అట్లాంటా స్పా కాల్పులు - జ్యోతిష్య విశ్లేషణ

16-3-2021 మంగళవారం సాయంత్రం అమెరికా టైం 5 గంటల ప్రాంతంలో అట్లాంటాలోని స్పాలలో జరిగిన కాల్పులలో ఎనిమిదిమంది చనిపోయారు. చనిపోయినవారిలో ఎక్కువమంది కొరియా జాతీయులైన ఆడవాళ్లు. వారిని కాల్చినది 21 ఏళ్ల పిల్ల అమెరికన్. అదేరోజు సాయంత్రానికి పోలీసులు అతన్ని పట్టేశారు. అతని పేరు రాబర్ట్ ఎరన్ లాంగ్, జార్జియా కు చెందినవాడు. సెక్స్ ఎడిక్షన్ కు ఇంతకు ముందు ట్రీట్మెంట్ తీసుకున్నాడని అంటున్నారు. మసాజ్ పార్లర్లను నిర్మూలించాలని కంకణం కట్టుకున్నాడట. ఎందుకంటే, అక్కడ అలాంటి కార్యకలాపాలు జరుగుతాయి కాబట్టిట. ఇంతకు ముందు తనుకూడా ఆ పార్లర్ల కష్టమరేట. ఆ వ్యసనాన్ని పోగొట్టుకోవడానికి వాళ్ళని కాల్చేశానని అంటున్నాడు. ఇదీ న్యూస్.

అసలు జ్యోతిష్యపరంగా ఇదంతా ఏంటో చూద్దాం.

ఆ సమయంలో శుక్రుడు దారాకారకుడుగా ఉంటూ సున్నా డిగ్రీలలో రాశిసంధిలో పడివున్నాడు. మనఃకారకుడైన చంద్రుడు, మొండి పట్టుదలకు సూచికగా మేషంలో ఉంటూ, పాపార్గళానికి గురయ్యాడు. ఇది చాలదన్నట్లు శుక్రునిమీద నీచ గురువు, శనుల దృష్టి ఉన్నది. గురువు ద్వేషభావానికి సూచికైన షష్టాధిపతిగా సప్తమంలో ఉంటూ లగ్నాన్ని బలమైన దృష్టితో చూస్తున్నాడు. ఇవన్నీ వేటిని సూచిస్తున్నాయి? ఆడవాళ్ళతో సంబంధం ఉన్న విలాసపూరితమైన స్థలాలు (మసాజ్ పార్లర్లు, స్పాలు), విదేశీయులపట్ల ద్వేషం, మొండిమూర్ఖత్వం, హింస ఇవన్నీ సూచింపబడుతున్నాయి. అదేగా మరి జరిగింది?

శుక్రునికి మీనరాశిలో ఉచ్ఛస్థితి ఉన్నది. కానీ సున్నా డిగ్రీలలో శుక్రుడు బలంగా లేడు. ఒకపక్కన ఉఛ్చత్వం, మరొకపక్కన బలహీనత్వం ఈ రెండూ కలసి శుక్రుడిని అటూఇటూ ఊపేస్తాయి. కనుక శుక్రకారకత్వాలు గందరగోళానికి గురౌతాయి.  కుజ, రాహు, శనులవల్ల విధ్వంసకాండ జరుగుతుంది. నా పుస్తకాలు చదివినవారికి ఈ యోగాలు సుపరిచితాలే. 

నాడీజ్యోతిష్యంలో వాడే రాశితుల్యనవాంశ విధానం ప్రకారం చూస్తే కర్కాటకలగ్నం నాలుగు గ్రహాల ప్రభావానికి లోనైంది. అవి - రవి, చంద్రుడు, రాహువు, శుక్రుడు. ఇది అమావాస్య యోగం (పిచ్చిప్రవర్తన) + సెక్స్ పరమైన పెడధోరణులకు సూచిక. రాహువు, కుజుడు, శని వృషభంలో ఉన్నారు. ఇది కాల్పులు, యాక్సిడెంట్లు, నేరాలకు సూచిక. వీరందరూ శుక్రరాశి యైన వృషభంలో ఉన్నారు. అంటే శుక్ర సంబంధం వీరికి ఉన్నది. శుక్రుడేమో ఇలాంటి చోట్లను ఇలాంటి పనులను చక్కగా సూచిస్తాడు. అదేగా మరి జరిగింది?

ఇందులో రేసిస్ట్ ఛాయలున్నాయని కొందరంటున్నారు. కాదు, ఇది పూర్తిగా సెక్స్ పరమైన విపరీతప్రవర్తనతో కూడిన నేరమని కొందరంటున్నారు. రెండూ కలసి ఉన్నాయని గ్రహాలు చెబుతున్నాయి.  అసలు గ్రహాల దాకా ఎందుకు? సింపుల్ సైకాలజీ తెలిస్తే చాలు. సెక్స్ కోరికలనేవి మనసులోనుంచి పోవాలిగాని, మసాజ్ పార్లర్లు, బార్లు, స్పాలు, రెడ్ లైట్ ఏరియాలను తొలగిస్తే అవి ఎలా పోతాయి? ఇది చిన్నపిల్లవాడిని అడిగినా చెబుతాడు. కారణాలు చెప్పడానికైనా అర్ధాలుండాలి. 

ఇప్పుడు మీకొక చచ్చుసందేహం రావచ్చు. దీనికి కారణం గ్రహాలైతే,  భూమ్మీద అన్నిచోట్లా ఇవే  జరగాలికదా? ఎందుకు జరగలేదు అని. దానికి నా జవాబేమిటంటే, భూమ్మీద అందరికీ ఇదే సందేహం రావాలి కదా, మీకొక్కరికే ఎందుకొచ్చింది? ముందు దీనికి జవాబు చెప్పండి, తర్వాత మీ ప్రశ్నకు నేను జవాబిస్తాను.

ఇలాంటి సంఘటనలకు కారణాలు గ్రహాలు కాదు. అలా చెప్పేవారికి ఏమీ తెలియదు. గ్రహాలు కారకాలేగాని కారణాలు కావు.

భూమిమొత్తం మీద ఒకే సంఘటన ఎప్పుడూ జరగదు. ఒకే గ్రహకారకత్వానికి సంబంధించిన సంఘటనలు రకరకాలైన ఛాయలలో కోణాలలో అనేక  ప్రదేశాలలో ఒకేసారి జరుగుతాయి. అదే ఈ భూమ్మీద జరుగుతున్న డ్రామా. మరొక్కవిషయం చెబుతా వినండి ! ఆ రోజున  చవితి అయింది. మీరు గమనించుకుంటే,  చాలామంది ఆడవాళ్లు ఆ రోజునా, ఒకరోజు అటూఇటూగా, చాలా హిస్టీరికల్ గా ప్రవర్తించినట్లు గమనిస్తారు. అది మీ మీ కుటుంబాలలో కావచ్చు, లేదా మీ చుట్టుపక్కల కావచ్చు. కరెక్టేనా కాదా? అదేమరి గ్రహప్రభావమంటే ! 

లొకేషనల్ ఎష్ట్రాలజీ సూత్రాలు తెలిస్తే మీకీ విషయాలు అర్ధమౌతాయి. సందర్భం వచ్చినపుడు వాటిని వివరిస్తాను. అంతవరకూ, జ్యోతిష్యశాస్త్రం నిజమే అని చెప్పడానికి  ఈ సంఘటన మరొక్క చక్కటి రుజువని అర్ధం చేసుకోండి. అంతవరకూ అర్ధమైతే చాలు !

read more " అట్లాంటా స్పా కాల్పులు - జ్యోతిష్య విశ్లేషణ "

శివరాత్రి - 2021

మొన్న శివరాత్రి నాడు, రాత్రి పదకొండున్నర దాటాక మిత్రుడు ఫోన్ చేశాడు. అప్పుడే నిద్రపట్టబోతోంది. 'ఏంటి ఈ టైంలో ఫోన్?' అనుకుంటూ ఫోనెత్తి 'హలో' అన్నా బద్ధకంగా.

'ఏం చేస్తున్నావ్' అన్నాడు.

తనెప్పుడూ ఇంతే. భోంచేస్తుంటే ఫోన్ చేసి ఏం చేస్తున్నావ్? అంటాడు. నిద్రపోతుంటే ఫోన్ చేసి  ఏం చేస్తున్నావ్? అంటాడు. స్నానం చేసే టైం లో అడగటం లేదు. అదొక్కటే వెసులుబాటు. ప్రస్తుతానికి బాత్రూం లోకి ఫోన్ తీసికెళ్ళడం లేదు. ముందుముందు అదికూడా చెయ్యాల్సి వస్తుందేమో మరి?

'ఈ టైంలో ఏం చేస్తాను? ఎగుర్లాడుతున్నా' అన్నా.

'అవునా? నువ్వు కూడా అదే చేస్తున్నావా?' అన్నాడు ఆశ్చర్యంగా.

'నేను కూడానా? ఇంకా ఎవరైనా ఇదే చేస్తున్నారా ఏంటి ఖర్మ?' అన్నా.

'అదేంటి? నువ్వు చూడటం లేదా?' అన్నాడు.

'ఏంటి చూసేది?' అన్నా.

'అదే. లైవ్ ప్రోగ్రామ్. ఫలానా ఆశ్రమంలో శివరాత్రి లైవ్ వస్తోంది. అందరూ ఎగురుతున్నారు' అన్నాడు ఉత్సాహంగా.

'శివరాత్రి లైవా? అదేంటి? అదేమన్నా ఫేషన్ షోనా లైవ్ రావటానికి? పైగా ఎగరటమేంటి?' అన్నాను.

'అక్కడ శివరాత్రి అలాగే చేస్తారు. పెద్దపెద్ద వాళ్లంతా ఉన్నారు. అందరూ ఎగురుతున్నారు' అన్నాడు మళ్ళీ.

'పెద్ద పెద్దవాళ్ళంటే ఏంటి? సైజా? ఎంత పొడుగున్నారేంటి?' అన్నాను.

'ఛ అది కాదు. అర్ధరాత్రికూడా నీ జోకులూ నువ్వూనూ. సినిమా యాక్టర్లు కూడా ఉన్నారు. నా ఫెవరెట్ హీరోయిన్ కూడా ఉంది. ఆమె డాన్స్ చెయ్యకపోతుంటే, స్వామీజీ ఆమె జబ్బ పట్టుకుని లేపి మరీ డాన్స్ చేయిస్తున్నాడు చూడు' అన్నాడు ఎంతో ఊగిపోతూ.

'హతవిధీ' అనుకున్నా మనసులో

'శివరాత్రి అలా కూడా చేసుకుంటారా? అయినా ఊరకే ఎగరమంటే ఆమెందుకు ఎగురుతుంది? లక్షలిస్తే ఎగురుతుంది గాని' అడిగా.

దానికి జవాబు చెప్పకుండా 'నేనుకూడా వెళ్తే బాగుండేది. తనతో నేను కూడా డాన్స్ చేసేవాడిని ' అన్నాడు నిరాశగా.

'తనతో అంటే ఎవరితో స్వామీజీతోనా' అన్నా నవ్వుతూ.

'ఛా! ఆ ముసలోడితో నాకెందుకు? నా ఫెవరెట్ హీరోయిన్ తో' అన్నాడు నీరసంగా.

'ఆ! నీకోసమే ఎదురుచూస్తోంది వెళ్ళు. ఆ దరిదాపులకు కూడా నిన్ను వెళ్లనివ్వరు. సోలో డాన్స్ చేసుకోవడమే నీకు చివరకు జరిగేది. ఇదంతా సరేగాని, దీనిని శివరాత్రి అంటారా? నా చిన్నప్పుడు కోటప్పకొండ తిరునాళ్లలో రాత్రంతా ఎద్దుబండ్లమీద రికార్డింగ్ డాన్సులు జరిగేవి. వాటికీ వీటికీ తేడా ఏంటో?' అన్నా నవ్వుతూ.

'అది నేలబారు. ఇది సోఫిస్టికేటెడ్, మైల్డ్ వెర్షన్ ఆఫ్ ఓషో ఆశ్రమంలా ఉంది.' అన్నాడు మిత్రుడు గాలిలో తేలిపోతూ.

'బైటికి మైల్డ్, లోపల మాత్రం వైల్డ్. బయటపడటానికి సమయం పడుతుంది' అన్నా.

'అంతేనంటావా?' అన్నాడు నీరసంగా.

'అయితే ప్రస్తుతం ఈ స్వామీజీ భక్తుడివా నీవు? శ్రీవిద్యని వదిలేశావా?' అన్నా మళ్ళీ నవ్వుతూ.

'అదేం లేదు. సరదాగా లైవ్ చూస్తున్నా. కాసేపాగి శంకరాచార్యులవారు వ్రాసిన నిర్వాణ శతకం చదువుకుంటా. విన్నావా ఈ పేరు ఎప్పుడైనా?' అన్నాడు.

'అది నిర్వాణశతకం కాదు. నిర్వాణషట్కమని ఆరుశ్లోకాలు. అది చిక్కటి అద్వైతం. అవి చదివితే నీకేమొస్తుంది?' అడిగా. 

'అందులో నువ్వే శివుడివి నువ్వే శివుడివి అని ఉంటుంది తెలుసా నీకు?' అన్నాడు.

'హైస్కూల్లో ఉన్న రోజుల్లో చదివా అది. అయినా, నేనే శివుణ్ణి నేనే శివుణ్ణి అనుకున్నంత మాత్రాన నువ్వు శివుడివి అయిపోవు.' అన్నాను విసుగ్గా.

'ఏదో ఒకటి చెయ్యాలి కదా. నువ్వేం చేస్తున్నావు?' అడిగాడు.

'ఏమీ చేయ్యను. నిద్రపోతాను నువ్వు వదిలితే' అన్నా నవ్వుతూ.

'అదేంటి కనీసం అర్ధరాత్రి పన్నెండు వరకైనా మెలకువగా ఉండవా?' అడిగాడు చిరాగ్గా.

'ఎందుకు? ఏమొస్తుంది అలా ఉంటే?' అడిగాను.

'శివరాత్రి కదా? శివపూజ చెయ్యవా?' అడిగాడు.

'పూజ మానుకున్నదెప్పుడు మళ్ళీ ఆరంభించడానికి?' అన్నాను.

'అంటే ప్రత్యేకపూజ లేదా?' అడిగాడు.

'ఏ ప్రత్యేకతా లేకపోవడమే పూజనుకుంటున్నాను' అన్నాను.

'అంటే, శివరాత్రికి ఏమీ చెయ్యవా?' అడిగాడు.

'ప్రతిరాత్రీ శివరాత్రే. శివుడు లేని రాత్రేక్కడుంది? పగలెక్కడుంది?' అడిగాను.

'అంటే, చేస్తున్నవాళ్లంతా పిచ్చివాళ్ళా?' అడిగాడు మళ్ళీ.

'పిచ్చివాళ్ళయితే బానే ఉండేది. అజ్ఞానులు. అహంకారులు' అన్నా.

'మరి నువ్వు చేసే పూజ ఏంటి?' అడిగాడు.

'చెప్పినా నీకర్ధం కాదు' అన్నాను.

'సర్లే ఏదో ఒకటి నీగోల. హాయిగా డాన్స్ చూసుకుంటా' అన్నాడు.

'ఆ పని చెయ్యి. శివుడి సంగతి ఎలా ఉన్నా, నీ హీరోయిన్ దర్శనం మాత్రం అవుతుంది, మీ స్వామీజీ ఆమె జబ్బ వదిల్తే' అన్నా నవ్వుతూ.

'సరే పడుకో. ఇక ఉంటా' అంటూ ఫోన్ కట్ చేశాడు మిత్రుడు.

'గుడ్ నైట్' అంటూ ముసుగేసి నిద్రలోకి అడుగుపెట్టా.

ఈ ఒక్క రాత్రికి శివుడిని తలచుకుంటే సరిపోతుందా? అదికూడా ఇలా డాన్సులు పాటలతో దరిద్రంగానా? అసలు శివుడు లేని రాత్రేక్కడుంది?

డర్టీ వరల్డ్ ! దీనిని ఎవడూ బాగుచెయ్యలేడు ! 

read more " శివరాత్రి - 2021 "

కర్ణపిశాచి - కరోనా వాక్సిన్

రాత్రి  భోజనం చేస్తూ ఉండగా ఫోన్ మ్రోగింది.

ఎవరా అని చూస్తే రవి. సామాన్యంగా ఉదయంపూట మాత్రమే రవి ఫోన్ చేస్తూ ఉంటాడు. ఆ సమయంలో అమెరికా శిష్యురాళ్ళతో మాట్లాడుతూ ఉంటాను గనుక అతడి ఫోన్ ఎత్తను. అందుకని ఈ టైంలో చేశాడా అనుకుంటూ 'హలొ రవి' అన్నా.

'ఏం చేస్తున్నావ్?'  అడిగాడు తాపీగా.

'ఇప్పుడే సాంగ్స్ అయిపోయాయి. డాన్స్ చెయ్యబోతున్నా' అన్నా అంతకంటే తాపీగా. 

'అదేంటి డాన్స్ కూడా వచ్చా నీకు? ఇన్నేళ్ల తర్వాత కొత్తకోణాలు కనిపిస్తున్నాయే?' అడిగాడు వింతగా.

'అవును. ఇప్పుడే కదా టీనేజిలోకి అడుగుపెడుతున్నాను. నువ్వెంటి అప్పుడే ముసలాడివై పోయావా? స్పెషల్ చ్యవనప్రాశ్ విత్ గోల్డ్  వాడటం లేదా?' అడిగా నవ్వుతూ.

'సరేలే ఏంటి నముల్తున్నావ్?' అడిగాడు మళ్ళీ.

'ఈ టైంలో ఏం నములుతం చెప్పు? అన్నం తింటున్నా. సరేలేగాని, నువ్వెంటి ఈ టైంలో?' అడిగాను.

'పొద్దున్నే ఫోన్ చేస్తే యోగా అంటావు. కొంచం సేపయ్యాక ఫోన్ చేస్తే అమెరికా శిష్యురాళ్లంటావు. ఆఫీస్ టైంలో పలకవు. సాయంత్రం ఫోన్ చేస్తే మార్షల్ ఆర్ట్స్ అంటావు. అందుకని రాత్రి తొమ్మదికి ఫిక్సయ్యా' అన్నాడు.

'సరే ఏంటి సంగతి చెప్పు' అన్నా.

'ఏం లేదు. అందరూ కరోనా వాక్సిన్ వేసుకుంటున్నారు.  మన బాస్ కూడా వేసుకున్నాడు. నన్నూ వేసుకోమంటున్నారు.  నువ్వూ వస్తే మనిద్దరం వెళ్ళొద్దాం' అన్నాడు.

'నాకొద్దులే. నువ్వెళ్ళి పొడిపించుకో' అన్నా.

'అదేంటి? అందరూ వేసుకుంటున్నారు. భయమా?' అన్నాడు.

'అదేం లేదులే. క్లాసికల్ హోమియోపత్స్ వాక్సిన్లను నమ్మరు. మాకొద్దు' అన్నా.

'మరి రక్షణ ఎలా?' అడిగాడు.

'అందరికీ ప్రభువే రక్షణ' అన్నా నవ్వుతూ.

'అదికాదు. సీరియస్. మరి కరోనా నుంచి ప్రొటెక్షన్ ఎలా?' అడిగాడు.

'హోమియో వాడేవాళ్ళకి వాక్సిన్ అవసరం లేదు' అన్నా.

'అదేంటి?' అన్నాడు అయోమయంగా.

'అవును. వైద్యజ్యోతిష్యం పుస్తకంలో చూడు.  కొన్ని కేసులలో వాక్సిన్ల సైడ్ ఎఫెక్ట్స్ గురించి చర్చించా. నా దృష్టిలో హోమియోపతిక్ ప్రోఫిలాక్టిక్స్ వాడితే చాలు. వాక్సిన్ అవసరం లేదు' అన్నాను.

'ఓరి నీ హోమియో పిచ్చి ! డేంజరేమో ఆలోచించు' అన్నాడు.

'ఓరి నీ వాక్సిన్ పిచ్చి ! ప్రచారాలకు పడిపోకు' అన్నా నవ్వుతూ.

ఆ తర్వాత అదీ ఇదీ మాట్లాడి ఫోన్ పెట్టేశాడు రవి.

భోజనం ముగిసింది. టైం తొమ్మిదిన్నర అయింది. గేట్లు వెయ్యాలి. నేనుండే బంగళాకు రెండు గేట్లుంటాయి. ఒకటి పెద్దగేటు. అది ఇంటికి రెండొందల మీటర్ల దూరంలో ఉంటుంది.  దానికి తాళం వేసి వస్తూ వస్తూ చిన్నగేట్టు తాళం వేసి, తోటలోని చెట్లలోనుంచి నడుస్తూ  ఇంటి వాకిలి దగ్గరకు రావాలి. ఇది ప్రతిరాత్రీ నా రోజువారీ దినచర్య. నిజం చెప్పొద్దూ? రాత్రిపూట ఈ నిర్మానుష్య కాలనీలో, ఈ బంగళాలో, ఈ చెట్లమధ్యన నడుస్తూ పోతుంటే కొంచం భయంగానే ఉంటుంది. అప్పుడప్పుడూ ఒళ్ళు ఝల్లుమంటూ ఉంటుంది  కూడా! అసలైతే,  నేనీ బంగళాలో చేరిన కొత్తలో ఇది భూత్ బంగళా అని నన్ను భయపెట్టబోయాడు రవి.

'అవునా ! అలా అయితే మరీ మంచిది. నేను ఇక్కడకు రావడం వల్ల ఇక్కడున్న దయ్యాలకు మోక్షం వస్తుందిలే, నువ్వు భయపడకు' అని నవ్వేశాను. నవ్వానేగాని లోలోపల పీచుపీచుమంటూనే ఉంటుంది మరి ! అయినా సరే, కొన్నిసార్లు రాత్రి పన్నెండువరకూ హాల్లొ ఒక్కడినే కూచుని, గజగజా వణికిపోతూ, నెట్ ఫ్లిక్స్ లో హర్రర్ మూవీస్ చూస్తూనే ఉంటాను. కానీ అదేంటో మరి? మోక్షం ప్రసాదిద్దామంటే, ఒక్క దయ్యం కూడా ఇప్పటివరకూ కనిపించలేదు. బహుశా వాటికి కూడా నన్ను చూస్తే హడలెత్తి ఉంటుంది !

యధాలాపంగా, నిన్న కూడా భోజనం అయ్యాక గేట్లు తాళాలు వేసి వద్దామని బయల్దేరాను. పెద్ద గేటుకు తాళం వేసి చెట్లలోనుంచి నడుస్తూ లోపలకు వస్తున్నాను. వెనుక ఎవరో ఫాలో అవుతున్నట్లు అనిపించి వెనక్కు చూశా. ఎవరో ఒకమ్మాయి మూతికి మాస్క్ వేసుకుని కొంచం దూరంలో నడుస్తూ వస్తోంది. మాస్కున్నా సరే, చూస్తూనే కర్ణపిశాచిని గుర్తుపట్టా. మా బంధం ఇప్పటిది కాదు కదా మరి !

కానీ తెలీనట్లు నటిస్తూ ' ఏయ్ అమ్మాయ్ ! ఎవరు నువ్వు? గేట్ వేసి ఉండగానే లోపలకెలా వచ్చావు? ఎందుకు నా వెంట వస్తున్నావు?' అడిగా. 

అదో రకంగా నవ్వింది కర్ణపిశాచి.

'ఎక్కువ నటించకు. ఎవార్డు రాగలదు' అంది గోదారి జిల్లా యాసలో.

'అబ్బో . తూగో నించా రాక? ఏంటి కధ? ఎవర్నువ్వు?' అన్నా మళ్ళీ.

'నీ నాటకాలు నీ శిష్యుల దగ్గర వేసుకో, నమ్ముతారు, నా దగ్గర కాదు' అంది ఇంకా దగ్గరకొస్తూ.

నేనూ నవ్వేస్తూ 'నీ నాటకాలేంటి మరి? ముఖానికి ఆ మాస్కేంటి? ఆగాగు. అక్కడే ఆగు. సోషల్ డిస్టెన్స్ ఉండాలి' అన్నా ఉడికిస్తూ.

'కరోనా వాక్సినే వద్దనేవాడికి సోషల్ డిస్టెన్స్ ఎందుకో?' అడిగింది ఇంకా దగ్గరకొస్తూ మళ్ళీ అదే యాసలో.

'అంతా విన్నావన్న మాట' అన్నా నీరసంగా. 

'నా పనే అది కదా ! ఎవరేం చెప్పుకుంటున్నారో వినడమే కదా నా పని. రోజూ నేనుకూడా నీతోపాటు హర్రర్ మూవీస్ చూస్తున్నా నీ పక్క సోఫాలో కూచుని, తెలుసా నీకు?' అడిగింది.

'నీ నాటకాలు మీ పిశాచాల దగ్గర వేస్కో. నా దగ్గర కాదు' అన్నా ఉడికిస్తూ.

'నిజ్జం, నీమీదొట్టు' అంది ఇంకా దగ్గరకొస్తూ.

'అవునా? అయితే చెప్పు, ప్రస్తుతం ఏం చూస్తున్నానో నెట్ ఫ్లిక్స్ లో?" అడిగాను.

'పరీక్షలా మాకు !  'యాష్ వెర్సస్ ఈవిల్ డెడ్' సీరీస్ సెకండ్ సీజన్ చూస్తున్నావ్' అంది.

'ఆమ్మో. కనిపించొచ్చు కదా మరి ! నాతోబాటు నీకూ టీ ఇచ్చేవాడిని కదా' అన్నా నవ్వుతూ.

'మాకు టీ ఎక్కడ సరిపోతుంది? మీ శిష్యురాలు తెచ్చిచ్చిన బాటిల్ ఇస్తే బాగుంటుంది' అంది  నవ్వుతూ.

' ఆ బాటిల్ సంగతి నీకూ తెలిసిపోయిందా?' అన్నా ముని స్టైల్లో నటిస్తూ.

' ఇక చాల్లే  ఆపు నీ నాటకాలు.  పాపం మీ ఫ్రెండ్ భయస్తుడు. అతనికోసమన్నా వేసుకోరాదు వాక్సిన్?' ప్రాధేయపడింది.

'ఆ ! నువ్వూ రా తోడు. మనిద్దరం వేసుకుందాం వాక్సిన్' అన్నా నవ్వుతూ.

తనూ నవ్వేసింది.

'ఏంటి ఈ మధ్య బిజీనా? అస్సలు దర్శనాల్లేవు? మీ చెల్లెలు కన్నెపిశాచి కూడా కనిపించడం లేదు?' అడిగా నడుస్తూ.

'మేం బిజీ కానిదెప్పుడు? క్షణం తీరికలేదు దమ్మిడీ ఆదాయం లేదంటే మా బ్రతుకే' అంది నిట్టూరుస్తూ నడుస్తూనే.

'సర్లే బాధపడకు. మీకూ మంచిరోజులొస్తాయి. పడ్డవాళ్ళు చెడ్డవాళ్లు కారు, నవ్విన నాపచేనే పండుతుంది' అంటూ ఇంకా ఏదో చెప్పబోయా

'ఆపుతావా సోది సామెతలు. అలాంటివి నన్ను చెప్పమంటే లక్ష చెబుతా నీకు వినే ఓపికుంటే' అన్నది.

'సర్లే ఏంటి ఇలా వచ్చావ్?' అడిగా..

'నువ్వంటే దిగులు పుట్టింది. ఒకసారి చూసిపోదామని వొచ్చా' అంది. 

'ఛా! నిజమా' అడిగా హాశ్చర్యపోతూ !

'అదే మరి ! రాజమండ్రి నుంచి నార్త్ ఇండియాకు పోతున్నా. దార్లో క్రిందికి చూస్తే నువ్వు గేటు వేస్తూ  కనిపించావు. సర్లే ఒకసారి పలకరిద్దామని దిగా. సరదాగా మాస్క్ వేస్కుని కనిపించా. అంతే, సింపుల్' అంది.

'ఓ అదా సంగతి ! ఏంటి కబుర్లు?' అడిగా నడుస్తూనే.

'ఏమున్నాయి. నడుస్తోంది ప్రపంచం' అంటూ మా శిష్యుల గురించీ, మా బంధువుల గురించీ, కొన్ని చాడీలు చెపింది తను.

'అవునా' అంటూ తెగ ఆశ్చర్యపోయా మళ్ళీ.

'ఆ నటనే వద్దనేది. సర్లే నే పోతున్నా, మీ ఆవిడ ఇటే చూస్తోంది అనుమానంగా. ఆవిడకి ఎమ్ చెప్పుకుంటావో చెప్పుకో. వస్తా పనుంది. బై' అంటూ గాల్లోకి నిలువుగా ఎగిరిపోయి చీకట్లో మాయమైపోయింది. 

చిన్నగేటుకు కూడా తాళం వేసి, చెట్లలోనుంచి గార్డెన్లో నడుచుకుంటూ ఇంట్లోకి వచ్చా. మా ఆవిడ అక్కడే నిలబడి నావైపే తీక్షణంగా చూస్తోంది.

'ఏంటి?' అన్నా సాధ్యమైనంత మామూలుగా ఉండటానికి ప్రయత్నిస్తూ.

'ఏంటది? చీకట్లో మీలో మీరే చేతులు తిప్పుకుంటూ మాట్లాడుకుంటూ వస్తున్నారు. మధ్యలో ఆకాశంలోకి చూస్తూ నిలబడిపోయారు ?' అడిగింది అనుమానంగా.

నా వేషాలు మొదట్నుంచీ చూస్తున్నా కూడా, ఈనాటికీ ఇంకా కొన్ని అనుమానాలున్నాయి తనకి.

'అదా ! ఆబ్బె అదేం లేదు. కరోనా గురించి రవితో ఇందాక మాట్లాడా కదా !  బ్రెయిన్ కి కరోనా ఎక్కినట్లుంది. పిచ్చి పిచ్చిగా ఉంది. రేప్పొద్దున వాక్సిన్ పొడిపించుకుంటా'. అన్నా నవ్వుతూ.

'మీ నాటకాలు నా దగ్గర కాదు. మీ శిష్యుల దగ్గర వేసుకోండి నమ్ముతారు' అంది శ్రీమతి సీరియస్ గా.

'ఖర్మరా బాబు ! భార్యా నమ్మక, శిష్యులూ నమ్మక, మనుషులూ నమ్మక చివరికి పిశాచాలు కూడా నమ్మకపోతే నేనేం చెయ్యాలి? ఇలా లాభం లేదు. రేప్పొద్దున్నే వెళ్లి కరోనా వాక్సిన్ బ్రెయిన్ కి పొడిపించుకోవాల్సిందే' అని గట్టిగా నిర్ణయించుకుని, 'అసలిదంతా నీ వల్లే జరిగింది. నువ్వు కనిపించకపోతే నీతో మాట్లాడేవాడినే కాను. ఇప్పుడు చూడు మా ఆవిడ ! నాకు పిచ్చనుకుంటోంది' అని కర్ణపిశాచిని తిట్టుకుంటూ దుప్పటి ముసుగేసి నిద్రకుపక్రమించాను.

నిద్రలోకి జారుకుంటున్న నాకు 'ఆపు నీ నాటకాలు ! నా దగ్గరకాదు. నీ శిష్యులదగ్గర వెయ్యి నమ్ముతారు' అని నవ్వుతున్న కర్ణపిశాచి స్వరం క్లియర్ గా వినిపించింది.

read more " కర్ణపిశాచి - కరోనా వాక్సిన్ "

కర్మవలయం - ప్రశ్నశాస్త్రం

సమయం రాత్రి పది. పనులన్నీ ముగించుకుని నిద్రాధ్యానానికి ఉపక్రమించబోతుండగా ఫోన్ మ్రోగింది. ఏదో క్రొత్త నంబర్. ఒక్కొక్కసారి అమెరికా శిష్యులు కూడా ఇండియా నంబర్ తో ఫోన్ చేస్తుంటారు. సరే ఎవరో చూద్దామని 'హలొ' అన్నా.

'నేను ఫలానా మాట్లాడుతున్నాను. ప్రభుత్వంలో ఫలానా పొజిషన్ లో రిటైరయ్యాను' అందొక మొగగొంతు దర్పంగా, 

ఇలాంటి మాడిపోయిన బల్బులని చాలా మందిని చూసి ఉండటంతో, అదంతా పట్టించుకోకుండా, 'చెప్పండి. ఏంటి ఈ టైంలో ఫోన్ చేశారు?' అడిగా.

'నా బాధలు మీతో చెప్పుకుని, పరిష్కారం అడుగుదామని. ఫలానాయన మీ నంబరిచ్చాడు' అంది స్వరం.

సామాన్యంగా ఆ సమయంలో అలాంటి ఫోన్స్ నేను మాట్లాడను. కానీ ఆ స్వరంలో ధ్వనిస్తున్న కించిత్ బాధ, ఫోన్ కట్ చెయ్యకుండా  నన్ను ఆపేసింది. 'సరే ఏంటో చూద్దాంలే' అనుకున్న వెంటనే  మనసులో అప్పటి ప్రశ్నచక్రం కనిపించింది.

తులా లగ్నమైంది. లగ్నాధిపతి శుక్రుడు, బాధకుడైన సూర్యునితో కలసి పంచమస్థానంలో అస్తంగతుడై ఉన్నాడు. అది శనిస్థానమైన కుంభమైంది. మనఃకారకుడైన చంద్రుడు కుటుంబస్థానంలో నీచస్థితిలో కేతుగ్రస్తుడై ఉంటూ కుటుంబపరమైన మానసికవేదనను సూచిస్తున్నాడు.

'మీ సంతానం గురించి, ముఖ్యంగా మీ అమ్మాయి గురించే కదా మీ బాధ' అన్నాను.

అవతలనుంచి భోరుమంటూ ఏడుపు వినిపించింది. నేను మౌనంగా ఉండిపోయాను. కాసేపలా వెక్కిళ్లు పెట్టిన తర్వాత 'ఏం చెప్పమంటారు మా ఖర్మ? ఎందుకిలా జరుగుతోంది?' అన్నాడు.

పంచమం నుండి సప్తమాధిపతి సూర్యుడు పంచమలగ్నంలో ఉన్నాడు. అక్కడనుంచి నవమాధిపతి శుక్రుడు లగ్నంలో అస్తంగతుడైనాడు. పంచమాధిపతి శని దానికి ద్వాదశమైన మకరంలో నీచగురువుతో కలసి ఉన్నాడు. మకరం ప్రశ్నలగ్నానికి చతుర్ధమైంది. అక్కడ నవమాదిపతి అయిన బుధుడు నీచగురువుతో డిగ్రీ కంజంక్షన్ లో ఉన్నాడు. గురు - రాహు - చంద్రదశ అయింది. అంటే ఇది పితృశాపం ! ఇది వీళ్ళ జీన్స్ లోనే ఉంది. గురుద్రోహం కూడా తోడై ఉంది.

ఈ యోగాలను గమనిస్తూ 'మీ అమ్మాయి ఇంటర్ కాస్ట్ పెళ్లి చేసుకుని వెళ్ళిపోయింది. మీ కొడుకు మిమ్మల్ని పట్టించుకోవడం లేదు. అంతేనా?' అడిగాను.

'అంతేసార్! నాకు తెలిసి నేనేమీ పాపాలు చెయ్యలేదు, ఇప్పుడు మేమిద్దరం ఓల్డేజి హోములో ఉన్నాం. అక్కడనుంచే మీతో మాట్లాడుతున్నాను. మా ఫ్రెండ్ ఫలానా ఆయన, మీ గురించి చెప్పి, మీ నంబర్ ఇచ్చాడు, మీకు ఎష్ట్రాలజీ బాగా తెలుసనీ చెప్పాడు' అన్నాడు. 

ప్రతివాడూ చెప్పేమాట ఇదే కావడంతో నేనేమీ ఆ విషయం నమ్మలేదు. మనమేం పాపాలు చేస్తున్నామో కూడా తెలీనంత చీకటిలో మనం బ్రతుకుతున్నామన్నది పచ్చినిజం.

చతుర్ధాన్ని అందులోని యోగాలను గమనిస్తున్నపుడే ఈయనగారి గతజీవితం అర్ధమైపోయింది. 'ఏ పాపాలూ చెయ్యలేదా? ఏమీ చెయ్యకపోతే మీకిలా జరగడానికి దేవుడికి తెలివి లేదనుకుంటున్నారా?' అడిగాను కటువుగా.

'అదేంటి అలా అంటారు?' అన్నాడాయన హర్దయిన గొంతుతో.

ఈకాలపు మనుషులతో ఇదే పెద్ద చిక్కు. ప్రతివాడూ తానొక మహా పవిత్రుడినని, తనకంటే మంచివాడు లేడని ఊహించుకుంటూ నానా ఛండాలమైన పనులూ చేస్తుంటాడు.  చేస్తున్న తప్పులను ఎత్తి చూపిస్తే మాత్రం సహించలేడు. 

మళ్ళీ చతుర్ధాన్నీ, మాతృకారకుడైన చంద్రుడు నీచస్థితిలో ఉచ్ఛకేతువుతో కలసి ఉండటాన్నీ గమనిస్తూ 'మీ అమ్మగారిని ఎందుకంత బాధలు పెట్టారు?' అడిగాను.

రెండు క్షణాలు నిశ్శబ్దం !!

'మేమేం బాధలు పెట్టలేదు. ఓల్డేజి హోమ్ లో ఉంచి, డబ్బులు కడుతూ బాగానే చూసుకున్నాం' అన్నాడు.

ఇక ఇలా లాభంలేదని, బెడ్ మీదనుంచి లేచి కుర్చీలో కూచున్నాను.

'మీరెంతమంది అన్నదమ్ములు?' ఇంటరాగేషన్ మొదలుపెట్టాను.

'నలుగురం' అన్నాడు.

'నలుగురూ బాగానే సెటిలయ్యారు కదా?' అడిగాను.

'అందరం మంచి పొజిషన్స్ లోనే సెటిలయ్యాము. అందరి పిల్లలూ ఇప్పుడు ఫారెన్లోనే ఉన్నారు' అన్నాడు.

'మీ నాన్నగారు?' అడిగాను.

'ఆయన కూడా ప్రభుత్వంలో పెద్ద ఆఫీసరుగా చేశారు. రిటైరయ్యాక కొద్దీ రోజులకే హార్ట్ ఎటాక్ తో చనిపోయారు' అన్నాడు.

'అప్పుడు మీ అమ్మగారిని ఎవరిదగ్గర ఉంచుకున్నారు?' అడిగాను.

కాసేపు మళ్ళీ నిశ్శబ్దం.

'హలొ. ఉన్నారా?' రెట్టించాను.

'ఆ. ఉన్నానండి. మా దగ్గర ఉండటానికి ఆమె ఇష్టపడలేదు. అందుకే ఓల్డేజి హోములో చేర్పించాం' అన్నాడు.

అంటే, కోడళ్ళకీ ఆమెకూ పడేది కాదన్నమాట ! కొడుకులేమో భార్యలకు చెప్పలేని చవలయ్యారన్నమాట ! 

'చూడండి. మీరు ఈ టైంలో ఫోన్ చేసి నన్ను డిస్టర్బ్ చేసినది ఇలా అబద్దాలు చెప్పడానికా?' అడిగాను తీవ్రంగానే.

ఆయనకూడా ఆర్గుమెంట్ మోడ్ లోకి దిగాడు.

'ఏం చెప్పమంటారండీ? కోడళ్ళేవరికీ మా అమ్మను చూడటం ఇష్టం లేదు. పనివాళ్లున్నారు. కానీ ముసలామెను ఇంట్లో పెట్టుకోవడం వాళ్ళకిష్టం లేదు. హై సొసైటీ కదండి ! పార్టీలు, గెట్ టుగెదర్స్ ఉంటాయి. ఆమె అడ్డంగా ఉంటుందని, బ్రదర్సందరం మాట్లాడుకుని ఆమెను మంచి ఓల్డ్ ఏజి హోములో చేర్పించాము. ఖర్చులు అందరం పంచుకున్నాము. అది తప్పంటారా?' అడిగాడు.

ఇలా ఉంటారు మనుషులు. రాత్రి పదికి ఫోన్ చేసినా మనం మాట్లాడాలి. వాళ్ళు చెప్పే సోదంతా వినాలి. వాళ్లేమో నిజాలు చెప్పరు. మేం పత్తిత్తులమనే వాదిస్తారు. కానీ కష్టాలు తీరే మార్గాలు చెప్పమంటారు. ఛీ ఛీ అని అసహ్యమేసింది.

'చూడండి ! మీరు నలుగురన్నదమ్ములు. మీ నలుగురినీ చక్కగా పెంచి పెద్దచేసి బాగా చదివించారు మీ తల్లిదండ్రులు. మంచి పొజిషన్స్ కి వచ్చేవరకూ సపోర్ట్ చేసి, పెళ్లిళ్లు చేశారు. మరి అంత చేసిన మీ తల్లిదండ్రులని అలాగా చూసుకోవడం? సరే, మీ నాన్నగారు మీ చేతుల్లో చిక్కకుండా చనిపోయారు. మీమీ భార్యలకు భయపడి మీ అమ్మను ఓల్డేజి హోములో చేర్పించారు. డబ్బులు మాత్రం పడేస్తూ, ఆమె ఆశించిన ప్రేమకు ఆమెను దూరం చేసి, అదేదో ఘనకార్యం చేసినట్లు మాట్లాడతారేమిటి? మీరు చేసినది ఘోరమైన పాపం. దీనికి మీకు శిక్ష తప్పదు' అన్నాను.

ఆయనకు కోపమొచ్చింది.

'ఏంటండీ? నేను ఫలానాగా రిటైరయ్యాను. నాకు వాళ్ళు తెలుసు వీళ్ళు తెలుసు. మా ఫ్రెండ్ ఏదో మిమ్మల్ని రిఫర్ చేశాడని మీకు ఫోన్ చేశాను.  ఇలా మాట్లాడతారేమిటి? మీకు తెలిస్తే రెమెడీలు చెప్పండి. లేదంటే ఊరుకోండి. అంతేగాని ఇలా మాట్లాడకండి. అసలు నాకు మీ జ్యోతిష్కులంటే నమ్మకం లేదు.  ఏదో మా ఫ్రెండ్ మాట కాదనలేక ఫోన్ చేశాను' అన్నాడు.

'ఓహో అసలు రంగు బయటపడిందే' అనుకుంటూ - 'వినండి గుర్నాథంగారు ! నేనేమీ రోడ్డుపక్కన జ్యోతిష్కుడిని కాను.  నేనొక సివిల్ సర్వీస్ అధికారిని. ప్రస్తుతం ఇంకా సర్వీస్ లోనే ఉన్నాను.  మీకంటే చిన్న పొజిషన్లో అయితే లేను. మీరేదో నాకు ఫోన్ చేసి నన్ను ఉద్ధరించడం లేదు. నా టైం మీకు కేటాయించి మీతో ఫోన్లో మాట్లాడటమే చాలా ఎక్కువ. అది ముందు తెలుసుకోండి. మిమ్మల్ని పైకెత్తాల్సిన అవసరం నాకు లేదు. పోనీలే ఏదో బాధల్లో ఉన్నారని  ఇంతసేపూ మర్యాదగా మాట్లాడాను. ఇప్పుడు వినండి.

సృష్టిలో ఏదీ ఊరకే జరగదు. మీరేమీ తప్పులు చెయ్యకుండా మీకిలాంటి శిక్షలు పడవు. మీ తండ్రిగానిని మీరు చూసుకోలేకపోవడం, మీ తల్లిగారిని చివరలో ఓల్డేజి హోములో పడేసి ఆమె అక్కడే చనిపోతుంటే, మీరు నలుగురు బ్రదర్సూ ఇక్కడే ఇండియాలో హ్యాపీగా ఎంజాయ్ చేస్తూ, నెలవారీ ఖర్చులు వంతులు వేసుకుని,  ఒక బెగ్గర్ కి పడేసినట్లు డబ్బులు పడేస్తూ, ఆమె తిన్నదా తినలేదా పట్టించుకోకుండా, ఆమె రోగాలు రొష్టులూ పట్టించుకోకుండా, గాలికొదిలేశారు చూడండి, అదీ మీరు చేసిన ఘోరమైన పాపం. అది చేయడంవల్ల మీరు మాతృశాపాన్ని మూటగట్టుకున్నారు. దానికి తిరుగులేదు. మీ పిల్లలు ఇప్పుడేదో అమెరికాలో ఉన్నారని తెగ సంపాదిస్తున్నారని ఎగరకండి. వాళ్ళ కుటుంబాలు నాశనమౌతాయి. రెండుతరాల తర్వాత వాళ్ళ అడ్రసులు కూడా ఉండవు. మీ మునిమనవళ్లు  మనవరాళ్లు అందరూ అమెరికన్స్ అయిపోతారు. నల్లోళ్ళనీ తెల్లోళ్ళనీ ఏడాదికొకళ్ళని మారుస్తూ చివరకేమౌతారో వాళ్ళకే తెలీకుండా పోతారు. మీ ముఖాలను కూడా వాళ్ళు గుర్తుంచుకోరు. వాళ్ళ ముఖాలు మీకూ గుర్తుండవు.

అప్పటిదాకా ఎందుకు? ప్రస్తుతం మీ గతేంటో చూడండి. మీ అమ్మగారు ఎంతబాధ పడ్డారో అంతకంత బాధలు మీరూ పడతారు.  ఇప్పుడే పడతారు. పైగా, ఎంత అహంకారం మీకు? పెద్ద పొజిషన్లో రిటైరయ్యారా? అయితే ఏంటి బోడి? ఒకప్పుడు మీరు వెయ్యి క్యాండిల్స్ బల్బే కావచ్చు. కానీ ఇప్పుడు మాడిపోయిన బల్బు. ఆ సంగతి మర్చిపోకండి. మీలాంటి వాళ్ళను ఇప్పటికి కొన్ని వేలమందిని చూచాను. ఈ స్థితిలో కూడా  మీకింత అహంకారముందంటే, ఒకప్పుడు ఇంకెంత ఉండేదో నేనూహించగలను.  మీలాంటి పాపాత్ములకు నేను రెమెడీలు చెప్పను. చెప్పి, మీ శాపాన్ని ఉత్తపుణ్యానికి  నా భుజాలకెత్తుకోలేను. మీ ఖర్మ అనుభవించండి. చావండి. నాకెందుకు?

ఇంకో సంగతి. ఇన్ని పాపాల మధ్యలో ఏంతో కొంత పుణ్యం సంపాదించే ఉంటారు మీరు. అందుకే నాతో ఫోన్లో మాట్లాడే అదృష్టం పట్టింది. అది తెలుసుకోండి. మీ పాపిష్టి ముఖాలకి రెమెడీలు కావాలా? గో టు హెల్ !' అన్నాను.

ఆయన కోపంగా ఏదేదో ఇంగిలీషులో అరుస్తున్నాడు.

ఫోన్ కట్ చేసి ఆ నంబర్ బ్లాక్ చేశాను.

ఇవాళ పొద్దున్న మా ఫ్రెండ్ కి ఫోన్ చేసి, 'ఎందుకురా అలాంటి వెధవలకి నా ఫోన్ నంబరిస్తావు?' అంటూ ముక్కచీవాట్లు పెట్టాను.

'నాకేం తెలుసురా అతనలా మాట్లాడతాడని? అతనూ వాళ్ళావిడా ప్రస్తుతం హైదరాబాద్ లోనే ఓల్డేజి హోములో ఉన్నారు. ఇద్దరూ 65+ లో ఉన్నారు. ఆవిడేమో అక్కడే బాత్రూమ్ లో కాలుజారి పడి మోకాలు ఫ్రాక్చర్ అయింది. అదీ పరిస్థితి. గ్రహాలు బాలేవని ఎవరో చెబితే మంచి జ్యోతిష్కుడు కావాలంటే నీ నంబరిచ్చాను. సారీ ! ఇంకెప్పుడూ ఇవ్వను' అన్నాడు.

'మాయమాటలు చెప్పి లక్షలు వదిలించే కమర్షియల్ జ్యోతిష్కులు చాలామంది ఉన్నారుకదా? వీళ్లకు వాళ్ళే కరెక్ట్. వాళ్ళు చూసుకుంటార్లే వదిలేయ్. సరేగాని,  వాళ్ళమ్మను కూడా ఓల్డేజి హోములో ఉంచారటకదా చివర్లో ?' అడిగాను.

'అవునురా. నలుగురు బ్రదర్సూ వెల్ సెటిల్డ్. కానీ పెళ్ళాలు చెప్పినమాటలు విని అమ్మను అలా చంపేశారు. ఇప్పుడు అందరూ అనుభవిస్తున్నారు. అందరికీ ప్రాబ్లమ్స్ ఉన్నాయి. ఏ సంతానాన్ని చూసుకుని విర్రవీగారో వాళ్ళే ఇప్పుడు పట్టించుకోవడం లేదు.  వాళ్ళ మదర్ కూడా చివరలో  ఓల్డేజి హోములో బాత్రూం లో పడి తుంటి ఎముక విరిగింది. ఆమెను వీళ్ళెవరూ పట్టించుకోలేదు.  అప్పట్లో ఈ పెద్దకోడలే ఆమెను ఇంటికి తీసుకురానివ్వలేదు. ఇప్పుడు అదే కోడలు ఓల్డేజి హోంలో కిందపడి మోకాలు విరగ్గొట్టుకుంది. నాకు వీళ్ళు ఫ్యామిలీ ఫ్రెండ్స్ . అందుకే నాకివన్నీ తెలుసు. సర్లే ఏదో అయిపొయింది. ఇంకెప్పుడూ ఇలాంటి వాళ్ళకి నీ నంబర్ ఇవ్వను. సరేనా !' అన్నాడు బతిమిలాడుతూ. 

నేనేం అనగలను? 'సరే' అన్నాను.

ఇలా ఉన్నారు మనుషులు ! జీవితంలో మన ప్రయారిటీస్ అన్నీ దారితప్పాయి. డబ్బు ఒక్కటే ప్రధానమై కూచుంది. స్వార్ధమూ, జల్సాలూ ముఖ్యమైనాయి. బాధ్యతలంటే అసహ్యం పెరిగింది. కనీసం కృతజ్ఞతకూడా ఎవరికీ ఉండటం లేదు. కర్మనియమాలు ఎవరికీ అర్ధం కావడం లేదు. చేసుకునేటప్పుడు ఎగురుకుంటూ చేసుకుంటున్నారు. పడేటప్పుడు లబోదిబో అంటున్నారు.  కానీ ఆ స్థితిలో కూడా అహంకారాలు ఏమాత్రమూ తగ్గడం లేదు. 

మనమెన్ని తప్పులైనా ఘోరాలైనా చెయ్యవచ్చు. కానీ మనకు మాత్రం అంతా బాగానే ఉండాలి. కనీసం పశ్చాత్తాపం కూడా ఉండదు ఇలాంటి మనుషులకి. పైగా, చింతచచ్చినా పులుపు చావనట్లు ఎంత అహంకారం? ఇలాంటి మృగాలకి ఏం రెమెడీలు చెప్పాలి? ఎందుకు చెప్పాలి?

దేవుడా ! మనం చేసేదే మనకు తిరిగి వస్తుందన్న నిజం ఎప్పుడు తెలుసుకుంటారో మనుషులు?

read more " కర్మవలయం - ప్రశ్నశాస్త్రం "

మాకు ఇంజనీరింగ్ కాలేజీ ఉంది

ఈరోజు పొద్దున్నే ఇద్దరు వ్యక్తులొచ్చి నన్ను కలిశారు.

మామూలు కుశలప్రశ్నలయ్యాక 'ఎవరు మీరు? ఎందుకు నన్ను కలవడానికి వచ్చారు?' అనడిగాను.

అసలు విషయం చెప్పకుండా వాళ్ళు 'మేం ఆత్మజ్ఞానం కోసం వెదుకుతున్నాం. మాకు గురువు కావాలి. ఆ విషయం మీతో మాట్లాడదామని వచ్చాం.' అన్నారు.

ఇలాంటివాళ్ళని ఇప్పటికి వందలాదిమందిని చూచాను. వాళ్ళు ఎందుకొచ్చారో ఆ అసలు విషయం చెప్పకుండా ఏదేదో డొంకతిరుగుడు మాటలు ఇలాంటివే మాట్లాడుతూ ఉంటారు. ఇదంతా ఇంటర్ నెట్, యూట్యూబుల మహిమ. అందులో అదీ ఇదీ చూసి నాలుగు మాటలు బట్టీపట్టి మాట్లాడబోతూ ఉంటారు. కానీ వాళ్ళ బాడీలాంగ్వేజిని బట్టి అయిదే అయిదు నిముషాలలో వాళ్ళ మనసులో ఏముందో నాకు తెలుస్తుంది. ఆధ్యాత్మిక మార్గానికి వాళ్ళు పనికొసారా లేదా అనేది ఒకేఒక్క క్షణంలో తెలుస్తుంది.

విసుగ్గా 'ఆత్మకే జ్ఞానం లేదు. ఇక మీకెలా దొరుకుతుందది?' అడిగాను సూటిగా.

వాళ్ళు స్టన్నయ్యారు నా ధోరణికి.

'అదేంటి? ఆత్మజ్ఞానం లేదా? రమణమహర్షి 'ఆత్మజ్ఞానం' ఉందని అన్నారుకదా?' అడిగారు వాళ్ళూ తెలివిగానే.

'ఆయన నాతో అనలేదు. నేనూ ఆయనతో అనలేదు. పైగా, నేనాయన్ని కాను. ఆయనామాట అంటే, ఆయన్నే అడగకపోయారా నాదగ్గరకెందుకొచ్చారు?' అడిగాను.

'అంటే ఆత్మకి జ్ఞానం లేదంటారా?' అడిగాడొకాయన.

'లేదు' అన్నాను ఖరాఖండిగా.

'ఉందని మా గురువుగారు కూడా అన్నారు' అన్నాడు రెండో ఆయన.

దొరికావురా దొంగా అనుకుని 'ఎవరు మీ గురువుగారు?' అడిగాను.

బయటపడిపోయామన్న కంగారు వాళ్ళ కళ్ళలో ప్రస్ఫూటంగా  కనిపించింది.

'అదీ, అంటే, ఆయన ఫలానా' అంటూ ఆయన పేరు చెప్పారు.

ఫకాల్న వాళ్ళ ముఖం మీదే నవ్వాను.

వాళ్లకు కోపమొచ్చింది.

'ఎందుకలా నవ్వారు?' అడిగాడు వాళ్లలో కొంచం పొగరుగా కనిపిస్తున్న ఇంకొకాయన.

'ఆయనకే గురువవసరం. ఆయన మీకు గురువా? అయినా,ఏ విధంగా మీకు గురువాయన?' అన్నాను మొహమాటం లేకుండా.

'మేమాయన్ని నమ్ముకున్నాం' అన్నాడు రెండోవాడు.

'మీరు నమ్ముకుంటే ఆయన గురువౌతాడా?' ఎదురు ప్రశ్నించాను.

'ఆయన సంస్థ బాగా డెవలప్ అవుతోంది. మాకొక ఇంజనీరింగ్ కాలేజీ కూడా ఉంది' అన్నాడొకాయన.

'ఓహో. మీరు ఆ కాలేజీ పెట్టినవాళ్ళా?' అడిగా.

'అవును.  ఇంకా ఉన్నారు. ఆ కాలేజీ మాదే' అన్నాడు.

'కాలేజీలు పెట్టడం జ్ఞానానికి చిహ్నమా?' అడిగాను.

వాళ్ళు ఎదురుదాడి ప్రారంభించారు.

'మీరు రామకృష్ణుల భక్తులని విన్నాం. మరి రామకృష్ణా మిషన్ కూడా అనేక కాలేజీలు పెట్టి నడుపుతోంది కదా?' అన్నారు.

' మీరు విన్నది అబద్దం' అన్నా నేను.

'అదేంటి మీరు రామకృష్ణుల భక్తులు కాదా?' అడిగారు.

'కాదని నేననలేదే?' అన్నాను.

వాళ్లకు అర్ధం కాలేదు. అయోమయంగా చూస్తున్నారు.

ఎక్కువ ఏడిపించడమెందుకని ఇలా చెప్పాను.

'నేను సత్యానికి భక్తుడిని. రామకృష్ణులు చెప్పినది సత్యం గనుక ఆయన భక్తుడిని. అదే విధంగా మిగతావాళ్ళు చెప్పినదాంట్లో సత్యముంటే వారినీ ఒప్పుకుంటాను. వినండి. నేను రామకృష్ణుల భక్తుడిని గాని రామకృష్ణా మిషన్ భక్తుడిని కాను. ఆ కాలేజీలు ఆ గోలతో నాకు సంబంధం లేదు. అందుకే అన్నాను. మీరు కాలేజీ పెట్టడం మీ జ్ఞానానికి చిహ్నం కాదని'.

'మరి దేనికి చిహ్నమంటారు?' అడిగాడాయన.

'చెప్తే మీరు బాధపడతారు' అన్నాను.

'పర్లేదు చెప్పండి. వింటాం' అన్నారు.

'మతాన్ని, నమ్మకాన్ని సొమ్ము చేసుకుని వ్యాపారం  చెయ్యడం తప్ప ఇందులో జ్ఞానం ఏమీ లేదని  నా ఉద్దేశ్యం' అన్నాను.

'రామకృష్ణా మిషన్ కూడా అంతేనా?' అన్నాడొకాయన ఎదురుదాడికి కొనసాగిస్తూ.

'దానికీ మీకూ పోలికే లేదు. అది నాకలోకం. మీకంత ఉన్నతమైన ఆదర్శాలేమీ లేవు. ఉంటే మీరింకో కొత్త కుంపటిని పెట్టాల్సిన అవసరం లేదు. ఇంకొకరిని గురువంటూ ప్రచారం చెయ్యాల్సిన పనీ లేదు'. అన్నాను.

'అయితే ఇప్పుడేమంటారు?' అడిగాడు ఆవేశపరుడు కోపంగా.

'నేనేమీ అనడం లేదు. మీరు నాదగ్గరకొచ్చారు. నేను మీ దగ్గరికి రాలేదు' అన్నాను నవ్వుతూ.

'మా గురువుగారికంటే మీకెక్కువ తెలుసా?' అన్నాడు ఆవేశపడుతూ.

'మీ గురువుగారికెంత తెలుసో మిమ్మల్ని చూస్తేనే తెలుస్తోంది. అడిగారు కాబట్టి చెబుతున్నా. ఎక్కువ తెలీడం వల్ల గురుత్వం రాదు. పోనీ అలా చూసినా, మీ గురువు నాలో పదిశాతానికి కూడా చాలడు' అన్నా మళ్ళీ నవ్వుతూ.

'మీకు అహంకారం ఎక్కువని ఫలానా మీ శిష్యుడు చెప్పాడు నిజమేనని రుజువైంది' అంటూ వెళ్ళిపోడానికి లేచారు వాళ్ళు.

'ఓహో అతను మీ గుంపా ఇప్పుడు? నాకు అహంకారం ఎంతో నాకు తెలీదుగాని, మీరు సత్యాన్ని ఒప్పుకోలేరని, మీకు కావలసింది సత్యం కాదని నాకర్ధమైంది'. అన్నా అంతే కూల్ గా నవ్వుతూ.

వాళ్ళు చాలా కోపంగా చూస్తూ లేచి వెళ్లిపోబోయారు.

వెళ్లిపోతున్న  వాళ్ళని ఆపి ఇలా చెప్పాను. 

'చూడండి మీరు ఎందుకొచ్చారో నేను ఊహించగలను. మనసులో ఒకటి పెట్టుకుని మరొకటి డొంకతిరుగుడుగా మాట్లాడుతూ, అదేదో పెద్దతెలివి అనుకునే మీకు 'ఆత్మజ్ఞానం' అనేది ఎన్ని జన్మలెత్తినా రాదు. ఇది ముందు తెలుసుకోండి. మీకు కాలేజీలు ఉండొచ్చు, దానికీ ఆధ్యాత్మికసిద్ధికీ ఎలాంటి సంబంధమూ లేదు. మీకు నిజంగా నిజాయితీ ఉంటె, మీ గురువుని వచ్చి వినయంగా నా కాళ్లదగ్గర కూర్చుని నేర్చుకోమని చెప్పండి'.

' అంటే మా గురువుగారికి సిద్ధి లేదంటారా?' అడిగాడొకాయన ఇంకా మొండిగా.

'సిద్ధి అనే పదానికి అర్ధం తెలిస్తే మీరామాట అడగరు' అన్నాను మళ్ళీ నవ్వుతూ.

వాళ్ళు విసవిసా వెళ్లిపోయారు. 

చాలామంది ఎవరెవరి గురువుల శిష్యులో, నా బ్లాగు మా వెబ్ సైట్లు చూచి, ఇక్కడే హైదరాబాదే కదా కలుద్దామని, 'వీడిదగ్గర సరుకెంతుందో చూద్దామని' వస్తూ ఉంటారు.  ఇలాంటిది ఇది మూడో కేసు.  నా సరుకు అర్ధం కావాలంటే ముందు వాళ్ళదగ్గర ఉండాలిగా సరుకు !

ఆత్మజ్ఞానం కావాల్ట బఫూన్ గాళ్ళకి ! అదేమైనా బజార్లో అమ్మే సరుకా డబ్బులు పడేసి కొనుక్కోడానికి ! ధనమదం తలకెక్కినవాళ్ళకి ఆత్మజ్ఞానం ఎలా కలుగుతుంది? ఎన్ని జన్మలకి కలుగుతుంది?

read more " మాకు ఇంజనీరింగ్ కాలేజీ ఉంది "

ప్రశ్నలు - జవాబులు

ఈ మధ్యలో కొంతమంది నన్నడిగిన ప్రశ్నలు నేనిచ్చిన జవాబులు ఇక్కడ చదువుకోండి.

1. హాయ్ ! మాది అప్పడాల వ్యాపారం. నేను ఆధ్యాత్మికంలోకి అడుగు పెట్టాలని అనుకుంటున్నాను. ఏ పుస్తకాలు చదవాలి?

జవాబు : ముందు ఎవరిని ఎలా సంబోధించాలో తెలుసుకో బాబు. నేను నీ గర్ల్ ఫ్రెండ్ ని కాను 'హాయ్' అంటూ కులకడానికి. పుస్తకాలు చదివితే ఆధ్యాత్మికానికి దూరమౌతావు. నీలాంటివాడు ఆధ్యాత్మికమార్గంలో అడుగుపెట్టాలంటే కనీసం పదిహేను జన్మలెత్తవలసి ఉంటుంది. అప్పటిదాకా రోడ్లమీద అరుచుకుంటూ అప్పడాలమ్ముకో.

2. నా వయసు 20. నేను 'క్షుద్రవిద్య' మీద పుస్తకం వ్రాస్తున్నాను. మీ ప్రొఫైల్ చూశాను. మీ విద్యలు నాకు బాగా నచ్చాయి. మీరేమైనా మెటీరియల్ ఇవ్వగలరా?

జవాబు: ఓ యస్ అదెంతపని? రెండు దయ్యాల్నీ మూడు పిశాచాలనీ పంపిస్తాను. ఎలాంటి సాయం కావాలన్నా మొహమాటపడకుండా  చేస్తాయి. ఎలా కావాలో అడిగి మరీ చేయించుకో. ఒక ఇరవై లక్షలు పంపించు.

3. నా పేరు భైరవుడు. వయసు 55. ఉండేది హైదరాబాద్. జనాల  సమస్యలు తీర్చడానికి హోమాలు చేస్తుంటాను. కానీ ఈ మధ్యనే బాత్రూంలో కాలు జారి పడ్డాను. తుంటి ఎముక ఫ్రాక్చర్ అయింది. ఏ రెమెడీ చెయ్యమంటారు?

జవాబు: ఈ వయసులో కాలుజారావా? అయ్యో పాపం. ఇన్నాళ్లు నువ్వు చేసిన దొంగహోమాలకి శాస్తి ఈ విధంగా జరిగిందన్నమాట. అయినా నువ్వు పడాల్సింది కుడితి తొట్లో కదా బాత్రూంలోకి ఎందుకెళ్ళావు? సర్లే ఏదో ఒకటి. నీకు మామూలు హోమాలు పనిచేయవు. నీకు ఆత్మహోమమొక్కలే దారి. నువ్వే హోమగుండంలో నిలబడి, అంటించుకుని, ఆహుతైపో. జనానికి పీడా వదుల్తుంది.

4. హాయండి ! నా వయసు 52. నేను గ్రహాలను నమ్మను. ఎందుకంటే నేను ఆంజనేయస్వామికి వీరభక్తురాలిని. గ్రహాలు మా ఇంటి దరిదాపులకు కూడా రాలేవు. కానీ ఏంటో, ఈ మధ్య అన్నీ ఎదురు తిరుగుతున్నాయి. ఒబెసిటీ విపరీతంగా వచ్చేసింది. మోకాళ్ళు, గిలకలు తెగ నెప్పులు పుడుతున్నాయి. ఏం చెయ్యమంటారు?

జవాబు: అమ్మా పాపా! ఆంజనేయస్వామి పటం ఇంట్లో ఉన్నంతమాత్రాన ఆయన భక్తులైపోరు. ఆయన పక్కనున్న రాముడే అష్టకష్టాలు పడ్డాడు. ఎందుకలా జరిగింది మరి? తిండి తగ్గించు. ఎంతసేపూ నోటికే కాదు, కాస్త దేహానికి కూడా పనిచెప్పు. బరువు తగ్గు. భక్తితో ఆరోగ్యం రాదు. తిండి కంట్రోల్ చేసి, వ్యాయామం చెయ్యి. ఆంజనేయస్వామి పటానికి నైవేద్యాలు పెట్టి నువ్వు మెక్కడం కాదు. ఆయన ఫోటో ముందు గుంజీలు, దండాలు, బస్కీలు తియ్యి. సమస్య సాల్వ్ అవుతుంది.

5. ఎప్పుడో చనిపోయినవాళ్లు తెగ కలల్లోకి వస్తున్నారు. ఏం చెయ్యమంటారు?

జవాబు: నువ్వు కూడా అర్జంటుగా చచ్చిపోయి వాళ్లలో కలిసిపో. పీడా వదుల్తుంది. అప్పుడు మీరంతా కలసి నా కలల్లోకి వద్దురుగాని. సరేనా? బెస్ట్ ఆఫ్ లక్ ఇన్ యువర్ జర్నీ.

6.  మా పక్కింటి అబ్బాయి నాకు చాలా చాలా నచ్చాడు. కానీ సమస్యేమంటే అతనికి భార్య ఉంది. నాకూ మొగుడున్నాడు. ఇద్దరికీ ఎదిగొస్తున్న పిల్లలూ ఉన్నారు. దయచేసి నవ్వులాటగా తీసుకోకండి. సిన్సియర్ గా అడుగుతున్నాను. సమస్యేమంటే పక్కింటబ్బాయి మీ శిష్యుడని తెలిసింది. నాతో ఎఫైర్ పెట్టుకోవాలంటే మీ పర్మిషన్ కావాలట. నేను మా ఆయన్నీ వదల్లేను. ఇతన్నీ వదల్లేను. ఏం చెయ్యమంటారు?

జవాబు: అబ్బ ! ఎంత మంచి ప్రశ్న అడిగావమ్మా ! ఇంతమంచి శిష్యుడా నాకు? నా జన్మ తరించింది. అసలిది ఒక సమస్యామ్మా? నేను సాల్వ్ చేసిన సమస్యలముందు ఇదొక సమస్యే కాదు. చాలా సింపుల్. విను. నువ్వు నిరభ్యంతరంగా అతనితో సంబంధం పెట్టుకో. అలాగే మీ ఆయన్ని అతని భార్యతో సంబంధం పెట్టుకోమను. అదే విధంగా, మీ పిల్లల్ని వాళ్ళ పిల్లలతో సంబంధం పెట్టుకోమను. అంతా కలసి, ఒకిల్లు కొనుక్కొని సకుటుంబ సపరివార సమేతంగా అందులో ఏడవండి. అసలే నూక్లియర్ పేమిలీలు ఎక్కువౌతున్న ఈ రోజుల్లో కావాల్సింది మీలాంటి ఉమ్మడి కుటుంబాలే ! ఇంకోమాట. నా శిష్యుడిని ఈజన్మలో నావైపు తిరిగిచూడొద్దని చెప్పమ్మా ! అలాంటివాళ్ళని నేను భరించలేనులే.

7. సార్ ! మీ వెబ్ సైట్ చూచి చాలా ఇంప్రెస్ అయ్యాను మీ బోధనలు నాకు చాలా నచ్చేశాయి. నా దగ్గర ఒక పెద్ద లైబ్రరీ ఉంది. లారీడు పుస్తకాలుంటాయి. వాటికి మీకు డొనేట్ చెయ్యాలని అనుకుంటున్నాను. ఏమంటారు?

జవాబు : నేను రాసిన పుస్తకాలే ప్రస్తుతం మా ఇంట్లో ఒక రూము నిండా ఉన్నాయమ్మ! నీ లారీని నేనేం చేసుకోను? ఒక పనిచెయ్యి. ఆ లారీడు పుస్తకాలనీ నీ మెడకి కట్టుకుని బంగాళాఖాతంలో దూకు. లోకానికి నీ పీడ విరగడ అవుతుంది.

8. హాల్లో అండి ! నేను కాళీ ఉపాసన చేస్తున్నాను. దానిని నాకు నేర్పించిన గురువుగారు, ఒకరు చేసిన చేతబడిలో చనిపోయాడు. ప్రస్తుతం నాకు గైడెన్స్ లేదు.  నేను మీ దగ్గరకు రాలేను. ఫోన్లో నాకు పరిష్కారాలు సూచనలు చెప్పగలరా>

జవాబు; అలాగే నాయన ! అంతకంటే నా బ్రతుక్కి వేరే పనేముంది గనుక? అయితే ఒక చిన్న సమస్య. కరోనా వచ్చినప్పటినుండి కాళీకాదేవి పనిలోకి రావటం లేదు.  లీవు పెట్టింది. ఇవ్వాళోరేపో వస్తుంది. తనొచ్చాక కనుక్కుని నీకు ఫోన్ చేస్తా. అప్పటిదాకా చచ్చిన మీ గురువు అస్థికలని మెళ్ళో వేసుకుని రోడ్లమ్మట తిరుగు. సమస్య తీరుతుంది.

9. నమస్తే గురూగారు ! ఆంజనేయస్వామి చిరంజీవి అని క్రీగంటివారి ఉపన్యాసాలలో విన్నాను. ఆయన్ని ఎలా కలవాలి? ఎక్కడ కనిపిస్తారు?

జవాబు : తప్పకుండా నాయన. ఆయన అప్పుడప్పుడు మా తోటలోకి వస్తూ ఉంటారు. గోడలమీద తిరుగుతూ కనిపిస్తారు. ఈ సారొచ్చినపుడు నీకు ఫోన్ చేస్తా.  నువ్వొచ్చేలోపల ఎక్కడికీ పారిపోకుండా చెట్లమీద ఉంటే నీ అదృష్టం. అన్నట్టు మరోమాట ! క్రీగంటిగారిని కూడా తీసుకురా మర్చిపోకుండా. ఆయనక్కూడా చిరంజీవి దర్శనం చేయిస్తా.

10. ఇలా వ్రాస్తున్నందుకు ఏమీ అనుకోకండి. మీకున్న జ్యోతిష్యవిద్య నాకుంటే ఈ పాటికి లక్షలు సంపాదించేవాడిని. మీ విద్యను వేస్ట్ చేసుకుంటున్నారు.

జవాబు: అవున్నాయన ! జోతిష్యం వేస్టని, అది డబ్బులు సంపాదించడానికి పనికిరాదని, దానిని పూర్తిగా నేర్చుకున్నాక అర్ధమైంది. లక్షలు సంపాదించడానికి చాలా ఈజీ మార్గాలున్నాయి. వాటిని అవలంబించు. నన్నిలా వదిలేయ్.

11. నా పేరు ఫలానా. వయసు 58. హైదరాబాద్ లో కాలేజీలో ఆఫీస్ స్టాఫ్ గా పనిచేస్తున్నా. బూడిదబాబా వీరభక్తుడిని. అందుకే మా ఇంటికి 'అశాంతినిలయం' అని పేరు పెట్టుకున్నా. బాబా పోయిన రోజునుంచీ బాధతో రాత్రిళ్ళు తిండి మానేశా. ఆయన ఫోటోకి పావుకేజీ స్వీటు నైవేద్యం పెట్టి అదే తిని పడుకుంటా. ఇలా పదేళ్లనుంచీ చేస్తున్నా. ప్రస్తుతం ఆరోగ్యం బాగా పాడైపోయింది. షుగర్ 300 ఉంది. కళ్ళు కనిపించడం లేదు. నీరసం వస్తోంది. బీపీ బాగా పెరిగింది. ఇంట్లో శాంతి లేదు. ఎందుకిలా జరుగుతోంది? రెమెడీ చెప్పండి.

జవాబు : బాబాగారి ఆకలెక్కువ కదా. మీరు పెడుతున్న పావుకేజీ స్వీటు ఆయనకు సరిపోవడం లేదు. ఆయన ఆగ్రహించారు. అందుకే మీకు షుగరు పెరుగుతోంది. రేపట్నించీ రోజుకి రెండుకేజీలు నేతి మైసూరుపాకు నైవేద్యం పెట్టండి. ఒక్కముక్క కూడా ఎవరికీ పెట్టకుండా రాత్రికి మొత్తం మీరే తిని పడుకోండి. నెలరోజుల్లోనే మీకు బాబా సశరీరంతో దర్శనమివ్వడమే గాక, తనలో ఐక్యం కూడా చేసుకుంటారు. మీ పీడా విరగడయ్యాక మీఇంట్లో వాళ్లకి శాంతి దక్కుతుంది. మీ ఇంటిపేరు ఆటోమేటిగ్గా 'శాంతినిలయం' అయిపోతుంది.

12. ఇంకొకామె రోజుకొక విష్ణు సహస్రనామాల మీద ఎవడో వెర్రినాగన్న వ్రాసిన తోటకూర భాష్యం నాకు పంపిస్తూ ఉంటుంది. మొదట్లోనే కరెంటు షాకెందుకు పాపం ఆడకూతురని చాలా రోజులు ఓపిక పట్టా. ఆమె ఆగడం లేదు. చూసీ చూసీ ఆమెకిలా మెసేజి పెట్టాను.

'ప్రస్తుతం మొదట్లోనే ఉంది. బాగా ముదరకముందే మంచి డాక్టరుకి చూపించుకోమ్మా. ముదిరితే తగ్గడం కష్టం'

-------------------------------

చాలామంది నన్నడిగే ప్రశ్నలు ఈ క్రింది విషయాలమీదే ఉంటున్నాయి.

1. ఈజీగా డబ్బు ఎలా సంపాదించాలి?

2. అక్రమ సెక్సు సంబంధాలు వాటిల్లో సమస్యలు.

3. క్షుద్రవిద్యలు, మంత్రాలతో పనులు సాధించడం.

4. దొంగగురువుల దగ్గర తెలిసీతెలీని సాధనలు చేసి జీవితాలు పాడుచేసుకుని, 'ఇప్పుడేం చెయ్యమంటారు?' అనే ప్రశ్నలు.

5. టీవీ ప్రవచనాల అతితెలివితో నాకే నేర్పించే ప్రయత్నాలు.

--------------------------------

ఈలోకాన్ని ఎవడూ మార్చలేడు, మంచిదారిలో నడిపించలేడు. ఈ చౌకబారు మనుషులూ,ఇంతే, ఈ చెత్తలోకమూ ఇంతే.

పదేళ్లనుంచీ వ్రాస్తున్నది చదివి, ఇలాంటి ప్రశ్నలు అడుగుతున్నారంటే, జనాల స్థాయి ఎలా ఉందో చాలా చక్కగా అర్థమౌతోంది. ఇలాంటి లోకానికి ఇప్పుడున్న దొంగగురువులు చాలరు. సందుకి వందమంది కావాలి, గొందికి వెయ్యిమంది కావాలి. జనం ఇంకా సర్వనాశనం కావాలి.

లోకుల అజ్ఞానం ఇంకా ఇంకా వర్ధిల్లుగాక !

read more " ప్రశ్నలు - జవాబులు "

టావోయిస్టు - మావోయిస్టు

అనగనగా ఒక టావోయిస్టు 

తన గుహలోనుంచి బయటకు రాదు

ఎవరో ఏదో తెచ్చిస్తారు తింటుంది

ఎప్పుడూ తన ధ్యానంలో ఉంటుంది

అనగనగా ఒక మావోయిస్టు

బజారు వదిలి ఇంట్లోకి రాదు

ఎవరి పనిమీదో బయటే ఉంటుంది

ధ్యానం గీనం జాన్తానై అంటుంది

మావోయిస్టు దగ్గరొక టెర్రరిస్టు

వాళ్ళతోపాటే ఒక మూడిష్టు

టావోయిస్టు దగ్గర జర్నలిస్టు

వాళ్ళ సైన్యమొక పెద్ద లిస్టు

టావోయిస్టుకి సకలభక్తి స్వస్తి

మావోయిస్టుకి నకిలీభక్తి జాస్తి

టెర్రరిస్టుకెపుడూ లోకంతో కుస్తీ

జర్నలిస్టుకి మాత్రం జనంతో దోస్తీ

మూడిస్టు ఇంటిపేరు మాడా

అతన్ని చూసే పెట్టారు టాడా

మావోయిస్టుకి అతడొక ఘోడా

మనిషి మాత్రం మహాపెద్ద తేడా

మూడిష్టు నిజానికి పెద్ద శాడిష్టు

లోలోపల కుమిలిపోయే కోపిష్టు

పెద్దగా ఏదీ సాధించలేని లోపిష్టు

దాన్ని కప్పుకుంటూ వాగే వాగిష్టు

అందితే అదిలిస్తుంది టావోయిస్టు

అందర్నీ బెదిరిస్తుంది మావోయిస్టు

తెలివి తనదే నంటాడు టెర్రరిస్టు

జరిగింది నాదేనంటాడు జర్నలిస్టు

టావోయిస్టుకి తనివితీరదు

మావోయిస్టుకి మనసు మారదు 

టెర్రరిస్టుకి తెలివి రాదు

జర్నలిస్టుకి జలుబు పోదు

మాడిష్టుకి మందు దొరకదు

మూడిస్టుకి మూర్ఛ  విడదు

లోపిష్టుకి లొల్లి ఆగదు 

కోపిష్టుకి కోర్కె చావదు

కాలం ఎవరి ఆగడాలనైనా

ఎన్నాళ్లు భరిస్తుంది చెప్పండి?

ఇదిలా ఉండగా ....

టావోయిస్టుకి తన్నులు మొదలయ్యాయి 

మావోయిస్టు మంచం ఎక్కింది

టెర్రరిష్టుకి టెక్కు దిగిపోయింది 

జర్నలిష్టుకి జాతర ఎక్కువైంది

మాడిష్టుకి మత్తు దిగింది

మూడిష్టుకి ముక్కు పగిలింది 

శాడిష్టుకి శాస్తి జరిగింది

కోపిష్టుకి కోతబడింది

అందుకే నేనంటాను ...

ఒరే ఇష్టుల్లారా, మీకెందుకీ భ్రష్టు?

టావోయిజమైనా, మావోయిజమైనా

టెర్రరిజమైనా, కమ్యూనిజమైనా

జర్నలిజమైనా, బర్నలిజమైనా

మీది ఏ ఇజమైనా సరే 

అన్ని ఇజాల్లోకీ ఈగోయిజం

చాలా చాలా చెడ్డది

ఈ రొష్టు తగ్గి సుష్టుగా ఉండేమార్గం చెప్పనా? 

ఈగోయిజం వదలండి, హాయిగా బ్రతకండి

మనుషులని మనుషుల్లా చూడండి

మనుషులలో మనుషుల్లా బ్రతకండి

మనసులు విశాలం చేసుకోండి

మమతల ప్రకారం నడుచుకోండి

ఏమ్? రుచించడం లేదా? అయితే,

అనుభవించే కాలం ఇంకా ఉందన్నమాట

ముందుముందు ఎంతో ఉంది సిన్మా

మంచిమాట వినకపోతే మీ ఖర్మ !

read more " టావోయిస్టు - మావోయిస్టు "

షష్ఠగ్రహ కూటమి

ఈ రోజు అమావాస్య .

దీనికితోడుగా  మకరరాశిలో షష్టగ్రహకూటమి జరుగుతున్నది. మకరరాశిలో ఆరుగ్రహాలున్నాయి.  అవి -  సూర్యుడు, చంద్రుడు, బుధుడు, శుక్రుడు, నీచగురువు, శని.

వీరిలో గురుశుక్రులిద్దరూ ఒకే డిగ్రీ మీదున్నారు. బుధ చంద్రులిద్దరూ ఒకే డిగ్రీ మీదున్నారు. అపసవ్యపు పోకడలు, కుటుంబాలలో, అయినవాళ్ల మధ్యన కీచులాటలు,  గొడవలను ఈ గ్రహస్థితి సూచిస్తున్నది.

ఈ ప్రభావం వల్ల అనేకమంది జీవితాలు ఈ సమయంలో అతలాకుతలం అవుతాయి.చిన్నాపెద్దా కష్టనష్టాలనుంచి, మనుషులు హఠాత్తుగా  చనిపోవడం వరకూ అన్ని స్థాయిలలోనూ మనుషులు అనేక విపత్తుల నెదుర్కొంటారు.

మానసిక సమస్యలు ఎక్కువౌతాయి. గొడవలౌతాయి. దీర్ఘరోగాలతో బాధపడుతున్నవారు పరలోక ప్రయాణమౌతారు. యాక్సిడెంట్లు జరుగుతాయి. ఇవన్నీ గత రెండు రోజులనుంచి మొదలయ్యాయి. ఇంకా రెండు రోజులుంటాయి. 

ఈ షష్టగ్రహకూటమి వల్ల బాగా దెబ్బతినేవారు ఎవరంటే -

మిథునరాశి/ లగ్నం వారు - వీరికి దీని దెబ్బ ఎక్కువగా ఉంటుంది. ఎందుకంటే, వారికి అష్టమంలో ఈ కూటమి ఏర్పడుతున్నది గనుక. వీరికి నష్టం, కష్టం ఎక్కువగా ఉంటుంది. త్రిప్పట అధికంగా ఉంటుంది. కష్టం  ఎక్కువ ఫలితం తక్కువ. చిన్న పనికి కూడా ఎక్కువ కష్టపడవలసి వస్తుంది.

తులారాశి/ లగ్నం వారు - వీరికి చతుర్దంలో ఈ కూటమి ఏర్పడుతున్నది. అందుకని వారికి ఇంటిలో, చదువులో సమస్యలు ఎక్కువౌతాయి. మానసికంగా టెన్షన్లతో నలిగిపోతారు.

మేషరాశి/ లగ్నం వారు - వీరికి దశమంలో ఈ కూటమి ఏర్పడుతునందున వీరికి వృత్తిపరంగా టెన్షన్ ఎక్కువౌతుంది. కొంతమంది ఉద్యోగాలు పోగొట్టుకుంటారు. పనివత్తిడి బాగా ఇబ్బంది పెడుతుంది. 

మీనరాశి/ లగ్నం వారు - వీరికి దీర్ఘరోగాలు తలెత్తి బాధలు పెడతాయి. వీరి స్నేహితులు, అన్నలు, అక్కలు గతిస్తారు. లేదా నానాబాధలు వారిని చుట్టుముడతాయి. 

ధనూరాశి/ లగ్నం వారు - వీరికి కుటుంబపరంగా చాలా చిక్కులు సమస్యలు, త్రిప్పట ఎదురౌతాయి. డబ్బులు పోగొట్టుకుంటారు. నష్టాలు ఎదురౌతాయి.

కర్కాటక రాశి/ లగ్నం వారు - వీరికి సప్తమంలో ఇది ఏర్పడుతున్నది. కనుక, ఉద్యోగంలో పని వత్తిడి ఎక్కువౌతుంది. మానసిక చింత ఎక్కువౌతుంది. పార్ట్ నర్లతో గొడవలొస్తాయి. అన్నీ ఎదురౌతుంటాయి.

కన్యా రాశి/ లగ్నం వారు - వీరికి మానసిక చింత, డిప్రెషన్ ఎక్కువగా ఉంటాయి. సంతానం వల్ల చాలా బాధలు ఎదురౌతాయి. షేర్ మార్కెట్లో నష్టాలొస్తాయి.

కుంభరాశి/ లగ్నం వారు - వీరికి యాక్సిడెంట్లు అవుతాయి. లేదా దీర్ఘరోగాలు తలెత్తుతాయి. ఆస్పత్రిలో చేరవలసి వస్తుంది. డాక్టర్ల చుట్టూ, క్లినికల్ ల్యాబ్ ల చుట్టూ తిరగవలసి వస్తుంది. 

అంతా చెడేనా అంటూ భయపడకండి ! మంచీ చెడూ అనేవి సాపేక్షాలు. ఎక్కువా తక్కువా అంతే. కాలచక్ర పరిభ్రమణంలో రెండూ కలిసే తిరుగుతూ  ఉంటాయి. మకర, వృషభ, కన్యా, తులా లగ్నాలవారికి చెడుతోబాటు ఇదే సమయంలో మంచి కూడా జరుగుతుంది.

ఈ ఫలితాలన్నీ ఈ అయిదు రోజులలోనే జరుగుతాయి. మీ చేతుల్లో లేనివాటి విషయంలో మీరేమీ చెయ్యలేరు. కనీసం అలా ఉన్నవాటి విషయంలోనైనా కాస్త గమనించుకుని జాగ్రత్తపడండి మరి !

read more " షష్ఠగ్రహ కూటమి "

Yoga Sutras of Sage Patanjali ఇంగ్లీష్ ఈ బుక్ విడుదల

తిధుల ప్రకారం ఈరోజు వివేకానందస్వామివారి 158 వ పుట్టినరోజు.అందుకని  Yoga Sutras of Sage Patanjali ఇంగ్లీష్ ఈ బుక్ ను నేడు విడుదల చేస్తున్నాను.

ఈ పుస్తకం తెలుగులో ఇప్పటికే ఉన్నది. ఇంగ్లిష్ పాఠకుల కోసం దీనిని ఇంగ్లిష్ లోకి అనువదించి ఈ బుక్ గా ప్రచురిస్తున్నాము. 

యోగసూత్రాలను మొదటిసారిగా 1976 లో నాకు 13 ఏళ్ల వయసులో చదివాను. అప్పటికి నాకు సంస్కృతం రాదు. ఇంగ్లిష్ కూడా రాదు. 'వివేకానంద సంపూర్ణ గ్రంధావళి' అనే పుస్తకాలలో ఒకదానిలో వివేకానందస్వాములవారు ఇచ్చిన రాజయోగ ఉపన్యాసాలున్నాయి. అవి యోగసూత్రాలమీద  ఆయన విదేశాలలో ఇచ్చిన ఉపన్యాసాలు. వాటిని చదివాను. అప్పటికి వాటిల్లో కొన్ని సూత్రాలు అర్ధమయ్యాయి. ఎక్కువశాతం  అర్ధం కాలేదు. ఆ తర్వాత, కాలేజీ చదువుకు నర్సరావుపేట వెళ్ళడము, అక్కడ ఇంగ్లిష్ నేర్చుకుని ఇంగ్లీషులో వివేకానందస్వామి చెప్పిన అసలైన మాటలు ఏమిటా అని ఇంగ్లిష్ వెర్షన్ కూడా చదివాను. ఆ విధంగా కొన్ని వందలసార్లు వాటిని చదవడం, ఈలోపల నేను చేస్తున్న సాధనతో వాటిని సమన్వయం చేసుకుంటూ అర్ధం చేసుకోవడం జరిగింది.

నా గురువులలో ఒకరైన పూజ్యపాద  నందానందస్వామివారు తన గుర్తుగా నాకిచ్చినది రాజయోగోపన్యాసాలున్న Complete works of Swami Vivekananda పుస్తకమే.

యోగసూత్రాలకు ఎందరో పండితులు ఎన్నోరకాలుగా వ్యాఖ్యానించారు. నా అవగాహననుబట్టి, నా సాధనానుభవములను బట్టి, ఋషిరుణమును  తీర్చుకుంటూ నేనుకూడా ఈ వ్యాఖ్యానమును వ్రాశాను. పతంజలిమహర్షి కంటే ముందువైన సాంఖ్యము, బౌద్ధముల నుండి ఆయన ఏయే భావములను స్వీకరించారో, ఎలా వాటిని మార్పులు చేసి యోగసంప్రదాయంతో మేళవించారో ఆ వివరమంతా ఈ పుస్తకంలో వ్రాశాను.

యోగోపనిషత్తులలో చూస్తే, ఈ యోగసూత్రాలకంటే ప్రాచీనమైన  పూర్తిగా సనాతన సంబంధమైన యోగసాంప్రదాయం గోచరిస్తుంది. ఇందులోనైతే, సాంఖ్యము, బౌద్ధము, యోగముల మేలుకలయిక గోచరిస్తుంది. రెంటినీ పోల్చి చదవడం ద్వారా పాఠకులు ఈఈ సాంప్రదాయ మార్గములను వివరంగా అర్ధం చేసుకోవచ్చు. తద్వారా హిందూమతం యొక్క మౌలిక గ్రంధాలలో ఏముందో స్పష్టంగా అర్ధం చేసుకునే వీలు కలుగుతుంది.

తెలుగుపుస్తకాన్ని ఇంగిలీషు లోకి అనువాదం చేయడంలో చేదోడు వాదోడుగా సహకరించిన నా శ్రీమతి సరళాదేవికి, నా శిష్యురాళ్ళు అఖిల జంపాల, శ్రీలలితలకు, కవర్ పేజీ డిజైనర్ ప్రవీణ్ కు కృతజ్ఞతలు ఆశీస్సులు తెలియజేస్తున్నాను.

ఈ ఇంగిలీషు పుస్తకం అంతర్జాతీయంగా పాఠకుల అభిమానాన్ని పొందుతుందని ఆశిస్తున్నాం.

ఈ పుస్తకం కూడా మా వెబ్ సైట్ నుంచి  https://mapanchawati.org/publications/ లభ్యమౌతుంది.

read more " Yoga Sutras of Sage Patanjali ఇంగ్లీష్ ఈ బుక్ విడుదల "

సాయమ్మ - చాయమ్మ (పైత్యానికి పరాకాష్ఠ)

మొన్నొకాయన నాకొక ఫోటో వాట్సాప్ లో పంపించి Let Sai amma bless us all ! అని ఒక బ్లెస్సింగ్ పంపించాడు. ఇలాంటి గొర్రెలు దొరికితే ఆడుకోకుండా మనం అస్సలు ఊరుకోము కదా ! ఆయనకు ఈ మెసేజి పంపాను. 

'ఎవరీ వికృతాకారం?'

'ఛీ అలా అనకండి సార్. ఈమె సాయమ్మ. ఈ అవతారం అంటే నాకు చాలా ఇష్టం, భక్తీను. మీరూ ఈ అవతారాన్ని నమ్మండి. మీకంతా మంచి జరుగుతుంది'.

'ఈమె భర్త ఎవరు?' అడిగాను.

'ఏంటండీ ఆ మాటలు?' అన్నాడు.

'మరా వేషమేంటి? దీనికెన్ని సార్లు చేస్తావ్ పూజ?' అడిగాను.

'రెండుసార్లు ఉదయం సాయంత్రం' అన్నాడు.

'ఒద్దులే. నాకిష్టమైన అవతారం వేరే ఉంది' అన్నాను.

'ఏంటది? నాకా అవతారం ఫొటో పంపించండి ప్లీజ్. నేనూ ఫాలో అవుతాను'.

అతనికీ ఫోటో పంపించాను.

'దీనిపేరు చాయమ్మ. నేనూ రెండుసార్లు వీరిని సేవిస్తాను. ఉదయం, సాయంత్రం. ఆకలైతే మధ్యలో కూడా సేవిస్తాను'

అతనికి భలే కోపమొచ్చింది.

'ఏంటి సార్ ! మీరేదో పెద్దవారని, భక్తిపరులని, ఆధ్యాత్మికం మీద రాస్తారని మంచిగా సాయమ్మ ఫోటో పంపిస్తే ఆటలాడుతున్నారు? సాయమ్మతో జోకులేయకండి.  మంచిది కాదు' అంటూ రెలిజియస్ బ్లాక్ మెయిల్ చేయబోయాడు.

'ఛాయమ్మ కూడా చాలా మంచిది. తిన్నదేదైనా సరే వెంటనే అరిగిపోతుంది. నిన్ను ఉల్లాసంగా ఉంచుతుంది. నమ్ము ! మారు ! ఫలితం నువ్వే చూడు !' అన్నా.

'మీరెన్నో పుస్తకాలు రాశారని గొప్ప భక్తిపరులనుకున్నా ఇలా నాస్తికులనుకోలేదు' అంటూ నాలో గిల్టీ ఫీలింగ్ ఇంజెక్ట్ చేద్దామని ట్రై చేశాడు ప్రబుద్ధుడు.

వీడికి విశ్వరూప సందర్శనయోగం కలిగించక తప్పదనుకున్నాను.

'ఆపరా నీ సోది వేస్ట్ ఫెలో ! మీ తాతనుకుంటా వినాయకుడికి ఆడవేషం వేసి వినాయకి అన్నాడు. మీ  నాన్నేమో నరసింహస్వామికి ఆడవేషం వేసి నారసింహి అన్నాడు. నువ్వు మోడరన్ చింపాంజీవి కదా అందుకే ఏకంగా సాయిబాబాకు జడవేసి పూలుపెట్టి చీర కట్టావ్ ! ఏమన్నావ్ ! సాయమ్మతో జోకులేయొద్దా? ఎవడ్రా జోకులేసింది? అలాంటి వేషం ఆయనకేసి ఆయన్నొక కార్టూన్ చేసింది నువ్వు. నేనేమీ సాయమ్మతో జోకులేయలేదు స్టెప్పులేయలేదు.  అంత ఖర్మ నాకేం లేదు. అలాంటి పనులు చెయ్యాలంటే చాలామంది అమ్మలు క్యూలో ఉన్నారవతల. ఇంకోసారి ఇలాంటి జోకులు నాతో వేశావంటే గుంటూరుజిల్లా నాటుభాష నానుంచి వింటావ్ ఖబడ్దార్!' అని గట్టి వార్నింగిచ్చా.

అంతటితో అతన్ని బ్లాక్ చేసి పారేశా.

నా బ్లాగ్ చూసి, నేనేదో చాదస్తపు జగన్నాధం అనుకుని, కొంతమంది అర్భకులు ఇలాంటి మెసేజిలు నాకు పంపిస్తూ ఉంటారు. ముఖం వాచేలా చీవాట్లు పెట్టించుకుంటూ ఉంటారు. 

కొన్ని విషయాలలో నాకు మహమ్మద్ ప్రవక్త అంటే చాలా ఇష్టం. ఆయన దూరదృష్టి చాలా గొప్పది. మతమనేది ఎన్ని రకాలుగా దిగజారే అవకాశముందో  ఆయన అప్పుడే కనిపెట్టి ఇస్లాం మతంలో చాలా గట్టివైన రూల్స్  పెట్టేశాడు. దేవుడికి ఏదో పేరు ఉండాలిగనుక అల్లా అని పేరు పెట్టినప్పటికీ, 'దేవుడు' అంటూ పుంలింగపరంగా పిలుస్తున్నప్పటికీ ఆయనకు రూపమనేది ఉండకూడదని చెప్పాడు. అంతేకాదు, ముస్లిం అనేవాడు ఏ విధమైన ఫోటోనీ చిత్రపటాన్ని తన ఇంట్లో గోడలకు తగిలించకూడదని, ఏ ఆకారాన్ని పూజించకూడదని ఖచ్చితమైన రూల్ పెట్టాడు. ఈ రూల్స్ నాకు చాలా నచ్చుతాయి.  ఎందుకంటే, కొంత వదులిచ్చామంటే, ఈ చౌకబారు మనుషులు చివరకు ఏ స్థాయికి దిగజారుతారో ఆయన అప్పుడే కనిపెట్టాడు. అందుకే అంత ఖచ్చితమైన రూల్స్ ఇస్లాం లో ఉన్నాయి.

అఫ్కోర్స్ ! దిగజారుడుతనమనేది మనుషుల్లో ఇన్ బిల్ట్ క్వాలిటీ కాబట్టి వాళ్లు పిడివాదులుగా, టెర్రరిస్టులుగా దిగజారారు. అంటే, ఆ ఎక్స్ ట్రీమ్ కి వెళ్లారు. హిందువులేమో రకరకాలైన కొత్తకొత్త దేవతలను సృష్టించుకుంటూ ఇలా దిగజారారు. వీళ్ళు ఇంకో ఎక్స్ ట్రీమ్ కి వెళ్లారు.

ఒకరకంగా చెప్పాలంటే, అన్ని విధాలైన భ్రష్టత్వాలూ హిందువులలోనే ఉన్నాయి. దానికి కారణం - పోన్లే పాపమని వారికివ్వబడిన అతిచనువు. దేవుడిని ఎలాగైనా పూజించండి తప్పులేదు అనిన చనువు వారికివ్వబడింది. దానిని మిస్యూజ్ చేస్తూ ఈ విధంగా నానారకాలైన దేవీదేవతలను, ఆయుధాలను, వాహనాలను ఎవడిష్టం వచ్చినట్లు వాడు సృష్టించి పారేసి, వారికి అష్టోత్తరాలు, సహస్రనామాలు రాసేసి, పూజావిధానాలు సృష్టించేసి నానా భ్రష్టు పట్టిస్తున్నారు. చనువిస్తే నెత్తికెక్కుతారన్న సామెత ఉండనే ఉందికదా !

వేదాలను, ఉపనిషత్తులను, వాటిలోని చిక్కటి సంస్కృతభాషను అర్ధం చేసుకునే తాహతు లేని సామాన్యుడికి వెసులుబాటు నివ్వడం కోసం వ్యాసమహర్షి పురాణాలు వ్రాసి, దేవతారాధన ఏర్పాటు చేస్తే, ఆ సామాన్యుడి బుద్ది వెర్రితలలేసి కొత్తకొత్త దేవుళ్ళని సృష్టించి, గుళ్లుకట్టి వ్యాపారంగా దానిని మార్చాడు.

మొన్న గుంటూరు నుంచి నర్సరావుపేట మీదుగా త్రిపురాంతకం వెళ్లాం ఏదో పనుండి. గుంటూరువైపునుండి నర్సరావుపేటలోకి వెళుతున్నప్పుడు నర్సరావుపేట మొదట్లోనే ఒక సాయిబాబా గుడి ఉంటుంది. దానికి ద్వారపాలకులుగా ఆంజనేయస్వామి, గరుత్మంతులను పెట్టారు ఆ గుడిని కట్టించిన ప్రబుద్ధులు. వీళ్ళిద్దరూ రోడ్డుమీద వాచ్ మెన్ లాగా ఉన్నారు గర్భగుడిలో సాయిబాబా విగ్రహం ఉంది. ఎంత దగుల్బాజీ పనో అది ! చూచి చాలా బాధేసింది. వారికి తెలియకపోతే ఈ స్వామీజీలైనా చెప్పరా అది తప్పని ! ఏంటో ఈ ఖర్మ !

హిందూమతపు ఈ వెర్రితలలు చూచి వేదమంత్రాలను దర్శించిన మహర్షులు ఎంత బాధపడుతున్నారో కాస్తైనా ఆలోచించండిరా ప్రబుద్ధుల్లారా. మీమీ పైత్యప్రకోపాలను తగ్గించుకుని సరియైన హిందూమతం ఏమిటో అర్ధం చేసుకోండిరా. ఈ భరతభూమిలో పుట్టి, మీరు చెడిపోయినదేగాక, గొప్పదైన మీ మతాన్ని కూడా ఈ విధంగా భ్రష్టుపట్టించకండిరా !

ఛీ! ఛీ! ఎప్పుడు బుద్ధొస్తుందో ఇలాంటి వాళ్లకి?

read more " సాయమ్మ - చాయమ్మ (పైత్యానికి పరాకాష్ఠ) "