జ్యోతిష్యం వాస్తు నిజమని నిరూపిస్తే 6 కోట్లు

అప్పుడప్పుడు నాకు చాలా ఈ మెయిల్స్ వస్తూ ఉంటాయి.

'ఎవరో హేతువాద సంఘం వాళ్ళు ప్రైజ్ మనీ ఎనౌన్స్ చేశారు. జ్యోతిష్యం వాస్తు నిజమని నిరూపిస్తే 6 కోట్లు ఇస్తామని అంటున్నారు. మీరు నిరూపించి ఆ డబ్బులు తీసుకోవచ్చు కదా?' అని.

నేను నవ్వుకుని ఊరుకుంటూ ఉంటాను.

మన తెలుగురాష్ట్రంలో ఈ ప్రైజ్ మనీ ఇప్పుడు వచ్చిందేమో? అర్ధశతాబ్దం క్రితమే ఇలాంటి చాలెంజ్ లు విదేశాలలో చాలా ఉన్నాయి. ఇంటర్నేషనల్ ఎతీస్ట్ సెంటర్స్ ఇలాంటి చాలెంజ్ లు ఎన్నో చేశాయి. ఇప్పటికీ ఆ చాలెంజ్ లను ఎవరూ స్వీకరించలేదు.

ఎందఱో పేరు మోసిన జ్యోతిష్కులు విదేశాలలో కూడా ఉన్నారు. వారు వెస్టర్న్ ఎస్ట్రాలజీ ని అనుసరిస్తారు. కానీ వాళ్ళు కూడా ఈ చాలెంజ్ ని స్వీకరించరు. ఎందుకంటే ఆ చాలెంజ్ చేసినవాళ్ళు పెట్టే కండిషన్స్ ఎలా ఉంటాయంటే, ఒకవేళ జ్యోతిష్కులు గెలిచినా, గెలవలేదని నిరూపించేలా అవి డిజైన్ చెయ్యబడి ఉంటాయి. మూర్ఖంగా వాదించి 'మీరు గెలవలేదు' అని వాళ్ళే నిరూపిస్తారు. కనుక అలా గెలవడం జరిగేపని కాదని వీరికి బాగా తెలుసు. అందుకే ఆ చాలెంజ్ ని నిజమైన జ్యోతిష్కులు ఎవ్వరూ స్వీకరించరు. ఇక కుహనా జ్యోతిష్కుల సంగతి చెప్పనే అక్కర్లేదు. వారెలాగూ ఓడిపోక తప్పదు. అందుకని వారూ ఈ చాలెంజ్ ని స్వీకరించరు.

మొన్నీ మధ్యనే ఒక కొలీగ్ కీ నాకూ మధ్య దీనిమీద సంభాషణ నడిచింది.

"ఆ చాలెంజ్ స్వీకరించి 6 కోట్లు కొట్టెయ్యొచ్చుగా?" అడిగాడు కొలీగ్.

'ఫస్ట్ నువ్వు వాడుతున్న పదమే తప్పు. కొట్టెయ్యడం అనే దానిమీద నాకు ఇంటరెస్ట్ లేదు. నేను దొంగను కాను ఆ పని చెయ్యడానికి." అన్నాను నవ్వుతూ.

'అదికాదు. ఏదో మాటవరసకి వాడాన్లే ఆ పదాన్ని. జ్యోతిష్యం నిజమే అని నువ్వు ప్రూవ్ చెయ్యొచ్చు కదా?' అన్నాడు.

'ఒకరికి ప్రూవ్ చెయ్యవలసిన పని నాకు లేదు. అది నిజమైన శాస్త్రమే అని నాకు తెలుసు. ఇంకొకరిని ఒప్పించాల్సిన పని నాకు లేదు. వారు ఒప్పుకుంటే నాకు ఒరిగేది కూడా లేదు' అన్నాను.

'ఎందుకు ఒరగదు? ఆరు కోట్లు అంటే మామూలు విషయం కాదుగా?' అన్నాడు.

'తేరగా వచ్చే సొమ్మంటే నాకు నమ్మకం లేదు. కష్టం లేకుండా అలా తేరగా వచ్చే సొమ్ము ఒక్క రూపాయికూడా నాకక్కర్లేదు. దానితో చాలా కర్మకూడా వస్తుంది. దాన్ని మోసే ఖర్మ నాకెందుకు? ఇప్పటికున్న కర్మ చాలు.' అన్నాను.

'పోనీ నీకు అవసరం లేకుంటే, తీసుకుని చారిటీకి ఇచ్చేయ్' అన్నాడు.

'ఎవరున్నారు మంచిగా చారిటీ చేసేవాళ్ళు? ఒక్కరిని చూపించు. అన్నీ రాజకీయాలే. అన్నీ స్వార్ధాలే. అన్నీ కుట్రలూ కుతంత్రాలే. అంత డబ్బు వాళ్లకిచ్చి ఆ కర్మను మోసే పని నాకెందుకు? నీకంత దురదగా ఉంటే నీ చేతనైనంతలో ఆ పని నువ్వే చెయ్యి' అన్నా.

'మరి ఇంత నేర్చుకుని, ఎవడికీ ఉపయోగం లేకపోతే, నీ టైం అంతా వేస్ట్ కాలేదా?' అన్నాడు తెలివిగా.

'ఇక్కడ ఎవడి టైం వేస్ట్ కావడం లేదో కాస్త చెప్పు? బిలియన్స్ సంపాదించిన వాడి టైం కూడా చివరికి వేస్టే. అది వాడికి అర్ధం కావడానికి 'టైం' పడుతుంది. అంతే. ఈ లోకంలో ప్రతివాడూ చేస్తున్నది ఒకటే పని - టైం వేస్ట్ - చెయ్యడమే. అది తప్ప ఎవరూ ఏమీ చెయ్యడం లేదు.' అన్నాను.

'కనీసం నీకైనా ఈ శాస్త్రం ఉపయోగపడుతోందా" అన్నాడు విసుగొచ్చి.

ఇక వీడితో ఇలా కాదని - 'ఉపయోగపడటం కోసం కాదు నేను దీనిని నేర్చుకుంది?' అన్నాను.

అది వాడికి అర్ధం కాలేదు.

'మరెందుకు?' అన్నాడు అయోమయంగా.

'టైం పాస్ కోసం నేర్చుకున్నాను. టైం వేస్ట్ చేస్తూ పోస్టులు వ్రాస్తున్నాను. సింపుల్ గా చెప్పాలంటే అంతే.' అన్నాను.

'అదేంటి?' అన్నాడు మళ్ళీ అయోమయంగా.

'అదంతే ! జ్యోతిష్యం ఒకరికి ప్రూవ్ చెయ్యాల్సిన సబ్జెక్ట్ కాదని తెలుసుకోవడం కోసమే దీనిని నేర్చుకున్నాను.నావరకూ నాకు బాగానే ఉపయోగపడుతోంది.' అన్నా నవ్వుతూ.

'ఓహో! చాలెంజ్ స్వీకరిస్తే ఓడిపోతానని భయంతో ఈ కబుర్లు చెబుతున్నావా?' అన్నాడు నవ్వుతూ.

'అవును. 'యుద్ధం చెయ్యనివాడు యుద్ధంలో గెలిచినట్లే' అన్నాడు లావోజు. ముందిది అర్ధం చేసుకో. ఆ తర్వాత తీరిగ్గా నాతో వాదిద్దువు గాని' అన్నా.

'ఏమో. నాకైతే కళ్ళు మూసినా తెరిచినా ఆరు కోట్లే కనిపిస్తున్నాయి' అన్నాడు శూన్యంలోకి చూస్తూ.

'సరే ఒకపని చెయ్యి. రేపట్నించీ నా దగ్గర జ్యోతిష్యశాస్త్రం నేర్చుకో. రెండు మూడేళ్ళలో ఆ చాలెంజ్ నువ్వే స్వీకరించే స్థాయికి ఎదుగుతావు. ఈ లోపల ప్రముఖ జ్యోతిష్కులు ఎవరూ ఆ పనిని చెయ్యరు గాక చెయ్యరు. అంతవరకూ నీకు గ్యారంటీ ఇస్తా.' అన్నా సీరియస్ గా.

'ఫీజు ఎంతేంటి?' అన్నాడు వాడూ నవ్వుతూ.

'వెరీ సింపుల్. నీ దగ్గర ఎక్కువ తీసుకోనులే. రోజుకు ఆరు కోట్లు. అంతే !' అన్నా నేనూ నవ్వుతూ.

'సర్లే పద ! నాకు చాలా పనుంది అవతల' అన్నాడు నీరసంగా.

' నాకూ పనుంది. వస్తా ! ఇంకో సంగతి ! జ్యోతిష్యం వాస్తు నిజాలు కావని నిరూపిస్తే నేను కూడా ఆరు కోట్లు ఇస్తానని ప్రెస్ మీట్ పెట్టబోతున్నా త్వరలో.' అన్నా.

'నీ దగ్గర ఆరు కోట్లు ఎక్కడివి?' అన్నాడు సీరియస్ గా.

'పాత జోకేలే. మళ్ళీ చెబుతున్నా. నేను లా చదివినప్పుడు కుట్టించుకున్న నల్లకోటు ఒకటుంది. రైల్వే టీసీలు వేసుకునే కోట్లు అయిదు దానికి కలిపి ఆరు కోట్లు చేస్తా. అవి ప్రైజుగా ఇస్తా.' అన్నా నవ్వుతూ.

'ఇది ప్రూవ్ చెయ్యడం చాలా తేలిక. నువ్వు ఓడిపోతావ్' అన్నాడు.

'అదీ జరిగే పని కాదు. ఎందుకంటే వాళ్ళు ఎన్నెన్ని చెప్పినా నేను కన్విన్స్ కాను కదా ! కన్విన్స్ కాకూడదు అని ముందే డిసైడ్ అయిపోతానన్నమాట - వాళ్ళలాగానే. కనుక వాళ్ళూ ఈ చాలెంజ్ లో గెలవలేరు. ఒకవేళ గెలిచినా మనకు పోయేదేముంది పాత కోట్లు తప్ప? దరిద్రం పోతుంది.' అన్నాను నవ్వుతూ.

వాడి దారిన వాడు చక్కా పోయాడు.

కధ కంచికి మనం ఇంటికి !

read more " జ్యోతిష్యం వాస్తు నిజమని నిరూపిస్తే 6 కోట్లు "

నిత్య జీవితంలో ప్రశ్నశాస్త్రం - మొబైల్ చార్జర్ ఏమైంది?

ఈరోజుల్లో ఏది మర్చిపోయినా అంత కంగారు రాదుగాని, మొబైలు గాని, దాని చార్జర్ గాని మర్చిపోతే మాత్రం చాలా కంగారు పుడుతుంది. ఎందుకంటే పనులన్నీ వాటితోనే జరుగుతున్నాయి గనుక.

నిన్న అర్ధరాత్రిదాకా ఒక ఫంక్షన్ లో కల్చరల్ ప్రోగ్రాం నిర్వహిస్తూ చాలా బిజీగా ఉండవలసి వచ్చింది. ఆ తర్వాత ఇంటికి వచ్చి నిద్రపోయే ముందు చూస్తే, మొబైల్ చార్జర్ కనిపించలేదు. ఈ ఫోన్ పిన్ కు అన్ని చార్జర్లూ సరిపోవు. ఆ మోడల్ ను అలా డిజైన్ చేశాడు లెనోవో గాడు. చార్జ్ చూద్దామంటే, 5% ఉంది. మనకేమో అఫీషియల్ కాల్స్ ఏ సమయంలోనైనా రావచ్చు. ఇక్కడ చార్జ్ చూస్తే తెల్లవార్లూ వచ్చేలా లేదు. ఏం చెయ్యాలి? దానిని ఉంచిన బ్యాగ్ మొత్తం వెదికినా అది కనిపించలేదని తెలిసింది. ఎక్కడ పోయిందబ్బా? అని కొంత ఆలోచన చేసి, ఆ ప్రోగ్రాం హడావిడిలో ఎక్కడో పోయి ఉంటుందిలే, సర్లే పోతే పోయిందిలే ఇంకోటి కొందాం అనుకుంటూ, ఎందుకైనా మంచిదని ఒక్కసారి ప్రశ్న చార్ట్ ని గమనించడం జరిగింది.

ప్రశ్న స్థలం -- గుంటూరు.

తేదీ -- 18-1-2018

ప్రశ్న సమయం -- రాత్రి 12.30

చూడగానే కుండలిలో కాలగ్రస్తయోగం చక్కగా కన్పిస్తోంది. ఆ పైన లగ్నానికి కాలార్గళం పట్టింది. ఒక మనిషిని విసిగించడానికి ఇవి చాలా ఎక్కువ. ఇవి చాలవన్నట్లు, లగ్నాధిపతి చతుర్దంలో తీవ్ర అస్తంగత్వంలో ఉండి మానసిక భ్రమను సూచిస్తున్నాడు. అంతేగాక, చతుర్ధం వల్ల ఆ వస్తువు ఇంట్లోనే ఉంది కానీ కన్పించడం లేదని సూచిస్తున్నాడు. మన: కారకుడైన చంద్రుడు కూడా అక్కడే ఉంటూ వస్తువు ఇంట్లోనే ఉందని, కానీ తప్పుదోవ పట్టిస్తోందనీ సూచిస్తున్నాడు. లగ్నంలో గురువుగారు ఉండి వస్తువు త్వరలోనే దొరుకుతుందని సూచిస్తున్నాడు. ద్వితీయాధిపతిగా విలువైన వస్తువులకు కారకుడు కుజుడు రాశిసంధిలో ఉంటూ వస్తువుల అనిశ్చిత పరిస్థితిని సూచిస్తున్నాడు. కానీ స్వక్షేత్ర స్థితి వల్ల, అది పోలేదని సూచిస్తున్నాడు. లగ్నం మొదటి ద్రేక్కాణంలో ఉంటూ వస్తువు ఇంటి మొదటిభాగంలోనే ఉందని సూచిస్తున్నది. దానిని ఉంచిన బ్యాగ్ హాల్లోనే ఉంచబడింది.

ఇవన్నీ గమనించిన మీదట అది ఎక్కడికీ పోలేదని, అదే బ్యాగ్ లోనే ఇంకో అరలో ఉంటుందని, సరిగ్గా వెదికితే దొరుకుతుందనీ అర్ధమై, నిద్రకు ఉపక్రమించాను.

పొద్దున్నే లేచి అదే బ్యాగ్ లో సైడ్ జిప్ పాకెట్ లో చూడగా అందులో మొబైల్ చార్జర్ చక్కగా దర్శనమిచ్చింది. నిత్యజీవితంలో ప్రశ్నశాస్త్రం ఎలా ఉపయోగపడుతుంది? అనడానికి ఇది ఇంకొక ఉదాహరణ.

అయితే, చార్ట్ ని సరియైన దృష్టితో అర్ధం చేసుకోవాలి. విషయమంతా ఈ అర్ధం చేసుకోవడంలోనే ఉంది. చార్ట్ అనేది అలా అర్ధం కావాలంటే, జ్యోతిష్య శాస్త్ర సూత్రాలు బాగా వంటబట్టి ఉండాలి, ఆ తర్వాత స్ఫురణ (ఇంట్యూషన్) ఉండాలి. వీటికి తోడుగా వందలాది చార్టులను విశ్లేషణ చేసిన అనుభవం ఉండాలి. ఈ మూడూ కలసినప్పుడు ప్రశ్నశాస్త్రం చక్కని ఫలితాలను తప్పకుండా ఇస్తుంది.

read more " నిత్య జీవితంలో ప్రశ్నశాస్త్రం - మొబైల్ చార్జర్ ఏమైంది? "

త్వరలో రాబోతున్న మా పుస్తకం "మహాసౌరమ్" నుంచి కొన్నిపద్యాలు

సూర్యోపాసన మన మతంలో ఒక విశిష్టమైన అంశం. సూర్యుడు ప్రత్యక్షదైవం. అంటే ప్రతిరోజూ మనకు కళ్ళెదురుగా కనిపించే దైవం. సూర్యుని సకల దేవతాస్వరూపునిగా స్తుతించింది వేదం.

భౌతికవాదులకూ నాస్తికులకూ సూర్యుడు ఒక మండుతున్న నిప్పుల ముద్ద కావచ్చు. కానీ అదే అగ్నిగోళం ఇచ్చే వేడితోనే వాళ్ళూ బ్రతుకుతున్నారన్న స్పృహ కొంచెం ఉంటే, దానినుంచి కృతజ్ఞత పుడుతుంది. ఆ కృతజ్ఞతకు మరో పేరే భక్తి. వారు నిత్యం పొందుతున్న సహాయం పట్ల కృతజ్ఞత లేకుండా నాస్తికులూ భౌతికవాదులూ ఉంటారని నేనైతే అనుకోను. అలా ఉండేవారు అసలు 'మనుషులు' అనే పదానికే అర్హులు కారు మరి.

దేవుడు సృష్టించిన సూర్యుడిని దేవుడిగా పూజించడం ఘోరమైన తప్పని క్రైస్తవమూ ఇస్లామూ వంటి కొన్ని మతాలంటాయి. ఈ మాట విన్నప్పుడు మనకు నవ్వొస్తుంది. దేవుని కంటే దేవుని సృష్టి వేరు కాదు. సృష్టిలో దైవపు వెలుగే ప్రకాశిస్తున్నది. కనుక తేజోవంతములైన వాటిల్లో దైవపు వెలుగును దర్శించి పూజించడం తప్పు కాదు. విషయం మీకు సరిగ్గా అర్ధం కావడం లేదని మనమంటాం.

మనకు కనిపించే వెలుగులలో అతిపెద్ద వెలుగు సూర్యుడే గనుక, "జ్యోతిషామపి తజ్జ్యోతి:" అంటూ ఆయన్ను దైవంగా భావించి పూజించడం చాలా సరియైన పని. ఈ విధమైన ఉపాసనను వేదం సమ్మతించింది. వేదంలో ఉన్న అరుణం, మహాసౌరం వంటి మంత్రభాగాలే దీనికి నిదర్శనాలు. సూర్యోపాసకులకు ఇవి చిరపరిచితములే. స్తోత్రాలలో అయితే రామాయణంలో మనకు లభిస్తున్న 'ఆదిత్య హృదయం' చాలా మంచి స్తోత్రం. లక్షలాది మంది చేత ఇది నిత్యమూ పారాయణం గావింపబడుతున్న స్తోత్రమే.

పంచవటి పబ్లికేషన్స్ నుంచి అతి త్వరలో రాబోతున్న మరో పుస్తకం 'మహాసౌరమ్' నుంచి నేను వ్రాసిన కొన్ని పద్యాలను మకర సంక్రాన్తి రోజున మీకోసం ఇక్కడ ముందుగానే ఇస్తున్నాను. ఇది ఋగ్వేదం లోని మహా ప్రభావవంతములైన మంత్ర సమాహారములలో ఒకటి.

చదవండి.

--------------------------------------------

ఓమ్ !
ఉదుత్యం జాతవేదసం దేవం వహంతి కేతవ:
దృశే విశ్వాయ సూర్యమ్

తే||కాంచు మల్లదె సూర్యుని గుర్రములను

విశ్వమెల్లను జూచెడి వెలుగురేని

సర్వవేత్తను శాసకు సర్వవిభుని

ఆకసంబున నిల్పవె; యవని కొరకు

సూర్యుడు భూమిపైన జరుగుతున్న సమస్తమునూ గ్రహిస్తున్నవాడు. సర్వమునూ శాసిస్తున్నవాడు. సర్వమానవాళికీ ఆయన ప్రభువు. ఎందుకంటే ఆయన ఇచ్చే వేడిమితోనే మనుషులు జంతువులు పక్షులు చెట్లు ఇతర జీవులు బ్రతుకుతున్నాయి. ఆ సూర్యునికి ఏడు గుర్రములున్నాయి. అవే ఆయన కాంతిలోని ఏడు రంగులు. ఆ గుర్రముల రధంపైన అధిరోహించి ఆయన ఆకాశంలో కనిపిస్తున్నాడు. మానవులారా చూడండి !

తే||ఏడు గుఱ్ఱము లెక్కుచు నెంతగాను

లోకమంతయు నింపెడు లాస్యమొదవ

ప్రభుత నేలగ విశ్వపు పారమంత

శూన్యమండల వీధుల సూర్యుడేగు

ఏడు గుర్రముల రధం మీద అధిరోహించి, లోకాన్నంతా విలాసంగా దర్శిస్తూ, దానిని పరిపాలిస్తూ, శూన్యమండలంలో సూర్యుడు విహరిస్తున్నాడు. మానవులారా ! ఆ వెలుగును దర్శించండి ! 

ఆ||విశ్వమెల్ల నేలు విఖ్యాత పురుషుండు

ఏడు హయములెక్కి ఏగు దెంచు

నియమమందు నిల్పి నిఖిల లోకతతుల

కాంతిపధము నందు గానవచ్చు

విశ్వం మొత్తాన్నీ పరిపాలిస్తున్న ప్రాచీన పురుషుడు ఏడు రంగుల గుర్రములు లాగే రధంలో వచ్చుచున్నాడు. ఈ భూమిపైన సమస్తమూ ఆయన అధీనంలోనిదే. అన్నింటినీ ఆయన నియమిస్తున్నాడు. కాంతిమార్గంలో ఆయన ప్రయాణిస్తున్నాడు. చూడండి !

తే||ఏడు రంగుల గుఱ్ఱములెక్కి నీవు

చేరబోవలె నాతని సర్వ విభుని

జ్ఞానరూపిని ప్రభువును చేతనమున
యోగమార్గము నందుచు వేగమొప్ప

ఈ ఏడు గుర్రములూ మనిషిలోని సప్తచక్రములకు సూచికలు. ఈ సప్తచక్రములనూ జాగృతం చెయ్యడం ద్వారా మీరు సమస్తానికీ ప్రభువైన సూర్యుని తేజస్సును అందుకోవాలి. ఓ మానవులారా ! ఈ యోగమార్గంలో ప్రయాణించడం నేర్చుకోండి.

read more " త్వరలో రాబోతున్న మా పుస్తకం "మహాసౌరమ్" నుంచి కొన్నిపద్యాలు "

నేనెవర్ని మరి?

వేదన నా తల్లి - వేడుక నా తండ్రి

బాధ నా తల్లి - భ్రమ నా తండ్రి

నేనెవర్ని మరి?

విషాదం నా తల్లి - విలాసం నా తండ్రి

విలాపం నా తల్లి - వినోదం నా తండ్రి

నేనెవర్ని మరి?

ఆచారం నా తల్లి - అనాచారం నా తండ్రి

గుట్టుదనం నా తల్లి - కట్టులేనితనం నా తండ్రి

నేనెవర్ని మరి?

అవమానం నా తల్లి - అహంకారం నా తండ్రి

ఆప్యాయత నా తల్లి - అవకాశవాదం నా తండ్రి

నేనెవర్ని మరి?

కారుణ్యం నా తల్లి - కాఠిన్యం నా తండ్రి

పాతివ్రత్యం నా తల్లి - పరగమనం నా తండ్రి

నేనెవర్ని మరి?

కళామతల్లి నా తల్లి - కళంకితుడు నా తండ్రి

ఉదారచరిత నా తల్లి - స్వార్ధపరత నా తండ్రి

నేనెవర్ని మరి?

అనురాగం నా తల్లి - అసహాయత నా తండ్రి

బాంధవ్యం నా తల్లి - భ్రష్టత్వం నా తండ్రి

నేనెవర్ని మరి?

త్యాగం నా తల్లి - భోగం నా తండ్రి

యోగం నా తల్లి - రోగం నా తండ్రి

నేనెవర్ని మరి?

ఆధ్యాత్మికం నా తల్లి - అమానుషం నా తండ్రి

ఆకాశం నా తల్లి - అగాధం నా తండ్రి

నేనెవర్ని మరి?

వాస్తవం నా తల్లి  - స్వప్నం నా తండ్రి

ఎరుక నా తల్లి - మరపు నా తండ్రి

నేనెవర్ని మరి?

read more " నేనెవర్ని మరి? "

హిందూ దేవాలయాలు ఎందుకు ధ్వంసం చెయ్యబడ్డాయి?

మొన్నొకాయన నాతో మాట్లాడుతూ ఈ పోస్టును వ్రాయడానికి నాంది పలికాడు.

'అమెరికాలో ఎక్కడ బడితే అక్కడ హిందూ దేవాలయాలు వెలుస్తున్నాయి. చూచారా ఇదెంత మంచి శుభ పరిణామమో?' అన్నాడు.

'ఆ విషయం నీకెలా తెలుసు?' అడిగాను.

'ఈ మధ్యనే అమెరికాలో ఆర్నెల్లు ఉండి వచ్చాను. అప్పుడు చూచాను. ప్రతి స్టేట్ లోనూ మన గుళ్ళున్నాయి. అంతేకాదు. ఒక్కో ఊరిలోనైతే అయిదారు దేవాలయాలున్నాయి. ఇంకా కడుతున్నారు.' అని ఆనందంతో ఉప్పొంగిపోయాడు.

'సరే మంచి విషయమేలే గాని, ఇది శుభ పరిణామం ఎలా అవుతుందో కాస్త చెప్పు వింటాను' అన్నాను.

'అదేంటి? మన సంస్కృతి అమెరికాలో కూడా విస్తరిస్తోంది. ఇది మంచిదేగా?' అన్నాడు.

'అవును. అదే సమయంలో మన సంస్కృతి మన దగ్గర మాయమౌతోంది. వాళ్ళ సంస్కృతి ఇక్కడ విస్తరిస్తోంది. దీనికేమంటావు?' అడిగాను.

'నిజమే. కాకపోతే కొంతలో కొంత మంచిదేగా?' అన్నాడు.

నేను నవ్వేసి ఊరుకున్నాను.

'అసలూ, నవాబుల కాలంలో మన గుళ్ళు ఎన్ని నాశనం అయ్యాయో లెక్కేలేదు. అవన్నీ ఉంటె ఇప్పుడు ఇంకెంత బాగుండేదో? అందుకే నాకు ముస్లిమ్స్ అంటే పరమమంట !' అన్నాడు కోపంగా.

'ఇప్పటి ముస్లిమ్స్ కాదుగా అప్పుడు మీ గుళ్ళు ధ్వంసం చేసింది? వాళ్ళంతా చనిపోయారు. ఇప్పుడున్న వీళ్ళమీద ఎందుకు నీకు కోపం?' అన్నాను నవ్వుతూ.

'అవుననుకోండి. కానీ వీళ్ళ తాతముత్తాతలేగా ఆ పనులు చేసింది?' అన్నాడు ఇంకా బుసలు కొడుతూ.

'ఓహో అదా ! అలా అయితే మీ తాతముత్తాతలు చేసిన పనులకు నీకూ శిక్ష పడాలిగా మరి?' అన్నాను.

'మా వాళ్ళేం గుళ్ళూ గోపురాలూ నాశనం చెయ్యలేదే?' అన్నాడు వాదనలోకి దిగుతూ.

'సరిగ్గా అవే పనులు చేసి ఉండకపోవచ్చు. కానీ అంటరానివాళ్ళు అంటూ సాటి మనుషులను దూరం పెట్టడాలూ, పల్లెల్లో పెత్తనం చెలాయించడాలూ, భూములన్నీ మీ చేతుల్లోనే ఉంచుకోడాలూ, రెలిజియస్ గా ఎన్నో బయటకురాని నేరాలూ దౌర్జన్యాలూ చెయ్యడాలూ - ఇవన్నీ చేశారు కదా మీ పెద్దలు? మరి వాటికి నీకూ శిక్ష పడాలిగా ఇప్పుడు. ఒప్పుకుంటావా?' అన్నాను సూటిగా.

'ఆ ! అదీ ఇదీ ఒకటే ఇలా అవుతుంది? మీరు చెప్పినట్లుగా మావాళ్ళు చేసిన నేరాలకు దౌర్జన్యాలకు సాక్ష్యాలు లేవు. కానీ దేవాలయాలు ధ్వంసం చెయ్యబడి మన కళ్ళ ఎదురుగా కనిపిస్తూనే ఉన్నాయి కదా? దీనికేమంటారు?' అన్నాడు తెలివిగా.

'ఇప్పుడు కరెక్ట్ గా సబ్జెక్ట్ లోకి వస్తున్నవురా బిడ్డా' - అని మనస్సులో అనుకుని - 'అలా ధ్వంసం చెయ్యబడిన గుళ్ళూ గోపురాలే మీ నేరాలకు నిదర్శనాలు' అన్నాను.

అతనికి అర్ధం కాలేదు.

'ఏంటి మీరు చెబుతున్నది?' అన్నాడు అయోమయంగా.

'శివుని ఆజ్ఞ లేకుండా చీమైనా కుట్టదు' అని ఒప్పుకుంటావా? అడిగాను.

'అవును. నిజమే.' అన్నాడు తప్పదన్నట్టు.

'మరి ముస్లిమ్స్ మీ దేవాలయాలను ధ్వంసం చెయ్యడం వెనుక కూడా శివుని ఆజ్ఞ ఉండే ఉంటుంది' అన్నా నవ్వుతూ.

'అదేంటి? శివుడు తన గుడిని తనే ధ్వంసం చేయించుకుంటాడా?' అన్నాడు ఎగతాళిగా.

'తప్పకపోతే మరేం చేస్తాడు?' అన్నా.

'అదేంటి? కొంచం అర్ధమయ్యేట్లు చెప్పండి' అన్నాడు అయోమయంగా.

'నీ దృష్టిలో నీ గుడి గొప్ప కావచ్చు. కానీ విశ్వమంతా వ్యాపించి ఉన్న శక్తికి, ఆ విశ్వంలోని ఒక భూమి ఎంత? ఆ భూమిమీద ఉన్న అనేక దేశాలలో నీ దేశం ఎంత? ఆ దేశంలో మారుమూలన ఉన్న ఒక గుడి ఎంత? శివుడికి నువ్వు కట్టించిన గుడి తప్ప ఇంకేదీ లేదా ఈ ప్రపంచంలో ఉంటానికి? అయినా, విశ్వవ్యాప్తశక్తి అయిన విశ్వనాధుడికి నువ్వు గుడి కట్టించగలవా? ఆలోచించి చెప్పు.' అన్నాను.

'మీరిలా మాట్లాడితే నేనేమీ చెప్పలేను.' అన్నాడు ఇంకేమీ అనలేక.

'చెప్పకు. నిన్ను చెప్పమని నేను అడగలేదు. నువ్వడిగితేనే నేను చెబుతున్నాను. నువ్వేమీ చెప్పద్దు. నాకూ వినాలని లేదు.' అన్నాను.

కాసేపు మౌనంగా ఉన్నాడు గాని, లోపల ఏదో పురుగు తొలుస్తోంది.

చివరకు మెల్లిగా - 'సరే మీరే చెప్పండి. మన గుళ్ళు ఎందుకు ధ్వంసం అయ్యాయో?' అన్నాడు.

'అలా  రా దారికి' అనుకుని చెప్పడం మొదలు పెట్టాను.

'ఏ గుడైనా మొదట్లో బాగానే ఉంటుంది. మంచి ఉద్దేశ్యంతోనే దాన్ని కడతారు. కాలక్రమేణా దానిలో లేనిపోని రాజకీయాలు చోటుచేసుకోవడం మొదలు పెడతాయి. అధికార దాహాలు, అక్రమాలు, నేరాలు, దౌర్జన్యాలు మొదలౌతాయి. లోపల్లోపల ఎన్నో లుకలుకలు సాగుతాయి కాని రెలిజియస్ ముసుగులో అవన్నీ బయటకు రాకుండా ఉండిపోతాయి. మతానికి రాజుల సహకారం తోడైతే ఇక అక్కడ జరిగే అక్రమాలు అన్నీఇన్నీ కావు. సామాన్యులను పురుగుల్లా చూడటమూ, తమకు తాము దైవాంశ సంభూతులలాగా భావించుకొని అడ్డమైన నేరాలు అక్రమాలు దౌర్జన్యాలు చెయ్యడమూ మొదలౌతాయి. ఆ అరాచకానికి అడ్డూఆపూ ఉండకుండా పోతుంది. ఈ క్రమంలో ఎంతోమంది ఆ ఇనుప చక్రాలక్రింద పడి నలిగిపోతారు. అప్పుడేం జరుగుతుంది? ' అన్నాను.

'ఏం జరుగుతుందో మీరే చెప్పండి' అన్నాడు.

'ఆ గుడిలోని దేవుడు కూడా భరించలేనంత మత దురహంకారం అక్కడివారిలో పెరుగుతుంది. అప్పుడు ఆ దేవుడే, బయట నుంచి కొంతమందిని సృష్టించి, వాళ్ళ చేత తన గుడిని తానే ఎటాక్ చేయించుకుని, దాన్ని కూలగొట్టిస్తాడు. మీ గుళ్ళలో జరిగింది కూడా అదే. ఇది అసలైన వాస్తవం.' అన్నాను.

' మీ లాజిక్ నాకు సమ్మతంగా లేదు.' అన్నాడు.

'అది నీ ఖర్మ. దానికి నేనేం చేసేది? పోనీ ఒక విషయం చెప్పు. వందల వేల సంవత్సరాల నుంచీ మంత్రాలతో, నియమాలతో, పూజలూ, పునస్కారాలూ క్రమం తప్పకుండా జరుగుతున్న ఒక గుడిలో శక్తి ఉంటుందా ఉండదా?' అడిగాను.

'తప్పకుండా ఉంటుంది' అన్నాడు.

'మరి అంతటి శక్తి ఉన్న ఆలయాలను, బయటనుంచి ఎవడో వచ్చి ఎలా ధ్వంసం చెయ్యగలడు? అంటే దీనిలో రెండే మార్గాలున్నాయి. ఒకటి - మీ గుళ్ళలో శక్తి తగ్గిపోయన్నా ఉండాలి. రెండు - వాటిని కూల్చేసిన ముస్లిమ్స్ లో మీకంటే ఎక్కువ భక్తీ శక్తీ ఉండి ఉండాలి. అంతేనా కాదా?' అడిగాను సీరియస్ గా.

జవాబు చెప్పలేక నీళ్ళు నములుతూ - 'ఆచారమూ పాడూ లేని వాళ్ళలో శక్తి ఉందంటే నేను నమ్మలేను. మాలోనే శక్తి తగ్గిపోయి ఉంటుంది.' అన్నాడు అయిష్టంగా.

'నేను చెప్పేదీ అదే. మీ గుళ్ళలో శక్తి తగ్గినప్పుడే ఇలాంటివి జరిగాయి. ఆ శక్తి ఎలా తగ్గిందంటావు? ఆలోచించు. నేను చెప్పినవే కారణాలు. మీలో దురహంకారం పెరిగిపోయింది, అక్రమాలు పెరిగాయి, రెలిజియస్ ముసుగులో నేరాలు చెయ్యడం మొదలైంది. సాటి మనుషుల మీద దౌర్జన్యాలు మొదలుపెట్టారు. ఆ అక్రమాలను దేవుడు కూడా భరించలేనంత స్థాయికి అవి చేరాయి. ఎంతోమంది ఉసురును మీరు పోసుకున్నారు. అందుకే ఒక మాలిక్ కాఫరో, ఒక అలాఉద్దీన్ ఖిల్జీనో, ఒక మహమ్మద్ గజనీనో, ఒక ఔరంగజేబో పుట్టుకొచ్చారు. వరుసగా మీ గుళ్ళమీద పడి వాటిని ధ్వంసం చేశారు. ఇంతకంటే ఇంకే కారణమూ లేదు. అనవసరంగా ముస్లిమ్స్ మీద ద్వేషం పెంచుకోకు. వాళ్ళలో మంచివాళ్ళు చాలామంది ఉన్నారు.' అని చెప్పాను.

'ఇదంతా మీ ఊహ కావచ్చుగా' అన్నాడు మళ్ళీ మొదటికొస్తూ.

'కావచ్చు. కానీ ఇంతకంటే లాజికల్ గా వేరే ఏదైనా ఉంటే చెప్పు. నేను వింటాను.' అన్నాను.

చాలాసేపు ఆలోచించాడు కానీ ఏమీ తట్టలేదు లాగుంది. ఏమీ మాట్లాడలేదు.

చివరకు నేనే ఇలా చెప్పాను.

'వివేకానందస్వామి జీవితంలో ఒక సంఘటన జరిగింది. కాశ్మీర్ లోని క్షీర్ భవాని ఆలయంలో జగన్మాత స్వరం ఆయనకు వినిపించింది. సాక్షాత్తూ అమ్మవారే ఆయనతో మాట్లాడింది. తన ఇష్టప్రకారమే తన ఆలయం ధ్వంసం కాబడిందనీ, అలా పాడుబడిన ఆలయంలో ఉండటమే తనకిష్టమనీ ఆ స్వరం చెప్పింది.' అన్నాను.

'అది ఆయన భ్రమ అయ్యి ఉండవచ్చు కదా?' అన్నాడు.

'ఆయన శిష్యుడు శరచ్చంద్ర చక్రవర్తి కూడా ఇదే సందేహాన్ని ఆయనదగ్గరే వెలిబుచ్చాడు. దానికి స్వామి చెప్పిన సమాధానం చదువు. 'స్వామి శిష్య సంవాదము' అనే తెలుగు పుస్తకంలో ఉంటుంది. ఇంగ్లీషులో అయితే Talks with Swami Vivekananda అని ఉంటుంది చూడు.

సామాన్యంగా భ్రమ అనేది మనకిష్టమైన రీతిలో ఉంటుంది గానీ మనకు నచ్చని రీతిలో ఉండదు. కనుక అది భ్రమ కాదు. పోనీ నువ్వన్నట్లే అది భ్రమ అనుకుందాం కాసేపు. అంటే - మహనీయులైన సిద్ధపురుషులతో సహా ప్రపంచంలో అందరిదీనేమో భ్రమనా?  నీదొక్కడిదీనేమో సరైన దృష్టీనా? నువ్వనుకున్నట్లుగా నీకు ఆన్సర్ వస్తే అది నిజమా? లేకపోతే భ్రమనా? ఇదేనా నీ తెలివి?' అన్నాను సీరియస్ గా.

ఏమో? నువ్వెన్ని చెప్పినా దీన్ని నేను అంగీకరించలేక పోతున్నాను' అన్నాడు చివరికి.

'దానినే మూర్ఖత్వం అంటారు మరి' అన్నాను నవ్వుతూ.

'అయితే ఇంతకీ నువ్వు ఏం చెప్పాలనుకుంటున్నావ్? అన్నాడు నసుగుతూ.

'ఏం లేదు. అమెరికాలో గుళ్ళు కట్టినంత మాత్రాన అదేదో గొప్ప విజయం అనుకోకండి. మన సంస్కృతి ఏదో గొప్పగా విస్తరిస్తోంది అని భ్రమా పడకండి. సంస్కృతి గుళ్ళలో ఉండదు. మనలో ఉంటుంది. మీలో అది లేకపోతే మీరు కట్టిన గుడి ఎక్కువ కాలం ఉండదు. కూలిపోతుంది. ఆ కూలిపోవడం ఏ రకంగానైనా కావచ్చు. అదే కూలిపోవచ్చు లేదా బయటనుంచి ఎవడైనా వచ్చి కూలగొట్టవచ్చు.

ఒక పండు లోపలనుంచి కుళ్ళడం ఎప్పుడైతే మొదలౌతుందో, బయటనుంచి అనేక పురుగులు దాన్ని ఎటాక్ చెయ్యడానికి వస్తాయి. అలాగే ఇదీ జరుగుతుంది. ముందు మీలో కుళ్ళు ఏర్పడింది. అప్పుడు బయటనుంచి ముస్లిమ్స్ వచ్చి మిమ్మల్ని చావగొట్టారు. మీలో నీతీ, నిజాయితీ, ఐకమత్యమూ ఉంటే బయటవాళ్ళు ఎవరూ మిమ్మల్ని ఏమీ చెయ్యలేకపోదురు. లోపం మీలో ఉంది. వాళ్ళలో లేదు. తప్పులన్నీ మీ దగ్గరుంచుకుని బయటవాళ్ళను అనడం దేనికి?

ఎక్కడైనా సరే, ఒక పవర్ సెంటర్ ఎప్పుడైతే ఏర్పడిందో అక్కడ నానా అక్రమాలూ మొదలౌతాయి. గుడి కూడా ఒక పవర్ సెంటరే. పైగా అదొక రెలిజియస్ పవర్ సెంటర్. అక్కడ జరిగే అన్యాయాలకు అంతూ పొంతూ ఉండదు. ప్రస్తుతం మన తిరుమలనే చూడు. అక్కడున్నంత అవినీతి ఎక్కడా ఉండదని ప్రతివాడికీ తెలుసు. అక్కడ అందరూ భక్తులే. అందరూ దొంగలే. సాక్షాత్తూ శ్రీమహావిష్ణువే అక్కడ ఉన్నాడని నమ్ముతూ, మళ్ళీ చెయ్యకూడని అడ్డమైన పనులన్నీ చేస్తూనే ఉంటారు. దీనినేమనాలి?

కనుక దేవాలయ వ్యవస్థ మాటున అహాలూ, అక్రమాలూ, దౌర్జన్యాలూ, అవినీతీ పెరగకుండా చూచుకోవడం ముఖ్యం. అంతేగాని ఎన్ని గుళ్ళు ఏ దేశంలో కట్టామన్నది ముఖ్యం కాదు. ఎన్ని కార్యక్రమాలు అక్కడ జరుగుతున్నాయన్నదీ ముఖ్యం కాదు. మన గుళ్ళు దేవుడికి అక్కర్లేదని గ్రహించు. విశ్వమే ఆయన దేవాలయం. మీరు మళ్ళీ ఒక రాతి గుడిని కట్టక్కరలేదు. అక్కడ అడ్డమైన అక్రమాలూ చెయ్యనక్కర్లేదు.

నువ్వు చేప్పే దేవాలయ కమిటీలలో ఏం జరుగుతుందో నాకు బాగా తెలుసు. వాటిల్లో ఒకరంటే ఒకరికి పడదు. అనేక ఈగో ప్రాబ్లంస్ ఉంటాయి. ఇంటర్నల్ గొడవలు ఉంటాయి. బయటకు మాత్రం గుడి అనే ముసుగులో అన్నీ కప్పేసి మహా పవిత్రులలాగా ఫోజు కొడుతూ ఉంటారు. ఎవడికి దొరికినది వాడు మెక్కుతూ ఉంటారు. ఇక ఆ గుడిలో దైవత్వం ఎక్కడేడుస్తుంది? వాళ్ళలో వాళ్లకు రాజకీయాలు లేని ఒక కమిటీని నాకు చూపించు. చూపలేవు.

నా దృష్టిలో ఇదేమీ పెద్ద గొప్ప 'ఎచీవ్ మెంట్' కాదు. ఇలాంటి గుళ్ళు కట్టడం వల్ల నా దృష్టిలో ఎలాంటి ఉపయోగమూ లేదు. కనుక అమెరికాలో మన సంస్కృతి, గుళ్ళు కట్టడం ద్వారా విస్తరిస్తోందని నువ్వు చంకలు చరుచుకోవలసి అవసరం లేదు. ఒకవేళ చరుచుకుంటే చరుచుకో. ఇది నీ ఇష్టం. కానీ అదొక భ్రమ మాత్రమే' అని ముగించాను.

అతను చాలా విసుగ్గా ముఖం పెట్టుకుని అక్కణ్ణించి నిష్క్రమించాడు.

యధావిధిగా - నేను చెప్పినది అతనికే మాత్రమూ నచ్చలేదని మళ్ళీ చెప్పనక్కర్లేదు కదూ !

read more " హిందూ దేవాలయాలు ఎందుకు ధ్వంసం చెయ్యబడ్డాయి? "

సత్యం ఎవరికి కావాలి?

నిన్న క్రీస్తు పుట్టలేదు
కానీ లోకమంతా క్రిస్మస్ జరుపుకుంది

మనిషిని చంపమని ఇస్లాం చెప్పలేదు
కానీ కాఫిర్లను వాళ్ళు చంపుతూనే ఉంటారు

కొత్తకొత్త దేవుళ్ళను సృష్టించమని
హిందూమతం అనలేదు కానీ
వాళ్ళాపనిని రోజూ చేస్తూనే ఉంటారు

'నన్ను పూజించండి' అని బుద్దుడు చెప్పలేదు
పైగా ఆ పని వద్దన్నాడు
కానీ బౌద్ధులు దానినే ఆచరిస్తున్నారు

మహావీరుడు బట్టలు వదిలేశాడు
జీవితమంతా అలాగే బ్రతికాడు
జైనులు మాత్రం బట్టల వ్యాపారమే చేస్తున్నారు

మతాలు చెప్పినదాన్ని
మతస్థులే ఆచరించడం లేదు
దేవుడు ఆశించినట్లు
భక్తులూ ఉండటం లేదు

అదే సమయంలో

మతాన్నీ వదలడం లేదు
దేవుడినీ వదలడం లేదు
ఇది కాదూ మాయంటే?
ఇది కాదూ భ్రమంటే?

మాయలో ఉన్నంతవరకూ
వాస్తవం ఎలా తెలుస్తుంది?
భ్రమలో ఉన్నంతవరకూ
నిజం ఎలా అర్ధమౌతుంది?

మాయ మత్తుగా జోకొడుతుంటే
మెలకువ ఎవరికి కావాలి?
భ్రమే ఆనందంగా ఉంటే
సత్యం ఎవరికి కావాలి?

read more " సత్యం ఎవరికి కావాలి? "

మా పుస్తకాలు - శ్రీలలితా సహస్రనామ రహస్యార్ధ ప్రదీపిక

పంచవటి పబ్లికేషన్స్ నుంచి మూడవ ప్రింట్ పుస్తకంగా, మరియు నాలుగో ఈ బుక్ గా ఈ మధ్యనే రిలీజైంది - శ్రీలలితా సహస్రనామ రహస్యార్ధ ప్రదీపిక.

లలితా సహస్ర నామాలకు అనేకములైన వ్యాఖ్యానాలు ఇప్పటికే ఉన్నాయి. వీటిలో 'సౌభాగ్య భాస్కరము' అనబడే "భాస్కరరాయ మఖి" గారి భాష్యం నుంచీ ఈ మధ్యకాలపు రచయితలు వ్రాసిన భాష్యాల వరకూ అనేకం మనకు లభిస్తున్నాయి.

మరి ఈ గ్రంధపు ప్రత్యేకత ఏమిటి?

ప్రతిపదార్ధాల జోలికి పోకుండా, లలితా సహస్రనామాలకు గల అసలైన, సాధనాపరమైన, తంత్రశాస్త్ర సమ్మతమైన నిగూడార్ధాలను వివరించింది ఈ పుస్తకం. దీనిలో పాండిత్య ప్రకర్ష కంటే, ఈ నామాల యొక్క రహస్యములైన సాధనార్ధాలను వివరించే ప్రయత్నమే మీకు దర్శనమిస్తుంది.

నా గురువుల నుంచి నేను తెలుసుకున్నవి, నా సాధనా మార్గంలో నేను పొందినవి అనేక అనుభవాలను ఒక చోటికి తెచ్చి వ్రాయబడినదే ఈ పుస్తకం. ఇందులోని ప్రతి పేజీ మిమ్మల్ని ఆలోచింపజేస్తుంది. ప్రతి లైనూ మిమ్మల్ని ముందుకు పోనివ్వకుండా అడ్డుకుంటుంది. ఈ పుస్తకాన్ని ఒక నవల లాగా చదివి పూర్తిచెయ్యడం అంత తేలిక కాదు. త్వరలోనే ఈ పుస్తకం యొక్క ఇంగ్లీష్ వెర్షన్ - ఈ బుక్ గా వెలువడుతుంది.

ఇది మీకు Google play books నుంచి లభిస్తుంది.

read more " మా పుస్తకాలు - శ్రీలలితా సహస్రనామ రహస్యార్ధ ప్రదీపిక "

కలబురిగి కబుర్లు - 4 (బుద్ధవిహార్)

కలబురిగిలో చూడదగిన ప్రదేశాలు ఏమున్నాయని మావాళ్ళను అడిగాను. ఏవేవో గుళ్ళూ గోపురాలూ చెప్పారు. వాటికి పోవాలని నాకేమీ అనిపించలేదు. కానీ ఒక ప్రదేశం మాత్రం చూడాలనిపించింది. అదే, గుల్బర్గా యూనివర్సిటీ వెనుకగా ఊరికి దూరంగా ఉన్న ' బుద్ధ విహార్ '. ఎనిమిదేళ్ళ క్రితం కర్నాటక అసెంబ్లీ ప్రతిపక్ష నాయకుడు మల్లికార్జున ఖర్గే ఆధ్వర్యంలో దీనిని రూపకల్పన జరిగింది.

దీనిని 2009 లో రాష్ట్రపతి ప్రతిభా పాటిల్, దలైలామాలు ప్రారంభించారని చెబుతున్నారు. గుల్బర్గాలో 'పాటిల్' అనేవాళ్ళ హవా ఎక్కువ. ఎక్కడ చూచినా ముఖ్యమైన వ్యక్తులు వాళ్ళే ఉంటారు. బిజినెస్ లో, ఉద్యోగాలలో వీళ్ళు ఎక్కువగా కనిపిస్తుంటారు.

దాదాపు 70 ఎకరాల విశాలమైన కొండప్రాంతంలో ఇది కట్టబడింది. ఊరికి దూరంగా నిశ్శబ్ద వాతావరణంలో ఈ ప్రాంగణం ఉన్నది. గ్రౌండ్ ఫ్లోర్ లో ఒక పెద్ద ధ్యానమందిరం ఉంది. ఇందులో బుద్ధుని విగ్రహం ఉన్నది. ఫస్ట్ ఫ్లోర్ లో బుద్ధుని ఆలయం ఉన్నది. ఇందులో కూడా బుద్ధుని విగ్రహంతో బాటు పక్కన ఇద్దరు ప్రధానశిష్యుల విగ్రహాలు ఉన్నాయి. వాళ్ళు సారిపుత్ర, మౌద్గల్యాయన అని వాళ్ళ విగ్రహాల తీరును బట్టి అనుకున్నాను. ఈ విగ్రహాలు థాయిలాండ్ విగ్రహాల పోలికలతో ఉన్నాయి.

ఈ బుద్ధవిహార్ బయట, అంబేద్కర్ తన అనుచరులతో బౌద్ధమతంలోకి మారుతున్న లైఫ్ సైజ్ విగ్రహాలు ఉన్నాయి. 

ఈ బుద్ధ విహార్ కు దగ్గరలోనే కనగనల్లి అనే ఒక గ్రామం ఉన్నది. క్రీస్తు పూర్వం మూడో శతాబ్దంలోనే ఈ గ్రామంలో కమలముని అని ఒక ప్రసిద్ధ బౌద్ధభిక్షువు ఉండేవాడని చరిత్ర చెబుతున్నది. అప్పట్లోనే ఇది ఒక ప్రసిద్ధ బౌద్ధ కేంద్రంగా ఉన్నదన్నమాట.

క్రీస్తు పూర్వం మూడో శతాబ్దం ప్రాంతంలోనే కర్నాటకలో జైన మతం విలసిల్లిందన్న విషయం నాకు తెలుసు. ఎందుకంటే చంద్రగుప్త మౌర్యుడు తన గురువైన భద్రబాహువుతో కలసి కర్నాటకలోని శ్రావణబెలగొలకు వచ్చి అక్కడే తపస్సులో తనువు చాలించాడన్నది చరిత్రలో రికార్డ్ కాబడిన విషయం. అక్కడున్న చంద్రగిరి అనే కొండకు ఆ పేరు  ఈయన నుంచి వచ్చినదే. కానీ బౌద్ధం కూడా అప్పుడే కర్నాటకలో ఉన్నదన్న విషయం ఇప్పుడే విన్నాను. బహుశా కమలముని అనేవాడు జైనముని అయ్యిఉండవచ్చు. వీళ్ళు బహుశా పొరపాటు పడుతూ ఉండవచ్చు. ఎందుకంటే అలాంటి పేర్లు బౌద్దులలో ఉండటం అరుదు.

అప్పుడప్పుడు వస్తున్న టూరిస్టుల వెకిలి గోల తప్ప మిగతా సమయాలలో చాలా ప్రశాంతంగా ఉందిక్కడ. ఊరికి చాలా దూరంగా ఉన్నది గాబట్టి సాయంత్రం అయిదుకల్లా దీనిని మూసేస్తారు. స్టాఫ్ తప్ప ఇక్కడ రాత్రంతా ఎవరూ ఉండరు. కానీ గెస్టులకోసం కొన్ని రూములు కనిపించాయి. వాటిల్లో ఉండే అవకాశం దొరికితే రాత్రంతా అక్కడ ఉండి ధ్యానంలో కాలం గడపొచ్చు అన్న ఆలోచన చాలా సంతోషాన్నిచ్చింది. ఈసారి ఆ ప్రయత్నం చెయ్యాలి.

పక్కనే ఉన్న ఒక పెద్ద భవనంలో ఒక బుద్ధిస్ట్ లైబ్రరీ కూడా ఉన్నదన్న విషయం విన్నప్పుడు మాత్రం కలబురిగికి వచ్చిన తర్వాత కలిగిన ఆనందాలలో కెల్లా గొప్ప ఆనందం కలిగింది. కానీ నేను వెళ్ళినప్పుడు అక్కడేవో రిపేర్లు జరుగుతూ ఉన్నందున లోనికి అనుమతించలేదు.

రాబోయే మూడేళ్ళలో ఇక్కడకు చాలాసార్లు రావలసి ఉంటుంది గనుక, ఈసారి వచ్చినప్పుడల్లా, నా లగేజిని మా అమ్మాయి రూములో పడేసి, రోజంతా ఈ లైబ్రరీలో మకాం వేసి ఇందులోని బౌద్ధగ్రంధాలను (ఇప్పటిదాకా నేను చదవనివంటూ కనిపిస్తే) మొత్తం జీర్ణం చేసుకోవాలని నిర్ణయానికి వచ్చి అక్కడనుంచి బయలుదేరి వెనక్కు వచ్చాను.

read more " కలబురిగి కబుర్లు - 4 (బుద్ధవిహార్) "

5th Astro Work Shop

పంచవటి సభ్యులలో జ్యోతిశ్శాస్త్రం అంటే శ్రద్ధ ఉన్నవారు జ్యోతిశ్శాస్త్రాన్ని చక్కగా అధ్యయనం గావిస్తూ మంచి జ్యోతిష్కులుగా రాణిస్తున్నారు. వీరందరూ బాగా చదువుకున్నవారూ, మంచి ఉద్యోగాలలో ఉన్నవారూ కావడంతో 'సైంటిఫిక్ ఆస్ట్రాలజీ' ని త్వరగా నేర్చుకుంటూ శాస్త్రీయ దృక్పధంతో ఎదుగుతున్నారు.

పుస్తకావిష్కరణ రోజున జరిగిన 'అయిదవ జ్యోతిశ్శాస్త్ర సమ్మేళనం' (5th Astro work shop) లో పంచవటి సభ్యులైన జ్యోతిశ్శాస్త్రవేత్తలు తమ తమ టాపిక్స్ మీద పవర్ పాయింట్ ప్రెజెంటేషన్స్ ఇచ్చారు.

జననకాల సంస్కరణ

>> ఒక వ్యక్తి పుట్టిన సమయం ఖచ్చితంగా మనకు లభించనప్పుడు ఆ సమయాన్ని ఎలా రాబట్టాలి? ఆయా సూత్రాలేమిటి? అన్న విషయాన్ని ఒక ఉదాహరణ జాతకంతో చక్కగా వివరిస్తూ సూర్యనారాయణ Birth time rectification అనే టాపిక్ కు న్యాయం చేశాడు.

దశమభావ విచారణ

>> మనిషి జీవితంలో వృత్తి అనేది చాలా ముఖ్యమైనది. అతని జీవనానికి అదే ఆధారం. ఈ విషయాన్ని ఒక ఉదాహరణ చార్ట్ సహాయంతో '10th house analysis - Professional ups and downs అనే తన ప్రెజెంటేషన్ లో సత్యేంద్ర చక్కగా వివరించాడు.

జాతకాన్ని ఎలా చదవాలి?

>> జ్యోతిశ్శాస్త్రంలో స్ఫురణ శక్తి ప్రాధాన్యత, ఒక జాతకాన్ని ఎలా చదవాలి? ఏయే విషయాలు మొదటగా చూడాలి? అన్న విషయాలపై పంచవటి మహిళా జ్యోతిష్కురాళ్ళలో ఒకరైన రత్నపాప తన ఉపన్యాసంలో చక్కగా వివరించింది.

నాడీ జ్యోతిష్యం

>>  నాడీ జ్యోతిష్యంలోని అంశాల గురించి, తన సుదీర్ఘ అనుభవాన్ని వివరిస్తూ మరొక ప్రఖ్యాత జ్యోతిష్కుడు వంశీ క్లుప్తంగా చక్కగా తను ఎంచుకున్న విషయాన్ని వివరించాడు.
  

వక్ర గ్రహములు - వాటి ఫలితాలు

>> వక్రగ్రహాలనేవి జ్యోతిశ్శాస్త్రంలో కొరుకుడు పడని అంశాలు. ఎంతటి పెద్ద జ్యోతిష్కులకైనా అవి అంత త్వరగా అర్ధం కావు. అలాంటి లోతైన విషయాన్ని తన ఉపన్యాసంలో పంచవటి (ఇండియా) జాయింట్ సెక్రటరీ అయిన జనార్దన్ చక్కగా వివరించాడు.

శుభ పాప గ్రహాలు - వాటిని ఎలా అర్ధం చేసుకోవాలి?

>> శుభ, పాప గ్రహాలనే కాన్సెప్ట్ జ్యోతిశ్శాస్త్రంలో ఒక ప్రధానమైన అంశం. ఈ గహనమైన విషయాన్ని మా విధానంలో మేమెలా అర్ధం చేసుకుంటామో చక్కగా తన ప్రెజెంటేషన్ లో వివరించాడు పంచవటి (ఇండియా) సెక్రటరీ రాజు సైకం, MA (Astrology).

జాతకంలో సూర్యచంద్రుల పాత్ర

>> చివరగా ప్రసంగిస్తూ నేను, జాతక విశ్లేషణలో సూర్య చంద్రులను ఎలా అర్ధం చేసుకోవాలి? అనే అంశం మీద నా ప్రెజెంటేషన్ ఇచ్చాను. దాని తర్వాత Spiritual Astrology లోని కొన్ని అంశాలను సభికులకు పరిచయం చేశాను.

మంచి లోతైన సబ్జెక్ట్స్ తీసుకుని విషయాన్ని చక్కగా వివరించి చెప్పిన వీరికి బ్లాగు ముఖంగా నా కృతజ్ఞతలు తెలియజేస్తున్నాను. ఇంగ్లీషు చదువులు బాగా చదువుకున్నప్పటికీ, మన ప్రాచీన ధార్మికసంపద అయిన ఈ శాస్త్రాన్ని కూడా చక్కగా అధ్యయనం చేస్తూ, ఋషి ఋణం తీర్చుకుంటున్న వీరందరినీ అభినందిస్తూ, ముందు ముందు జరిగే సమావేశాలలో, మిగతా సభ్యులు కూడా ముందుకొచ్చి వారికిష్టమైన టాపిక్స్ మీద మాట్లాడవలసినదిగా, దానికి ఇప్పటినుంచే తయారు కావలసిందిగా కోరుతున్నాను.

read more " 5th Astro Work Shop "

'శ్రీ లలితా సహస్రనామ రహస్యార్ధ ప్రదీపిక' పుస్తకావిష్కరణ - మరికొన్ని ఫోటోలు

"పంచవటి స్పిరిట్యువల్ ఫౌండేషన్" ఒక ప్రేమపూరితమైన ఆధ్యాత్మిక కుటుంబంగా వేగంగా రూపుదిద్దుకుంటున్నది. ఈ కార్యక్రమంలో పాల్గొన్న అందరి ముఖాలలో ఆనందం. అకారణ సంతోషం. జీవితంలో ఇన్నాళ్ళకు ఒక అర్ధం పరమార్ధం కలుగుతున్నాయన్న సంభ్రమం. అద్భుతమైన గమ్యాన్ని చేరుకునే క్రమంలో అడుగులు వేస్తున్నామన్న ఆత్మసంతృప్తి. ఇన్నాళ్ళూ వేచి చూచిన ఒక Spiritual fulfillment కలుగుతున్నదన్న ఉత్సాహం.

దేశంలోని నలుమూలల నుంచీ ఇక్కడకు వచ్చారు. ఒక్కొక్కరూ ఒక్కొక్క పని భుజాన వేసుకుని తమ ఇంటి పని కంటే చక్కగా నిర్వహించారు. ఒకే కుటుంబంలా కలసి మెలసి ఉన్నారు. ఎవరి కులం ఏమిటో, ఎవరి మతం ఏమిటో, ఎవరి ఆర్ధిక స్తోమత ఏమిటో, ఎవరి సామాజిక స్థాయి ఏమిటో, ఎవరి బ్యాక్ గ్రౌండ్ ఏమిటో - ఎవరికీ అవసరం లేదు. మేమంతా ఒక కుటుంబం. అంతే !!

ఎవరిలోనూ కల్లా కపటం లేవు. స్వార్ధం లేదు. అనవసరమైన మాటలు లేవు. లోపల ఒకటీ బయటకు ఒకటీ లేవు. స్వచ్చమైన మనసులతో, నిష్కల్మషమైన నవ్వులతో, ఆత్మీయతతో కలసి మెలసి ఈ కార్యక్రమాన్ని జరుపుకున్నాం. సాయంత్రం విడిపోయేటప్పుడు బరువైన గుండెలతో, మళ్ళీ త్వరలోనే కలుస్తామన్న భరోసాతో - ఒకరికొకరు సెలవు తీసుకున్నాం. విడిపోయేటప్పుడు చాలామంది ఏడ్చేశారు కూడా !

ఈ పుస్తకాన్ని నేనొక్కడినే వ్రాయలేదు. మనమంతా కలసి వ్రాశాం. ఇది మన పుస్తకం. మనందరి పుస్తకం !!

ఇదే అసలైన సత్సంగం అంటే. ఇలాంటి సత్సంగం ప్రపంచంలో ఇంకెక్కడ దొరుకుతుంది? భూతద్దం వేసి వెదికినా ఇలాంటి మనుషులు ఎక్కడ దొరుకుతారు?

read more " 'శ్రీ లలితా సహస్రనామ రహస్యార్ధ ప్రదీపిక' పుస్తకావిష్కరణ - మరికొన్ని ఫోటోలు "