింది చాలా డొల్ల జీవితం. అసలైన జీవితం నీకేమీ తెలీదు. నీకు తెలీని జీవితం చాలా ఉంది. అలా బ్రతికితేనే దానికి సార్ధకత' అన్నా.
'ఓహో ! లేకపోతే ఏమౌతుంది?' అన్నాడు.
'ఏమీ కాదు. రోడ్డు ప్రక్కన బెగ్గరూ చస్తాడు. ఒక మధ్యతరగతి మనిషీ చస్తాడు. నువ్వూ చస్తావు. కాకపోతే నువ్వు అపోలో లో పోతావు. మామూలు మనిషి మామూలు ఆస్పత్రిలో పోతాడు. అంతే తేడా ! ఒక ఇరవై ఏళ్ల తర్వాత నువ్వనేవాడివి ఒకప్పుడు ఉన్నావని కూడా ఎవడికీ గుర్తుండదు. నిన్ననుకునేవారే ఉండరు. మీలాంటి వాళ్ళెవరూ జీవితపు మౌలికసమస్యలకు సొల్యూషన్స్ కనుక్కోలేరు. ఎందుకంటే మీరా దిశగా ప్రయత్నం చేయడం లేదు గాబట్టి' అన్నా.
'నువ్వొక్కడివే పెద్ద ఫిలాసఫర్ ననుకోకు. నేనూ ఫలానా స్వామీజీ భక్తుడినే. ఆయన మా ఇంటికి కూడా వొచ్చాడు' అన్నాడు.
'దానివల్ల ఉపయోగం జీరో. ఆయనకూ అసలు విషయం తెలీదు, నీకూ తెలీదు. ఆయనా నువ్వూ ఒకే పడవలో ఉన్నారు. ఆయనకూ పరమావధి డబ్బే. నీకూ అదే' అన్నా.
వాడికి పిచ్చి కోపం రేగింది. తమాయించుకుని, 'నీకసలు క్రిప్టో కరెన్సీ గురించే తెలీదు, షేర్ మార్కెట్ ఎలా ఉందో తెలీదు. నువ్వు నాకు ఫిలాసఫీ చెబుతున్నావ్ ! నువ్వు మారవురా ! నీ ఖర్మ. పడు' అంటూ విసురుగా వెళ్ళిపోయాడు.
నాకు నవ్వూ జాలీ ఒకేసారి కలిగాయి. వాడు వెళ్ళినవైపు చూస్తూ ఉండిపోయా కాసేపు.
మనుషులు ఎంత మాయలో కూరుకుపోయి ఉన్నారు? 61 వచ్చినా ఇంకా 'డబ్బు డబ్బు' అంటూ అంగలారుస్తున్నాడు మిత్రుడు. ఏంటీ ఖర్మ? మాయంటే ఇదేనా? మనుషుల పైన దీని పట్టు ఇంత ఘోరంగా ఉంటుందా? కళ్ళముందు ప్రతిరోజూ ఎంతో మంది చనిపోవడం చూస్తూ కూడా, ఇంకా డబ్బని ఆస్తులని పరిగెత్తడం ఎంత వింత? సరే జీవితమంతా దానికోసమే బ్రతికాడు. కనీసం ఇప్పుడైనా జీవితపు మౌలికసమస్యల గురించి కాస్త ఆలోచించాలి కదా? తర్వాత ఏంటి? అన్న ఆలోచన రావాలి కదా.
ప్రపంచ జనాభా 790 కోట్లు. వీళ్ళలో నిజమైన ఆధ్యాత్మిక చింతన ఉన్నవాళ్లు కనీసం ఒక లక్షమందైనా ఉంటారా? ఒకవేళ ఉంటే, వాళ్లలో ఎంతమంది సిన్సియర్ గా సరియైన దారిలో నడుస్తారు? అలా నడిచేవారిలో ఎంతమంది గమ్యానికి చేరతారు? కనీసం ఒక పదిమంది ఉంటారా? లేక వారూ ఉండరా? ఈ లోకం ఇంతేనా? ఒకవేళ దీని నియమం ఇంతేనేమో? ఇదెప్పటికీ ఇలా ఉండటమే కరెక్టేమో? కర్మనియమమూ, లోకరీతీ ఇంతేనేమో? ఈ రొచ్చులోంచి బయటపడటం వీళ్ళవల్ల కాదేమో? మరి వీళ్లకు చెప్పాలని ప్రయత్నించడం కరెక్టేనా? అసలీ ప్రయత్నమే తప్పేమో?
పై ప్రశ్నలన్నీ నాలో తలెత్తాయి. హఠాత్తుగా, శ్రీ రామకృష్ణుల వారు చెప్పిన 'వలా - చేపలూ' కధ గుర్తొచ్చింది. నాకు నాకే సమాధానం కూడా దొరికింది.
'చీకట్లో చిరుదీపాన్ని వెలిగించడమే నీ పని. అది ఎవరికి ఉపయోగపడాలో వారికి పడుతుంది. మిగతాది నీపని కాదు. ఎక్కువ దీనిగురించి ఆలోచించకు. లోకం సంగతి నీకనవసరం. దానిని చూచుకునేవాడు ఒకడున్నాడు. అది వాడి పని. మనుషులు అంత తేలికగా వెలుగుదారిలోకి రాలేరు. ఈ ప్రపంచం ఒక ప్లాన్ ప్రకారం పోతున్నది. దానిపని అది చూచుకుంటుంది. నీ పని నీవు చెయ్యి. ఇంతకు ముందు కూడా చాలాసార్లు నీకిదే చెప్పాను. మళ్ళీ చెబుతున్నాను' అన్నది ఒక స్వరం.
'సరే అలాగే చేద్దాం' అనుకుంటూ నా దారిన నేనొచ్చేశా.
అంతకంటే చేసేది మాత్రం ఏముంది గనుక?
ఈ పుస్తకం కోసం ఎంతోమంది మేధావులు, తంత్రశాస్త్రాభిమానులు చాలాకాలంగా ఎదురు చూస్తున్నారు. కొందరైతే, సంస్కృతంలో ఉన్న ఈ గ్రంధానికి తెలుగు వ్యాఖ్యానాన్ని వ్రాయమని నన్ను గతంలో కోరారు కూడా. వారందరి కోరికను తీరుస్తూ 'తంత్రసారము' అనబడే ఈ పుస్తకాన్ని తెలుగులో నేడు విడుదల చేస్తున్నాము. మా సంస్థ నుండి వెలువడుతున్న మిగతా చాలా పుస్తకాలలాగా ఇది కూడా మొదటిసారిగా తెలుగులోకి వస్తున్నది. అదికూడా నా చేతులమీదుగా జరగడం నా అదృష్టంగా భావిస్తున్నాను.
'తంత్రశాస్త్రం' అంటే లోకులలో చాలా అపోహలున్నాయి. దానికి కారణం అసలైన తంత్రమంటే ఏమిటో లోకానికి తెలియకపోవడం. భూతప్రేతాలు, క్షుద్రపూజలు, చేతబడులు మొదలైన పనికిరాని తంతులతో కూడినదే తంత్రమని చాలామంది అనుకుంటూ ఉంటారు. ఇది శుద్ధపొరపాటు. అది క్షుద్రతంత్రం. అసలైన తంత్రం వేరు. అసలైన తంత్రం శుద్ధమైన సాధనామార్గం.
పదవశతాబ్దం నుంచి మనదేశం పైన జరిగిన తురకల దండయాత్రలలోను, వారు బుద్ధిలేకుండా మనదేశంలో జరిపిన విధ్వంసకాండలోను, మన దేవాలయాలు గ్రంధాలయాలు వేలాదిగా ధ్వంసమయ్యాయి. వేలాది విలువైన గ్రంధాలు తగలబెట్టబడ్డాయి. వాటిలోని విలువైన జ్ఞానసంపదంతా నాశనమైపోయింది. మన అదృష్టం బాగుండి కొన్నికొన్ని గ్రంధాలు మాత్రం బ్రతికి బయటపడ్డాయి. వాటిల్లో, మాలినీ విజయోత్తర తంత్రము, తంత్రాలోకము, తంత్రసారము అనే గ్రంధాలు కొన్ని. ఇవి దాదాపుగా 900 వంవత్సరాల తర్వాత క్రీ. శ . 1900 ప్రాంతంలో కాశ్మీర్ లో పురాతన తాళపత్ర గ్రంధాలలో దొరికాయి. వాటిని భద్రపరచిన ఘనత అప్పటి కాశ్మీరరాజైన శ్రీప్రతాపసింహమహారాజు గారికీ, ఆయన ఏలుబడిలో ఉన్న పురాతన తాళపత్రాల గ్రంధాలయాధికారి శ్రీముకుందరామశాస్త్రి గారికీ చెందుతుంది. నూరేళ్లక్రితం దీనిని హిందీలోకి అనువదించింది ఈయనే. ఈ మహానుభావుల కృషి వల్లనే ఈ గ్రంధాలను మనం ఈనాడు చదువుకోగలుగుతున్నాం. మనమేకాదు, సంస్కృతం నేర్చుకున్న వందలాది మంది యూరోపియన్లు, అమెరికన్లు నేడు ఈ పుస్తకాలను చదివి, వాటిలోని అత్యున్నతమైన ఫిలాసఫీకీ, లాజిక్ కీ ముగ్దులైపోయి, శివభక్తులుగా మారారు. మారుతున్నారు.
వీటిలో 'శ్రీ మాలినీ విజయోత్తర తంత్రము' ను తెలుగులో నా వ్యాఖ్యానంతో ఇప్పటికే ప్రచురించాము. ఇప్పుడు, అభినవగుప్తులవారు వ్రాసిన 'తంత్రసారము' ను ప్రచురిస్తున్నాము. త్వరలో ఈయన యొక్క లైఫ్ టైం వర్క్ అయిన 'తంత్రాలోకము' కూడా నా వ్యాఖ్యానంతో తెలుగులోకి రాబోతున్నది.
క్రీ.శ.1000 కంటే ముందు మనదేశంలో,ముఖ్యంగా శైవాగమాలలో ప్రచారంలో ఉన్న, స్పంద, క్రమ, కుల, ప్రత్యభిజ్ఞములనే అన్ని శైవతంత్ర సిద్ధాంతాలనూ ఒకేచోట చేర్చి, వాటిని సతార్కికంగా వివరిస్తూ ఒక బృహద్గ్రంధాన్ని వ్రాయమని తన కౌలాచార గురువైన శ్రీ శంభునాధులవారు తనను ఆదేశించినట్లు, దానిననుసరించి తానీ గ్రంధాన్ని వ్రాసినట్లు అభినవగుప్తులవారు తన 'తంత్రాలోకము' ముందు మాటలో వ్రాశారు. ఇవన్నీ క్రీ. శ 1000 ప్రాంతంలో కాశ్మీర్ లో జరిగిన సంఘటనలు. ఆ తంత్రాలోకానికే ఈ 'తంత్రసారము' సంక్షిప్తరూపం. ఇదే 550 పేజీలలో ఉందంటే ఇక 'తంత్రాలోకం' ఎంత పెద్ద గ్రంధమో అర్ధం చేసుకోవచ్చు. ఈ గ్రంధం బ్రతికి బట్ట కట్టబట్టే, ఆయా తాత్వికచింతనలన్నీ ఒకప్పుడు ఉన్నాయని నేడు మనం తెలుసుకోగలుగుతున్నాం.
ప్రపంచంలోని ఏ మతమైనా తీసుకోండి, వాటన్నిటికంటే ఎంతో గొప్పదీ ఉత్తమమైనదీ శివాద్వైతం. అంతేకాదు, హిందూమతం లోని అన్ని తాత్త్విక చింతనామార్గాలలోకీ శిఖరం లాంటిది ఈ శాస్త్రం. దీనిని వ్రాసిన అభినవగుప్తులవారు మామూలు మనిషి కాదు. అటువంటి మహానుభావులు వెయ్యేళ్లకు ఒక్కరు మాత్రమే పుడతారు. ఈయన సాంఖ్య, బౌద్ధ, వైష్ణవ, శైవశాస్త్రములను క్షుణ్ణంగా అధ్యయనము చేసిన మహాపండితుడు మాత్రమే గాక, మహా తపస్వి, జ్ఞానీ కూడా. నేటి సోకాల్డ్ ప్రవక్తలతో పోలిస్తే ఈయనను 'మహాప్రవక్త' అనవచ్చు. అటువంటి మహాప్రవక్త వ్రాసిన ఈ గ్రంధమును తెలుగులోకి తేవడం నా పూర్వజన్మ సుకృతంగా భావిస్తున్నాను.
ఇందులో 22 అధ్యాయాలున్నాయి. వీటిల్లో ఎంతో నిశితమైన లాజిక్ తో కూడిన సిద్ధాంత భాగమేగాక, అణవోపాయము, శాక్తోపాయము, శాంభవోపాయము, అనుపాయము, శక్తిపాతము, షడధ్వములు, వివిధరకములైన దీక్షలు, విధులు, ఆగమప్రామాణికతలను వివరిస్తూ, వీటన్నిటికీ తలమానికంగా, చివరి అధ్యాయములో ఆరువిధములైన సాధనలతో కూడిన కౌలాచారతంత్రమును కూడా వివరించడం జరిగింది.
ఈయన దాదాపుగా 50 గ్రంధములను రచించారు. వాటితో బాటు తనకెంతో ఇష్టమైన 'భైరవస్తవము' అనే తొమ్మిది శ్లోకములతో కూడిన స్తోత్రమును కూడా రచించారు. దానినీ, ఆ శ్లోకములకు నేను వ్రాసిన తెలుగు పద్యములనూ ఈ గ్రంధంలో ఇచ్చాను. దానినాయన పుష్య బహుళదశమి నాడు వ్రాసినట్లుగా అందులో వ్రాసుకున్నారు. బహుశా అది క్రీ. శ. 1016 సంవత్సరం కావచ్చు. మా గ్రంధం కూడా, అనుకోకుండా అదే తిధికి దగ్గరలోనే, పుష్యమాసంలోనే పూర్తయింది. అలా జరగాలని మేము ప్లాన్ చెయ్యలేదు. అనుకోకుండా అలా జరిగింది. కనుక, అదే పుష్య బహుళ దశమి నాడు, అంటే ఈరోజున, ఈ పుస్తకాన్ని 'ఈ బుక్' గా విడుదల చేస్తున్నాను. దీనిని కాకతాళీయంగా నేను భావించడం లేదు. ఎందుకంటే, ప్రపంచంలో ఏదీ కాకతాళీయం కాదని నాకు తెలుసు కాబట్టి.
'భైరవ స్తవము' చివరలో అభినవగుప్తులవారు వ్రాసిన సంస్కృత శ్లోకము, దానికి నా తెలుగు పద్యమూ, దాని వివరణలూ ఇవి.
శ్లో|| వసురసపౌషే కృష్ణ దశమ్యామ్
అభినవగుప్తః స్తవమిమ మకరోత్
యేన విభుర్భవ మరుసంతాపం
శమయతి ఝటితి జనస్య దయాళుః
ఆ || అరువదెనిమిదేండ్ల యరుదైన దినమందు
స్తవము నభినవుండు చక్కజేసె
దీనినెంచి మిగుల దయతోడ నీశుండు
తాపతతుల నెల్ల దీర్చుగాత
అష్టవసువులు గనుక, వసు అంటే 8. షడ్రసములు గనుక రస అంటే 6. 'అంకానాం వామతో గతి: (అంకెలన్నీ కుడినుంచి ఎడమకు నడుస్తాయి)' గనుక, వసురస అనేపదం 68 ని సూచిస్తున్నది. అంటే, 'తన 68 వ సంవత్సరంలో పుష్యమాసపు కృష్ణదశమి, మకరసంక్రాంతి నాడు అభినవగుప్తుల వారు ఈ స్తోత్రమును రచించారు. దీనిని పఠించడం వల్ల, దయాళువైన పరమేశ్వరుడు కరుణిస్తాడు. జనులకు కలిగే బాధలను శమింపజేస్తాడు' - అని ఈ శ్లోకం యొక్క అర్ధం.
ప్రస్తుతం మా ఆశ్రమస్థలాన్ని సేకరించే పని అయిపోయింది గనుక, ఇక పుస్తకాల ప్రింటింగ్ మళ్ళీ మొదలౌతుంది. ఆ క్రమంలో 'తంత్రసారము' కూడా పుస్తకంగా వస్తుంది. ఈ లోపల 'ఈ బుక్' ని చదివి ఆనందించండి మరి !
యధావిధిగా, ఈ పుస్తకాన్ని వ్రాయడంలో త్రిశక్తుల సహాయం నాకు లభించింది. వారు, నా శ్రీమతి సరళాదేవి, నా శిష్యురాళ్ళు అఖిల, శ్రీలలితలు. సంస్కృతశ్లోకాలను, వచనాన్ని తెలుగులో వ్రాయడంలో శ్రీలలిత ప్రధానపాత్ర పోషిస్తే, పుస్తకం టైప్ సెట్టింగ్, ప్రూఫ్ రీడింగ్, పబ్లిషింగ్ మొదలైన పనులలో ఎంతో ఓర్పుతో అఖిల సహాయపడింది. నాకైతే చిన్నప్పటినుంచీ ఆధ్యాత్మిక చింతన ఎక్కువ గనుక నేనీ పనులు చేస్తున్నాను. నాతోబాటు వీరందరూ కూడా ఇంత కష్టపడుతున్నారంటే అది జగజ్జనని అనుగ్రహం కాక మరేమనుకోవాలి? వీరు ముగ్గురి తోడ్పాటు లేకుంటే నా పుస్తకాలలో ఒక్కటి కూడా వెలుగు చూచేది కాదు. అందుకే వీరికి ఎంతగా కృతజ్ఞతలు చెప్పినా తక్కువే అవుతుంది. అయినా సరే, వీరికి మళ్ళీ నా ప్రత్యేక కృతజ్ఞతలు తెలియజేస్తున్నాను.
ఇకపోతే, ముఖచిత్రాన్ని యధావిధిగా అద్భుతంగా తీర్చిదిద్దాడు శిష్యుడు ప్రవీణ్. చిరకాలం లోకంలో నిలచిపోయే ఇలాంటి ఉత్తమ గ్రంధాలను తెలుగు ప్రపంచానికి అందించే పనిలో, నాకు సహచరులయ్యే అదృష్టం వీరికి పట్టింది. అది వారి సుకృతం. వీరందరికీ ఋణపడి ఉన్నాను. పరమ శివానుగ్రహం వీరికి నిరంతరం ఉండాలని ప్రార్ధిస్తున్నాను.
యధావిధిగా ఈ పుస్తకం కూడా గూగుల్ ప్లే బుక్స్ నుండి ఇక్కడ లభిస్తుంది. ఇంకొక క్రొత్త పుస్తకంతో మళ్ళీ త్వరలో కలుసుకుందాం. అప్పటివరకూ ఈ మహోత్తమగ్రంధాన్ని అధ్యయనం చేయండి.
విజయవాడ బుక్ ఎగ్జిబిషన్ లో 'పంచవటి' పుస్తకాలు లభిస్తున్నాయి. ఈ ఎగ్జిబిషన్ 1 వ తేదీ నుండి 11 వ తేదీ వరకు ఉంటుంది.
2022 వ సంవత్సరంలో 'పంచవటి స్పిరిట్యువల్ ఫౌండేషన్' వేస్తున్న అడుగులలో మొదటిది, బుక్ ఎగ్జిబిషన్ లో మా పుస్తకాలను ప్రదర్శించడం. ప్రస్తుతానికి స్టాల్ నంబర్ 103, 104 (భారతీయ గ్రంథమాల) లో మా పుస్తకాలు లభిస్తాయి. ఆసక్తి గలవారు ఈ అవకాశాన్ని వినియోగించుకుంటారని ఆశిస్తున్నాం.
బుక్ ఎగ్జిబిషన్ లో మా పుస్తకాల స్టాల్ కోసం చాలామంది మెయిల్స్ ఇస్తున్నారు. అందుకని ఈ ఏడాదికి తాత్కాలికమైన ఈ ఏర్పాటును చేస్తున్నాం. వచ్చే ఏడాదినుంచీ విజయవాడ, హైదరాబాద్ బుక్ ఎగ్జిబిషన్లలో ప్రత్యేకంగా మా స్టాల్ ను పెట్టడం జరుగుతుంది.
గమనించండి !
