“There are many who just talk, but very very few who really realize" - Self Quote

25, డిసెంబర్ 2010, శనివారం

క్రిస్మస్

ప్రపంచమంతా డిసెంబర్ ఇరవై ఐదున క్రిస్మస్ గా జరుపుకుంటున్నారు. కాని దీనికి ఆధారాలు ఏమాత్రం లేవని, ఇది అంతకంటే ప్రాచీనమైన వైదికుల "ఉత్తరాయణ పుణ్యకాలం" అనే పండుగ అన్న చేదునిజం బయట పడితే దీనిని ప్రపంచం జీర్ణించుకోగలదా?

జీసస్
క్రీస్ట్ ఎప్పుడు పుట్టాడో ఎవరికీ తెలియదు. మనలాగా సంవత్సర, మాస, పక్ష, తిథి, వార, నక్షత్రాలను, యోగకరణాలను, హోరను,లగ్నం నుంచి నాడీ లగ్నం వరకూ ఉన్న సూక్ష్మ విభాగాలను లెక్కించి దాన్ని బట్టి జనన కాలాన్నివ్రాసిపెట్టే పద్దతి అప్పట్లో దేశంలో లేదు. వారికి అంతటి జ్యోతిష్య జ్ఞానమూ లేదు. కనుక ఆయన ఎప్పుడు పుట్టాడో ఎవరికీ తెలియదు. అందరూ అనుకుంటున్నడిసెంబర్ ఇరవై అయిదు ఆయన పుట్టిన రోజు కాదు.

క్రీస్తు శకం మూడో శతాబ్దం లో ఆయన జనన సమయాన్ని నిర్ధారించి దానిని ఒక పండుగగా జరుపుకోవాలనే ప్రయత్నాలుజరిగాయి. అప్పటికి క్రైస్తవ మతం ఒక రాజామోదం పొందిన మతం గా రూపు దిద్దుకోగలిగింది. యూదుల ప్రాచీన పండుగ అయిన "పెస్టివల్ ఆఫ్ లైట్స్" అదే సమయంలో వస్తుంది కనుక కాలపు క్రైస్తవమతాచార్యులు ఆ సమయాన్నినిర్ధారించి ఉండవచ్చు. ఈ పండుగను యూదులు తమకంటే ప్రాచీనమైన వైదిక సంస్కృతి నుంచి తీసుకుని అనుకరించసాగారు. ఎందుకంటే మన పండుగలకు, ప్రకృతికీ, సూర్య చంద్ర గమనాలకూ, అవినాభావ సంబంధం ఉన్నది. మన వైదికపండుగలు విశ్వజనీనమైనవి. ఇవి వ్యక్తులతో ముడిపడినట్టివి కావు. ఇది ఎవ్వరూ కాదనలేని సత్యం. కాబట్టి ఈ కాన్సెప్ట్ ను యూదులు మననుంచి కాపీ కొట్టి ఉండవచ్చు అని గట్టిగా చెప్పవచ్చు.

ప్రాచీన వేద కాలం నాటి పండుగలు ఏ ఒక్క మహాపురుషుని జన్మనో ఆధారంగా తీసుకుని మొదలైనవి కావు. అప్పట్లో వ్యక్తుల పుట్టినరోజులు జరుపుకునే కాన్సెప్ట్ లేదు. అప్పటి పండుగలు అన్నీ విశ్వం లో జరుగుతున్న మార్పులను బట్టి, సూర్య చంద్రుల గమనాలను బట్టి, ఋతువులను బట్టి, సూక్ష్మమైన ఖగోళ పరిశీలనను బట్టి తయారు చేసినవే.

పండుగనే అతి ప్రాచీన కాలం నుంచి మనం "ఉత్తరాయణ పుణ్య కాలం" గా పిలుస్తూ ఉన్నాం. సూర్యుడు దక్షిణం నుంచి ఉత్తరానికి ప్రయాణం చేసే సమయాన్ని, ఒంపు తిరిగే సమయాన్ని, ఉత్తరాయణ పుణ్యకాలం అంటూ అది దేవతలకు పగలుగా వేదం చెప్పింది. అది సాయన సిద్ధాంతం ప్రకారం డిసెంబర్ ఇరవై ఒకటి ప్రాంతం లో వస్తుంది. ఈ రోజు నుంచి రాత్రుళ్ళు తగ్గుతూ పగటి నిడివి పెరుగుతూ వస్తుంది. కనుక భారతీయుల ఉత్తరాయణ పుణ్యకాలాన్నే ప్రాచీనయూదులు "ఫెస్టివల్ ఆఫ్ లైట్స్" గా లెక్కించి ఉండవచ్చు.

దీనినే
క్రీస్తు జనన సమయంగా తరువాతి క్రైస్తవులు నిర్ధారించారు. ఎందుకంటే ఈవిధంగా యూదులపండుగ సమయంలో క్రీస్తుజన్మదినం జరపటం మొదలుపెడితే కొన్నాళ్ళకు ప్రాచీనయూదుల పండుగలు మరుగునపడి, క్రిస్మస్ మాత్రమె సమాజంలో మిగులుతుందనే దురూహ దీన్ని మొదలుపెట్టిన వారికి ఉండిఉండవచ్చు. క్రీస్తును సిలువనెక్కించి చిత్రహింస పెట్టిన యూదుల పండుగలను సమాజంలోనుంచి చెరిపివెయ్యాలంటే ఇదొక మార్గం గా అప్పటి వారు ఊహించి ఉండవచ్చు. ప్రస్తుతం అసలైన పండుగ మరుగున పడి, వీరి ఊహే చాలావరకూ చలామణీ అవుతూ ఉండటం చూస్తున్నాం.

దీనికి ఇంకొక రుజువు కూడా చరిత్రలో ఉంది. ప్రాచీన ఇరాన్ లో సూర్యుని "మిత్ర" అనే పేరుతొ పిలిచేవారు. వారి కాలెండర్ లోకూడా తేదీన షబే-జాఎష్- మెహర్ అనే పండుగను జరుపుకుంటారు. రోజునుంచి పగళ్ళు పెరుగుతూ వస్తాయి. రాత్రుళ్ళు తగ్గుతూ వస్తాయి. సూర్యుని వెలుగు ఎక్కువ అవుతుంది కనుక దీనిని లోకానికి శుభసూచకంగా భావించేవారు. ప్రాచీన ఇరానియన్ దేవత అయిన "మిత్రా"(సూర్యున) కు ముఖ్యమైన తేదీ కనుక తరువాతివారు క్రీస్తుజన్మదినంగా దానిని నిర్ధారించి ఉండవచ్చు. వేదం లోని "మిత్రా-వరుణులు" లేక "మైత్రా-వరుణులు" అదే పేర్లతో ప్రాచీన ఇరాన్ లోకూడా మనకు దర్శనం ఇస్తారు. తరువాత ఇస్లాం మతం వచ్చి ఇరాన్ లో పూజింపబడుతున్న వైదిక దేవతలను అందరినీ తొలగించింది అది వేరే సంగతి.

మొత్తంమీద జీసస్ ను స్మరించుకుంటూ చేసుకునే ఒక పండుగగా క్రిస్మస్ నిలిచిపోయింది. దానికి డిసెంబర్ ఇరవై అయిదు ఖాయం చెయ్యబడింది. అదే ప్రపంచవ్యాప్తంగా కొనసాగుతూ వస్తున్నది. కాని దీనికి మూలం మన పంచాంగంలోని "ఉత్తరాయణ పుణ్యకాలం" అన్న సంగతి, ఇది సూర్య గమనానికి సంబంధించిన పండుగ అనీ, జ్యోతిష్య విజ్ఞానం ఇచ్చిన పండుగ అనీ, ఇదే జీసస్ జనన దినంగా జరుపుకోబడుతున్నదనీ, ఖగోళ పరమైన ఆధారాలు తప్ప దీనికి క్రైస్తవపరమైన ఆధారాలు అస్సలులేవన్న సంగతీ చాలా మందికితెలియదు.

అసలు జీసస్ ఎప్పుడు పుట్టాడో ఎవరికీ తెలియదు దానికి
బైబిల్ లో ఎక్కడా రికార్డులు లేవు. భారతీయుల "ఉత్తరాయణ పుణ్యకాలమే" క్రిస్మస్ గా మారి అందరిచేతా ఈపేరుతొ జరుపుకొబడుతున్నది. ప్రపంచం అజ్ఞానమయం అనడానికి, దానిని సత్యం నడపదు, గుడ్డి నమ్మకమే నడుపుతుంది అనడానికి ఇదొక రుజువు. ఈ నమ్మకం మీద కొన్ని వందల కోట్ల డాలర్ల వ్యాపారం ప్రపంచ వ్యాప్తం గా జరుగుతున్నది. కాని ఆ నమ్మకానికే అసలు ఆధారాలు లేవు అన్నది చేదునిజం.

నిజాలు అర్ధమయ్యే కొద్దీ "మాయా ప్రపంచం తమ్ముడూ..." అని పాడుకోక తప్పదేమో మరి.