“There are many who just talk, but very very few who really realize" - Self Quote

31, మార్చి 2016, గురువారం

గతజన్మల జాడను నేను...

ఎచటకు పోతున్నావ్ మిత్రమా
ఈ చీకట్లో?
ఎందుకు నిలబడ్డావ్ మిత్రమా
ఈ వాకిట్లో?

సుఖావహ జీవితం
నీకు విసుగ్గా ఉంది కదూ?
భోగమయ ప్రపంచం
నీకు ఎడారిలా ఉంది కదూ?

మనుషుల కపటం నీలో
అసహ్యాన్ని నింపుతోంది కదూ?
మోసపు లోకం నీలో
ఆవేశాన్ని రేపుతోంది కదూ?

తెలియని అసంతృప్తి తప్ప
నీ గమ్యం నీకే తెలియదు
అర్ధంకాని తపన తప్ప
నీ దారే నీకు తెలియదు

నాతో రా
నీకు దారి చూపిస్తా
నా చేయి అందుకో
నిన్ను గమ్యం చేరుస్తా

భయంగా చూడకు నావైపు
నేనెవరనేగా నీ సందేహం?
నువ్విన్నాళ్ళూ వెదుకుతున్నది నా కోసమే
నువ్విన్నాళ్ళూ వేచింది నా కోసమే
ఇప్పుడు స్వయంగా నేనే వచ్చా
తీర్చడానికి నీ దాహం

నువ్వు ఎప్పటినుంచో వెదికే
నీ నేస్తాన్ని నేను
నీకోసం చిరకాలంగా చాచిన
స్నేహహస్తాన్ని నేను

ఇదే దారిలో
నీ ముందు నడచినవాణ్ణి
ఇదే లోకంలో
నీలాగే నలిగినవాణ్ణి
నువ్వు వెదికే
గమ్యం చేరినవాణ్ణి
అయినా సరే
మీకోసం వచ్చినవాణ్ణి

నన్నుగాక ఇంకెవరిని నమ్మగలవు?
ఈ మాయాలోకంలో
నన్ను గాక ఇంకెవరిని అడుగగలవు?
ఆ అవతల ఏముందో?

ఇంతా చేస్తే
నా లాభం ఏంటనేగా నీ సందేహం?
ఇదంతా చూస్తే
నాకేమొస్తుందనేగా నీ అనుమానం?

మీ లాభనష్టాల కోణంలో నన్ను చూడకు
అవి నన్ను తాకలేవు
నీ ఇష్టాఇష్టాల త్రాసులో నన్ను ఉంచకు
అది నన్ను తూచలేదు

నేను నాలో కలసినట్లు
నిన్ను నాలో కలుపుకుంటా
నువ్వు సిద్ధమేనా?

నేను నేనుగా మిగిలినట్లు
నిన్ను నాలా మలుచుకుంటా
నీకిష్టమేనా?

సరిగా చూడు నాలో ఏముందో?

నేను
నువ్వనుకునే నేనును కాను
నేను
నీకు తెలిసిన నేనును కాను

నువ్వు  నన్ను గుర్తిస్తే
నీ గమ్యం నీ ఎదుటే ఉంది
నువ్వు నాతో నడిస్తే
నీ మార్గం నీలోనే ఉంది

నీ గమ్యపు నీడను నేను
నీ మార్గపు తోడును నేను
గతజన్మల జాడను నేను
నీ స్నేహం వీడను నేను

నువ్వు వెదికేది
ఎవరికోసమో తెలుసా?
నా కోసమే
సరిగా చూడు
నువ్వే నేను.....
read more " గతజన్మల జాడను నేను... "

సత్యం - అసత్యం

ఈ మాయాలోకంలో
సత్యాసత్యాల మధ్యగీత
చాలా పలుచన

స్వార్ధంకోసం నీతిని
నిస్సిగ్గుగా వదిలేసే వారికి
సత్యం చాలా చులకన

సత్యమూ అసత్యమే
నమ్మబడదు గనుక
అసత్యమూ సత్యమే
ఉంది గనుక

అసత్యం అందలాలెక్కిస్తే
అంతా సౌఖ్యమే
శాంతి మాత్రం శూన్యం

సత్యం నీలో నిండితే
అంతా ఆనందమే
ఎలా మిగుల్తుంది దైన్యం?

అసత్యం అనుక్షణం మోసగిస్తుంది
కానీ దానిని వదలవు
సత్యం అనుక్షణం హెచ్చరిస్తుంది
కానీ దానిమాట వినవు

సత్యమే అనుకుంటూ
అసత్యాన్ని ఆరాధించడం
అసత్యం అనుకుంటూ
సత్యాన్ని తిరస్కరించడం

ఈ రెండే మానవజాతికి శాపాలు
ఈ రెండే మనుషులు చేసే పాపాలు

ఈ మెలిక అర్ధమైతే
నీ జీవితం ధన్యమే
ఈ తడిక తొలగిపోతే
అన్యం శూన్యమే....
read more " సత్యం - అసత్యం "

30, మార్చి 2016, బుధవారం

మల్టిపుల్ పర్సనాలిటీ డిజార్డర్

"గోసాయి తత్త్వాలు" పోస్ట్ వ్రాశాక ఇంకా ఎవరూ తిడుతూ మెయిల్స్ ఇవ్వడం లేదేమిటా అని తెగ ఆశ్చర్యపోతూ విపరీతంగా బాధపడుతూ ఉండగా నేనున్నానంటూ ఫోన్ మ్రోగింది.

'హలో శర్మగారేనా?' అంటూ ఒక స్త్రీ స్వరం వినవచ్చింది.

'అవును' అన్నాను.

'మీరు లేటెస్ట్ గా వ్రాసిన రెండు పోస్టులు నాకు ఏమాత్రం నచ్చలేదు' అంది ఆ స్వరం సీరియస్ గా.

'అమ్మయ్య ! వచ్చిందిరా బాబూ' అనుకుంటూ - 'మీరెవరో చెప్పకుండా ఇలా డైరెక్ట్ గా విషయంలోకి రావడం నాకూ ఏమాత్రం నచ్చలేదు' అన్నాను నేనూ అంతే సీరియస్ గా.

'నాపేరు డాక్టర్ ఫలానా.' అంటూ ఒక పేరును చెప్పింది ఆమె.

'ఓహో మీరు మెడికల్ డాక్టరా ఎకాడమిక్ డాక్టరా' - అడిగాను.

'అయామె సైకియాట్రిస్ట్' అందా స్వరం దర్పంగా.

విషయం అర్ధమైంది.

ఆమె నిజంగా అదో కాదో గాని, నావి పిచ్చి వ్రాతలని ఆమె అనబోతున్నదని సిక్స్త్ సెన్స్ చెప్పేసింది.

'అఫెన్స్ ఈజ్ ద బెస్ట్ డిఫెన్స్' అన్న కుంగ్ ఫూ సూత్రాన్ని అప్లై చేస్తూ -'మీ సమస్యకి మీ దగ్గరే మందులుంటాయిగా నాకెందుకు ఫోన్ చేశారు?' అడిగాను.

'అదేంటి? అందామె.

'పిచ్చి డాక్టర్లకు నేను మందివ్వను.అయినా హోమియోపతి చాలా స్లోగా పనిచేస్తుంది.ఈలోపల మీకు చాలా ముదిరి పోతుంది.వేరేచోట ట్రై చెయ్యండి.' అన్నాను నవ్వాపుకుంటూ.

'అందుకోసం కాదు.నేను ఫోన్ చేసినది మీతో కాసేపు మాట్లాడటానికి మాత్రమే. అసలు మీరేం అంటున్నారో నాకేమీ అర్ధం కావడం లేదు.' అందామె.

'ఇన్నేళ్ళుగా నేనేమిటో నాకే అర్ధం కాలేదు.ఇంక మీకేం అర్ధమౌతాను లెండి?' అన్నాను.

'అదే నేనూ చెప్పబోతున్నాను.మీరేదో పెద్ద మల్టీ స్కిల్డ్ అనుకుంటున్నారేమో?నిజానికి మీరు M.P.D తో బాధ పడుతున్నారు.అంటే మల్టిపుల్ పర్సనాలిటీ డిజార్దర్.అలాంటివాళ్ళే ఇలాంటి వ్రాతలు వ్రాస్తారు. మీకు సైకియాట్రీ ట్రీట్మెంట్ అవసరం.' అంది లేడీ డాక్టర్ స్వరం.

'ఆ రోగం వస్తే ఏమౌతుంది డాక్టర్" అడిగాను భయంగా గొంతు పెట్టి.

'ఏమీ కాదు.ఒకే మనిషిలో పదిమంది మనుషులుంటారు.ఒక్కొక్కరితో ఒక్కొక్క సందర్భంలో ఒక్కో రకంగా బిహేవ్ చేస్తారు.అదొక రోగం' అందామె.

'మీ కుటుంబ సభ్యులలో అందరితో మీరు ఒకేలా ఉంటున్నారా లేక ఒక్కొక్కరితో ఒక్కొక్క విధంగా ఉంటున్నారా మేడం?' అడిగాను.

'అందరితో ఒకేలా ఎలా ఉంటాం? అయినా, అదీ ఇదీ ఒకటే ఎలా అవుతుంది?అది సహజం.ఇది రోగం.' అందామె.

'అంటే - మీకైతే సహజమూనూ ఇతరులకైతే రోగమా మేడం?' అడిగాను వినయంగా.

'చెప్పటం నా ధర్మం.మీకు మాత్రం అర్జంటుగా ట్రీట్మెంట్ అవసరం' అందామె మళ్ళీ మొదటికొస్తూ.

'ఇక లాభం లేదు.డాక్టర్ కి పిచ్చి బాగా ముదిరినట్లుంది.' అనుకుంటూ - 'మీరిచ్చే కరెంటు షాకులు ఏ రేంజిలో ఉంటాయి డాక్టర్ గారు?' నేనూ సబ్జెక్టులోకి దిగాను.

'తమాషాగా తీసుకోకండి.నిజంగానే మీకు సమస్య ఉన్నది. ముందు లో-డోస్ మందులతో మొదలు పెడతాము.అవి పనిచెయ్యకపోతే ఆ తర్వాత కరెంటు షాకులు ఇస్తాము' అంది డాక్టరు.

'అవీ పనిచెయ్యకపోతే అప్పుడేం చేస్తారు?' అడిగాను.

నిశ్శబ్దం.

'మీరు చెప్పినది నేను విన్నాను కదా.ఇప్పుడు నేను చెప్పేది మీరూ వినాలి.' అన్నాను.

'చెప్పండి' అంది స్వరం.

'మీరు కూడా N.P.D అనే రోగంతో బాధ పడుతున్నారు.అంటే నార్సిసిస్టిక్ పర్సనాలిటీ డిజార్దర్ అన్నమాట.ఈ రోగం ఉన్నవాళ్ళు అన్నీ తమకే తెలుసనీ,ఎదుటివాళ్ళందరూ వెర్రి వెంగళప్పలనీ అనుకుంటూ ఉంటారు. మీరు ఆ కేసు లాగున్నారు.అసలు నిజంగా మీరు సైకియాట్రిస్టేనా?' అడిగాను.

'పరవాలేదు.మీకూ కొంత సబ్జెక్టు తెల్సన్నమాట.' అంది స్వరం.

'ఏదో M.P.D ని కదా.అందులో మీకన్నా జూనియర్ నే అనుకోండి.మీలా మెడిసిన్ చదివి పిచ్చిడాక్టర్ని కాకపోయినా ఏదో కాస్త జెనరల్ నాలెడ్జి ఏడిసింది లెండి.' అన్నాను.

మళ్ళీ నిశ్శబ్దం.

'డాక్టర్ గారు.ఒకమాట.నేనుకూడా మీలాగే కరెంటు షాకులు పెడతాను. అయితే నా పద్ధతి వేరు.నేను మీలా లోనుంచి హైకి వోల్టేజి పెంచుతూ పోను. ఒకేసారి రైల్వేతీగల మీదకు మిమ్మల్ని విసిరేస్తాను.వాటిల్లో 24 KV మాత్రమే కరెంటు ఉంటుంది.దెబ్బతో అటో ఇటో తేలిపోతుంది. అస్సలు టైంవేస్ట్ అవదు.మీలాంటి పిచ్చి డాక్టర్లకు నేనిచ్చే ట్రీట్మెంట్ అలా ఉంటుంది.' అన్నాను.

'సీరియస్ గా చెబుతున్నాను.మీరు వ్రాసినవి నాకు నచ్చలేదు' అన్నదామె మళ్ళీ.

"పొద్దున్నే ఇదెక్కడి పిచ్చిగోలరా బాబూ?' అనుకుంటూ - 'సహజమేనండి. అందరికీ అన్నీ ఎలా నచ్చుతాయి?నచ్చవు.అలా నచ్చాలని రూలు కూడా ఎక్కడా లేదు. I can understand you perfectly well.' అన్నాను.

'ఆ పోస్టులు తీసెయ్యండి.' అన్నది స్వరం.

'మీకు నచ్చనంత మాత్రాన వాటిని తీసెయ్యాలా?అంటే ఒక మనిషి మీకు నచ్చకపోతే వాళ్ళు ఈ లోకంలోనే లేకుండా పోవాలా? మీ సొంతూరు కడపా?' అడిగాను.

మళ్ళీ నిశ్శబ్దం.

'మాకు ద్రోహం చేసిన ఆడాళ్ళు లేకుండా పోవాలని మేమేమీ కోరుకోవడం లేదు.వాళ్ళ బ్రతుకు వాళ్ళది మా బ్రతుకు మాది.అలా చెయ్యడం వాళ్ళ ఖర్మ కావచ్చు.అయినా సరే,వాళ్ళుకూడా బాగుండాలనే మేం కోరుకుంటున్నాం. మీరేమో మీకు నచ్చలేదు గనుక నా పోస్టులే తీసెయ్యమని అంటున్నారు. మానసిక రోగం మీకా నాకా? కాస్త ఆలోచించండి.' డైరెక్ట్ గా అడిగాను.

'అయినా సరే వాటిని తీసెయ్యండి' అంది ఆ స్వరం మళ్ళీ.

'అదేంటి? అవి చాలా బాగున్నాయనీ, నిజాలను నిర్భయంగా వ్రాశాననీ, వాళ్లకు కూడా గతంలో అలాంటి అనుభవాలు అయ్యాయనీ నన్ను తెగ మెచ్చుకుంటూ చాలామంది జెంట్స్ నాకు మెయిల్స్ ఇచ్చారు. కావాలంటే ఆ మెయిల్స్ మీకు పంపనా? చూస్తారా?' అడిగాను.

'ఆడవాళ్ళందరూ అలా ఉండరు.మీరు జెనరలైజ్ చేస్తూ వ్రాయడం బాగాలేదు.' అన్నది స్వరం మళ్ళీ.

'సారీ.మీరు మళ్ళీ చదవండి.నేను జనరలైజ్ చెయ్యలేదు.మా ఫ్రెండ్ ను మోసం చేసిన అమ్మాయి మీద ఆ కవిత వ్రాసుకున్నాను.అది నిజంగా జరిగిన సంఘటన.' అన్నాను.

'మరి గోసాయి తత్త్వాలు పోస్ట్ ఏమిటి?' ప్రశ్నించింది స్వరం.

'అవి అడుక్కుంటూ తిరిగే బైరాగుల అభిప్రాయాలు.వాళ్ళు వైరాగ్యంతో ఉంటారు.ఇంటిపోరు భరించలేక దేశాలు పట్టుకుని తిరుగుతూ ఉంటారు. స్త్రీలను ఆమడ దూరంలో ఉంచుతారు. వాళ్ళ సాహిత్యం అలా ఉండక ఇంకెలా ఉంటుంది?' అడిగాను.

'అయితే అవి మీ అభిప్రాయాలు కావని మీరు ఒప్పుకుంటున్నారా?' ప్రశ్నించింది స్వరం.

'ఇప్పుడే చెప్పలేను' అన్నాను నీరసంగా గొంతు మార్చి.

'అదేంటి?' అనుమానంగా ప్రశ్నించింది స్వరం.

'ఇంకా కొంచం ముదిరితేగాని ఏ సంగతీ చెప్పలేను.ఇప్పుడే మా ఇంటి కిచెన్ ప్లగ్గులో వేలు పెట్టబోతున్నాను.ఆ షాకు చాలకపోతే ఆ తర్వాత ఇంకేం చెయ్యాలో మా వీథి చివర్లో ఉన్న ట్రాన్స్ ఫార్మర్ దగ్గరకెళ్ళి నిలబడి తీరికగా ఆలోచిస్తాను.ప్రస్తుతం అంతకంటే ఆలోచించే టైము నా దగ్గర లేదు.' అన్నాను.

'నిజంగా పిచ్చిలాగే ఉందే...' అంటూ పక్కన ఎవరితోనో లోగొంతుకలో అంటోంది ఆమె.

'నిజం పిచ్చి ఒకటీ, అబద్దం పిచ్చి ఒకటీ ఉండదుగాని చెప్పేది వినండి.మీ నంబర్ ఇప్పుడే 'ట్రూకాలర్' లో చెక్ చేశాను.మీ అడ్రస్ హైదరాబాద్ అని వచ్చింది.ఎల్లుండి నేను హైదరాబాద్ వస్తున్నాను.మీ అడ్రస్ వెతుక్కుంటూ నేనే వచ్చి కలుస్తాను.' అన్నాను.

'అయితే మీరు ట్రీట్మెంట్ కి ఇష్టపడినట్లేనా?' అన్నదామె.

'అది మీరు చెప్పాలి.సరేగాని మీ ఇంటి దగ్గ్గర రైల్వే లైన్స్ ఉన్నాయా? ఉంటే మిమ్మల్ని వాటి మీదకి విసరడానికి నా పని తేలికౌతుంది.మీకోసం మీ ఇంటి పక్కగా లైన్స్ వేయించడం ప్రస్తుతానికి నా తరం కాదు.' అన్నాను.

'ఇంతకీ మీరు ఆ పోస్ట్ లు తీస్తారా తియ్యరా" ఈసారి కొంచం కోపం ధ్వనించింది స్వరంలో.

'చూడండి డాక్టర్ గారు.మీలో E.I.S - అంటే 'ఈజీలీ ఇర్రిటబుల్ సిండ్రోం' కూడా ఉన్నట్లు నాకు ఇప్పుడే అనుమానం వస్తున్నది.ఎందుకలా మాటమాటకీ అవి తీసెయ్యండి అవి తీసెయ్యండి అని అరుస్తారు?అలా చెప్పినదే చెబుతూ ఉన్నారంటే - ఇప్పటికే ఉన్న రోగాలకు తోడుగా మీకు O.C.D అంటే - అబ్సెస్సివ్ కంపల్సరీ డిజార్డర్ కూడా ఉన్నట్లు నేనుకోవాల్సి వస్తుంది. దయచేసి మంచి పిచ్చిడాక్టర్ కు త్వరగా చూపించుకోండి.ఇంకా ముదిరితే తగ్గడం చాలా కష్టం' అన్నాను.

'ఇడియట్' అన్నదామె కోపంగా.

'డబల్ ఇడియట్..హహ్హహ్హ...' అన్నా పిచ్చోడిలాగా పెద్దగా నవ్వుతూ.

ఫోన్ కట్ అయిపోయింది.

మనకు పడాల్సిన డోసు పడింది కదా !! ఫుల్ ఎనర్జీ వచ్చేసింది.ఉల్లాసంగా నవ్వుకుంటూ నా పనిమీద నేను బయల్దేరాను.నాలుగు తిట్లు తిని, పది తిట్లు తిట్టకపోతే మనకు తోచదు కదా మరి.

ఈ లక్షణాన్ని ఏమంటారో మానసిక రోగాల డిక్షనరీ తీరిగ్గా వెతకాలి.

ఏం చేస్తాం??? కొన్ని పిచ్చి జీవితాలింతే !!
read more " మల్టిపుల్ పర్సనాలిటీ డిజార్డర్ "

గంధర్వ సంగీతం..

నిశీధ నిబిడాంధకార
సముద్రపు లోతుల్లోకి
సడిలేకుండా దిగివచ్చిందొక
సూర్యుని కాంతిపుంజం

యుగాలుగా కదలిక లేని
మరణాల మత్తుల్లోకి
వడిగా అరుదెంచిందొక
అమృత దివ్యధామం

మసిబారిన మస్తిష్కపు
చీకటి గదుల్లోకి
తానై ప్రసరించిందొక
వెలుగుల ప్రవాహం

కర్మరోదనా భరిత
కారడవుల మూలల్లోకి
అడుగు మోపిందొక
ఆనందపు ఆకాశం

కష్టాల కన్నీళ్ళ కట్లను
తుత్తునియలు గావిస్తూ
ఒళ్ళు విరుచుకుందొక
మహిమా విలాసం

మాయా మోహాలనన్నింటినీ
మసిచేసి పారేస్తూ
కళ్ళు తెరిచిందొక
ప్రజ్ఞా ప్రకాశం

అయోమయపు అట్టడుగుల్లో
వియోగాల వింత వీధుల్లో
వినసొంపుగా వినిపించిందొక
గంధర్వ సంగీతం...
read more " గంధర్వ సంగీతం.. "

హృదయపు గడియ

పడమటింట పగటిరేడు
నిదురరాని నిశాదేవి
తెరచుకున్న మది తలుపులు
ముసురుకున్న నీ తలపులు

మొద్దునిద్రలో తాను
నిదురరాని నీ మేను
జాగారపు జాబిల్లి
జిగిబాసిన సిరిమల్లి

నిను మరచిన తన స్వార్ధం
నువు మరచిన పరమార్ధం
హృదయం లేని ఆమె
ఉదయం రాని రేయి

ధనం తనకు సర్వస్వం
ప్రేమ నీకు ప్రియనేస్తం
స్వార్ధపు వలలో తాను
ముగిసిన కలలో నీవు

అహం హద్దులో ఆమె
ఇహం వద్దనే నీవు
నొప్పించడం తనకిష్టం
ఒప్పించడం నీ కష్టం

భానుని కోరే కలువ
ఎరుగదు వెన్నెల విలువ
సత్యం మరచిన చెలియ
బిగిసిన హృదయపు గడియ....
read more " హృదయపు గడియ "

29, మార్చి 2016, మంగళవారం

ఆడదాన్ని నమ్మబోకు నరుడా....(గోసాయి తత్త్వాలు)

గోసాయి పదాలు,బైరాగి చిటికెలు అనే మాటలు ఈ తరానికి తెలియవు.కానీ నా చిన్నప్పుడు ఈ పదాలు తరచుగా వినేవాళ్ళం.పల్లెటూళ్ళలో అడుక్కుంటూ తిరిగే బైరాగుల నోళ్ళలో ఇవి వినబడుతూ ఉండేవి.

నేను హైస్కూలు చదివే రోజుల్లో ఒక బైరాగి ఈ గోసాయి తత్త్వాన్ని పాడుతూ తంబురా మీటుతూ అడుక్కోవడానికి వచ్చేవాడు. అతన్ని వెంటబడి బ్రతిమాలి ఈ తత్త్వాన్ని నా తెలుగు నోట్సులో వ్రాసుకున్నాను.ఆ నోట్సు పోయినా, ఎప్పటికప్పుడు ఎత్తి వ్రాసుకుంటూ ఇన్నేళ్ళ తర్వాత కూడా భద్రంగా దీనిని బ్రతికిస్తూ ఇప్పటిదాకా తెచ్చాను.

పాత కాగితాల త్రవ్వకాలలో బయటపడిన వాటిలో ఇదీ ఒకటి.

చదవండి.
--------------------------
రాగం :-- కదనకుతూహల రాగం
తాళం :-- ఆదితాళం
--------------------------
ఆడదాన్ని నమ్మబోకు నరుడా
అగచాట్లను పొందబోకు నరుడా

అడుసు తొక్కి కడుగనేల గురుడా
అలుపు దెచ్చు పరుగులేల గురుడా               ||ఆడదాన్ని||

నంగనాచి నాటకాలు నరుడా
నమ్మినావ నరకమేర నరుడా                        ||ఆడదాన్ని||

సంసారపు సుద్దులేల గురుడా
సన్యాసం సుఖమిచ్చును గురుడా              ||ఆడదాన్ని||

నమ్మితేను నాంచారిని నరుడా
నెత్తికెక్కి నాట్యమాడు నరుడా                    ||ఆడదాన్ని||

వయ్యారని వెంటబోకు గురుడా
సయ్యాటలు చావుదెచ్చు గురుడా            ||ఆడదాన్ని||

ముండమోపి మోహమేల నరుడా
బండదాని భ్రమల బడకు నరుడా           ||ఆడదాన్ని||

వగలు జూచి వీగిపోకు గురుడా
పగలు రేయి పాడుజేయు గురుడా            ||ఆడదాన్ని||

రంగు జూచి మోసపోకు నరుడా
రక్తమాంస పంజరమ్ము నరుడా                ||ఆడదాన్ని||

ఒంపుసొంపు లంటినంత గురుడా
వైతరణిని దాటలేవు గురుడా                   ||ఆడదాన్ని||

మెరమెచ్చుల బడినావా నరుడా
మరమనిషై పోతావుర నరుడా                 ||ఆడదాన్ని||

కొంగుబట్టి తిరుగబోకు గురుడా
కొండముచ్చు బ్రతుకౌరా గురుడా           ||ఆడదాన్ని||

పడతి మేను పట్టిజూడ నరుడా
చీమునెత్తురుల చెరువే నరుడా              ||ఆడదాన్ని||

శుక్లశోణితాల జూచి గురుడా
శోషదెచ్చు కొబోకుర గురుడా                 ||ఆడదాన్ని||

సిగ్గుబోవు సరసమేల నరుడా
ఒగ్గు వగల జిక్కబోకు నరుడా                ||ఆడదాన్ని||

ఆడదంటె నరకమేర గురుడా
అందులోన సుఖము లేదు గురుడా       ||ఆడదాన్ని||

కోరచూపు కాటుకన్న నరుడా
కోడెత్రాచు కాటుమేలు నరుడా               ||ఆడదాన్ని||

ఆడదాని మాటలెపుడు గురుడా
అబద్దాల మూటలేర గురుడా                 ||ఆడదాన్ని||

ఆడదాన్ని దరిజేర్చకు నరుడా
ఆమడ దూరానబెట్టు నరుడా                ||ఆడదాన్ని||

గొగ్గెర వేషాల నమ్మి గురుడా
గోచిపాత జారనీకు గురుడా                   ||ఆడదాన్ని||

ఓయంటూ సరసమాడ నరుడా
ఓజస్సే క్షీణించును నరుడా                ||ఆడదాన్ని||

పడతి చెంత జేరినావ గురుడా
పనికిరాక పోతావుర గురుడా                 ||ఆడదాన్ని||

ఇచ్చకాల బడినావా నరుడా
ఇహపరముల చెడిపోదువు నరుడా         ||ఆడదాన్ని||

వనితల దూరాననుంచి గురుడా
విష్ణువునే ధ్యానించర గురుడా               ||ఆడదాన్ని||

బైరాగుల మాటలన్ని నరుడా
బంగారపు మూటలేర నరుడా               ||ఆడదాన్ని||

గురుబోధను చక్కగాను నరుడా
గుండెలోన నిలుపుకోర నరుడా            ||ఆడదాన్ని||

ఆడదాన్ని నమ్మబోకు నరుడా
అగచాట్లను పొందబోకు నరుడా
read more " ఆడదాన్ని నమ్మబోకు నరుడా....(గోసాయి తత్త్వాలు) "

28, మార్చి 2016, సోమవారం

స్త్రీ హృదయం

నేను కాలేజీలో చదివే రోజుల్లో నా స్నేహితుడొకడు ఒకమ్మాయిని ప్రేమించాడు.చదువుకునే వయసులో ప్రేమా గీమా ఎందుకురా అని మేమంతా ఎంతో చెప్పాం.కానీ వాడు వినలేదు.ఆ అమ్మాయీ అతన్ని ప్రేమించింది.ఇద్దరూ పెళ్లి చేసుకుందామని కలలు కన్నారు.కలిసి తిరిగారు.ఆ అమ్మాయి దేవత అంటూ మాతో ఎంతో పొంగిపోతూ చెప్పేవాడు.సరే అంతా బానే ఉంది కదా కధ సుఖాంతం అవుతుంది అని అందరం అనుకునేవాళ్ళం.

అలా కొన్నాళ్ళు గడిచాక ఆ అమ్మాయి సడన్ గా ఇతనితో మాట్లాడటం మానేసింది. కారణం తెలీదు.చదువైపోగానే ఇంకొకడిని పెళ్లి చేసుకుని వెళ్ళిపోయింది.మావాడు పిచ్చివాడిలాగా అయిపోయాడు.వాడిని మామూలు మనిషిని చెయ్యడానికి మా మిత్రబృందానికి తలప్రాణం తోకకొచ్చింది.కాలక్రమేణా వాడూ రియాలిటీలో కొచ్చి ఇంకొక అమ్మాయిని పెళ్లి చేసుకున్నాడు.ఇప్పుడు వాడూ బాగానే సెటిల్ అయ్యాడు.అప్పుడప్పుడూ కలుస్తూ ఉంటాడు కూడా.

అసలు విషయం ఏమంటే - చదువు పూర్తయ్యాక మిత్రులందరూ ఉద్యోగ ప్రయత్నాలలో ఉన్నారు.వీడికి ఉద్యోగం లేదు.ఎలా సెటిల్ అవుతాడో తెలియదు.అందుకని పెళ్లి దగ్గరకొచ్చేసరికి వీడిని నమ్మలేక,ప్రేమా దోమా అంతా మర్చిపోయి,చక్కగా ఒక బ్యాంకు ఉద్యోగిని చేసుకుని ఆ అమ్మాయి చక్కగా సెటిల్ అయిపొయింది.ఆ తర్వాత వీడికీ మంచి ఉద్యోగమే వచ్చింది.కాకపోతే,డబ్బు దగ్గరకి వచ్చేసరికి ఉన్నట్టుండి ఆ ప్రేమ అంతా ఏమైపోయిందా అనే విషయం మాకిప్పటికీ అర్ధం కాదు.వీడికి ఉద్యోగం వచ్చేదాకా ఒకటి రెండు ఏళ్ళు ఆ అమ్మాయి ఆగలేక పోయింది.

వీడు మాత్రం ఆ నమ్మకద్రోహం తట్టుకోలేక సూయిసైడ్ అటెంప్ట్ కూడా చేసి చావుతప్పి కన్ను లొట్టపోయి బయటపడ్డాడు.అప్పట్లో,అర్ధరాత్రిపూట అప్పటికప్పుడు వాడిని  ఆస్పత్రిలో చేర్చడమూ,తాగిన పురుగు మందు కక్కించడమూ ఆ డాక్టర్ల చుట్టూ తిరగడమూ మాకందరికీ అదొక మరపురాని ఘట్టం.

ఆడవాళ్ళది చాలా సున్నిత హృదయమనీ,ప్రేమను వాళ్ళు మర్చిపోలేరనీ అందరూ అంటారు గాని అది అబద్దం అని నేను నమ్ముతాను.నిజానికి ప్రేమను మర్చిపోలేక బాధపడేదీ, పిచ్చివాడిలా తిరిగేదీ మగవాడే.ఆడది చాలా తేలికగా ఇవన్నీ మర్చిపోగలదు.చాలా ప్రాక్టికల్ గా ఆలోచించగలదు.తనను అమితంగా ప్రేమించినవాడిని కూడా తన స్వార్ధంకోసం అతి తేలికగా డిస్కార్డ్ చెయ్యగలదు. నిజమైన సెంటిమెంటల్ ఫూల్ ఎవరంటే మగవాడే.

దేవదాసు సినిమా వచ్చింది గాని 'దేవదాసి' అనే సినిమా రాలేదుగా?

ఇదీ, ఆ తర్వాత ఇంకా ఒకటి రెండు ఇలాంటి సంఘటనలూ చూచాక స్త్రీలంటే నాకున్న అంతకు మునుపటి ఉన్నతమైన అభిప్రాయం చాలా మారిపోయింది.స్త్రీలందరూ దేవతలని చాలాకాలం అనుకుంటూ ఉండేవాడిని.కానీ ఆ తర్వాత అది నిజం కాదని అర్ధమైంది.స్త్రీల మొదటి ప్రయారిటీ ప్రేమ కాదనీ సెక్యూరిటీ మాత్రమేననీ అనిపించింది.అప్పటినించీ స్త్రీలను నేనంత త్వరగా నమ్మను.ఆ తర్వాత నుంచీ నాకెదురైన స్త్రీలను ఈ కోణంలో చాలా పరిశీలించాను.సోషల్ సెక్యూరిటీ - ప్రేమ ఈ రెంటిలో పోటీ వస్తే ప్రేమను కోరుకునే స్త్రీ నాకింతవరకూ తారసపడలేదు.బహుశా నా ఆలోచన తప్పు కావచ్చు.కానీ నాకు అలాంటి ఆదర్శప్రాయులైన స్త్రీలు మాత్రం ఇప్పటిదాకా కనిపించలేదు.


స్త్రీలు చాలా తేలికగా నమ్మకద్రోహం చెయ్యగలరు.కానీ ఎల్లప్పుడూ మగవాడినే దుర్మార్గుడని నిందిస్తారు.

అప్పట్లో ఈ తతంగం అంతా చూచి వ్రాసుకున్న కవిత ఒకటి పాత కాయితాల త్రవ్వకాలలో బయట పడింది.

చదవండి.
---------------------------------------
స్త్రీ హృదయం స్వార్ధమయం
నాటకాల రంగస్థలం
ప్రేమకచట లేదు స్థానం
ప్రేమించినవాడికి - మహాప్రస్థానం

నాటకాల నిలయమైన
వనిత నెపుడు నమ్మరాదు
పెదవులపై ప్రియలాస్యం
మనసులోన మహావిషం

ఆడదాన్ని నమ్మినోడు
అస్సలెపుడు బాగుపడడు
మనసు లేని స్త్రీకంటే
గుండె లేని బండ మేలు

ప్రేమన్నది స్త్రీకెపుడూ
ఒక సరదా ఆట
అప్పుడపుడు వాడుకునే
పనికిరాని పైట

స్త్రీ హృదయం ప్రేమమయం
అన్న కవులు పిచ్చివాళ్ళు
అది మొత్తం స్వార్ధమయం
అక్కడుంది మురుగునీళ్ళు

స్వార్ధం తన పరమార్ధం
సర్వం రెండో పురుషార్ధం
మాటలు చేతలు అన్నీ
ఆ క్షణపు అవసరార్ధం

శాంతిని కోరే మనిషి
స్త్రీ స్నేహం చెయ్యరాదు
ఆడదాని సహవాసం
అనర్ధాల ఆవాసం

బండరాయి నర్చిస్తే
నీకు బ్రతుకు నిస్తుంది
ఆడదాన్ని ప్రేమిస్తే
నిన్నంతం చేస్తుంది

మంటల్లో దూకబోయే మిడత
మగవాడే
ఎంతగా ప్రేమించినా వాడు
పగవాడే
read more " స్త్రీ హృదయం "

27, మార్చి 2016, ఆదివారం

Ye Raat Ye Chandni Phir Kahaa - Hemant Kumar


యే రాత్ యే చాంద్ నీ ఫిర్ కహా సున్ జా దిల్ కీ దాస్తా....

హేమంత్ కుమార్ పాడిన మధుర గీతాలలో ఇది కూడా ఒకటి.ఈ పాట 1952 లో వచ్చిన 'జాల్' అనే సినిమాలోది.ఈ సినిమాను గురుదత్ నిర్మించాడు.S.D.Burman సంగీతాన్ని సమకూర్చాడు.హేమంత్ కుమార్ గానం చేశాడు.చాలా మంచి పాటలలో ఒకటి.అందుకే కదా 65 ఏళ్ళ తర్వాత కూడా ఈ పాటను మనం పాడుతున్నాం !!

నా స్వరంలో కూడా ఈ పాటను వినండి మరి.

Movie:--Jaal (1952)
Lyrics:--Sahir Ludhianvi
Music:--S.D.Burman
Singer:--Hemant Kumar
Karaoke Singer:--Satya Narayana Sarma
Enjoy
----------------------------------

Aaa...ahahaaha haaha aaahahaaa...

[Yeh Raat Yeh Chandni Phir Kaha

Sun Ja Din Ki Daastan]-2

oohoo hoo oohoo hoo

Aee...Paido ki shakho pe 

paido ki shakho pe

khoee khoee chandni

paido ki shakho pe
Tere khayaalo mein khoe khoe chandni

aur thodi daer mein thak k laut jayegi

Raat yeh bahar ki phir kabhi na aayegi

do ek pal aur hai yeh sama - sun ja dil ki daastan


oohoo hoo oohoo hoo

Aee...Lahro ke honton pe

Lahro ke honton pe

dhima dhima raag hai

Bheegi hawao mein....

Bheegi hawao mein--thandi thandi aag hai

Is haseen aag mein tu bhi jal ke Dekhle

zindegi ke geet ki dhun badal ke dekh le

Khulne de ab dhadkano ki jaban

Sun ja dil ki daastan


Aee...Jaati Baharein hein

jaati Baharein hein - uthti jawaniyaan

Jaati Baharein hein...
Taaro ki chawo mein - kah le kahaniyan 

Ek baar chal diye - gar tujhe pukar Ke 

Laut kar na aayenge - kaaphile bahar ke

Ek baar chal diye - gar tujhe pukar Ke 

Laut kar na aayenge - kaaphile bahar ke

Aja abhi zindegi hai jawaa - sun ja dil ki daastan


Yeh Raat Yeh Chandni Phir Kaha

Sun Ja Din Ki Daastan

Daastaan....Daastaan.....


Meaning:--

Where can you find this night and this Moon again?
Listen now, to the outpouring of my heart

On the branches of trees yonder
the moonlight is dozing to sleep
In your memories
the moonlight is intoxicated
Very soon it will go back
tired of waiting for you like this
Once it goes back
this night of spring will never come back
Only one or two moments of this lovely night
are left with us now
Listen now, to the outpouring of my heart

On the lips of waves
On the lips of waves, there flows a soft melody
In the rainy air, there is a cool fire
In this cool and enchanting fire
You too learn to burn yourself
Free the voices sleeping in your heart
Listen now, to the outpouring of my heart

The spring is receding
the spring is receding, but our youthfulness is rising
In the shadows of stars
It is expressing its message
If it leaves after calling you once
This caravan of spring will never come back for you
Come, life is still young
Listen to the outpouring of my heart...

తెలుగు స్వేచ్చానువాదం

ఇలాంటి రాత్రీ ఇలాంటి వెన్నెలా
మళ్ళీ నీకెక్కడ దొరుకుతాయి?
అందుకే,
నా హృదయం చెబుతున్న కధను ఇప్పుడే విను

ఆ చెట్ల కొమ్మల మీద
వెన్నెల నిద్రకు జోగుతున్నది
అది నీ స్మృతులలో మత్తుగా పడి ఉంది
నిన్ను పిలిచీ పిలిచీ దానికి విసుగు వస్తున్నది
అతి త్వరలో అది వెనక్కు వెళ్ళిపోతుంది
ఒకసారి వెనక్కు వెళ్ళిపోతే
ఈ వసంతరాత్రి మళ్ళీ వెనక్కు రాదు
ఈ రాత్రిలో కొద్ది క్షణాలే నీకు మిగిలి ఉన్నాయి
అందుకే,
నా హృదయం చెబుతున్న కధను ఇప్పుడే విను

నీటి అలల పెదవులపైన
మధురమైన రాగాలు జాలువారుతున్నాయి
ఈ చల్లని గాలిలో
ఏదో హిమాగ్ని మండుతూ ఉన్నది
ఈ తియ్యని అగ్నిలో నువ్వూ కాలడం నేర్చుకో
నీ జీవితం అనే పాట రాగాన్ని ఒకసారి మార్చి చూడు
దాగి ఉన్న నీ హృదయావేదనను వెలిబుచ్చు
నా హృదయం చెబుతున్న కధను విను

వసంతం వెళ్ళిపోతున్నది
కానీ మన యవ్వనం సజీవంగానే ఉన్నది
ఆ నక్షత్రాల నీడలలో
దాని సందేశాన్ని నీకు వినిపిస్తున్నది
ఒక్కసారి మాత్రమే ఈ వసంతం నిన్ను పిలుస్తుంది
విసుగుతో అది వెనక్కు వెళ్ళిపోతే
మళ్ళీ ఎన్నటికీ తిరిగి నీ దరికి రాదు

ఇలాంటి రాత్రీ ఇలాంటి వెన్నెలా
మళ్ళీ నీకెక్కడ దొరుకుతాయి?
అందుకే,
నా హృదయం చెబుతున్న కధను ఇప్పుడే విను...
read more " Ye Raat Ye Chandni Phir Kahaa - Hemant Kumar "

26, మార్చి 2016, శనివారం

Tum Pukar Lo - Hemant Kumar


Youtube Link
https://youtu.be/BFTxwcw3gqw

తుమ్ పుకార్ లో ....తుమ్హారా ఇంత్ జార్ హై....

హేమంత్ కుమార్ మధుర మంద్రస్వరంలో సుమధురంగా పలికిన ఈ గీతం 'ఖామోషి' అనే సినిమాలోది.ఈ సినిమా 1969 నాటిది.ఈ సినిమాకు హేమంత్ కుమారే సంగీత దర్శకుడు. పాటల రచయితేమో గుల్జార్.అందుకే ఈ సినిమాలోని పాటలన్నీ ఆపాత మధురాలే.

'పంతులమ్మ' చిత్రంలో రంగనాద్ మీద చిత్రీకరించిన 'ఎడారిలో కోయిలా తెల్లారనీ రేయిలా' అనే పాటకు మాతృక ఈ రాగమే.

నా స్వరంలో కూడా ఈ పాటను వినండి మరి.

Movie:--Khamoshi (1969)
Lyrics:--Gulzar
Music and Singer:--Hemant Kumar
Karaoke Singer:--Satya Narayana Sarma
Enjoy
-----------------------
Humming...

Tum pukar lo
Tumhara Intzaar hai
Tum pukar lo
Khwaab chun rahi hai raat beqarar hai
Tumhara intezaar hai
Tum pukar lo

Hoth pe liye huye dil ki baath hum
Jaagte rahenge aur Kitni raat hum]-2
Muktasar ki baat hai, Tum se pyaar hai
Tumhara intezaar hai
Tum pukar lo

Dil behel tho jayegaa is khayal se
Haal mil gaya tumhara apne haal se]-2
Raat ye karaar ki beqarar hai
Tumhara intezaar hai

Meaning:--

Call me
I am waiting for you
Call me...
The night is restless
and I am sifting through dreams
I am waiting for you
Call me...

My heartfelt words have escaped from my lips
How many nights I have to remain awake like this?
Waiting for you?
The matter is very simple
I love you...

I am waiting for you
Call me...

My heart becomes still with this thought
that your condition has become
similar to mine
Yet somehow, this peaceful night
is very restless

Call me...
I am waiting for you
Call me...

తెలుగు స్వేచ్చానువాదం


నీకోసం ఎప్పటినుంచో నేను వేచి ఉన్నాను
నా పిలుపుకు స్పందించవూ

ఈ రేయి చాలా కల్లోలంగా ఉంది
నేను నా స్వప్నాల మధ్యన ఉన్నాను
నీ కోసం ఎప్పటినుంచో వేచి ఉన్నాను
నా పిలుపుకు స్పందించవూ?

నా హృదయంలో ఉన్న మాటలు
పెదవులను దాటి వస్తున్నాయి
ఇంకా ఎన్ని రాత్రులు నీకోసం ఇలా మేలుకోవాలి?
ఉన్న విషయం సూటిగా చెప్తున్నాను
నిన్ను నేను ప్రేమిస్తున్నాను

నీ కోసం ఎప్పటినుంచో వేచి ఉన్నాను
నా పిలుపుకు స్పందించవూ?

మనిద్దరి పరిస్థితీ ఒక్కటే అన్న ఆలోచనతో
నా హృదయం శాంతిస్తున్నది
కానీ శాంతంగా ఉండాల్సిన ఈ రేయి మాత్రం
చాలా అశాంతిగా ఉన్నది

నీ కోసం ఎప్పటినుంచో వేచి ఉన్నాను
నా పిలుపుకు స్పందించవూ?
read more " Tum Pukar Lo - Hemant Kumar "