“Most difficult thing in the world is to find people who are truly genuine"

8, జులై 2015, బుధవారం

Telugu Melodies-S.P.Balasubramanyam--ఏ దివిలో విరిసిన పారిజాతమో....




ఏ దివిలో విరిసిన పారిజాతమో
ఏ కవిలో మెరిసిన ప్రేమగీతమో...

ఒక వీరాభిమాని కోరినమీదట ఈ పాటను పాడుతున్నాను.

ఈ పాట 1973 లో వచ్చిన 'కన్నెవయసు' అనే చిత్రం లోనిది.అప్పట్లో ఈ పాట సూపర్ హిట్ అయింది.నేటికీ ఇదొక మధురగీతమే.బాలూగారి కెరీర్ మొదట్లో వచ్చిన హిట్స్ లో ఇదొకటి.రెండోది -'శివరంజని నవరాగిణి'.

సత్యం సంగీత దర్శకత్వంలో వచ్చిన పాటలన్నీ మధురగీతాలే.ఎందుకంటే ఆయన ఎక్కువగా ఘజల్స్ నీ, హిందీగీతాల రాగాలనూ అనుకరించేవాడు. అందుకే ఆయన పాటల్లో కర్నాటక సంగీతం కంటే, హిందూస్తానీ పోకడలు ఎక్కువగా ఉంటాయి.ఆయనకు 'డోలక్ సత్యం' అని కూడా పేరుండేది. ఎందుకంటే ఆయన తన పాటలలో తబలాకంటే కూడా డోలక్ ను ఎక్కువగా వాడేవాడు.దీనిని ఉత్తర భారతదేశంలో జానపద గీతాలలో, ఖవ్వాలీలలో ఎక్కువగా ఉపయోగిస్తారు.ఇప్పటికీ ఉత్తరభారతంలో డోలక్ ఉన్నది.కానీ మన దక్షిణాదిలో కనుమరుగైపోయింది.మన దగ్గర తబలానే మాయమైంది. ఇక డోలక్ ఎక్కడుంటుంది?

సత్యం గతించాక బాలసుబ్రమణ్యంగారు మధురగీతాలను పాడటం దాదాపు ఆగిపోయింది.చక్రవర్తి తన సారధ్యంలో అప్పుడప్పుడూ కొన్ని మధురగీతాలను కూర్చినప్పటికీ ఎక్కువగా స్పీడుతో కూడిన పాపులర్ గీతాలే చేశాడు.ఆ పాటలలో సాహిత్యపు విలువలు అంతగా ఉండేవికావు.ఆ తర్వాత ఇళయరాజా బాణీలలో మాధుర్యం ఉన్నప్పటికీ అది తమిళ జానపద సంగీత పోకడలూ, కర్నాటక శాస్త్రీయ సంగీత పోకడలతో కూడి ఉంటుంది. సత్యం కూర్చిన స్వరాలలో ఉండే మాధుర్యం వేరు.అది హిందూస్తానీ రాగాల మాధుర్యం. సత్యం ఎక్కువగా వయోలిన్, వేణువు,గిటార్, డోలక్,డ్రమ్స్ లతోనే మంచిమంచి ట్యూన్స్ కట్టేవాడు.అప్పట్లో ఎలక్ట్రానిక్ సంగీతం తక్కువనే చెప్పాలి.హిందీ పాటలను తెలుగులోకి దించాలంటే ఆరోజుల్లో సత్యమే దిక్కు.

దాశరధిగారు ఈ పాటకు కూర్చిన సాహిత్యం చాలా మనోజ్ఞంగా ఉంటుంది.నేటి పిచ్చికవులు వ్రాసే పాటలని ఈ పాటతో పోల్చి చూచుకుంటే ఆనాటి పాటల భావసౌందర్యం ఏమిటో అర్ధమౌతుంది.కవులు వ్రాసే పాటల్లో వారి కుటుంబ నేపధ్యమూ,వారు పెరిగిన వాతావరణమూ, వారు చదివిన సాహిత్యమూ ప్రతిబింబిస్తూ ఉంటాయి.కవులు తమ పాటలలో వాడే భాషనూ భావాలనూ బట్టి,వారు ఏ కుటుంబ నేపధ్యం నుంచి వచ్చారో తేలికగా చెప్పవచ్చు.

ఈ పాటలో రెండు వెర్షన్లున్నాయి.అసలైన పాటలోని చరణంలో పాదాలు రెండుసార్లు మళ్ళీ మళ్ళీ వస్తాయి.అప్పుడు పాట కొంచం పెద్దదౌతుంది.ఆ పాటనే పాడాలని అనుకున్నప్పటికీ ఆ ట్రాక్ దొరకలేదు గనుక ఈ రెండో వెర్షన్ పాడాను.ఇది కుదించబడిన పాట.

Movie:--Kanne Vayasu (1973)
Lyrics:--Daasaradhi
Music:--Satyam
Singer:--S.P.Balasubramanyam
Karaoke Singer:--Satya Narayana Sarma

Enjoy
--------------------------------
ఏ దివిలో విరిసిన పారిజాతమో
ఏ కవిలో మెరిసిన ప్రేమగీతమో
నా మదిలో నీవై నిండిపోయెనే
ఏ దివిలో విరిసిన పారిజాతమో
ఏ కవిలో మెరిసిన ప్రేమగీతమో

నీ రూపమే దివ్యదీపమై
నీ నవ్వులే నవ్య తారలై
నా కన్నుల వెన్నెల కాంతి నింపెలే
ఏ దివిలో విరిసిన పారిజాతమో
ఏ కవిలో మెరిసిన ప్రేమగీతమో

పాలబుగ్గలను లేతసిగ్గులు పల్లవించగా రావే
నీలిముంగురులు పిల్లగాలితో ఆటలాడగా రావే
కాలిఅందియలు ఘల్లు ఘల్లుమన
రాజహంసలా రావే

ఏ దివిలో విరిసిన పారిజాతమో
ఏ కవిలో మెరిసిన ప్రేమగీతమో

నిదురమబ్బులను మెరుపుతీగవై
కలలు రేపినది నీవే
బ్రతుకు వీణపై ప్రణయరాగములు
ఆలపించినది నీవే
పదము పదములో మధువులూరగా
కావ్యకన్యవై రావే

ఏ దివిలో విరిసిన పారిజాతమో
ఏ కవిలో మెరిసిన ప్రేమగీతమో..