“The world is a puzzle; no need to make sense out of it." - Socrates

28, నవంబర్ 2021, ఆదివారం

ఓ మైగాడ్ - ఓమైక్రాన్ రంగప్రవేశం

ప్రస్తుతం, గురువు కుంభరాశిలో సున్నా డిగ్రీల మీదున్నాడు. ప్లూటో మకరరాశి సున్నా డిగ్రీలమీదున్నాడు. ఇద్దరికీ ఆచ్చాదనా యోగం ఏర్పడింది. గురువు జీవకారకుడు, ప్లూటో యముడు, ఫలితం? జీవశక్తిని మరణం కమ్మేస్తుందని అర్ధం. జ్యోతిష్యశాస్త్రపరంగా దీనిని 'మరణయోగం' అనవచ్చు.  అంటే, లోకానికి మళ్ళీ మూడిందని అర్ధం. అందుకే, ఇప్పటివరకూ వచ్చిన అన్ని రకాల కోవిడ్ వైరస్ ల కంటే ఎన్నోరెట్లు భయంకరమైన 'ఓమైక్రాన్' వేరియంట్ హఠాత్తుగా తలెత్తింది.

ఇప్పటివరకూ పెద్దగా కోవిడ్ న్యూస్ అంటూ లేని ఆఫ్రికాలో, మొట్టమొదటి ఓమైక్రాన్ వేరియంట్ కనిపించింది. కనిపించీ కనిపించగానే, యూరప్ లో అడుగుపెట్టింది. యూకే, జర్మనీ, ఇటలీలు ఇప్పటికే వణికిపోతున్నాయి. ఇజ్రాయెల్ తన బార్డర్స్ ను మూసేసింది. యూరప్ లో కనీసం 7 లక్షలమంది చావబోతున్నారని WHO అంటోంది. అంటే ఏమిటి? మళ్ళీ  ప్రపంచానికి మూడిన సంకేతాలు వెలువడుతున్నాయి.

గతంలో చాలామంది, 'కరోనా పని అయిపోయింది. ఇదుగో పోయింది, అదుగో పోయింది, మార్చి తర్వాత పోతుంది, ఏప్రిల్ తర్వాత పోతుంది', అని వ్రాశారు. ఇదిప్పుడే పోదని, గ్లోబల్ కర్మ లెవల్స్ చాలా ఎక్కువగా ఉన్నాయని, స్వార్ధమూ, లెక్కలేనితనమూ జనాలలో ముదిరిపోయాయని, మనుషులకి గట్టిగా బుద్ధి చెప్పనిదే ప్రకృతి ఊరుకోదని, నేనన్నాను. చూడండి ఏం జరుగుతోందో మరి?

ఓమైక్రాన్ కు ఎదురులేదని, వాక్సిన్లేవీ దానిని అడ్డుకోలేవనీ, అది వ్వాపించే వేగం చాలా ఎక్కువగా ఉంటుందని, దాని విధ్వంసం కూడా ఎక్కువేననీ, నిపుణులు అంటున్నారు. కనుక, ఇప్పటిదాకా వాక్సిన్  వేసుకున్నవారైనా, వేసుకోనివారైనా, ప్రస్తుతం అందరూ ఒకటే అయిపోయారు. ఒక ఆర్నెల్లలో దీనికి కూడా వాక్సిన్ తయారు చేస్తామని కంపెనీలు అంటున్నాయి.  మళ్ళీ 'రెడ్డొచ్చె మొదలాడు' అన్నట్లు, ఈ క్రొత్త వాక్సిన్ కోసం మళ్ళీ క్యూలు మొదలవబోతున్నాయి.  ఇంతా చేస్తే, ఆ క్రొత్త వాక్సిన్ ఎంతవరకూ పనిచేస్తుందో దేవుడికే ఎరుక ! భలే ఉంది కదూ మనుషులతో వారి కర్మ ఆడుతున్న ఆట !

గురువు - ప్లుటోల మరణయోగం మానవాళికి డేంజర్ సిగ్నల్స్ ను మ్రోగిస్తోంది. విమాన సంస్థలు, తమ సర్వీసుల గురించి ఆలోచిస్తున్నాయి. జాతీయ అంతర్జాతీయ ప్రయాణ రంగం మళ్ళీ కుదుపులకు లోనవబోతోంది. అంతేకాదు, దేశదేశాలన్నీ మళ్ళీ లాక్ డౌన్ దిశగా చూస్తున్నాయి.

ఇంకొక్క నెలలో శని యురేనస్ ల మధ్యన ఖచ్చితమైన కేంద్రదృష్టి ఏర్పడబోతున్నది. అప్పుడుంటుంది అసలు  విలయం ! ఈలోపల యూరోప్ అట్టుడుకుతుంది. అప్పటినుంచీ, ఇండియా, పాకిస్తాన్, యూకే లలో అసలైన డ్రామా మొదలౌతుంది. జనమంతా తట్టా బుట్టా సర్దుకోవడం మొదలుపెట్టాలి. 'మేం రెండు వాక్సిన్లూ వేయించుకున్నాం, మాకేమీ కాదు' అంటూ మాస్కులు తీసేసి మోర విరుచుకుని తిరుగుతున్నవారందరూ మళ్ళీ మాస్కులు బయటకు తియ్యండి మరి !  

సరే, 'ఓ మైగాడ్' అనుకుంటూ ఓమైక్రాన్ విధ్వంస న్యూస్ కోసం ఎదురుచూద్దాం !